རྒྱ་ནག་གིས་དྲག་རྒོལ་དྲག་ལངས་ལ་སྒུག་ཡོད།

འཇམ་བྷེ།

གཞིས་སྡོད་རིགས་མཐུན་གྱི་སྤུན་ཟླ་ཚོས་རྒྱ་ནག་དམར་པོའི་གཞུང་གི་གདུབ་རྩུབ་དང་དྲག་སྤྱོད་ལ་བཟོད་བསྲན་མ་ཚུགས་པ་དང་།  རང་རིགས་ཀྱི་རང་དབང་དང་བདེན་དོན་གྱི་ཆེད་དུ་རང་གི་གཅེས་བའི་ཚེ་སྲོག་མེར་བསྒྲོན་ཏེ་རྒྱ་ནག་གཞུང་གི་དྲག་རྩུབ་སྲིད་ཇུས་ལ་ངོ་རྒོལ་བསྟུན་མར་བྱུང་དང་འབྱུང་བཞིན་པ་རེད། དེ་ཡང་གཞིས་སྡོད་བོད་མི་དགུ་བཅུ་བརྒལ་བའི་ཞིག་གི་ཚེ་སྲོག་བདེན་པའི་མེ་ལྕེར་འཐིམས་སོང་བ་རེད།  འཐིམས་སོང་བའི་ཚེ་སྲོག་གི་གྲངས་དགུ་བཅུ་ནི་ཡིག་ཐོག་གི་གྲངས་དགུ་བཅུ་ཙམ་མ་རེད་ཚེ་སྲོག་གི་གྲངས་དགུ་བཅུ་རེད། 

མི་རིགས་ཤིག་གི་བདེ་སྡུག་མཁུར་བའི་བདེན་པའི་ཚེ་སྲོག་གི་མེ་ལྕེའི་འབར་ཤུགས་ཇེ་ཆེ་ནས་ཇེ་ཆེ་དང་ཇེ་མང་ནས་ཇེ་མང་རེད།  དེར་བརྟན།  མི་རིགས་འདིའི་བདེ་སྡུག་ཁུར་ཉམས་ལེན་དང་།  ཆགས་འཇིག་ལ་སེམས་ཁུར་བྱེད་ཀྱིན་པའི་གཞོན་སྐྱེས་སྐོར་ཞིག་གིས་ཀྱང་འུ་ཐུག་ཐབས་ཟད་དང་། ཞེ་སྡང་གི་ན་ཟུག་གནོན་མ་ཐུབ་པར་དྲག་པོའི་དམར་གཞུང་ལ་དྲག་རྒོལ་དང་དྲག་ལས་ཀྱི་སྦྱོར་བ་རྩོམ་དགོས་རབས་དང་།  བོད་རིགས་ཡོད་དོ་ཅོག་སྡེབ་ལངས་བྱེད་དགོས་པ་སོགས་ཚོར་ཤུགས་ཆེན་པོའི་སྒོ་ནས་རང་གཞུང་ལ་བསམ་འཆར་དང་རེ་སྒུག་བྱེད་ཀྱིན་ཡོད། 

