ན་གཞོན་ཤེས་རབ་ཚེ་རྡོར་ལགས་ཀྱིས་ད་ལོའི་གསུམ་བཅུའི་དུས་དྲན་ཉིན་བཞུཊ་སྒར་ནས་མགོ་བཙུཊ་ཏེ། མིག་སྒྲིབ་རྒྱལ་དཀྲོགས་ཟེར་བའི་གོམ་བགྲོད་ལས་འགུལ་ཞིག་མགོ་འཛུགས་གནང་ཡོད་པ་དེ་གཟའ་ལྷག་པའི་ཉིན་ལྡེ་ར་ལྡུན་ས་གནས་སུ་འབྱོར་ཏེ་མཚན་རྟགས་བསྡུ་རུབ་གནང་འདུག
ད་ལོའི་གསུམ་བཅུའི་དུས་དྲན་ཉིན་བཞུགས་སྒར་ནས་མགོ་འཛུགས་གནང་བའི་ཤེས་རབ་ཚེ་རྡོར་ལགས་ཀྱི་༼ མིག་སྒྲིབ་རྒྱལ་དཀྲོགས ༽ཀྱི་ལས་འགུལ་དེ་རེས་གཟའ་ལྷག་པའི་ཉིན་ལྡེ་ར་རྡུན་ས་གནས་སུ་འབྱོར་ཏེ་ས་ཡིག་བསྡུ་རུབ་ཀྱི་ལས་འགུལ་སྤེལ་ཡོད་འདུག་ལ། དེའི་རྗེས་མུ་མཐུད་དུ་དོན་གྲུབ་གླིང་གཞིས་ཆགས་དང་རྭ་ཇི་པུར། མཱ་སའོ་རི་སོགས་བོད་པའི་གཞིས་ཆགས་ཁག་བརྒྱུད་རྒྱ་གར་གྱི་ས་གནས་དང་གྲོང་ཁྱེར་མང་པོ་ཞིག་ཏུ་སྐོར་སྐྱོད་ཀྱིས། བོད་ནང་གི་ཛ་དྲག་གནས་སྟངས་ངོ་སྤྲོད་དང་། རྒྱལ་ཚོགས་དང་རྒྱལ་སྤྱིའི་སྲིད་གཞུང་ཁག་ལ་བོད་ནང་གི་ཛ་དྲག་གནས་སྟངས་ཐད་དོ་ཁུར་བྱ་དགོས་པའི་འབོད་སྐུལ་མཚན་རྟགས་བསྡུ་རུབ་གནང་འཆར་ཡོད་འདུག
ལས་འགུལ་སྐབས་ཉིན་ལྟར་ཞོགས་པ་ཆུ་ཚོད་ ༩ ནས་ཕྱི་དྲོ་ཆུ་ཚོད་ ༥ བར་ཁོང་གི་མིག་གཉིས་རས་ནག་གིས་གཡོགས་ཏེ། མང་ཚོགས་ཁྲོད་བོད་དོན་གོ་རྟོགས་སྤེལ་བ་དང་མཚན་རྟགས་བསྡུ་རུབ་བྱེད་ཀྱི་ཡོད་པ་དང་། མིག་གཉིས་རས་ནག་པོས་གཡོགས་དོན་ནི། རྒྱལ་ཚོགས་དང་འཛམ་གླིང་ནང་གི་སྲིད་གཞུང་མང་པོ་ཞིག་གིས་བོད་ནང་གི་ཛ་དྲག་གནས་སྟངས་དང་། རྒྱ་གཞུང་གིས་བོད་མི་ཚོར་དྲག་གནོན་བྱེད་བཞིན་པ། བོད་ནང་གི་བོད་མི་ཚོར་འགྲོ་བ་མིའི་ཐོབ་ཐང་མེད་པ་བཅས་ཀྱི་གནས་ཚུལ་མཐོང་བཞིན་དུ་སྣང་མེད་གཏོང་གི་ཡོད་པར་ངོ་རྒོལ་མཚོན་བྱེད་ཅིག་ཡིན་པ་དང་། རྒྱ་གར་རྒྱལ་ཡོངས་ནང་བོད་དོན་ངོ་སྤྲོད་དང་མཚན་རྟགས་བསྡུ་རུབ་བྱས་རྗེས། རྒྱ་གར་རྒྱལ་ས་ལྡི་ལིར་ཡོད་པའི་མཉམ་འབྲེལ་རྒྱལ་ཚོགས་ལས་ཁུངས་དང་། གཞུང་ཚབ་ཁག རྒྱ་གར་གཞུང་སོགས་སུ་ཕུལ་ཏེ་རྒྱ་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུ་རྒྱུ་ཡིན་འདུག
