ཁ་སང་གཟའ་ཕུར་བུ་ཉིན་སུད་སི་གྲོང་ཁྱེར་ཛོའི་རིག་ནང་བོད་མི་བརྒྱ་ཕྲག་ཁ་ཤས་མཉམ་ཞུགས་ཐོག རྒྱ་ནག་གཞུང་ཚབ་ཁང་གི་སྒོ་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག
འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཁ་སང་ཕྱི་ཚེས་ ༥ ཉིན་སུད་སི་གནས་སྡོད་བོད་ཀྱི་མི་རབས་གསར་པའི་མཐུན་ཚོགས་ཀྱི་གོ་སྒྲིག་འོག གྲོང་ཁྱེར་ཛོའི་རིག་མེ་འཁོར་འབབ་ཚིགས་ཀྱི་ཉེ་འགྲམ་ནས་རྒྱ་ནག་གཞུང་ཚབ་ཁང་གི་མདུན་བར་རྔམ་སྟོན་སྐད་འབོད་ཀྱི་ལས་འགུལ་འཁྲིག་ཆ་དོད་པ་ཞིག་བྱས་ཡོད་ལ། ལས་འགུལ་དེར་མི་མང་བརྒྱ་ཕྲག་ཁ་ཤས་མཉམ་ཞུགས་གནང་ཡོད་འདུག ལས་འགུལ་སྐབས་མི་མང་པོ་ཞིག་ཚོར་ཤུགས་ཆེན་པོས་རྒྱ་ནག་གཞུང་ཚབ་ཁང་གི་ནང་དུ་མཆོངས་གྲབ་བྱས་པ་དང་། མི་ཁ་ཤས་ཀྱིས་ཚོར་བ་མནོན་མ་ཐུབ་པར་དབུགས་འཚང་བ་དང་དྲན་པ་འཐོར་ཏེ་སྨན་ཁང་ནང་འཁྲིད་དགོས་པའི་གནས་ཚུལ་ཀྱང་བྱུང་ཡོད་པ་རེད། མཐར་མི་མང་ཚང་མས་བོད་ཀྱི་རྒྱལ་ཁབ་ཆེན་པོའི་རྒྱལ་གླུ་བླངས་ཏེ་ལས་འགུལ་མཇུག་སྒྲིག་ཡོད་འདུག
བོད་ཀྱི་མི་རབས་གསར་པའི་མཐུན་ཚོགས་ཀྱི་ཚོགས་གཞོན་མཁར་འཕགས་ལགས་ཀྱི་ལས་འགུལ་དབུ་འཛུགས་གཏམ་བཤད་སྐབས། ཐེངས་འདིའི་ལས་འགུལ་འདི་ནི་བོད་ནང་གི་རྒྱལ་གཅེས་དཔའ་བོ་དཔའ་མོ་མང་པོས་རང་སྲོང་བློས་གཏོང་གིས་བོད་ཀྱི་འཐབ་རྩོད་ཆེད་སྐུ་ངལ་སྐྱོན་བཞིན་པའི་ཛ་དྲག་གི་གནས་བབ་སྤྱི་དང་། ཉེ་ལམ་རྒྱ་ནག་གི་སྲིད་འཛིན་རྒྱ་གར་དུ་སླེབས་སྐབས་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱི་སྐུ་ལུས་མཆོད་མེར་ཕུལ་བ། ད་ལྟ་ལས་འགུལ་འགྲོ་བཞིན་པའི་གླིང་ཚ་ཚེ་བརྟན་རྡོར་རྗེ་མ་བུ་གསུམ་གྱི་ཞི་བའི་གོམ་བགྲོད་སོགས། རྒྱལ་གཅེས་ཁོང་ཚོའི་སྙིང་སྟོབས་ལ་རྒྱབ་ལངས་དང་། གདུང་སེམས་མཉམ་བསྐྱེད་བྱ་ཆེད་དམིགས་སུ་བཀར་ནས་སྤེལ་བ་ཞིག་ཡིོན་པ་བརྗོད་འདུག
དེ་བཞིན་བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཙོ་དཔའ་བོ་ལགས་ཀྱིས་ལས་འགུལ་དང་འབྲེལ་བའི་གཏམ་བཤད་སྐབས། ད་ལྟའི་བོད་ནང་གི་གནས་བབ་ཛ་དྲག་གི་རང་བཞིན་མི་ཚང་མས་མཁྱེན་གསལ་ལྟར། སྐུ་ལུས་མཆོད་མེར་ཕུལ་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱིས་ང་ཚོར་བཞག་པའི་གཅིག་གྱུར་གྱི་ཞལ་ཆེམས་ཀྱི་འབོད་ཚིག་ནི། བོད་ནང་རང་དབང་དང་དམངས་གཙོ། ༧གོང་ས་མཆོག་བོད་དུ་ཕྱིར་གདན་འདྲེན་བྱེད་དགོས་པ། བོད་མི་ཡོངས་རྫོགས་རྡོ་རྩ་གཅིག་སྒྲིལ་བྱ་དགོས་བཅས་ཡིན་པས། བོད་ཕྱི་ལོག་ལ་ཡོད་པའི་བོད་པ་མི་སུ་ཞིག་ཡིན་ནའང་ཞལ་ཆེམས་དེ་ཉིད་འཛམས་གླིང་མི་མང་དང་། རྒྱལ་སྤྱིའི་ཚོགས་སྡེ་ཁག་ལ་གོ་བརྡ་སྤྲོད་རྒྱུ་དེ་ནི་ང་ཚོའི་ལས་འགན་ཆགས་ཡོད་གསལ་བཤད་སྦྲགས། ཁོང་གིས་ “ད་ལྟའི་བོད་ནང་གི་གནས་སྟངས་འདི་ལ་ཕྱོགས་གཅིག་ནས་བལྟས་ན་ཡིད་སྐྱོ་ཞིང་སེམས་ཕམ་དགོས་པ་ཞིག་ཡིན་ཡང་། ཕྱོགས་གཞན་ཞིག་ནས་བལྟས་ན་སེམས་ཤུགས་བསྐྱེད་དགོས་པ་ཞིག་དང་སྙིང་སྟོབས་བསྐྱེད་པ་ཞིག་ཡོང་གི་ཡོད། དེ་ནི་བོད་ནང་དུ་སྐུ་སྲོག་མཆོད་མེར་འབུལ་བཞིན་པ་རྣམས་དང་དཀའ་ལས་རྒྱག་བཞིན་པ་རྣམས་ཀྱི་མང་ཤོས་ཤིག་ནི། བོད་ཀྱི་མི་རབས་གསར་བའི་གྲས་ཡིན་པ་འདིས་བོད་དོན་རྒྱལ་སྤྱིའི་སྒང་ནས་ཡལ་མི་ཐུབ་པ་ཞིག་དང་། བོད་ཀྱི་མི་རབས་ནས་མི་རབས་བར་བོད་དོན་བློས་བཏང་མི་བྱ་བའི་སྙིང་སྟོབས་རྒྱུན་སྐྱོང་བྱ་ཐུབ་པའི་དཔང་རྟགས་གསལ་བོ་ཞིག་ཡིན།” ཞེས་བརྗོད་ཡོད་འདུག
བོད་ཀྱི་མི་རབས་གསར་པའི་མཐུན་ཚོགས་འདི་ནི་བོད་ཀྱི་དཔའ་བོ་དང་དཔའ་མོ་འདས་གསོན་ཡོངས་ཀྱི་རེ་འབོད་དེ་དག་དྲང་བདེན་ལ་དགའ་བའི་འཛམ་གླིང་མི་དམངས་ཚོའི་མདུན་དུ་ངོ་འཕྲོད་ཆེད་ཆབ་སྲིད་ཀྱི་ལས་འགུལ་འདྲ་མིན་སྤེལ་ཕྱིར་བཙུགས་ཤིང་དུས་ཡུན་ཐུང་ངའི་ནང་དུས་ཐོག་ཆར་པ་ལྟར་རྔམ་སྟོན་ཁྲོམས་སྐོར་སོགས་ཡུལ་ཁྲིམས་དང་མཐུན་ཞིང་ཆེ་མཐོང་ལྡན་པའི་ལས་འགུལ་མི་ཉུང་བ་སྤེལ་ཡོད་ཀྱང་གུ་དོགས་ཤིང་མིག་སེར་ཆེ་བའི་རྙིང་ཞེན་ཅན་གྱི་མི་སྣ་འགའ་ཞིག་གི་ཐུགས་ལ་བབ་ཀྱི་མེད་བཟོ་འདུག སོ་སོས་ལས་འགུལ་ཞིག་རྩོམ་མ་ཐུབ་ཀྱང་གཞན་གྱི་ལས་འགུལ་ལ་དགའ་བ་སྒོམ་རྒྱུ་ལས་ཕྲག་དོགས་བྱེད་པའི་དུས་ཞིག་ག་ལ་ཡིན། གལ་སྲིད་མི་འགྲིགས་པའི་གནས་ལུགས་ཀྱིས་གསལ་བཤད་ཡོད་ན་མཐུན་ཚོགས་འདིས་ཁས་ལེན་ངེས་ལ་དེ་མིན་ཀུ་ཅོ་སྒོྲོགས་པའི་དུས་མིན། ང་ཚོའི་གནས་བབ་འདིར་ཐེངས་གཅིག་གཟིགས་དང་། བོད་རྒྱལ་ལོ།
བོད་བསྟན་སྲིད་ཆེད་བོད་ཕྱི་ནང་གི་བོད་རིགས་ཡོད་དོ་ལྕོགས་ནས་རང་ནུས་གང་ཡོད་ཀྱིས་ལས་འགུལ་གནང་འོས་གནང་བར་མངག་འོས་སུ་མ་མཆིས་ཀྱང་སྐབས་ཐོག་དུས་ཐོག་ལས་འགུལ་སྤེལར་བར་རྒྱབ་སྐྱོར་ཡོད། འོན་ཀྱང་སུད་སིའི་མི་རབས་གསར་པའི་ཚོགས་པ་དེ་བཞིན་བོད་བསྟན་སྲིད་ཁོ་ནར་དམིགས་ཏེ་གསར་འཛུགས་ཞུས་ཤིང་རིམ་པས་རྒྱ་ནག་གཞུང་ཚབ་མདུན་རང་ཉིད་ཀྱི་སྐུ་ལུས་མེར་བསྒྲོན་ཐུབ་པའི་རེ་བ་ཡོད།
ང་ཚོ་དཀའ་ངལ་གང་ཞིག་ལ་འཕྲད་ཀྱང་ང་ཚོའི་ཆེད་དུ་རང་སྲོག་གཏོང་མཁན་ཚོ་ནམ་ཡང་རྗེད་མི་ཉན།