མཐུན་ཚོཊ་ཀྱི་དངུལ་རྩིས་འགྲོ་སྟངས་དེ་ཁྲིམས་མཐུན་དང་ཕྱི་གསལ་ནང་གསལ་ཞིག་བཟོས་ཡོད།

འདི་ལོ་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་རྒྱུན་ལས་གསར་འདེབས་བྱས་ཡོད་པ་ལྟར། ཚོགས་གཞོན་སྤྲོ་ཚིགས་ཆོས་གྲགས་ལགས་སུ་མ་འོངས་པར་མཐུན་ཚོགས་འདུ་ཡར་རྒྱས་གཏོང་ཕྱོགས་ཐད་འཆར་སྣང་ག་རེ་ཡོད་མེད་སྐོར་ནས་བཅར་འདྲི་ཞུས་ཡོད།

དྲི་བ། འདི་ལོ་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོཊ་ཀྱི་རྒྱུན་ལས་གསར་དུ་འདེམས་སྒྲུག་བྱས་ཡོད་པ་རེད། རྒྱུན་ལས་རྣམས་ལས་བགོས་ཇི་ལྟར་བྱས་ཡོད་མེད་དང་། ད་ལྟའི་ཆར་ཚོགས་པའི་དཀའ་ངལ་ཆེ་ཤོས་དེ་ག་རེ་རེད།

ལན། འདི་ལོའི་ཕྱི་ཟླ་དགུ་བའི་ནང་ནོར་གླིང་ཚོགས་ཁང་དུ་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་ཆེན་སྐབས་བཞི་བ་འཚོགས་ནས་ཉིན་གསུམ་རིང་རྩོམ་རིག་སོགས་བརྗོད་གཞི་སྣ་མང་ཐོག་བགྲོ་གླེང་དང་། དེ་བཞིན་མཐུན་ཚོགས་ཡར་རྒྱས་གཏོང་ཕྱོགས་སྐོར་ལ་གྲོས་བསྡུར། མཐར་རྒྱུན་ལས་གསར་པ་མི་བཅུ་གཅིག་འདེམས་བསྐོ་བྱས་ཡོད། དེ་དག་གི་ལས་བགོས་ནི། སྤྱི་ཟུར་ཆབ་བྲག་ལྷ་མོ་སྐྱབས་ཚོགས་གཙོ་དང་། སྤྲོ་ཚིགས་ཆོས་གྲགས་ཚོགས་གཞོན་དང་ཕྱི་འབྲེལ་དྲུང་ཆེ་གཅིག་ལྕོག གཡུ་སྒང་འོད་ཟེར་འཛིན་སྐྱོང་དྲུང་ཆེ་དང་དངུལ་གཉེར་གཅིག་ལྕོག སྨན་ཤེར་བློ་གྲོས་ཤེས་ཡོན་འགན་འཛིན་དང་རྩིས་པ་གཅིག་ལྕོག མེ་འོད་སྤྱི་ཚོགས་མེ་ལོང་གི་སྤྱི་ཁྱབ་རྩོམ་སྒྲིག་པ། རྡོ་རྗེ་ཚེ་རིང་དྲྭ་རྒྱའི་རྩོམ་སྒྲིག་པ་དང་གསར་འགོད་པ་རྒན་པ། གཟུངས་འདུས་སྐྱིད་སྤྱི་ཚོགས་མེ་ལོང་གི་རྩོམ་སྒྲིག་པ་དང་འགྲེམས་སྤེལ་པ། དྲུག་དཀར་མཚོ་རྩོམ་སྒྲིག་ལས་རོགས་དང་གསར་འགོད་པ། ཨ་རིག་དགེ་མཐོང་ཕྱོགས་བཞུགས་འབྲེལ་མཐུད་པ། རྫ་ཚེ་རིང་བཀྲ་ཤིས་དང་ཁ་སྒང་བསམ་གཏན་རྒྱ་མཚོ་གཉིས་ཕྱོགས་བཞུགས་རྒྱུན་ལས་བཅས་རེད། ད་ལྟའི་སྐབས་ང་ཚོ་མཐུན་ཚོགས་ཀྱི་དཀའ་ངལ་གཙོ་བོ་ནི། མཐུན་ཚོགས་ལ་མ་དངུལ་རྩ་བ་ནས་མེད་པ་དང་། དེ་སྔའི་ལས་བྱེད་པ་རེ་ཟུང་གི་ལས་ཀ་བྱེད་སྟངས་དབང་གིས་སྤྱི་ཚོགས་ཁྲོད་བག་ཆགས་ངན་པ་བཞག་པ་དང།  དགོས་ངེས་ཀྱི་ཆེ་མཐོང་དང་ངོས་འཛིན་ལེཊ་པོ་མེད་པ་དེ་རེད།