ཁ་སང་ཕྱི་ཚེས་ ༢༢ ཉིན་འདི་གའི་གསར་འགོད་པས་ཁ་པར་བརྒྱུད་ཤེས་རབ་ཚེ་རྡོར་ལགས་སུ་བཅར་འདྲི་ཞུས་པ་ལྟར་ན། ལས་འགུལ་གྱི་དུས་ཡུན་ཟླ་ ༣ ལྷག་གི་འཆར་གཞི་དང་། ད་ལྟའི་ཆར་ཁོང་གི་གྲོགས་པོ་ཀརྨ་དོན་གྲུབ་དང་ཀརྨ་དངོས་གྲུབ་གཉིས་ལྷན་དུ་ཡོད་འདུག་ལ། དེ་སྔ་ལྡི་ལིར་རང་ལུས་མེར་བསྲེགས་བཏང་བས་རྐང་པའི་རྨ་ཁ་སོས་ཡོད་ཀྱང་གོམ་བགྲོད་སྐབས་མཚམས་རེར་ན་ཟུག་རྒྱག་གི་ཡོད་པ་མ་ཟད། དབྱུག་རྟེན་མེད་པར་གོམ་པ་རྒྱག་དཀའ་བའི་གནས་སྟངས་ཆགས་ཡོད་སྟབས། ས་གནས་གཅིག་ནས་གཞན་དུ་འགྲོ་སྐབས་རླངས་འཁོར་ཞིག་ཀྱང་མཉམ་ཁྲིད་བྱེད་ཀྱི་ཡོད་འདུག ཁོང་གིས་བརྗོད་དོན “མཚན་རྟགས་བསྡུ་རུབ་ལས་འགུལ་མཇུག་སྒྲིལ་རྗེས་ལྡི་ལིར་ཡོད་པའི་རྒྱལ་ཚོགས་ལས་ཁུངས་སུ་ཕྱིན་ཏེ། མཚན་རྟགས་བཀོད་པའི་ཡིག་ཆ་དང་སྙན་ཞུ་འབུལ་སྐབས་ཁོང་ཚོས་ད་ནས་བོད་ཀྱི་གནད་དོན་ཐད་མིག་ཕྱེ་རྒྱུའི་དམ་བཅའ་དང་ལྷན་དུ། ང་རང་གི་མིག་ཁ་གཡོགས་ཡོད་པའི་རས་ནག་འདི་ཁོང་ཚོར་ལེན་དུ་འཇུག་རྒྱུ་ཡིན”ཞེས་བརྗོད་བྱུང་།
ཤེས་རབ་ཚེ་རྡོར་ལགས་ཀྱི་ལས་འགུལ་སྐབས་ “གངས་ལྗོང་གི་ཕོ་ཉ་” ཞེས་པའི་མིང་ཐོག་ནས་ཡིག་ཆ་ཞིག་འགྲེམས་སྤེལ་བྱེད་བཞིན་པའི་ནང་དོན་ཚན་འགའ་བཀོད་ཡོད་པ་ནི། ༡༽ རྒྱ་གཞུང་གིས་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་བཀུར་དང་རྒྱལ་གཅེས་ཆོས་གཅོས་ཀྱི་སློབ་གསོ་མཚམས་འཇོག་བྱ་རྒྱུ། ༢༽ བོད་ནང་གི་བོད་མིའི་མངོན་འདོད་ལ་བརྩི་བཀུར་དང་རང་ལུས་མེར་བསྲེགས་གཏོང་མཁན་ཚོའི་ནང་མིར་སུན་གཙེར་བཟོ་རྒྱུ་མཚམས་འཇོག ༣༽ ཞི་རྒོལ་མང་ཚོགས་ལ་དྲག་གནོན་མཚམས་འཇོག་དང་རྒྱལ་སྤྱིའི་རང་དབང་ཅན་གྱི་རྟོག་ཞིབ་མི་སྣ་དང་གསར་འགོད་པ་བོད་ནང་གཏོང་དགོས་པ། ༤ ༽ རྒྱལ་སྤྱིའི་བཅའ་ཁྲིམས་ནང་གི་འགྲོ་བ་མིའི་ཐོབ་ཐང་དང་ལེགས་བྱང་རིགས་བོད་ནང་ལག་བསྟར་ཡོང་རྒྱུར་རྒྱལ་ཚོགས་དང་རྒྱལ་སྤྱིའི་སྲིད་གཞུང་ཁག་གིས་རྒྱ་གཞུང་ལ་གནོན་ཤུགས་སྤྲོད་དགོས་པ། ༥༽ ཡར་ཀླུང་གཙང་པོ་གཙོས་པའི་བོད་ནང་གི་ཆུ་ཆེན་དག་ལ་གློག་ཁང་ཆུ་མཛོད་རྒྱག་པའི་ལས་གཞི་མཚམས་འཇོག་བྱ་དགོས་པ། ༦༽ བོད་ཀྱི་རང་བྱུང་ཁོར་ཡུག་ལ་རྒྱ་གཞུང་གིས་བརྩི་བཀུར་བྱ་དགོས་པ་བཅས་ཀྱི་ཐད་རྒྱལ་ཚོགས་དང་རྒྱལ་སྤྱིའི་དབུ་ཁྲིད་ཚོས་རྒྱ་གཞུང་ལ་འབོད་སྐུལ་དང་གནོན་ཤུགས་སྤྲོད་དགོས་པ་བཅས་རེད།
སྔ་ལོར་རྒྱ་གར་རྒྱལ་ས་ལྡི་ལིར་བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་འཁྲིད་དེ་བོད་ནང་གདུང་སེམས་མཉམ་སྐྱེད་ཀྱི་ལས་འགུལ་སྤེལ་སྐབས། ཤེས་རབ་ཚེ་རྡོར་ལགས་ཀྱིས་ ༢༠༡༡ ལོའི་ཕྱི་ཟླ་ ༡༡ ཚེས་ ༤ ཉིན་ལྡི་ལིའི་རྒྱ་ནག་གཞུང་ཚབ་མདུན་དུ་རང་ལུས་མེར་བསྲེགས་བཏང་ཡོད་ཀྱང་། དེ་མ་ཐག་རྒྱ་གར་སྐོར་སྲུང་བ་འབྱོར་ཏེ་མེ་བསད་དེ་སྨན་ཁང་དུ་བསྐྱལ་ཡོད། སྐབས་དེ་ནས་བཟུང་ཁོང་གི་རྐང་པ་གཡོན་པར་རྨས་སྐྱོན་ཚབས་ཆེན་ཕོག་སྟེ་ད་ཆར་ཡང་དབྱུག་པར་བརྟེན་ཏེ་འགྲོ་དགོས་པ་ཆགས་ཡོད།
གསར་འགོད་པ། བནྡེ་སྐྱབས།
བཀའ་དྲིན་ཆེ། གསལ་བསྒྲགས་དེ་མ་ཀློག་མི་ཟུང་གི ཀློག་ན་མིག་ཆུ་འཐོར་ཡོང་བས། ད་ཅི་བྱེད། ཀ་ཁ་ག་ངའི་ལས་འདི།
རིགས་ཀྱི་དོན་ཆེན་སྒྲུབ་པར་བརྩོན་སྤྲོ་བའི།།
གང་ན་སུ་ཐུགས་རྗེ་བཀའ་དྲིན་ཆེ།།
རིགས་ཀྱི་ཞབས་འདྲེན་ཀླད་མེད་ཅོལ་ཆུང་རྣམས།།
འདི་དང་ཕྱི་མར་གཤེགས་པའི་གྲབས་མཛོད་ཅིག།