གཞིས་སྡོད་བོད་མི་ཚོའི་ཛ་དྲག་གི་གནས་བབ་འདིའི་སྐོར་ལ་དོ་སྣང་དང་མནོ་བསམ་ཆེད་གཏོང་གིས་མི་རིགས་འདིའི་བདེ་སྡུག་དང་ཆགས་འཇིག་ལ་ཁུར་ཉམས་ལེན་བྱེད་མཁན་ཞིག་ཡིན་ཕྱིན། ཤ་གསེང་རུས་གསེང་ནས་གཟེར་བའི་ན་ཟུག་གིས་འདུག་མི་བཟོད་པ་ཁོ་ཐག་རེད། འོན་ཀྱང་།  དེ་ལྟར་བསམ་འཆར་དང་ལྟ་ཚུལ་འདོན་མཁན་དེ་དག་ངྷ་སར་གནས་བའི་ཁ་སྟོང་མགོ་སྟོང་ཚོའི་ཁ་སྟོང་ནང་གི་ཚིག་སྟོང་ཡིན་པ་དང་། ཡང་གུང་ཁྲན་ཏང་གི་རྒྱུ་རྔན་ལ་འདོན་རྔམ་ཆེ་བའི་རྒྱུག་ཁྱི་འགས་བོད་མིའི་ཞི་བའི་ཐབས་རྩོད་ཀྱི་སྟོབས་ཤུགས་ཉམས་རྒུད་དང་ཁ་གཞན་དུ་བསྒྱུར་བའི་གཡོ་ཐབས་དང་ཆོ་འཕྲུལ་ཡིན་ཚེ། བོད་མི་སྤྱི་སྒེར་ཡོངས་ཀྱིས་བློ་རིག་གཟུར་གནས་ཀྱི་མཉམ་འཇོག་བྱེད་དགོས་པ་གལ་ཆེན་རེད།

དེ་ལྟ་བུའི་ལྟ་ཚུལ་དང་བསམ་འཆར་དེ་རྣམས་གཞིས་སྡོད་བོད་མི་བྱིངས་དང་མི་བུ་རེ་ཟུང་གིས་མངོན་འདོན་ཡིན་ཚེ་ཉན་འཇོག་བྱེད་དགོས་པ་ལས་སྣང་མེད་དུ་གཏོང་མི་རུང་བར་ངེས་པར་དུ་དེ་ལ་གསལ་བཤད་དང་ལམ་སྟོན་ཞིག་གནང་གལ་ཆེ།  གལ་སྲིད་གཞོན་སྐྱེས་སྐོར་ཞིག་གིས་ཞེ་སྡང་གི་མེ་ལྕེ་དང་ལར་ཞེན་གྱི་ཚོར་ཤུགས་མནོན་མ་ཐུབ་པར་དྲག་ལས་དང་དྲག་རྒོལ་གྱི་ཐབས་རྩོད་ལམ་དུ་ཞུགས་ཏེ་ཆགས་སྒོ་ཆེན་པོ་ཞིག་བསླངས་ཚེ། གོ་སྐབས་ངང་སྒུག་བྱེད་བཞིན་པའི་དྲག་པོའི་དམར་གཞུང་གི་འདོད་ཐོག་ཏུ་རྟ་རྒྱུག་པ་རེད། དེ་ཡང་༧ གོང་ས་མཆོག་དང་རང་གཞུང་ལ་རྒྱ་ནག་དམར་གཞུང་གིས་མ་ཉེས་ཁ་གཡོག་དང་རྫུན་པ་བདེན་ སྒྲིག་གིས་འཇིགས་སྐུལ་རིང་ལུགས་པ་དང་དྲག་སྤྱོད་པའི་ཞྭ་ནག་བཙན་ཤེད་ཀྱིས་བསྐོན་ཅི་ཐབས་བྱེད་པ་སོགས་ལེགས་འགྲུབ་བྱུང་སོང་བ་རེད། 

