བླ་མ་གྲྭ་བ་ཡིན་ཟེར་མཁན་ལ་དམིགས་བསལ་གྱི་འགན་ཆེན་པོ་ཞིག་འཁྲི་ཡོད།

ཁ་སང་གཟའ་ལྷག་པའི་ཉིན་དཔལ་ལྡན་རྒྱུད་སྟོད་གྲྭ་ཚང་དུ་བསླབ་པ་མཐར་སོན་པ་རྣམས་ལ་དགེ་བཤེས་སྔགས་རམས་པའི་ཕྱག་འཁྱེར་ཕུལ་བ་དང་། གྲྭ་ཚང་གི་དཔེ་མཛོད་ཁང་གསར་བཞེངས་གྲུབ་པའི་དབུ་འབྱེད་གཉིས་ཀྱི་མཛད་སྒོ་ཚོགས་སོང་།

ཟླ་འདིའི་ཕྱི་ཚེས་ ༡༨ ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་དཔལ་ལྡན་རྒྱུད་སྟོད་གྲྭ་ཚང་དུ། གྲྭ་ཚང་གི་དཔེ་མཛོད་ཁང་གསར་བཞེངས་གྲུབ་པའི་དབུ་འབྱེད་དང་། བསླབ་པ་མཐར་སོན་པ་རྣམས་ལ་དགེ་བཤེས་སྔགས་རམས་པའི་ཕྱག་འཁྱེར་འབུལ་བའི་མཛད་སྒོ་ཞིག་ཚོགས་སོང་ལ། སྐུ་མགྲོན་གཙོ་བོར་དཔལ་རྒྱལ་བ་ཀརྨ་པ་མཆོག་དང་། དམིགས་བསལ་སྐུ་མགྲོན་དུ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག   གཞན་ཡང་། ཆོས་རིག་བཀའ་བློན་པདྨ་ཆོས་འབྱོར་མཆོག  རྒྱུད་སྟོད་གྲྭ་ཚང་གི་མཁན་རིན་པོ་ཆེ་མཆོག  སྤྱི་འཐུས་རྣམ་པ་དང་ཕྱོགས་མཐའ་ཁག་གི་དགོན་སྡེ་རྣམས་ཀྱི་སྐུ་ཚབ།  ཕྱི་རྒྱལ་གྱི་སྦྱིན་བདག་རྣམ་པ་བཅས་སེར་སྐྱ་མང་ཚོགས་བརྒྱ་སྐོར་འགའ་མཉམ་ཞུགས་གནང་འདུག 

མཛད་སྒོའི་ཐོག་སྐུ་མགྲོན་གཙོ་བོ་རྣམ་གཉིས་ཀྱིས་གྲྭ་ཚང་དཔེ་མཛོད་ཁང་གི་སྒོ་ཆེན་དར་ཚོན་བཀྲོལ་ཏེ་སྣང་གསལ་མཆོད་མེ་ཞལ་འབྱེད་དང་རྟེན་གཙོ་ཁག་ལ་མཇལ་དར་སྒྲོན་འབུལ། རྒྱུད་སྟོད་དཔེ་མཛོད་ཁང་ནས་དཔར་སྐྲུན་བྱས་པའི་གསང་སྔགས་ཟབ་མོའི་མཛོད་འཛིན་རྒྱུད་ཆེན་སྦྱིན་པ་དཔལ་བའི་རྒྱུད་ཊཱིཀ་ཆེན་མོ་དང་། གསང་ཆེན་སྟོད་རྒྱུད་པོད་ཕྲེང་དང་པོ་བཅས་ཞལ་འབྱེད་དང་།  བསླབ་པ་མཐར་སོན་གྱི་དགེ་བཤེས་སྔགས་རམས་པ་རྣམས་ལ་ལག་འཁྱེར་གནང་པ་དང་།  