དྲི་བ། ད་སྐབས་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ལ་ཚོགས་མི་ག་ཚོད་ཡོད། མཐུན་ཚོགས་འདིའི་ཚོགས་མི་དག་གི་བརྩམས་ཆོས་ཁྲོད་དེང་རབས་བོད་ཀྱི་རྩོམ་རིག་གར་སྟེགས་སྟེང་གདེང་འཇོག་དང་ཚབ་མཚོན་རང་བཞིན་ཅན་གྱི་བརྩམས་ཆོས་གང་དག་ཐོན་ཡོད་མེད་ཀྱི་སྐོར་ནས་ངོ་སྤྲོད་མདོར་བསྡུས་ཤིག་གནང་རོགས།

ལན། ད་ལྟའི་སྐབས་སུ་ང་ཚོར་ཤེས་ཡོན་ཅན་གྱི་རྩོམ་པ་པོ་ཚོགས་མི་བརྒྱ་ཙམ་ཡོད། དེ་དག་ནི་སྐྱ་སེར་གཉིས་ཀ་དང་ཕོ་མོ་དབྱེར་མེད། དེ་བཞིན་བོད་ཆོལ་ཁ་གསུམ་གྱི་ཚོགས་མི་འདུས་ཡོད། འདས་པའི་ལོ་བཅུ་ལྷག་རིང་འདི་ག་མཐུན་ཚོགས་ཀྱི་ཚོགས་མི་རྩོམ་པ་པོ་ཚོས་བོད་ཕྱི་ནང་གི་རྩོམ་རིག་དུས་དེབ་དང་། ཆེད་དེབ། ཚགས་པར། དྲྭ་རྒྱ་སོགས་སུ་སྒྱུ་རྩལ་རྩོམ་རིག་གི་བརྩམས་ཆོས་གང་མང་གསར་རྩོམ་དང་འགྲེམས་སྤེལ་བྱས་ཡོད་པ་རེད་ལ། དེ་དག་གིས་བོད་ཀྱི་དེང་རབས་རྩོམ་རིག་གི་ལོ་རྒྱུས་ཁྲོད་གོ་བབ་ངེས་ཅན་ཞིག་འཛིན་ཐུབ་ཡོད་པ་རེད་བསམ་གྱི་འདུག ལྷག་པར་དུ་བཙན་བྱོལ་ལ་ཡོད་པའི་རྩོམ་པ་པོ་ཞིག་གི་ངོས་ནས་བོད་ཀྱི་རྩ་དོན་ཆབ་སྲིད་དང་འབྲེལ་བའི་རྩོམ་རིག་བརྩམས་ཆོས་དང་། སྤྱིར་བཏང་གི་དཔྱད་བརྗོད་རྩོམ་ཡིག་སོགས་གང་མང་བྲིས་ཏེ་དཔར་འགྲེམས་བྱས་ཡོད་པ་ནི། རྩོམ་པ་པོ་ཚོས་རང་མི་རིཊ་ཀྱི་བདེ་སྡུག་ལ་འགན་ཁུར་བ་ཞིག་ཡིན་པར་ངོས་འཛིན་བྱེད་ཀྱི་ཡོད།

དྲི་བ། མཐུན་ཚོགས་འདི་ནི་བོད་མི་ཤེས་ལྡན་པ་ཙམ་མ་ཡིན་པར་དམིགས་བསལ་རྩོམ་རིག་དང་ཐད་ཀར་འབྲེལ་བ་ཆགས་ཡོད་སྟབས། ཚོགས་མིའི་སྤུས་ཚད་ཐད་སྤྱི་ཚོགས་ནང་ལྟ་སྟངས་སྣ་ཚོགས་ཤིག་ཡོང་གི་ཡོད་པ་རེད། མ་འོངས་པར་རྒྱུན་ལས་གསར་བའི་ངོས་ནས་ཚོགས་མི་འདེམས་སྒྲུག་ཐད་བསྐྱར་ཞིབ་དང་ལེགས་སྒྲིག་ཇི་ལྟར་བྱ་འཆར་ཡོད་དམ།