དྲག་པོར་དྲག་རྒོལ་བྱེད་དགོས་ཟེར་བ་སོགས་ནི་བསམ་བློ་ནན་ནན་ཏིག་ཏིག་མ་བཏང་བར་ཧོལ་རྒྱུག་དང་ཚོར་ཤེས་མ་སྙོམས་པའི་སྐད་ཆ་ཞིག་རེད།  བཞི་བཅུ་ཞེ་གྲངས་ནས་ད་ལྟའི་བར་གྱི་གནས་བབ་དང་ཆགས་སྒོ་ལ་བསམ་གཞིགས་དང་ཕྱིར་རྟོག་ཞིབ་ཏུ་གནོངས་དང་། ང་ཚོ་བོད་མི་རིགས་ཀྱི་རྒན་དར་གཞོན་གསུམ་ལ་དམར་པོའི་གཞུང་གི་དྲག་དམག་གི་བཙན་འཛུལ་ལ་དྲག་རྒོལ་དང་དྲག་ལངས་བྱེད་པའི་སྙིང་རུས་མེད་སོང་བ་གཏན་ནས་མ་རེད་ལ།  དེ་ལྟར་བྱེད་པ་ཡང་སྔར་ནས་ད་བར་མང་མེད་ན་ཉུང་ཡོད་བ་མ་རེད། དེ་ལྟར་བྱེད་པའི་ཁྲོད་ནས་བོད་མི་ཁྲི་ཁྲི་འབུམ་འབུམ་གྱི་ཚེ་སྲོག་ཤོར་བ་སོང་བ་ལས།  ངེད་ཚང་ལ་རྒྱལ་ཁ་ཅི་ཞིག་ཐོབ་ཡོད། རྒྱ་དམག་ག་ཚོད་ཞིག་གསོད་ཐུབ་ཡོད། 

དེ་ཡང་རྒྱ་ནག་དམར་པོའི་གཞུང་གི་དམག་དཔུང་དང་གོ་མཚོན་གྱི་སྟོབས་ཤུགས།  བོད་མིའི་དྲག་རྒོལ་གྱི་སྟོབས་ཤུགས་ལས་ལྡབ་འགྱུར་ཀྱིས་ཆེ་དྲགས་པ་དང་།  ང་ཚོའི་མི་གྲངས་ལས་རྒྱ་དམར་གྱི་དམག་གྲངས་མང་དྲགས་པས་མ་རེད་དམ།  དེར་བརྟེན། ཅི་ཙམ་གྱིས་སྙིང་སྟོབས་ཆེར་སྐྱེད་ཀྱིས་དྲག་རྒོལ་དང་དྲག་ལངས་བྱས་ ན་ཡང་སྔར་བཞིན་བསྐྱར་ཏུ་བོད་མི་ཁྲི་སྟོང་འགའི་ཚེ་སྲོག་ལ་བརྡབ་གསིག་དང་བོད་མིའི་མི་གྲངས་ཉུང་བྲི་བྱེད་པ་ལས་གཞན་ཅི་ཞིག་ཡོད།  སྒོང་ང་རྡོ་ལ་བརྡབ་ན་སྒོང་ང་ཆག་རྒྱུ་ལས་རྡོ་ལ་ཅི་ཡང་གནོད་མི་ཐུབ་པའི་གནས་ལུགས་ལ་ཡང་བསམ་བློ་ཞིག་བཏང་ན་རེད། 

ཡང་གཅིག་བཤད་ན། རང་ཉིད་བདེ་ས་འཇམ་ས་ཞིག་ཏུ་བསྐོངས་ནས་ཁ་སྤོབས་ཆེན་པོས་མི་རིགས་ཀྱི་བདེ་ སྡུག་གི་ཆེད་དུ་དྲག་རྒོལ་དང་དྲག་ལངས་ཀྱི་ཐབས་རྩོད་བྱེད་དགོས་ཞེས་འུར་སྒྲོག་བྱས་ཏེ།  ཡང་བསྐྱར་བོད་མི་རིགས་ཀྱི་ཚེ་སྲོག་ཁྲི་ཁྲི་འབུམ་འབུམ་རྒྱ་ནག་དམར་གཞུང་གི་དྲག་པོའི་དམག་གི་མདུང་རྩེར་གཤམས་ནས་སྔ་ལམ་དུ་བརྫང་ན་ཁྱོད་ཚོའི་ཞེ་ནས་བཟོད་ཐབས་ཡོད་དམ། ད་དུང་མི་རིགས་ཀྱི་ཆེད་དུ་ཡིན་པའི་སྐྱོན་མེད་ཟེར་ན།  དངོས་གནས་ཁྱོད་ཚོ་ནི་རྒྱ་དམར་ལས་ཀྱང་སྙིང་རྗེ་མེད་པ་ཞིག་རེད་འདུག  ང་ཚོ་མི་རིགས་འདིའི་བདེན་པའི་ཐབས་རྩོད་ཀྱི་ཆེད་དུ་རིགས་མཐུན་གྱི་སྤུན་ཟླ་ཚོའི་ཚེ་སྲོག་ཤོར་བ་མང་མེད་ན་ཉུང་གཏན་ནས་མེད།

