ཕས་བུ་མོར་སྤྲིངས་པའི་འཕྲིན།

༼རྒྱ་གར་གྱི་སྲིད་བློན་དང་པོ་ཇོ་ཧ་ལ་ནེ་རུས་རང་གི་བུ་མོ་རྒྱ་གར་གྱི་བུད་མེད་སྲིད་བློན་དང་པོ་ཨིན་དྷ་ར་གྷན་དྷིར་སྤྲིངས་པའི་འཕྲིན།༽

ཇོ་ཝ་ཧ་ལ་ནེ་རུས་བརྩམས། ནོར་བསམ་གྱིས་བསྒྱུར།

༡༽ རང་བྱུང་ཁམས་ཀྱི་དཔེ་དེབ།

ཁྱེད་རང་ང་དང་མཉམ་དུ་ཡོད་སྐབས་ཁྱེད་ཀྱིས་ང་ལ་གནས་ཚུལ་འདྲ་མིན་ཐོག་དྲི་བ་ཡང་ཡང་དྲི་ཡི་ཡོད་ཀྱང་། ད་ལྟ་ཁྱེད་རང་མ་སུ་རིར་ཡོད་ལ་ང་ནི་ཨ་ལ་ཧ་བྷ་ཀྲེར་ཡོད་པར་བརྟེན་ང་གཉིས་ཕན་ཚུན་སྐད་ཆ་བཤད་ཐབས་མེད་པས་ངས་ཁྱེད་ལ་དུས་ནས་དུས་སུ་འཕྲིན་ཡིག་བྲིས་ཏེ་ང་ཚོའི་སའི་གོ་ལའི་ནང་ཆ་བགོས་བྱས་པའི་རྒྱལ་ཁབ་ཆེ་ཆུང་མང་པོའི་ལོ་རྒྱུས་བརྗོད་ཀྱི་ཡིན། ཁྱེད་ཀྱིས་དབྱིན་ཇི་དང་རྒྱ་གར་གྱི་ལོ་རྒྱུས་ཉུང་ཤས་བཀླགས་མྱོང་ཡང་རྒྱ་གར་ནི་ལུང་པ་ཆེན་པོ་ཡིན་མིན་གང་ལྟར་ཡང་སའི་གོ་ལའི་ཐོག་ནས་བལྟས་ཚེ་ཆུང་ངུ་ཞིག་ལས་མ་རེད་ལ། དབྱིན་ཡུལ་ཡང་མཚོ་གླིང་ཆུང་ཆུང་ཞིག་རེད། གལ་སྲིད་ང་ཚོས་འཛམ་བུ་གླིང་གི་གནས་ཚུལ་ཤེས་འདོད་ཡོད་ཚེ་ངེས་པར་དུ་རྒྱལ་ཁབ་ཚང་མ་དང་། དེའི་ནང་གནས་སྡོད་བྱེད་མཁན་ཚང་མའི་སྐོར་ལ་བསམ་བློ་གཏོང་དགོས་པ་ལས། ང་ཚོ་སྐྱེ་སའི་ཡུལ་ལུང་ཆུང་ངུ་དེ་ཁོ་ནར་བསམ་བློ་བཏང་ན་མི་འགྲིག

ངས་འཕྲིན་ཡིག་བརྒྱུད་ནས་གནས་ཚུལ་ཕྲན་བུ་ལས་བཤད་མི་ཐུབ་པས་ཞེད་སྣང་སྐྱེ་ཡི་འདུག་ཀྱང་། གནས་ཚུལ་ཕྲན་བུ་དེ་བརྒྱུད་ནས་འཛམ་གླིང་ནང་གི་མི་རིགས་ཚང་མ་ང་ཚོའི་སྤུན་ཟླ་ཡིན་པ་ཁྱེད་ཀྱིས་དོ་སྣང་བྱས་ཏེ་ཤེས་ཐུབ་པའི་རེ་བ་བྱེད་ཀྱི་ཡོད།  ཁྱེད་རང་འཚར་ལོངས་བྱུང་རྗེས་ཁྱེད་ཀྱིས་དཔེ་དེབ་ཐུག་པོ་དེ་འདྲའི་ནང་ནས་སའི་གོ་ལ་དང་དེའི་ཐོག་གནས་བཅའ་མཁན་མིའི་སྐོར་ཀློག་ངེས་ལ་ཕལ་ཆེར་དེ་དུས་ཁྱེད་ཀྱིས་བཀླགས་པའི་སྒྲུང་དེབ་གཞན་ལས་དགའ་སྣང་ཆེ་བ་ཡོང་སྲིད།

