དགྲ་བོའི་ཁྱད་ཆོས་ཨང་དང་པོ་ངོ་ཚ་དང་སྙིང་རྗེ་མེད་པ་དེ་ཡིན།

མིག་མི་འཛུམ།

སྐལ་བ་ས་ལ་ཆགས་པ་ནས་འུ་ཅག་གིས་དགྲ་བོའི་ས་ཐོག་ནས་ཕར་ཁྲག་ཐིགས་ཤིག་ཀྱང་ཕམ་མྱོང་མེད། (བཙན་པོའི་སྐབས་སུ་ཁྲང་ཨན་ཚུར་འདབས་བླངས་ཞེས་པ་ནི་རང་མགོ་རང་གིས་སྐོར་བྱེད་ཀྱི་སེམས་གསོ་ཙམ་ཡིན་པར་འདོད།)འོན་ཀྱང་ཚུར་ཡ་ང་སྙིང་རྗེ་ཏིལ་ཙམ་མེད་པར་བསད་ནས་གཏུབ་ནས་བཅོམ་ནས་འུ་ཅག་གི་ཡོད་ཚད་འཕྲོག་སོང་བ་རེད། དེའི་མིང་ལ་བཅིངས་འགྲོལ་བཏགས་ཤིང་། དེའི་མིང་ལ་གསར་བརྗེ་ཞེས་འབོད། ང་ཚོའི་ཡོད་ཚད་དགྲ་ལག་ཏུ་ཤོར་ནས་ལོ་ངོ་ག་ཚོད་འགྲོ་ཡི་ཡོད་མེད་འདིར་འཆད་དགོས་དོན་མེད་མོད། ལོ་ངོ་དེ་དག་གི་ནང་ང་ཚོའི་མི་རབས་གསུམ་ཙམ་གྱི་མགོ་ལ་ཡོང་མྱོང་བའི་སྡུག་བསྔལ་དེར་འུ་ཚོས་བསམ་བློ་མི་གཏོང་རང་གཏོང་ཆགས་ཡོད།

ཡ་ཁོག་ན་སྙིང་ཡོད་པ་ཚོས་བསམ་བློ་ཞིག་ཐོངས་དང་། དགྲ་བོས་གཞན་གྱི་ཕུན་ཚོགས་རང་ལག་ཏུ་ཐོབ་ཆེད་གསོད་གཏུབ་བཅོམ་གསུམ་བྱ་ཆོག་ན། འུ་ཚོས་ཅིའི་ཕྱིར་རང་གི་ཕུན་ཚོགས་ལ་བདག་པོ་རྒྱག་ཕྱིར་གསོད་གཏུབ་བྱ་མི་ཆོག་གམ། ལོས་ཡིན། རང་ཅག་གི་སེམས་ན་སྙིང་རྗེ་ཆེན་པོའི་ས་བོན་ཡོད་ལ། རང་ཅག་གི་སེམས་ན་སྔགས་བླ་མེད་ཀྱི་བཟོད་སྒོམ་ཡོད། ད་དུང་དེ་བས་ཀྱང་བདག་གཞན་མཉམ་བརྗེ་ཞེས་པའི་ཕ་རོལ་དགོད་ཁ་སློང་བྱེད་ཀྱི་རྒུད་པའི་འཕྲུལ་འཁོར་ཡོད། དེའི་སྟབས་ཀྱིས་ང་ཚོའི་མགོ་ཐོག་ལ་དེ་རིང་གི་སྡུག་བསྔལ་དྲག་པོ་འདི་བབ་པ་མ་ཡིན་ནམ།

