ང་རང་ཚོའི་ནང་ཁུལ་གྱི་ནུས་པ་དེ་གལ་ཆེ་ཤོས་སུ་མཐོང་གི་ཡོད།

མི་འགྱངས་པར་ངྷ་སར་འཚོགས་འཆར་གྱི་དམིགས་བསལ་ཚོགས་ཆེན་ཐེངས་གཉིས་པའི་གྲོས་གཞི་དང་འབྲེལ་བའི་དོན་གནས་ཁག་ཅིག་གི་ཐོག་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་སུ་བཅར་འདྲི་ཞུས།

དྲི་བ། བོད་ནང་གི་ཛ་དྲག་གི་གནས་སྟངས་ཐད་བོད་གཞུང་མང་གཉིས་ཀྱིས་གདོང་ལེན་ཇི་ལྟར་གནང་དགོས།

ལན། ད་ལྟའི་བར་བོད་ནང་གི་ཛ་དྲག་གནས་སྟངས་རིམ་པའི་ཐོག བོད་མིའི་སྒྲིག་འཛུགས་དང་གཞུང་འབྲེལ་མིན་པའི་ཚོགས་པ་ཁག མི་སྒེར་བཅས་ཀྱིས་སོ་སོའི་འཆར་གཞི་ལྡན་པ་དང་སྒྲིག་གཞི་ཡོད་པའི་ཐོག་ནས་ལས་འགུལ་སྤེལ་མ་ཐུབ་སྟབས། བོད་ནང་གི་རླབས་ཆེན་བློས་གཏོང་གི་ལས་འགུལ་ལ་དཔག་པའི་ནུས་ལྡན་གྱི་གྲུབ་འབྲས་ཤིག་ཐོན་ཐུབ་ཡོད་པ་མ་རེད། ད་རེབ་འཛམ་གླིང་ཡུལ་གྲུ་གང་སར་ཡོད་པའི་བོད་མི་མང་པོ་ཞིག་འཛོམས་ཏེ་བོད་ནང་གི་ཛ་དྲག་གནས་སྟངས་ཐད་ཚོགས་འདུ་འཚོགས་ཀྱི་ཡོད་སྟབས། ཚོགས་འདིའི་ཐོག་ང་ཚོས་གཞི་རྒྱ་ཆེ་བའི་འཆར་གཞི་བསྒྲིགས་ཏེ། རྒྱལ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་གཞུང་གི་ལས་ཁུངས་ཁག་གིས་ངོས་ནས་ག་རེ་བྱ་དགོས་མིན་དང༌། གཞུང་འབྲེལ་མིན་པའི་ཚོགས་པ་ཁག་གིས་ག་རེ་བྱ་དགོས་མིན། མི་སྒེར་གྱི་ངོས་ནས་ག་རེ་བྱ་དགོས་མིན་སོགས་ལ་ལས་བགོས་བྱས་ཏེ་ལས་འགུལ་སྤེལ་ཐུབ་པ་ཡིན་ན་ནུས་པ་ཐོན་རྒྱུ་རེད་ལ། ཕུགས་རྒྱང་རིང་པོར་ཕན་རྒྱུ་རེད་བསམ་གྱི་འདུག ད་ལྟའི་བར་གྱི་ལས་འགུལ་དེ་ང་ཚོས་གང་ཐུབ་གནང་ཡོད་ཀྱང༌། འཆར་གཞི་མེད་པའི་དབང་གིས་རྒྱལ་སྤྱིའི་ཐོག་ནུས་པ་བསླེབས་མ་ཐུབ་པའི་རྣམ་པ་ཞིག་མཐོང་གི་འདུག གདོང་ལེན་བྱེད་ཕྱོགས་ཐད་ནས། གཅིག་ནས་ད་ལྟའི་བོད་ནང་གི་ཛ་དྲག་གནས་སྟངས་དང༌། གཉིས་ནས་བོད་ནང་གི་བོད་མི་ཚོས་ྋགོང་ས་མཆོག་བོད་ལ་གདན་འདྲེན་ཞུ་དགོས་པ། བོད་ལ་རང་དབང་དགོས་ཞེས་པའི་མངོན་འདོད་དེ་རེད། མངོན་འདོད་དེ་དག་ལམ་སེང་བསྒྲུབ་ཐུབ་པ་ཞིག་མིན་སྟབས། ང་ཚོས་ཕུགས་རྒྱང་རིང་པོར་དམིགས་ཏེ་ལས་ཀ་བྱ་རྒྱུ་གལ་ཆེན་པོ་རེད། ཕུཊ་རྒྱང་རིང་པོའི་འཐབ་རྩོད་ལ་དམིགས་ཏེ། ང་ཚོས་རྒྱ་ནག་ནང་ཁུལ་དུ་དམངས་གཙོ་རྩོད་ལེན་བྱེད་མཁན་དང་རང་དབང་འཐབ་རྩོད་པ་སོགས་དང༌། ཤར་ཏིར་ཀེ་སི་ཐན་དང་ནག་སོག་བཅས་རྒྱ་གཞུང་གི་འོག་ཏུ་དཀའ་སྡུག་མྱོང་བཞིན་པའི་གྲང་ཉུང་མི་རིགས་དག་དང་མཉམ་འབྲེལ་ཐོག་འཐབ་རྩོད་བྱ་རྒྱུ་དེ་ལག་ཆེན་དུ་མཐོང་གི་ཡོད། 