རྒྱ་ནག་དམར་པོའི་གཞུང་གིས་དྲག་པོའི་དམག་དཔུང་ས་ཡ་མང་པོ་བསྡུ་རུབ་ཀྱིས་སྐུང་སྒྲིག་དང་། དྲག་སྤྱོད་ཀྱི་གོ་མཚོན་འདྲ་མིན་བཟོས་བཟོས་ནས་དེ་དག་ང་ཚོ་ལྟ་བུའི་མི་རིགས་ཉམས་ཆུང་ཞིག་གི་ཐོག་ཚོད་ལྟ་དང་སྦྱོང་བརྡར་གྱི་གོ་སྐབས་ལ་སྒུག་ཡོད་པ་ཤེས་གསལ་རེད།  དེ་ལྟར་ཤེས་བཞིན་དུ་མདུང་ཁར་མཆོངས་དགོས་དོན་གང་ཡིན་ནམ། དེར་བརྟེན།  ང་ཚོའི་ཞི་བའི་ཐབས་རྩོད་ཀྱི་ལངས་ཕྱོགས་དང་ཆོད་སེམས་ལ་འགྱུར་བ་གཏན་ནས་འགྲོ་མི་རུང་། གཞིས་ལུས་བོད་མི་ཚོས་ཀྱང་དངོས་ཡོད་དང་གནས་ལུགས་དེ་དག་ཤེས་རྟོགས་ཀྱིས་ཆེས་མཐོའི་ཞི་རྒོལ་གྱི་ལམ་འདིར་(གསོན་བསྲེགས)མི་ཞུགས་ཐབས་མེད་བྱུང་བ་རེད། 

ཡང་གཅིག་བཤད་ན།  དྲག་རྒོལ་དང་དྲག་ལས་ཀྱི་སྦྱོར་བ་རྩོམ་དགོས་ཟེར་མཁན་ཚོས་རང་ཉིད་ཕག་ཏུ་བསྐུངས་ནས་དྲག་རྒོལ་དང་དྲག་ལས་ཀྱི་སྦྱོར་བ་རྩོམ་དགོས་ཞེས་འུར་སྒྲོག་བྱས་ཏེ། གཞན་འཆི་ལམ་དུ་བརྫངས་རྒྱུ་དེ་ཡིན་རྒྱུ་མ་རེད། དེ་མིན་པར་དོན་དངོས་ཡིན་ན།  དྲག་ལས་ཀྱི་ཐབས་ལམ་དང་གྲྭ་སྒྲིག་ཇི་ལྟར་ཡོད།  དྲག་ལས་ཀྱི་སྦྱོར་བརྡར་དང་གོ་རྟོགས་ཅི་ཙམ་ཡོད། དྲག་ལས་ཀྱི་འགད་རྫས་དང་གོ་མཚོན་གང་དུ་ཡོད།  དྲག་ལས་ཀྱི་སྦྱོར་བ་རྩོམ་པ་ལ་འདི་དག་ངེས་པར་ཏུ་ཚང་དགོས་པར་འདོད།  དེ་དག་གང་ཡང་མེད་ན་དྲག་ལས་རྩོམ་དགོས་ཟེར་བ་ནི་སྦོམ་བཤད་ཁོ་ན་རེད།

༢༠༡༢།༡༢།༥ ཉིན་ལ།