ངས་རང་བཙན་བཤད་ཀི་མེད། ངས་དབུ་མའང་བཤད་ཀི་མེད། ངས་བརྗོད་ཀྱིན་པ་ནི་དགྲ་བོ་ཅི་འདོད་གང་འདོད་དུ་རང་ཅག་གི་ས་ཐོག་ལ་ཡོང་ནས། སུ་གསོད་འདོད་ན་དེ་གསོད་པ་དང་སུ་འཛིན་འདོད་ན་དེ་བཟུང་ནས་དུས་རབས་ཉེར་གཅིག་པའི་རྒྱལ་སྤྱིའི་ཁྱོན་ཡོངས་ལ་ཡོད་སྡོད་པའི་འགྲོ་བ་མིའི་རང་དབང་ཟེར་བ་དེ་དང་ཐོབ་ཐང་ཟེར་བ་དེ་མེད་པ་ནི་བཤད་ཅི་ལ་དགོས། ད་དུང་འུ་ཅག་གི་སྤུན་ཟླ་ཚོས་ང་ཚོ་ལ་རང་དབང་དང་ཐོབ་ཐང་ཏོག་ཙམ་སྤྲོད་རོགས་ཞེས་ཕར་ཞུ་བ་བྱེད་ཚད་ལ་དྲག་གནོན་གྱིས་བསད་སོང་བ་དང་བཙོན་དུ་བཅུག་པ་སོགས་གྲངས་ཀྱིས་ག་ལ་ཟིན། ད་ནི་བྱང་ཆུབ་ཀྱི་སེམས་ཡང་དག་པ་རྙེད་པའི་གང་ཟག་རེ་གཉིས་ཤིག་ལས་བཟོད་ཐབས་མེད་པའི་དུས་ཚོད་ཅིག་རང་ཅག་གི་མགོ་ལ་ཤར་ཡོད་ཨང་།

ད་ལྟའི་དུས་ཚོད་འདི་ལ། གཞིས་ལུས་སྤུན་ཟླ་དག་གིས་མ་གྲོས་རང་མཐུན་གྱིས་སྲོག་འདོར་ཕོད་ཀྱི་ཡོད། ཉིས་སྟོང་བརྒྱད་ནས་དེ་རིང་ལ་ཐུག་གི་བར་གྱི་དཔའ་བོ་ཚོའི་ཞི་བའི་ལས་འགུལ་གྱི་རྣམ་གྲངས་རེ་རེར་བསམ་ན། ད་ནི་དགྲ་བོའི་ཕྱོགས་ལའང་འདང་རྒྱག་རྒྱུ་ཞིག་བཞག་ཡོད་ཀྱང་། དེ་ལས་ལྡོག་པའི་རྣམ་འགྱུར་ཞིག་ལས་ཅི་ཞིག་ཐོབ་བྱུང་ཨང་། ད་དུང་མུ་མཐུད་ནས་རང་རེའི་གདོང་མཆོངས་དཔའ་བོ་ཚོ་འདི་ལྟར་ཉི་མ་རེ་རེར་རྒྱུན་མཐུད་ནས་བསྲེག་ཚེ་གྱོང་རག་མཁན་དེ་སེམས་ན་སྙིང་རྗེ་དང་ངོ་ཚས་ཁེངས་པའི་རང་ཅག་ལས་སུ་ཞིག་ཡིན། དེ་བས་ས་གནས་ཁག་སོ་སོ་ནས་དགྲ་བོའི་ཕྱོགས་ཀྱི་ཟ་དང་ཟུར་ནས་བཏོག་ཅིང་། བྱིས་པས་བྱིས་པ་དང་རྒན་པས་རྒན་པོར་ཉེས་པ། སུའི་ལག་ལ་སུ་ཡོང་ན་དེ་མ་ཐག་དམར་གསོད་དང་ཞ་གཅོང་དུ་བཏང་ནས་ཁེར་རྐྱང་དུ་འགྲོ་མི་ཕོད་པ་དང་ལྷོད་ལྷོད་དུ་འདུག་མི་བདེ་བ་བཟོ་བའི་བྱ་སྤྱོད་ཅིག་ངེས་པར་དུ་སྤེལ་དགོས་ངེས་ཡིན།