དེ་བཞིན།  དཔལ་ལྡན་རྒྱུད་སྟོད་གྲྭ་ཚང་གི་དཔེ་ཁྲིད་དགེ་རྒན་སེར་ལྷོ་དགེ་བཤེས་སྔགས་རམས་པ་སློབ་དཔོན་མཁས་གྲུབ་ནོར་བཟང་ལགས་ཀྱིས་རྒྱུད་ཆེན་སྦྱིན་པ་དཔལ་བའི་མཛད་རྣམ་དང་། གྲྭ་ཚང་ཕྱག་མཛོད་བློ་བཟང་རྡོ་རྗེ་ལགས་ནས་དགེ་བཤེས་སྔགས་རམས་པ་རྣམས་ཀྱི་སློབ་ཚན་ཁག་བཅས་ངོ་སྤྲོད་གནང་སོང་ལ། དབུས་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཀྱང་། དེ་སྔོན་རྒྱ་གཞུང་གིས་བོད་ནང་གི་དགོན་སྡེ་གྲྭ་ཚང་མང་པོ་གཏོར་བཤིག་བཏང་སྟེ་ནང་པ་སངས་རྒྱས་པའི་བསྟན་པར་ཉམས་ཆག་ཆེན་པོ་བཟོས་ཡོད་ཀྱང་། བོད་མི་རང་ཉིད་ཀྱི་འབད་བརྩོན་ལ་བརྟེན་ནས་སླར་ཡང་བསྐྱར་གསོ་བྱུང་སྟེ། དེང་སྐབས་འཛམ་གླིང་ཡུལ་གྲུ་གང་སར་དར་ཁྱབ་ཆེན་པོ་བྱུང་ཡོད་སྐོར་གསུངས་སོང་།  

གསང་ཆེན་རྡོ་རྗེ་ཐེག་པའི་བཤད་སྒྲུབ་ཀྱི་བསྟི་གནས་དཔལ་ལྡན་རྒྱུད་སྟོད་གྲྭ་ཚང་གི་ཕྱི་ལོ་ ༢༠༡༡ ལོའི་དགེ་བཤེས་སྔགས་རམས་པ་རྣམས།  གྲྭ་ཚང་འདིའི་ཆོས་སྒོར་ཞུགས་པ་ནས་རིམ་བཞིན་ཐེག་པ་རིམ་འཛེགས་ཀྱིས་མདོ་དང་རྒྱུད་སྡེ་རྒྱ་མཚོ་ལ་གསན་སྦྱོང་ཚུལ་བཞིན་མཛད་དེ་བསླབ་པ་མཐར་སོན་པའི་རྒྱུགས་སྤྲོད་གནང་སྐབས། བློ་རྒྱུགས་དང་རྩོད་རྒྱུགས། སྔགས་རིམ་བྲིས་རྒྱུགས། རྫོགས་རིམ་བྲིས་རྒྱུགས་བཅས་ལ་ཁྱོན་བསྡོམས་བརྒྱ་ཆ་གྲངས་ ༤༠༠ ཡོད་པའི་ཁྲོད་ནས། དགེ་བཤེས་སྔགས་རམས་པ་དཀོན་མཆོག་རྣམ་འདྲེན་ལགས་ལ་བརྒྱ་ཆ་གྲངས་ ༣༧༥་༧༥ ཐོབ་སྟེ་གནས་རིམ་ ༡ ཨང་རིམ་རྩེ་ཕུལ་དང་། དགེ་བཤེས་སྔགས་རམས་པ་ཐུབ་བསྟན་ཤེས་རབ་ལགས་ལ་བརྒྱ་ཆ་གྲངས་ ༣༧༠་༥༠ ཐོབ་སྟེ་གནས་རིམ་ ༡ ཨང་རིམ་གཉིས་པ། དགེ་བཤེས་སྔགས་རམས་པ་ནོར་བུ་དགྲ་འདུལ་ལགས་ལ་བརྒྱ་ཆ་གྲངས་ ༣༤༠ ཐོབ་སྟེ་གནས་རིམ་ ༡ ཨང་རིམ་གསུམ་པ། དགེ་བཤེས་སྔགས་རམས་པ་ཚེ་དབང་དཔལ་འབར་ལགས་ལ་བརྒྱ་ཆ་གྲངས་ ༢༣༠ ཐོབ་སྟེ་གནས་རིམ་ ༢ ཨང་རིམ་བཞི་བ་བཅས་བླངས་ཡོད་པ་རེད།