ལན། ད་ལྟའི་སྐབས་སུ་སྤྱིར་བཏང་བཤད་ན་ང་ཚོའི་ཚོགས་མི་མང་ཆེ་བའི་སྤུས་ཚད་ཡག་ཐག་ཆོད་འདུག་བསམ་གྱི་ཡོད། རྩོམ་པ་པོ་སོ་སོའི་ཁྱད་ཆོས་དང་དགའ་ཁ་འཁྱེར་ཕྱོགས་མ་འདྲ་བའི་ཐོག་ནས་རྩོམ་ལུས་མ་འདྲ་བའི་རྩོམ་ཡིག་སྣ་ཚོགས་འབྲི་སྤེལ་བྱེད་ཀྱི་ཡོད་པ་རེད། ཁག་ཅིག་སྙན་ངག་དང་སྒྲུང་རྩོམ་སོགས་སྒྱུ་རྩལ་རྩོམ་རིག་དང་། ཁག་ཅིག་གིས་དཔྱད་རྩོམ་དང་སྤྱི་ཚོགས་གླེང་བརྗོད་སོགས་སྤྱིར་བཏང་གི་རྩོམ་ཡིག་འབྲི་བཞིན་ཡོད་པ་རེད། ཚོགས་མི་གསར་འཇུག་ཐད་འོས་ཆོས་དོན་ཚན་བདུན་ང་ཚོའི་སྒྲིག་གཞིའི་ནང་ཡོད་པ་གཞིར་བཟུང་། སྐབས་སོ་སོའི་རྒྱུན་ལས་རྣམས་ནས་གོ་བསྡུར་བརྒྱུད་ཐག་གཅོད་བྱེད་ཀྱི་ཡོད་པ་རེད། འོས་ཆོས་ནང་ཚད་ལྡན་གྱི་བརྩམས་ཆོས་གང་འཚམས་ཡོད་དགོས་པ་དང་། དེ་བཞིན་མཐུན་ཚོགས་ཀྱི་ཚོགས་མི་གཉིས་ནས་ངོ་སྤྲོད་འགན་ལེན་བྱེད་དགོས་སྟབས་གང་བྱུང་མང་བྱུང་ཡོང་ཤེས་ཀྱི་མ་རེད། མ་འོངས་པར་བོད་རིགས་ཡིན་པ་གང་ཞིག་ལ་དབྱིན་ཇི་དང་རྒྱ་ཡིག་སོགས་སྐད་ཡིག་གཞན་གྱི་སྒང་ནས་རྩོམ་ཡིག་འབྲི་མཁན་གྱི་རྩོམ་པ་པོ་ཡང་ཚོགས་མིར་ལེན་རྒྱུའི་འཆར་གཞི་དང་གྲོས་ཆོད་ཡོད་པ་རེད། ངས་གོ་སྐབས་འདི་བརྒྱུད་ནས་སྐད་ཡིག་གཞན་གྱི་ཐོག་རྩོམ་འབྲི་མཁན་གྱི་རང་རིགས་རྩོམ་པ་པོ་ཚོ་ང་ཚོའི་མཐུན་ཚོགས་ལ་ཞུགས་པར་འབོད་སྐུལ་དང་དགའ་བསུ་ཞུ་རྒྱུ་ཡིན།

དྲི་བ། པེན་སྤྱི་སྡོད་བོད་ཀྱི་རྩོམ་པ་པོའི་མཐུན་ཚོགས་འདི་ནི་རྒྱལ་སྤྱིའི་ངོས་ལེན་ཡོད་པའི་ཚོགས་སྡེ་ཞིག་ཆགས་ཡོད་པ་རེད། ཡིན་ནའང་། དངུལ་རྩིས་འགྲོ་སྟངས་ཀྱིས་མཚོན་པའི་ཚོགས་པར་ཁྲིམས་སྒྲིག་ཚགས་ཚུད་ཅིག་མི་འདུག་སྐད། འདིའི་ཐད་ཡར་རྒྱས་ཚགས་ཚུད་ཇི་ལྟར་གཏོང་འཆར་ཡོད་དམ།