ཕར་ལ་དམག་འཐབ་རྒྱག་པའི་ནུས་པ་མེད་ནའང་སུན་པོ་བཟོ་བའི་ནུས་པ་ང་ཚོ་ལ་ཏན་ཏན་ཡོད་པས། ངོ་ཚ་དང་སྙིང་རྗེ་མེད་པའི་དགྲ་བོའི་སེམས་ལ་འདས་པའི་དུས་རིམ་གྱི་འཚེ་མེད་ཞི་བ་དྲན་དུ་འཇུག་དགོས། ངོ་ཚ་དང་སྙིང་རྗེ་མེད་པའི་སྲིད་གཞུང་གི་ཁ་གཏད་དུ་ང་ཚོའི་བྱང་ཆུབ་ཀྱི་སེམས་འདི་གཏན་ནས་འོས་ཚོད་མི་འདུག་པ་ནི་མིག་མཐོང་ལག་ཟིན་ཡིན། ངས་འདི་ལྟར་བཤད་དགོས་དོན་ནི་འུ་ཅག་གི་དམིགས་སྔའི་གནས་སྟངས་ཀྱིས་དེ་ལྟར་བྱེད་ཐུབ་པ་ར་འཕྲོད་སོང་ལ། དེ་ལྟར་ཁྲག་དང་སྲོག་གི་སྡུག་བསྔལ་དེ་དགྲ་བོའི་སེམས་ནས་གང་འདྲ་ཡིན་མིན་བྲོ་བ་ཙམ་མྱོང་ཐུབ་ངེས་ཡིན།

ངེད་ཅག་གི་མ་འོངས་པའི་གཅེས་ཕྲུག་ཚོར་རེ་གཞག་གསར་བ་ཞིག་སྐྱེས་སོང་། སྔོན་མའི་གླེན་ལྐུགས་ཀྱི་ཚད་གཞི་ལས་འཕར་ནས་ཕ་རོལ་བས་རྔ་བོ་ཇི་ལྟར་བརྡུང་ན་དེ་ལྟར་དུ་བྲོ་འཁྲབ་རྒྱུའི་དཔའ་དང་བློ་ཁོག་ཡོད་པ་མཐོང་བྱུང་། ལས་འགུལ་གྱི་ཚད་གཞི་ཇེ་མཐོར་སོང་བ་དང་བསྟུན་ནས་མི་རིགས་དང་རྒྱལ་ཁབ་ཀྱི་མ་འོངས་པ་ཡང་ཇེ་གསལ་དུ་འགྲོ་ཡི་འདུག སྐབས་འདི་དང་དུས་འདི་ནི་རང་ཅག་ལ་གཞིས་བྱེས་ལྷན་འཛོམས་(འདི་ནས་རང་བཙན་དང་རང་སྐྱོང་གང་ཡིན་ཡང་རུང་།)འབྱུང་རྒྱུ་དང་འདས་གསོན་དཔའ་བོ་དཔའ་མོ་ཚོས་རེ་སྒུག་བྱས་པའི་སྐྱིད་པའི་ཉི་མ་དེ་ཡང་ཤར་རྒྱུའི་གོ་སྐབས་ཧ་ཅང་ཆེ་བ་མཐོང་བྱུང་། མི་ཁག་ཅིག་གིས་བཤད་ན། ཕྱི་ལོགས་ཀྱི་བོད་པ་རྒྱུ་ཆེན་དག་དང་སྲིད་ཀྱི་སྟེགས་བུར་འཛེག་ནས་རྒྱུ་དངོས་གསོག་སྒྲུབ་བྱ་རྒྱུའི་གོ་སྐབས་ཅན་དག་ཕྱིར་ལོག་འདོད་མེད་པར་བརྗོད་ཀྱང་། དེ་དག་གཡུག་ནས་༸གོང་ས་མཆོག་གཙོས་གསར་འབྱོར་བ་ཉི་མ་རེ་རེའི་ལྟོ་གོས་ལ་སེམས་ཁྲལ་དང་དཀའ་ངལ་གྱིས་གཙེས་ནས་སྡོད་པ་དག་ཕྱིར་ལོག་རྒྱུར་རེ་ནས་རྨི་ལམ་ཚུན་ཆད་གཏོང་གི་ཡོད། རང་གི་ཕ་ས་ཕ་ཡུལ་དུ་ལོག་འདོད་ཀྱི་ཡོད། རང་གི་ལྟེ་འཚལ་གཏོར་སའི་ས་གཞི་ལ་ལོག་འདོད་ཡོད། བྱིས་དུས་ཀྱི་རྨི་ལམ་ཐོག་མ་རྨི་སའི་ཕ་ཁྱིམ་དྲོན་མོ་ལ་ལོག་འདོད་ཡོད།