དྲི་བ། དེ་སྔའི་རྒྱལ་ཡོངས་ཚོགས་ཆེན་དང་དམིགས་བསལ་ཚོགས་ཆེན་རིམ་པའི་གྲོས་ཆོད་ཁག་ལ་གྲུབ་འབྲས་ཐོན་ཡོད་མེད་དང་། ཐེངས་འདིའི་གྲོས་ཆོད་ཁག་ལག་བསྟར་བྱེད་ཕྱོགས་ཐད་དགོངས་ཚུལ་ག་རེ་ཡོད།

ལན། ལག་བསྟར་བྱེད་ཕྱོགས་ཀྱི་ཐོག་ནས་ང་རང་གི་ཤེས་པ་ཅིག་ལ། དམིགས་བསལ་ཚོགས་ཆེན་ལབ་དུས་ཁྲིམས་ཐོག་ནས་བསྒྱུར་བཅོས་གཏོང་ཐུབ་པའི་དབང་ཡོད་པ་ཞིག་དང༌། གཞུང་མང་རྒྱལ་ཡོངས་ཚོགས་ཆེན་ལབ་པའི་སྐབས་ལ་ཁྲིམས་ལུགས་དབང་འཛིན་མེད་པའི་གནས་སྟངས་དེ་འདྲ་ཞིག་རེད། ཚོགས་འདུ་རིམ་པའི་ཐོག་མི་འབོར་ཆེན་ཡོང་གི་ཡོད་པ་རེད་ལ། དེར་འགྲོ་སོང་ཕོན་ཆེན་པོ་གཏོང་གི་ཡོད་སྟབས། ཐག་གཅོད་གང་བྱུང་བ་དེ་ཁྲིམས་ཐོག་ནས་དབང་ཚད་ཡོད་པར་བྱ་རྒྱུ་ཧ་ཅང་གལ་ཆེན་པོ་རེད་བསམ་གྱི་ཡོད། ང་ཚོས་དུས་ཚོད་དང་འགྲོ་སོང༌། ནུས་པ་ཤུགས་ཆེན་པོ་བཏང་སྟེ་ལག་ལེན་མ་ཁེལ་བ་ཡིན་ན། ཚོགས་འདུའི་དགོས་འདུན་མ་འགྲུབ་པ་རེད་བསམ་གྱི་འདུག ད་ལྟའི་བར་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་དང༌། དམིགས་བསལ་ཚོགས་ཆེན་གཅིག་བཅས་ད་རེབ་ཀྱི་ཚོགས་ཆེན་བརྩིས་པ་ཡིན་ན་ཚོགས་ཆེན་ཐེངས་བཞི་ཙམ་ཚོགས་ཟིན་པ་རེད། གཅིག་བྱས་ནས་མང་པོ་དེ་འདྲ་མ་རེད། ཡིན་ནའང༌། ང་ཚོས་ལག་ལེན་ཁེལ་ཐུབ་པར་ཚང་མས་བསམ་བློ་གཏོང་དགོས་པ་ཞིག་དང༌། ལག་ལེན་བསྟར་ཐུབ་པའི་དབང་ཚད་དགོས་རྒྱུ་གལ་ཆེན་པོ་རེད་བསམ་གྱི་འདུག ༢༠༠༨ ལོའི་དམིགས་བསལ་ཚོགས་ཆེན་སྐབས། མི་མང་གི་མངོན་འདོད་ལྟར་དབུ་མའི་ལམ་གྱི་ཐོག་རང་སྲིད་རང་སྐྱོང་ཐོབ་ཐུབ་པའི་འབད་བརྩོན་བྱས་ཏེ་མུ་མཐུད་འགྲོ་བཞིན་པ་རེད། ཡིན་ནའང༌། རྒྱ་ནག་གཞུང་གིས་བརྡ་ལན་མ་སྤྲད་པ་ཡིན་ན། ང་ཚོའི་དགོས་འདུན་དང་དམིགས་ཡུལ་གྱི་སྐོར་ལ་གྲོས་བསྡུར་བྱ་རྒྱུ་དང༌། བོད་མིའི་སྒྲིག་འཛུགས་ཀྱི་ངོས་ནས་ཀྱང་བརྩི་འཇོག་བྱས་ཏེ་བསམ་བློ་ནན་ཏན་གཏོང་དགོས་པ་རེད་ཅེས་གྲོས་ཆོད་བཞག་ཡོད་པ་རེད། ད་ལྟ་ ༢༠༡༢ ལ་བསླེབས་ཡོད་པ་རེད། དེའི་སྐོར་གལ་ཆེན་དུ་བརྩིས་ཏེ་བསམ་བློ་བཏང་རྗེས་མུ་མཐུད་གྲོས་ཆོད་འཇོག་ཐུབ་ན་བསམ་གྱི་འདུག  གྲོས་ཆོད་ལག་བསྟར་མ་ཐུབ་པའི་ཐད་ནས། ད་ལྟའི་བར་གཞུང་མང་རྒྱལ་ཡོངས་ཚོགས་ཆེན་སྐབས་ཀྱི་གྲོས་ཆོད་ལ་འགྲེལ་བཤད་ཅིག་གནང་བ་མ་གཏོགས། དབང་ཚད་ཡོད་པའི་ཐོག་ནས་ལག་བསྟར་མ་ཐུབ་པ་མང་པོ་ཞིག་མཐོང་གི་འདུག གཙོ་བོ། གྲོས་ཚོགས་དེ་བོད་པའི་སྤྱི་ཚོགས་ཀྱི་ལས་ཀ་བྱེད་སྟངས་དང་གཞུང་གི་ཆབ་སྲིད་འཛིན་སྟངས། འཛིན་སྐྱོང་གི་ལས་ཀ་བྱེད་ཕྱོགས་བཅས་ལ་བསྒྱུར་བཅོས་དབང་ཚད་ཆེ་ཤོས་ཆགས་ཡོད། གཞུང་མང་རྒྱལ་ཡོངས་ཚོགས་ཆེན་གྱི་ཐག་གཅོད་ཁག་ཁྲིམས་ཐོག་གི་དབང་ཚད་ཡོད་པར་འགྱུར་བ་གཏོང་མ་ཐུབ་པའི་དབང་གིས་རེད་བསམ་གྱི་འདུག

དྲི་བ། བོད་ནང་གི་ཛ་དྲག་གནས་སྟངས་ལ་གཞིགས་ཏེ་ཕྱི་ཕྱོགས་ནས་སྲིད་བྱུས་དང་ལས་དོན་ཐོག་འགྱུར་བ་གཏོང་དགོས་པར་གཟིགས་ཀྱི་ཡོད་དམ།