ལན། དྲི་བ་འདི་ང་ཚོར་མཚོན་ན་གལ་གནད་ཆེན་པོར་ཆགས་ཀྱི་འདུག གསལ་བཤད་ཀྱི་གོ་སྐབས་གནང་བར་ཐུགས་རྗེ་ཆེ། ང་ཚོའི་མཐུན་ཚོགས་འདི་རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱི་ཡན་ལག་དང་། རྒྱ་གར་གཞུང་ལ་ཁྲིམས་མཐུན་དེབ་སྐྱེལ་བྱས་ཡོད་པའི་ཚོགས་པ་ཞིག་ཡིན་སྟབས། དངུལ་རྩིས་ཀྱི་འགྲོ་སྟངས་སོགས་ཁྲིམས་མཐུན་དང་གཙང་མ་ཞིག་དགོས་པ་གལ་ཆེ་ཤོས་སུ་མཐོང་། དེ་སྔ་ལས་ཀ་བྱེད་མཁན་འགའ་རེ་གློ་བུར་བརྗེ་སྤོར་དང་། ལས་ཀ་བྱེད་ཕྱོགས་དང་ཉམས་མྱོང་འདེང་མིན་སོགས་ཀྱི་དབང་གིས་མཐུན་ཚོགས་ལ་དངུལ་རྩིས་ཀྱི་འགྲོ་སྟངས་སོགས་ཁྲིམས་སྒྲིག་སྤུས་དག་ཅིག་བྱུང་མི་འདུག ང་ཚོ་སྐབས་བཞི་བའི་རྒྱུན་ལས་གསར་པ་ཚོའི་ངོས་ནས་དངུལ་རྩིས་ཀྱི་འགྲོ་སྟངས་དང་ལས་ཁུངས་ཀྱི་སྒྲིག་གཞི་སོགས་ཁྲིམས་མཐུན་སྤུས་དག་ཅིག་བཟོ་རྒྱུ་དེ་ལས་ཀ་ཨང་དང་པོར་བརྩིས་ཏེ། ཀིརྟིའི་དགེ་རྩ་ཚོགས་པ་སོགས་རྩིས་ཀྱི་འགྲོ་སྟངས་ཁམས་གཙང་ཁྲིམས་མཐུན་ཡོད་མཁན་གྱི་འབྲེལ་ཡོད་ཚོགས་པ་ཁག་ཅིག་ལ་འདྲི་ཞིབ་དང་དཔེ་ལེན་བྱས་ཏེ། ད་ལྟའི་ཆར་མཐུན་ཚོགས་ཀྱི་དངུལ་རྩིས་ཀྱི་འགྲོ་སྟངས་དེ་ཁྲིམས་མཐུན་དང་ཕྱི་གསལ་ནང་གསལ་ཡོང་བའི་སྒྲིག་གཞི་ཞིག་བཟོས་ཏེ་ལག་བསྟར་བྱེད་མུས་ཡིན། དེ་བཞིན་ལས་ཁུངས་ཀྱི་འཛིན་སྐྱོང་སྒྲིག་གཞིའི་ཟིན་བྲིས་ཤིག་ད་ལྟ་བཟོ་བཞིན་པའི་སྒང་ཡིན་ལ། མི་རིང་བར་རྒྱུན་ལས་རྣམས་འཚོགས་ཏེ་གོ་བསྡུར་དང་གཏན་འབེབས་བྱ་རྩིས་ཡོད། དེ་བཞིན་གལ་ཆེ་ཤོས་ཤིག་ནི་ད་ཕྱིན་ཕྱི་རྒྱལ་ཁག་ཏུ་རྒྱལ་སྤྱིའི་རང་བཞིན་ཚོགས་འདུ་དེ་འདྲ་འཚོགས་སྐབས་རྒྱུན་ལས་ཀྱི་འཐུས་ཚབ་ཅིག་མཉམ་ཞུགས་བྱེད་རྒྱུ་ལས་གཞན་ཚོགས་མི་རྣམས་སྔོན་ཆད་ལྟར་རྒྱན་དཀྲུག་དང་དངུལ་དངོས་ཀྱི་ཁེ་ཕན་ཙམ་ལ་བལྟས་ཏེ་ཕྱིར་ཡོང་མི་ཐུབ་པའི་རིགས་གཏོང་རྒྱུ་མིན་པའི་ཐག་གཅོད་བྱས་ཡོད། གལ་སྲིད་མཐུན་ཚོགས་ཀྱི་ཚོགས་མི་དེ་འདྲ་སྒེར་ངོས་ནས་ཚོཊ་ཞུཊ་གནང་འདོད་ཡོད་ན་དེ་ལ་མཐུན་ཚོགས་ཀྱི་ངོས་ནས་ཚོཊ་མི་ཡིན་པའི་ངོས་སྦྱོར་གནང་དགོས་པ་རེད།