ཞོར་དུ་ཞུ་རྒྱུར། ངས་ཁ་སང་《དྲག་པོར་དྲག་པོས་རྒོལ་དགོས》ཞེས་པའི་བསམ་ཚུལ་ཞིག་བྲིས་ཏེ་ཀློག་མཁན་དག་གི་སྤྱན་སྔར་ཕུལ་མ་ཐག ནམ་རྒྱུན་བསམ་ཚུལ་སོགས་འབྲི་རྒྱུན་ཆད་ནས་རྩོམ་ཡིག་ཚང་མའི་གཤམ་དུ་གོར་ཐིག་ཅིག་བབ་ནས་འདུག་རྒྱུར་ཆགས་པའི་དུས་བབ་ཀྱི་བསམ་ཚུལ་རྩོམ་ཡིག་གི་གར་སྟེགས་སྟེང་། བསྐྱར་དུ་ཚ་ཚ་འུར་འུར་གྱི་དྲོད་རླབས་ཤིག་འཕྱུར་ནའང་། བདག་གི་ཁ་གཏད་དུ་ལང་མཁན་དང་རྒྱབ་སྐྱོར་ཞུ་མཁན་ཚང་མས་གནད་གཅིག་མ་རྟོགས་པར་དོན་མེད་དུ་འུར་གཏམ་སྒྲོག་སོང་བའི་སྣང་བ་ཞིག་སྐྱེས་སོང་ལ། སྔ་གཞུག་ཐམས་ཅད་ནས་དྲག་པོའི་ལས་ནི་ལོ་རྒྱུས་ཀྱི་ནག་ཉེས་ཤིག་ཡིན་པར་ངོས་འཛིན་གྱི་འདུག་པ་མཐོང་ནས་དགོད་བྲོ་བ་ཞིག་ཀྱང་བྱུང་། དོན་དངོས་ཀྱིས་བཤད་ན། ང་ཡང་དྲག་པོ་ལ་དགའ་མཁན་ཞིག་མིན་ནའང་། འདྲེ་ཉལ་བར་ཕག་གིས་འདྲོགས་སློང་ཟེར་བ་ལྟར་འུ་ཅག་གི་གཞོན་སྐྱེས་ཕལ་མོ་ཆེའི་སེམས་ན་ལྷོག་ལྷོག་ཏུ་འཁོལ་བའི་ཚོར་བའི་མདངས་དེ་ངས་སྔ་ཙམ་དང་མ་འཕྱི་བ་ཙམ་གྱིས་མི་བརྗོད་ཐབས་མེད་བྱུང་། དེ་ལྟ་ལོས་ཡིན་ཏེ། འུ་ཅག་ཚང་མས་མིག་ཆུ་འདོན་གྱི་མེད་ཀྱང་སེམས་ན་ངུ་ཡི་ཡོད་པ་རང་རང་གི་སེམས་ན་ཁྲིག་ཁྲིག་ཡིན་ཨང་།

ངས་གནད་དོན་མང་བོ་མི་ཤེས། ལྷག་པར་དུ་ངས་ཆབ་སྲིད་དེ་བས་ཀྱང་མི་ཤེས། ཡིན་ནའང་ངའི་སེམས་ན་དྭངས་མཐའ་མེད་པའི་སྡུག་བསྔལ་ཞིག་དང་ཁོང་ཁྲོ་ཞིག་ཡོད། དེའི་སྟབས་ཀྱིས་གསོད་གཏུབ་བཅོམ་གསུམ་གྱི་བསམ་བློ་ཞིག་ཀྱང་རང་བཞིན་གྱིས་འཁོར་འོང་གི་འདུག དེ་ནི་བཟོད་མ་ཐུབ་པའི་རྣམ་པ་ཞིག་ལོས་ཡིན། དེའི་སྟབས་ཀྱིས་རང་རེའི་གཞོན་སྐྱེས་ཚོས་ཀྱང་མགོ་འབུར་འབུར་ཚང་མ་དགྲ་དང་སྐྱོན་དུ་མི་རྩི་བར་དཔྱད་ཞིབ་དང་བསམ་ཚུལ་བརྗེ་རེས་བྱེད་པ་ལས། དོན་མེད་དུ་ཁ་བརྡུང་དང་ལྷག་དོན་མ་ཉེས་པའི་ཞྭ་མོ་མི་གཡོག་རྒྱུའི་རེ་སྐུལ་ཞུ།

༢༠༡༢ །༡༡། ༣༠ ལ་བྲིས།