བོད་མི་ཞིག་འཛིན་བཟུང་།

འོད་དཀར་དྲ་བའི་སྟེང་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༨ ཉིན་མདོ་སྨད་ཀན་ལྷོ་རྨ་ཆུ་རྫོང་དབལ་པཎ་ཞང་ (ཡུལ་ཚོ) རོང་སྐོར་སྡེ་བའི་གཞོན་ནུ་དཔལ་ལྡན་ཞུ་བ་ཡུལ་ཚོའི་ཇ་ཁང་ཞིག་ཏུ་སྡོད་སྐབས་རྨ་ཆུ་རྫོང་བདེ་འཇགས་རུ་ཁག་དང་། སྤྱི་བདེ་ཉེན་རྟོག་ལས་ཁུངས་གཉིས་མཉམ་འབྲེལ་ཐོག་རླུང་འཁོར་ཆུང་བ་༤ ལྷག་ཡོང་སྟེ། ས་གནས་དེ་གར་འཇུ་བཟུང་བཙན་ཁྲིད་བྱས་ཡོད་འདུག

ཉིན་དེར་ནང་མི་ཉེ་འབྲེལ་ཚོས་ཁོང་ཉེན་རྟོག་པས་རྫོང་ཐོག་ཏུ་ཁྲིད་སོང་བའི་གནས་ཚུལ་ཙམ་ལས་ཞིབ་ཕྲའི་གནས་ཚུལ་ཤེས་མེད་ཀྱང་། ཕྱི་ཚེས་ ༢༠ ཉིན་ནང་མི་ཉེ་འབྲེལ་དང་ཡུལ་མི་བཅས་ཁྱོན་བོད་མི་ ༡༠ ལྷག་རྫོང་ཐོག་ཏུ་སོང་སྟེ་སྐད་ཆ་དྲིས་སྐབས། ཉེན་རྟོག་ལས་ཁུངས་ཀྱིས་ཁོང་ཚོའི་ཁྲོད་ཀྱི་མི་ ༥ ལས་ཁུངས་ནང་སྐད་བཏང་སྟེ། གཞོན་ནུ་དཔལ་ལྡན་ལགས་ཀྱིས་ ༢༠༠༨ ལོར་དབལ་བཎ་ཞང་དུ་སེར་སྐྱ་མི་མང་གིས་ཉིན་གསུམ་རིང་ངོ་རྒོལ་སྐད་འབོད་བྱས་སྐབས། མི་དམངས་ཀྱི་ཚོགས་གཙོའམ་མགོ་ཁྲིད་གཙོ་བོ་ཡིན་པ་མི་གཞན་བརྒྱུད་དེ་ཤེས་སྟབས། ཁོང་འཇུ་བཟུང་བཀག་ཉར་བྱས་པ་ཡིན་ཚུལ་དང་། ཟླ་གཅིག་རིང་འདྲི་གཅོད་བྱས་རྗེས་ཀློད་གྲོལ་གཏོང་གི་ཡིན་ཞེས་སོགས་བཤད་དེ་ནང་མི་ཚོ་ཕྱིར་མངགས་ཡོད་པ་ཙམ་ལས། ད་ལྟའི་ཆར་ཁོང་གང་དུ་ཡོད་མེད་དང་གནས་སྟངས་གང་འདྲ་ཡིན་མིན་གྱི་གནས་ཚུལ་ཅི་ཡང་འགྲེལ་བརྗོད་བྱས་མེད་པར་ལྷག་འདུག  

རང་ལོ་ ༣༤ ཡིན་པའི་གཞོན་ནུ་དཔལ་ལྡན་ལགས་ནི། རྨ་ཆུ་རྫོང་དབལ་པཎ་ཞང་རོང་སྐོར་སྡེ་བའི་ཕ་ལ་མགོན་ཚེ་དང་མ་བདེ་ཆེན་གཉིས་ཀྱི་བུ་ཡིན་འདུག་ལ། ༢༠༠༨ལོ་ནས་བཟུང་རྒྱ་གཞུང་གིས་ས་གནས་སུ་ཁོང་འཛིན་བཟུང་བྱེད་རྒྱུའི་བཀའ་རྒྱ་བཏང་སྟབས། མི་མེད་ལུང་སྟོང་སོགས་སུ་བྲོས་བྱོལ་བྱས་ཏེ་ད་བར་འཛིན་བཟུང་བྱེད་ཐུབ་མེད་ཀྱང་། ཉེ་ཆར་ཁོང་ས་གནས་ཀྱི་ཇ་ཁང་ཞིག་ཏུ་སྡོད་སྐབས། གློ་བུར་དུ་རྨ་ཆུ་རྫོང་བདེ་འཇགས་རུ་ཁག་དང་། སྤྱི་བདེ་ཉེན་རྟོག་རུ་ཁག་གི་མི་སྣ་ཡོང་སྟེ་འཇུ་བཟུང་བཙན་འཁྲིད་བྱས་ཡོད་འདུག