རྒྱུད་སྟོད་གྲྭ་ཚང་གི་མཁན་ཆེན་རྡོ་རྗེ་འཆང་སེར་བྱེས་ལོ་དགོན་སྤྲུལ་སྐུ་བསྟན་འཛིན་བྱས་པ་ཆོས་བཟང་རིན་པོ་ཆེ་མཆོག་གིས་དཔེ་མཛོད་དབུ་འབྱེད་དང་བསླབ་པ་མཐར་སོན་པའི་དགའ་སྟོན་གྱི་མཛད་སྒོ་ངོ་སྤྲོད་དང་སྦྲགས།  “སྔོན་མ་ཡིན་ན་རྒྱུད་པ་གྲྭ་ཚང་འདི་གཙོ་བོ་སྔགས་ཕྱོགས་རེད། ད་ལྟའི་ཆར་མདོ་སྔགས་ཟུང་འབྲེལ་རེད་ཅེས་ཞུས་ཆོག་པ་ཞིག་ཆགས་བསྡད་ཡོད་པ་རེད།” ཅེས་གསུངས་ཏེ། བོད་ནང་ལ་ཡིན་ནའང་བླ་མ་རྒྱུད་པ་སྔགས་ཕྱོགས་རྐྱང་རྐྱང་ཞིག་མ་གཏོགས། མཚན་ཉིད་ཀྱི་གཞུང་ལ་སོ་སོ་སྒེར་གྱི་ངོས་ནས་གཟིགས་མཁན་ཙམ་ལས།  སྤྱི་ཡོངས་ཀྱི་ཆ་ནས་མཚན་ཉིད་ཀྱི་སྲོལ་མེད་པ་དང་།   ད་ཆ་གཙོ་བོ་༸གོང་ས་མཆོག་གི་བཀའ་དགོངས་གཞིར་བཟུང་ཐོག་རིས་སུ་མ་ཆད་པའི་ཆོས་ལུགས་ཚང་མར་མཚན་ཉིད་ཀྱི་སྲོལ་བཙུགས་ཡོད་པ་ལྟར།  རྒྱུད་པ་གྲྭ་ཚང་ལ་མཚོན་ནའང་མཚན་ཉིད་ཀྱི་ཐོག་ལ་གཞུང་ཆེན་བཀའ་པོད་ལྔ་ཡི་ཕྱག་དཔེ་གཟིགས་སྟངས་ཐད་ཡག་པོ་ཡོད་པ་དང་། དེ་བཞིན།  སློབ་གཉེར་བ་རྣམས་ཀྱིས་མདོ་སྔགས་ཀྱི་གཞུང་ལ་ཐོས་བསམ་བྱེད་ཀྱིན་ཡོད་སྟབས། དེའི་ཡན་ལག་ལྟ་བུར་དཔེ་མཛོད་ཁང་དེ་སྒོ་འབྱེད་གནང་པ་ཞིག་ཡིན་པར་མ་ཟད། ཕྱག་དཔེ་ཡི་ཆ་ནས་ཀྱང་བཀའ་བསྟན་གཙོས་རིས་སུ་མ་ཆད་པའི་ཆོས་ལུགས་ཁག་གི་ཕྱག་དཔེ་དང་། དཔེ་ཁྲིད་ཀྱི་སྒྲ་འཛིན་འཁོར་ལོ་སོགས་སྣ་ཁ་འཛོམས་པོ་དང་སྤུས་དག་པོ་ཡོད་ཀྱང་། གཙོ་བོ་སློབ་གཉེར་གནང་མཁན་རྣམས་དཔེ་མཛོད་ནང་ཕེབས་ཏེ་སློབ་གཉེར་གནང་རྒྱུ་གལ་ཆེན་པོ་ཡིན་པའི་སྐུལ་འདེད་གནང་སོང་།