དྲི་བ། བཙན་བྱོལ་སྤྱི་ཚོགས་ཁྲོད་ཏོག་ཙམ་གདེང་འཇོག་ཡོད་པའི་རྩོམ་པ་པོ་རྒན་རབས་པ་དག་མཐུན་ཚོགས་འདིའི་ཚོགས་མིའི་ཁྲོད་འཛུལ་ཞུགས་གནང་མི་འདུག དེ་བཞིན། སྔར་འཛུལ་ཞུགས་བྱེད་མཁན་ཁག་ཅིག་ཕྱིར་ཐོན་འདུག དེའི་རྒྱུ་རྐྱེན་གཙོ་བོ་གང་ལ་ཐུག་ཡོད་པར་དགོངས་ཀྱི་ཡོད་དམ། མ་འོངས་པར་རྩོམ་པ་པོ་རྒན་རབས་རྣམས་འཛུལ་ཞུགས་ཡོང་ཐབས་གནང་རྩིས་ཡོད་དམ།

ལན། མ་གཞི་ཚོགས་པ་གང་ཞིག་ཡིན་ནའང། དེའི་ནང་དུ་འཛུལ་ཞུགས་བྱེད་དང་མི་བྱེད། དེ་བཞིན་ཚོགས་ཁོངས་ནས་ཕྱིར་ཐོན་དང་མི་ཐོན་ཟེར་བ་དེ་མི་སོ་སོ་སྒེར་གྱི་ཐོབ་ཐང་རེད། ད་ལྟའི་སྐབས་སུ་ང་ཚོའི་མཐུན་ཚོགས་འདི་ལ་མཚོན་ན་ཚོགས་མི་རྙིང་པ་དང་དེ་བཞིན་གསར་དུ་ཞུགས་རྒྱུར་སྙན་ཞུ་འབུལ་མཁན་མང་པོ་འདུག ང་ཚོ་སྐབས་བཞི་པའི་རྒྱུན་ལས་ནས་འདས་པའི་ཟླ་གསུམ་ཙམ་རིང་ལས་ཀ་བྱས་རིང་ཚོགས་མི་གསར་ཞུགས་དང་། དེ་བཞིན་དེ་སྔ་ཚོགས་ཁོངས་ནས་རང་བཞིན་གྱིས་ཕྱིར་ཐོན་པའི་ཚོགས་མི་རྙིང་པ་ཚུར་ཞུགས་མཁན་དེ་འདྲ་ཡང་འདུག ཕྱིར་ཐོན་མཁན་ཟེར་བ་ནི་མཐུན་ཚོགས་ཀྱི་སྒྲིག་གཞི་ལྟར་ཚོགས་དངུལ་དུས་ཐོག་ལ་མ་ཕུལ་སྟབས་རང་བཞིན་གྱིས་ཚོགས་ཁོངས་ནས་ཐོན་པར་བརྩིས་པ་དང་། བསམ་བཞིན་དུ་མངོན་གསལ་དོད་པོར་ཕྱིར་འཐེན་བྱས་པ། རྒྱུན་ལས་ཀྱི་ངོས་ནས་ཚོགས་ཁོངས་ནས་རྩ་དགོངས་བཏང་པ་དེ་འདྲ་གང་ཡང་ཡོད་པ་རེད། བསམ་བཞིན་དུ་ཕྱིར་ཐོན་མཁན་དག་ནི་གཅིག་བྱས་ན་སྐབས་ཐོག་སོ་སོའི་རྒྱུན་ལས་ཚོའི་ལས་ཀ་བྱེད་སྟངས་དང་འབྲེལ་བ་གནང་ཕྱོགས་ཀྱི་ཐོག་ནས་ཕྱིར་འཐེན་བྱས་པ་དེ་འདྲ་ཡིན་སྲིད། དེ་སྔའི་རྒྱུན་ལས་ཚོས་ཕྱག་ལས་གནང་ཕྱོགས་ཐད་ལྟ་ཚུལ་ཡོད་ནའང་། མཐུན་ཚོགས་འདི་ཉིད་བོད་ཀྱི་རྩ་དོན་འཐབ་རྩོད་ཁྲོད་ཤེས་ཡོན་ཅན་གྱི་ཚོགས་སྡེ་གལ་ཆེན་ཞིག་ཆགས་ཡོད་སྟབས། དེ་སྔ་བསམ་ཚུལ་མཐུན་མིན་དང་འདོད་པ་ཁེངས་མིན་ལ་མ་ལྟོས་པར་བསྐྱར་དུ་ཚོགས་ཁོངས་སུ་འཛུལ་ཞུགས་གནང་སྟེ་ནུས་ཤུགས་མཉམ་འདོན་དང་། ཚོགས་པ་འདི་ཉིད་ཚགས་ཚུད་ཅིག་ཡོང་བར་དགོངས་ཚུལ་འདོན་རྒྱུའི་རེ་བ་བྱེད་བཞིན་ཡོད། དེ་བཞིན་ང་ཚོ་རྒྱུན་ལས་རྣམས་ཀྱིས་གཙོ་བོ་འགན་བླངས་ཏེ་མིང་མཐོང་ཡོད་པའི་རྩོམ་པ་པོ་རྒན་རབས་རྣམས་འདི་ག་མཐུན་ཚོགས་ནང་འཛུལ་ཞུགས་ཡོང་རྒྱུར་འབོད་སྐུལ་ཞུ་རྩིས་ཡོད། དེ་འདྲ་བྱུང་ན་གཅིག་ནས་རྩོམ་རིག་གི་ལས་དོན་ཐོག་གཅིག་གྱུར་གྱིས་ནུས་ཤུགས་འདོན་ཐུབ་པ་དང། གཉིས་ནས་འདི་ག་མཐུན་ཚོགས་ཀྱི་སྤུས་ཚད་ལའང་ཕན་ཐོགས་ས་རེད་བསམ་གྱི་འདུག