ཁྱེད་ཀྱིས་ཤེས་གསལ་ལྟར་ང་ཚོའི་སའི་གོ་ལ་དེ་ནི་ལོ་ངོ་ས་ཡ་མང་པོ་སོང་ཟིན་པས་ཧ་ཅང་རྙིང་ཞིང་དུས་ཡུན་རིང་པོའི་སྔོན་ལ་དེའི་ནང་འཚོ་སྡོད་བྱེད་མཁན་འགྲོ་བ་མི་མེད།  འགྲོ་བ་མི་མ་བྱུང་བའི་སྔོན་ལ་དུད་འགྲོ་སེམས་ཅན་ཁོ་ན་ལས་མེད་ལ། དུད་འགྲོ་སེམས་ཅན་མ་བྱུང་བའི་སྔོན་ལ་སྲོག་ཆགས་རིགས་རྩ་བ་ནས་མེད། ད་ལྟ་འགྲོ་བ་མི་དང་དུད་འགྲོ་སེམས་ཅན་གྱི་རིགས་འདྲ་མིན་ཚང་མ་ཡོད་པའི་ང་ཚོའི་འཛམ་གླིང་དེའི་ནང་དེ་དག་གཅིག་ཀྱང་མེད་པ་བློ་ཡུལ་དུ་འཆར་ཁག་པོ་ཡོད་ཀྱང་ཚན་རིག་པས་གནད་དོན་དེའི་ཐོག་རྟགས་དཔྱད་ཞིབ་འཇུག་བྱས་པ་བརྒྱུད་ཤེས་རྟོགས་བྱུང་བར་སའི་གོ་ལ་དེ་ཉིད་ཧ་ཅང་གི་ཚ་དྲོད་འཕེལ་ནས་སྲོག་ཆགས་གནས་དཀའ་བའི་དུས་ཚོད་གཅིག་བྱུང་ཡོད། གལ་ཏེ་ང་ཚོས་དེའི་སྐོར་གྱི་དཔེ་དེབ་ཀློག་པ་དང་། རྡོ་དང་རྗེས་ཤུལ་འགྱུར་རྡོར་རྟགས་དཔྱད་བྱས་ཚེ་གནད་དོན་དེ་རིགས་བདེན་པ་ཡིན་པ་ང་ཚོས་ཤེས་ཐུབ།