མཛད་སྒོའི་གཏམ་བཤད་སྐབས་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས། དགེ་བཤེས་སྔགས་རམས་པའི་བསླབ་པ་མཐར་སོན་གྱི་ཕྱག་འཁྱེར་བཞེས་མཁན་རྣམ་པར་རྗེས་སུ་ཡི་རངས་དང་བཀྲ་ཤིས་བདེ་ལེགས་ཀྱི་འཚམས་འདྲི་གནང་བ་དང་ཆབས་ཅིག  ཁོང་གིས་ “ ང་ཚོ་བོད་པར་གཏམ་དཔེ་ཞིག་ཡོད་པ་རེད། ཐུད་ཚོ་བ་མར་གྱི་བཀའ་དྲིན། སྔགས་ཟབ་པ་མདོ་ཡི་བཀའ་དྲིན། ཞེས་པ་ལྟར། ལམ་ཐུན་མོང་བའི་རྒྱུད་མ་སྦྱང་པ་དང་། རྒྱུད་ཕ་རོལ་ཏུ་ཕྱིན་པའི་ཐོས་པ་ལ་ཐོས་བསམ་ཡང་དག་པ་ཞིག་མ་གནང་པར། སྔགས་ལ་མཆོང་རྒྱག་བརྒྱབ་ནས་ཐར་བ་བྱེད་པ་ཞིག་ཡོད་པ་མ་རེད། ཐུན་མོང་ལམ་སྦྱང་སྣོད་དུ་གྱུར་པ་ན། ། ཐེག་པ་ཀུན་གྱི་མཆོག་གྱུར་རྡོ་རྗེ་ཐེག། ཅེས་གསུངས་ཡོད་པ་རེད་མ་གཏོགས། ཐུན་མོང་ལམ་སྦྱང་སྣོད་དུ་མ་གྱུར་པ་ཞིག་ལ། སྔགས་ཀྱི་འཇུག་སྒོ་ཁོ་རང་མ་ཚང་པ་རེད། དེ་འདྲ་ཡིན་དུས། སྔགས་རྐྱང་པ་ལ་སློབ་གཉེར་གནང་རྒྱུ་དེ་ཧ་ལམ་མེད་པ་འདྲ་བོ་ཞིག་རེད། སྔགས་རྐྱང་པ་ལ་སློབ་གཉེར་མ་གནང་པའི་སྔོན་ལ། ཕ་རོལ་ཏུ་ཕྱིན་པའི་གཞུང་ལ་ངེས་པར་ཏུ་སློབ་གཉེར་གནང་དགོས་པ་དེ་བཤད་མི་དགོས་པ་ཞིག་དང་།  དེ་ནི་སྔོན་འགྲོའི་ཆ་རྐྱེན་འདྲ་བོ་ཞིག་ཆགས་བསྡད་ཡོད་པ་རེད།” ཅེས་གསུངས་ཏེ། རྒྱུད་གྲྭ་རྣམ་པ་ཚོས་བླ་མ་རྒྱུད་པ་ཞེས་པའི་མཚན་དེ་དོན་དང་ལྡན་པ་ཞིག་ཡོང་བ་ལ། རྒྱུད་ཀྱི་སློབ་གཉེར་གནང་དགོས་པ་དང་། རྒྱུད་ཀྱི་སློབ་གཉེར་གནང་བའི་སྔོན་འགྲོའི་ཆ་རྐྱེན་ལ་ཕ་རོལ་དུ་ཕྱིན་པའི་གཞུང་གི་སློབ་གཉེར་གནང་དགོས་པ་སོགས།  རྒྱས་བསྡུས་ལ་མ་བལྟོས་པར་ཆ་ཚང་ཞིག་ཡོང་ཐུབ་པ་གནང་རྒྱུར་འབོད་སྐུལ་གནང་སོང་།