ལན། ད་ལྟའི་ཆར་བོད་ནང་ཛ་དྲག་གནས་སྟངས་ཆགས་ཡོད་པ་དང༌། ང་ཚོའི་འཐབ་རྩོད་ཀྱང་ཧ་ཅང་ཉག་ཕྲ་བའི་དུས་སྐབས་ཤིག་ཏུ་བསླེབས་ཡོད། ཡིན་ནའང༌། ད་ལྟའི་གནས་སྐབས་སུ་ནུབ་ཕྱོགས་རྒྱལ་ཁབ་མང་པོ་ཞིག་གིས། རྒྱ་ནག་གི་དཔལ་འབྱོར་ཁེ་བཟང་ལེན་ཆེད་བསྟུན་དགོས་པ་བྱུང་སྟབས། ང་རང་གི་ངོས་ནས་ལམ་སེང་རྒྱལ་སྤྱིའི་སྟེང་གི་རྒྱབ་སྐྱོར་ཡོང་བའི་རེ་བ་བྱེད་ཀྱི་མེད། ཡིན་ནའང༌། འགྲོ་བ་མིའི་ཐོབ་ཐང་ཚོགས་པ་སོགས་ཀྱི་ངོས་ནས་རྒྱལ་སྤྱིའི་ནང་གོ་རྟོགས་སྤེལ་བ་དང༌། གླེང་སློང་བྱེད་ཐུབ་པ་དེ་འདྲ་ཡོང་གི་རེད། བོད་ནང་རང་ལུས་མེར་བསྲེགས་ཀྱི་ངོ་རྒོལ་ག་ཚོད་བྱུང་བ་དེས། ང་ཚོ་ནང་ཁུལ་གྱི་ནུས་པ་མུ་མཐུད་རྒྱ་ཆེ་རུ་གཏོང་ཐུབ་ཀྱི་ཡོད་པར་ངོས་འཛིན་ཞུ་བཞིན་ཡོད། ང་ཚོའི་ནང་ཁུལ་གྱི་ནུས་པ་དེ་ང་ཚོའི་འཐབ་རྩོད་ཀྱི་ནུས་པ་གལ་ཆེ་ཤོས་དེ་རེད། ང་ཚོའི་ནང་ཁུལ་དུ་ཆིག་སྒྲིལ་མེད་པ་དང༌། ནང་ཁུལ་མི་མང་ལ་སེམས་ཤུགས་མེད་པ་ཡིན་ན་ང་ཚོར་རང་དབང་ཐོབ་ཐུབ་ཀྱི་མ་རེད། ད་ལྟའི་ཆར་འཛམ་གླིང་གི་རྒྱལ་ཁབ་མང་པོ་ཞིག་གིས་རྒྱ་ནག་གི་ཚོང་འབྲེལ་ཁེ་ཕན་ལ་གཟིགས་ཏེ་འབྲེལ་ལམ་འཛུགས་ཀྱི་ཡོད་ཀྱང༌། ང་ཚོའི་ནང་ཁུལ་རྡོག་རྩ་ཆིག་སྒྲིལ་དང་སྤྱི་ཚོགས་ནང་ཆབ་སྲིད་ཀྱི་གོ་རྟོགས་སྤེལ་རྒྱུ། དུས་ནས་དུས་སུ་གནས་སྟངས་ལ་གཞིགས་ཏེ་ལས་འགུལ་གསར་བའི་རིགས་སྤེལ་ཐུབ་པ་ཡིན་ན། འཛམ་གླིང་ཐོག་གི་རྒྱབ་སྐྱོར་མ་རག་ཀྱང༌། ང་ཚོའི་ནུས་པ་སྔར་བཞིན་གནས་ཐུབ་པ་རེད། ངའི་ངོས་ནས་ང་རང་ཚོའི་ནང་ཁུལ་གྱི་ནུས་པ་དེ་གལ་ཆེ་ཤོས་སུ་མཐོང་གི་ཡོད། ད་ལྟའི་བར་དུ་ང་ཚོས་མ་ལས་པ་ཞིང་དང་ངེས་པར་ལས་དགོས་པ་ཞིག་ལྷག་ཡོད་པ་དེ། ང་ཚོས་རྒྱ་ནག་ནང་ཁུལ་དུ་རང་དབང་དང་རང་བཙན་རྩོད་ལེན་བྱེད་ཀྱིན་པའི་འབྲེལ་བ་བཙུགས་ཏེ། ནུས་པ་གསར་བ་ཞིག་བསྐྲུན་པའི་འབད་བརྩོན་གནང་དགོས་ཀྱི་འདུག དེའི་ཐོག་ང་ཚོ་གཞུང་མང་གཉིས་ཀྱིས་ཤུགས་རྒྱག་དགོས་པ་རེད། 

གསར་འགོད་པ། དོན་གོ