ལོ་རྒྱུས་ཁྱེད་ཀྱིས་དཔེ་དེབ་ནས་ཀློག་ཐུབ་ཀྱང་མི་མ་བྱུང་བའི་སྔོན་ལ་དེབ་འབྲི་ཐུབ་མེད་པ་ངེས་གཏན་ཡིན་པས་ང་ཚོས་སྐབས་དེ་དུས་ག་རེ་བྱུང་ཡོད་མེད་ཇི་ལྟར་ཤེས་ཐུབ་བམ། ང་ཚོ་ལྷོད་ལྷོད་བྱས་ཏེ་བསྡད་ཀྱང་གནས་ཚུལ་ཚང་མ་བསམ་བློའི་ཡུལ་དུ་འཆར་མི་ཐུབ། ང་ཚོས་གནས་ཚུལ་མཐའ་དག་བསམ་བློའི་ཡུལ་དུ་རང་གིས་གང་འདོད་ལྟར་འཆར་སྣང་བསྐྱེད་ནས་ཡིད་དུ་འོང་བའི་ལྷ་སྒྲུང་ཞིག་བསྐྲུན་རྒྱུ་ནི་ཤིན་ཏུ་དགའ་སྣང་སྐྱེ་དགོས་པ་ཞིག་ཡིན་ཡང་། དེ་ནི་ང་ཚོས་དོན་དངོས་མཐོང་ཆོས་སུ་གྱུར་བ་ལྟར་བདེན་པ་མ་རེད། ང་ཚོར་འདས་པའི་དུས་ཡུན་ནང་བྲིས་པའི་དཔེ་དེབ་མེད་ཀྱང་སྟབས་ལེགས་པ་ཞིག་ལ་ང་ཚོར་དངོས་པོ་འགའ་ཞིག་ཡོད་པ་དེ་དག་གིས་དཔེ་དེབ་ཀྱི་ཚབ་བྱེད་ཐུབ། ང་ཚོར་ཡོད་པ་ནི་བྲག་རྡོ་དང་། རི། མཚོ། སྒྱུ་སྐར། གཙང་པོ། བྱེ་ཐང་། གནའ་བོའི་སྲོག་ཆགས་ཀྱི་རྗེས་ཤུལ་འགྱུར་རྡོ་སོགས་དང་དེ་ལྟ་བུའི་དངོས་རིགས་གཞན་གྱིས་ང་ཚོས་སའི་གོ་ལའི་ཐོག་ཡོད་པའི་གནའ་བོའི་ལོ་རྒྱུས་བལྟ་བྱེད་ཀྱི་དཔེ་དེབ་རེད་ལ། དོན་དངོས་ཐོག་ལ་ཡང་ང་ཚོས་ལོ་རྒྱུས་ཤེས་ཆེད་མི་གཞན་གྱིས་བྲིས་པའི་དཔེ་དེབ་བལྟ་རྒྱུའི་ཚབ་ལ་རང་བྱུང་ཁམས་ཀྱི་དཔེ་དེབ་ཆེན་པོ་དེ་ཀློག་དགོས། ཁྱེད་ཀྱིས་རི་དང་བྲག་རྡོ་ལས་ལོ་རྒྱུས་སློབ་སྦྱོང་མགྱོགས་པོ་བྱེད་ཐུབ་པར་ངས་རེ་བ་བྱེད་ཀྱི་ཡོད། བསམ་བློ་བཏང་ཚེ་དེ་ནི་ཇི་འདྲའི་ཡིད་དུ་འོང་བའི་བྱ་བཞག་ཞིག་མ་ཡིན་ནམ། ལམ་ཟུར་དང་ཡང་ན་རི་གཟར་ལ་ལྷུང་པའི་རྡོ་ཆུང་རེ་རེར་ཕལ་ཆེར་རང་བྱུང་ཁམས་ཀྱི་དཔེ་དེབ་ཀྱི་ཤོག་བུ་རེ་ཡོད་ལ་གལ་ཏེ་ཁྱེད་ཀྱིས་ཀློག་སྟངས་ཇི་ལྟར་ཡིན་པ་ཤེས་ན་གནས་ཚུལ་མི་ཉུང་བ་ཞིག་ཤེས་ཐུབ། ཧིན་དྷི་དང་། ཨུར་དྷུ། དབྱིན་ཡིག་སོགས་སྐད་ཡིག་གང་འདྲ་ཞིག་སློབ་སྦྱོང་བྱེད་ནའང་སྐད་ཡིག་དེའི་གསལ་བྱེད་ཡི་གེ་སྦྱོང་དགོས་པ་དེ་དང་གཅིག་མཚུངས་ཁྱེད་ཀྱིས་ཀྱང་ངེས་པར་དུ་རང་བྱུང་ཁམས་ཀྱི་ལོ་རྒྱུས་བྲག་དང་རྡོ་ལས་གྲུབ་པའི་དཔེ་དེབ་མ་ཀློག་སྔོན་ལ་རང་བྱུང་ཁམས་ཀྱི་གསལ་བྱེད་ཡི་གེར་སློབ་སྦྱོང་བྱེད་དགོས། ཕལ་ཆེར་ད་ལྟ་ཁྱེད་ཀྱིས་ཇི་ལྟར་ཀློག་དགོས་མིན་ཅུང་ཙམ་ཤེས་ཀྱི་ཡོད་སྲིད།