གཞན་ཡང་། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་དཔེ་མཛོད་དབུ་འབྱེད་ཀྱི་ལས་གཞི་དང་འབྲེལ་ཏེ་གསུངས་དོན། དགོན་སྡེ་ཁག་ནང་ངེས་པར་དུ་ཚང་དགོས་པ་ཞིག་ནི་སྡེ་སྣོད་བཞུགས་སའི་དཔེ་མཛོད་ཁང་ཡིན་པ་དང་།  བོད་ལ་བཀའ་འགྱུར་བསྟན་འགྱུར་གྱི་གཙོས་པའི་སྒྲ་སྒྱུར་བྱེད་པ་དང་། བོད་པ་རང་གིས་བསྟན་བཅོས་རྩོམ་པའི་མགོ་ཚུགས་པ་ནས་བཟུང་། སྔ་མོ་ཞིག་ནས་དཀར་ཆག་རིག་པ་དང་དཔེ་མཛོད་རིག་པ་དེ་ཤུགས་ཆེན་པོ་དར་བའི་སྐོར་ངོ་སྤྲོད་དང་། གྲྭ་ཚང་གི་དཔེ་སྐྲུན་ལས་གཞིའི་ཐད་ནས་ཀྱང་ཕྱག་དཔེ་དག་ཞུ་དང་། དཔེ་བསྡུར་གནང་པ། བར་མཆན་འགོད་པ་སོགས་ཚད་དང་ལྡན་པ་གནའ་བོའི་བོད་ཀྱི་སྲོལ་རྒྱུན་མ་ཉམས་ཤིག་གནང་དགོས་པའི་ལམ་སྟོན་གནང་པ་དང་། བོད་པའི་སྐད་ཡིག་དེ་སངས་རྒྱས་ཀྱི་གསུང་རབས་མང་ཤོས་བཞུགས་སའི་སྐད་ཡིག་ཅིག་དང་། ཐེག་པ་གསུམ་དང་རྒྱུད་སྡེ་བཞི་ལ་སོགས་པའི་རྒྱལ་བའི་གསུང་རབས་ཡོངས་སུ་རྫོགས་པ་ལ། ཚད་མ་གསུམ་གྱི་རིག་པའི་ལམ་ནས་བརྟག་དཔྱད་བྱས་ཏེ། སློབ་སྦྱོང་བྱེད་པའི་འཆད་ཉན་གྱི་རྒྱུན་མ་ཉམས་པར་ཡོད་པ་དེ་བོད་པ་གཅིག་པུ་ཆགས་ཡོད་སྟབས། བོད་སྐད་དང་བོད་མི་རིགས་ལ་འགན་འཁྲི་ཡོད་པར་མ་ཟད། དེའི་ནང་ནས་ཀྱང་བླ་མ་གྲྭ་བ་ཡིན་ཟེར་མཁན་ཁྱིམ་ནས་ཁྱིམ་མེད་པར་རབ་ཏུ་བྱུང་མཁན་ལ་དམིགས་བསལ་གྱིས་འགན་ཆེན་པོ་ཞིག་འཁྲི་ཡོད་སྐོར་གསུངས་སོང་།

མཇུག་མཐར།  སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་མཆོག་གིས་ “ གྲྭ་ཚང་ཁག་ལ་དཔེ་མཛོད་དེ་གལ་ཆེན་པོ་རེད།    གདན་ས་ཁག་ལ་མཚོན་པ་ཡིན་ནའང་དཔེ་མཛོད་ཡོད་པ་རེད་དེ། གདན་ས་ཆེན་པོ་དེ་འདྲ་ཞིག་གི་ངོས་ནས་བཤད་པ་ཡིན་ན།  