མིག་བོད་པ་རྒྱ་ནག་དམར་པོས་བཀབ་ཡོད།།
རྒྱ་ནག་པོ་བཀོག་ན་བོད་ཡུལ་གསལ་འགྲོ།།
མིག་མཉམ་འབྲེལ་རྒྱལ་ཚོགས་ཚོང་གིས་བཀབ་ཡོད།།
ཚོང་ཁེ་ཕོག་མ་བསམ་འཛམ་གླིང་བདེ་འགྲོ།།
དགའ་བསུ་ཡོད། མུ་མཐུད་ནས་ལས་འགུལ་སྤེལ་རོགས་གནང་། བོད་པ་སྤྱི་ཡིན་ནའང་རང་རང་གི་ས་ནས་ལས་འགུལ་རེ་སྤེལ་རོགས་གནང་།
རྒྱལ་གཅེས་དཔའ་བོ་ཨ་རི་ནེའུ་ཡོག་ཏུ་ཟས་བཅད་ངོ་རྒོལ་བྱེད་མཁན་གསུམ་དང། གླིང་ཚ་མ་བུ་གསུམ། གསོག་སྒར་སློབ་གྲྭའི་རྐང་འཁོར་སྐོར་བསྐྱོད་པ་གསུམ། ཤེས་རབ་ཚེ་རྡོར་བཅས་ཀྱི་བོད་བསྟན་སྲིད་ཀྱི་ཆེད་དུ་བློས་གཏོང་དང་སྙིང་སྟོབས་ཆེན་པོས་ལས་འགུལ་སྤེལ་བར། བོད་རྒྱ་ཆེ་མི་མང་དྲིན་དྲན་དགོས་པ། ཁོང་ཚོའི་བྱས་རྗེས་ལོ་རྒྱུས་དེབ་ཐེར་དུ་འགོད་ཆེད་བོད་མི་མང་སྤྱི་འཐུས་ཀརྨ་ཆོས་འཕེལ་མཆོག་གིས་གྲོས་ཚོགས་ཀྱི་སྟོང་པའི་དུས་ཚོད་བླངས་ཏེ་དྲན་གསོ་ཞུ་སོང། ང་ཚོས་ཀྱང་བསྔགས་བརྗོད་དང་རྗེས་སུ་ཡི་རང་བྱེད་དོ། །
ཤེས་རབ་ཚེ་རྡོར་ལགས་ནི་་་་་སྔོན་མ་ནས་བོད་དོན་གྱི་ཆེད་དུ་རང་ནུས་གང་ཡོད་དང་སེམས་ཐག་གཙང་བཅད་ཀྱི་ལས་འགུལ་མང་པོ་སྤེལ་མྱོང་བའི་རྒྱལ་གཅེས་དཔའ་བོ་ངོ་མ་ཞིག་རེད་་་་ཁོང་གིས་བློས་གཏོང་མང་པོ་གནངས་ཟིན་པའང་ཤེས་ཀྱིན་ཡོད་ལ་་་་་་མི་རིགས་ཀྱི་ཆེད་དུ་རང་སྲོག་དང་རང་ལུས་གཏོང་ཐུབ་པའི་སྙིང་སྟོབས་དང་དཔའ་ངར་ཡོད་པའང་ཤེས་ཀྱིན་ཡོད་་་་་་རེད་དེ་་་་་་ང་ཚོའི་འཐབ་རྩོད་འདི་རིམ་བཞིན་སྟོབས་ཤུགས་ཇེ་ཆེ་དང་འགྲུབ་འབྲས་ཇེ་བཟང་དུ་གཏོང་དགོས་པས་་་་
ཚང་མ་་མཉམ་དུ་འཇིག་རྟེན་གྱི་ཁྱིམ་གཞིས་འདི་ནང་འཚོ་ཐོག་་་ད་ལྟའི་ལས་རིམ་་ནང་བཞིན་མུ་མཐུད་དེ་སྤེལ་བ་ལས་་་་་ཁ་སྔོན་ལྡི་ལི་རུ་གནངས་པའི་ཐག་བཅད་དང་བློས་གཏོང་དེ་འདྲ་རྩ་བ་ནས་མ་མཛད་རོགས་ཞུ།།