གློག་བརྙན་ལ་གཟེངས་རྟཊ།

ཟླ་འདིའི་ཕྱི་ཚེས་ ༡ ནས་ ༡༠ བར་ཨ་རིའི་བྷིར་ཀི་ལིན་གློག་བརྙན་དུས་སྟོན་དེ་ཨ་རིའི་ནེའུ་ཡོག་གྲོང་ཁྱེར་དུ་ཚོགས་ཡོད་པ་ལྟར། དུས་སྟོན་ཐོག་འཛམ་གླིང་རྒྱལ་ཁབ་ ༣༠ ཙམ་གྱི་གློག་བརྙན་མི་འདྲ་བ་ ༡༠༠ ལྷག་འགྲན་ཞུགས་བྱས་པའི་ཁྲོད། བོད་ཀྱི་གློག་བརྙན་འཁྲབ་འཁྲིད་པ་པདྨ་ཚེ་བརྟན་ལགས་ཀྱི་ ༼ ཁྱི་རྒན༽ ཞེས་པའི་གློག་བརྙན་ལ་འོས་ཤོག་མང་ཤོས་ཐོབ་སྟེ། དུས་སྟོན་སྟེང་ཕུལ་བྱུང་གློག་བརྙན་གྱི་གཟེངས་རྟགས་དང་ཨ་སྒོར་ ༥༧༠༠༠ གི་བྱ་དགའ་ཐོབ་འདུག  

པདྨ་ཚེ་བརྟན་ལགས་ཀྱིས་འཁྲབ་འཁྲིད་བྱས་པའི་ ༼ཁྱི་རྒན༽ ཞེས་པའི་གློག་བརྙན་གྱི་ནང་དོན་གཙོ་བོ་ནི། བོད་དབུས་ཁུལ་དུ་བོད་པའི་ཁྱིམ་ཚང་ཅིག་གིས་ཕྱི་རྒྱལ་ནས་རིན་གོང་ཆེན་པོ་སྤྲད་དེ། བ་ཕྱུགས་ཤིག་ཉོས་རྗེས་གསོ་སྐྱོང་བྱེད་མ་ཤེས་པར་ཤི་བའི་སྐོར་གྱི་སྒྲུང་གཏམ་བརྒྱུད་དེ། བོད་ཀྱི་མི་རབས་རྒན་གཞོན་བར་གྱི་བསམ་བློའི་བར་ཁྱད་དང་། བོད་ནང་གི་སྤྱི་ཚོགས་ཀྱི་འགྱུར་འགྲོས་གསལ་སྟོན་བྱས་ཡོད་འདུག་ལ། གློག་བརྙན་འདིའི་འཁྲབ་སྟོན་པ་དབྱངས་འབུམ་རྒྱལ་དང་སྒྲོལ་མ་སྐྱབས། བློ་ཆེ། རྟ་མགྲིན་མཚོ་བཅས་དང་།  པར་ལེན་པ་གསོན་མཐར་རྒྱལ། གློག་བརྙན་སྒྲིག་སྦྱོར་བ་སངས་རྒྱས་འབུམ་བཅས་ཡིན་འདུག

གློག་བརྙན་འཁྲབ་འཁྲིད་པ་པདྨ་ཚེ་བརྟན་ལགས་ཀྱིས་འཁྲབ་འཁྲིད་བྱས་པའི་གློག་བརྙན་༼ཁྱི་རྒན༽ ལ། སྔར་ལོ་ ཧོང་ཀོང་རྒྱལ་སྤྱིའི་གློག་བརྙན་དུས་སྟོན་ཐེངས་ ༣༥ སྟེང་ཨེ་ཤ་ཡའི་གསེར་གྱི་གཟེངས་རྟཊ་ཐོབ་ཡོད་པ་མ་ཟད། ཁོང་གི་གློག་བརྙན་༼འཚོལ༽ དང་༼ ལྷིང་འཇགས་ཀྱི་མ་ཎི་རྡོ་འབུམ༽ གཉིས་ལ་སྔ་ཕྱི་ཧྲང་ཧེ་རྒྱལ་སྤྱིའི་གློག་བརྙན་དུས་སྟོན་དང་། ཧོང་ཀོང་རྒྱལ་སྤྱིའི་གློག་བརྙན་དུས་སྟོན་ཐེངས་ ༣༠ པ་བཅས་སུ་རྒྱལ་སྤྱིའི་གློག་བརྙན་དཔྱད་བརྗོད་མཁན་མཉམ་འབྲེལ་གྱི་གཟེངས་རྟགས་དང་། གནམ་བདག་ཆོས་ལུགས་རིག་གནས་དམིགས་བསལ་ཆེ་བསྟོད་གཟེངས་རྟཊ་བཅས་ཐོབ་ཡོད་འདུག