དཔེ་མཛོད་རྒྱ་ཆུང་བ་དང་ནང་ལོགས་ཀྱི་ཕྱག་དཔེ་ཡི་ནང་དོན་གྱི་ཆ་ནས་ཀྱང་ཕུན་སུམ་ཚོགས་པ་མེད་པའི་བཟོ་འདྲ་བོ་འདུག  བོད་པའི་ལུགས་སྲོལ་དུ་བརྗོད་ན་འགྲིག་གི་མི་འདུག་སྟེ།  སྤྱིར་བཏང་དཔེ་མཛོད་ལབ་དུས་དཔེ་ཆ་རྣམས་ཅ་ལག་སྤུངས་པ་ནང་བཞིན་ཡར་བསྒྲིགས་ཏེ་ཡོན་ཆབ་བཤམས་བསྡད་པ་མ་གཏོགས།  ཕྱག་དཔེ་དེ་དག་གི་ཞལ་ཕྱེ་སྟེ་འཆན་ཉན་གནང་བ་དང་། ཐོས་བསམ་སྒོམ་གསུམ་བྱ་དགོས་པའི་ཚོར་སྣང་ཞེ་དྲག་མེད་པའི་སྣང་ཚུལ་ཡོང་གི་འདུག” ཅེས་གསུངས་ཏེ།   བོད་ནས་བཙན་བྱོལ་དུ་འབྱོར་ནས་ད་ལྟ་བར་དགེ་བཤེས་སྔགས་རམས་ཀྱི་རྒྱུན་ཆད་པ་དེ།  དེ་རིང་བསྐྱར་གསོ་བྱུང་བ་འདི་སྔགས་རིམས་གཏོང་གནང་མཁན་སོ་སོའི་ངོས་ནས་ཡིན་ནའང་། སྤྱིར་རྒྱལ་བའི་བསྟན་པ་ཕྱག་རྗེས་བཞག་པ་ཞིག་དང་།  རྗེ་རིན་པོ་ཆེའི་བསྟན་པ་ལ་ཞབས་འདེགས་སྒྲུབ་ཐུབ་པ་བྱུང་ཡོད་པ་དེར་རྗེས་སུ་ཡི་རངས་བྱེད་དགོས་པ་ཞིག་ཆགས་ཡོད་ལ།  མ་འོངས་པར་ཡང་དམ་པ་གོང་མའི་རྣམ་ཐར་རྣམས་ང་ཚོ་རྗེས་འཇུག་པ་ཚོས་ཉམས་ལེན་གནང་ཐུབ་བྱས་ཏེ། མུ་མཐུད་ནས་བཤད་སྒྲུབ་ཀྱི་རྒྱུན་མ་ཉམས་པར་འཛིན་སྐྱོང་སྤེལ་གསུམ་གནང་དགོས་པ་གསུངས་སོང་།  

དཔལ་ལྡན་རྒྱུད་སྟོད་གྲྭ་ཚང་ལ་གདན་ས་ཁག་ནས་ཕེབས་པའི་བླ་སྤྲུལ་དགེ་བཤེས་རྣམས་ཀྱིས་སྔགས་རམས་གཏོང་ཕྱོགས་དང་བསྐྱེད་རིམ་པའི་དགེ་བཤེས་སྔགས་རམས་གཏོང་ཕྱོགས་གཉིས་ཡོད་པ་ལས། དགེ་བཤེས་ལྷ་རམས་པ་རྣམས་ལ་ལོ་གསུམ་རེ་མཚམས་རྩོད་རྒྱུགས་ཆེན་མོ་འབུལ་བཞེས་ཀྱིས་དགེ་བཤེས་སྔགས་རམས་པའི་ཕྱག་འཁྱེར་འབུལ་རྒྱུ་དང་། བསྐྱེད་རིམ་པ་རྣམས་གྲྭ་ཚང་གི་སྒྲིག་ལ་ཞུགས་ནས་སྔགས་རམས་མ་བཏང་བར་ལོ་བཅུ་དགུའི་རིང་ཐེག་པ་རིམ་འཛེག་གིས་སློབ་སྦྱོང་གནང་དགོས་ཀྱི་ཡོད་འདུག

གསར་འགོད་པ། ཚེ་རིང་རྒྱལ།