གལ་སྲིད་ཁྱེད་ཀྱིས་བཀྲགས་མདང་ཅན་གྱི་ཆུ་རྡེའུ་སྒོར་སྒོར་ཆུང་ངུ་ཞིག་མཐོང་ཚེ་དེས་ཁྱོད་ལ་གནས་ཚུལ་ཞིག་བརྗོད་ཀྱི་མི་འདུག་གམ། ཟུར་དང་རྩུབ་པོ་ཡོད་པའི་གྲི་སོགས་གང་ཡང་མེད་པར་ཇི་ལྟར་བྱས་ཏེ་དེ་ནི་སྒོར་སྒོར་དང་། འཇམ་པོ། འོད་འཚེར་མཁན་ཆགས་པ་རེད་དམ། གལ་ཏེ་ཁྱེད་ཀྱིས་རྡོ་ཆེན་པོ་ཞིག་དུམ་བུར་གཅོག་པ་ཡིན་ན། དུམ་བུ་རེ་རེ་རྩུབ་པོ་དང་། ཟུར་ཡོད་པ། རྩུབ་ཤ་ཅན་གྱི་ཁའམ་རྣོ་ཡོད་པ་ལས་དེ་ནི་རྣམ་པ་ཀུན་ནས་ཆུ་རྡེའུ་འཇམ་པོ་སྒོར་སྒོར་དེ་འདྲ་མ་རེད། དེས་ན་ཆུ་རྡེའུ་ཧ་ཅང་གི་སྒོར་སྒོར་དང་འཇམ་པོ། འོད་འཚེར་པ་དེ་འདྲ་ཇི་ལྟར་ཆགས་པ་རེད་དམ། གལ་ཏེ་ཁྱེད་ལ་བལྟ་ཐུབ་པའི་མིག་དང་ཉན་ཐུབ་པའི་རྣ་ཅོག་ཡོད་ཚེ་དེས་ཁྱེད་ལ་ལོ་རྒྱུས་ཤིག་བརྗོད་ཀྱི་ཡོད། བརྗོད་དོན་ནི་དུས་ཡུན་རིང་པོའི་སྔོན་ལ་ད་ལྟ་ཁྱེད་ཀྱིས་བྲག་རྡོ་བཅག་ནས་དུམ་བུ་སོང་བའི་རྡོ་ཕྲུག་ལྟ་བུ་ཟུར་དང་སྣེ་མང་པོ་ཡོད་པ་ཞིག་དང་། ཕལ་ཆེར་རི་གཟར་དུ་ཡོད་ངེས། དེ་རྗེས་ཆར་ཆུས་འཁྱེར་ནས་ལུང་གཤོངས་ནང་ལྷུངས་པ་དང་དེ་རྗེས་རི་སྟེང་གི་རྒྱུག་ཆུས་འཕུད་རྒྱག་བཏང་ནས་གཙང་པོ་ཆུང་ངུའི་ནང་བསླེབས་པ་དང་། དེ་ནས་གཙང་པོའི་གཏིང་མཐའ་ལ་བསྒྲིལ་ནས་དེའི་ཟུར་གྱི་རྣོ་དང་ངོས་རྩུབ་བོ་རྣམས་འཇམ་པོ་དང་བཀྲག་མདངས་ཅན་ཆགས་པ་དེ་ནི་ཁྱེད་ཀྱིས་མཐོང་བའི་ཆུ་རྡེའུ་དེ་རེད། གཙང་ཆུས་འཁྱེར་མཚམས་བཞག་པར་བརྟེན་ད་ལྟ་ཁྱེད་ཀྱིས་མཐོང་ཐུབ་པ་ལས་དེ་མིན་མུ་མཐུད་གཙང་ཆུས་འཁྱེར་ཡོད་ཚེ་ཆུང་དུ་ཆུང་དུ་ཕྱིན་ནས་མཐའ་མ་འབྲུ་རྡོག་ལྟ་བུའི་བྱེ་མར་གྱུར་ནས་རྒྱ་མཚོའི་འགྲམ་ལ་ཕྲུ་གུ་ཚོས་བྱེ་མའི་མཁར་རྫོང་བརྒྱབ་པ་དང་། སྤྲོ་འཆམ་བྱེད་ཡུལ་མཚོ་གླིང་ཡིད་དུ་འོང་བ་ཞིག་ཆགས་ཡོད།

གལ་ཏེ་ཆུ་རྡེའུ་ཆུང་ཆུང་ཞིག་གིས་ཁྱེད་ལ་གནས་ཚུལ་དེ་ཙམ་བརྗོད་ཀྱི་ཡོད་ན། ང་ཚོའི་གཡས་གཡོན་ལ་མཐོང་ཆོས་སུ་ཡོད་པའི་རི་དང་བྲག་རྡོ་སོགས་ལས་དེ་ལས་མང་བའི་གནས་ཚུལ་ག་ཚོད་ཤེས་ཐུབ་བམ།

༌༌༌༌༌༌༌༌༌༌༌༌༌༌༌༌༌༌མུ་འགོད།