དྲི་བ། བཙན་བྱོལ་སྤྱི་ཚོགས་ནང་ཚད་འཛིན་རུང་བའི་རྩོམ་རིག་དུས་དེབ་དང་། རྩོམ་ཡིག་གི་རྒྱུ་སྤུས་ལ་ཁག་ལེན་གནང་མཁན་གྱི་རྩོམ་སྒྲིག་ཁང་སོགས་མེད་སྟབས། གསར་སྐྱེས་རྩོམ་པ་པོའི་འཚར་ལོངས་ཀྱི་ཁ་ཕྱོགས་ལ་བར་ཆད་སྣ་ཚོགས་འཕྲད་ཀྱིན་ཡོད་པ་རེད། སྤྱི་ཚོགས་རང་བཞིན་གྱི་དཀའ་ངལ་འདི་རིགས་ལ་མཐུན་ཚོགས་ཀྱི་ངོས་ནས་གདོང་ལེན་ཅི་ལྟར་གནང་རྩིས་ཡོད་དམ།

ལན། སྤྱིར་མི་རིགས་ཤིག་གི་རྩོམ་རིག་འཕེལ་རྒྱས་ལ་རྩོམ་རིག་བརྩམས་ཆོས་ཀྱི་སྤུས་ཚད་དང་གྲངས་ཀ་གཉིས་ཆ་གལ་ཆེན་པོ་རེད། བཙན་བྱོལ་ཁྲོད་སློབ་གྲྭ་ཁག་དང་འབྲེལ་ཡོད་ཚོགས་པ་ཁག་ནས་ནང་ཁུལ་འགྲེམས་སྤེལ་ལ་དམིགས་པའི་ཚགས་དེབ་ཁག་གི་སྟེང་བཀོད་པའི་སྦྱོང་བརྡར་རྩོམ་ཡིག་རྣམས་ཕུད། རྩོམ་རིག་གི་དུས་དེབ་དང་དྲྭ་རྒྱའི་ཐོག་མི་འབོར་ལ་དཔག་པའི་རྩོམ་ཡིག་གི་གྲངས་ཀ་མང་པོ་རེད་ལ། དེ་དག་ཁྲོད་བསམ་བློ་དང་སྒྱུ་རྩལ་ཕུན་སུམ་ཚོགས་པའི་བརྩམས་ཆོས་སྤུས་ཚད་ལྡན་པ་དེ་འདྲ་ཡང་གང་མང་འདུག་བསམ་གྱི་ཡོད། མི་སྒེར་སོ་སོའི་ཆེད་སྒྲིག་བྱས་པའི་རྩོམ་དེབ་ཁག་ལ་ནི་སྤུས་ཚད་ཡོད་མེད་ཅི་རིགས་ཡོང་གི་ཡོད་ནའང་། མང་གཙོའི་ལུང་པའི་ནང་སྨྲ་བརྗོད་དང་དཔར་སྐྲུན་རང་དབང་ཡོད་སྟབས་སུས་ཀྱང་འདོན་མི་ཆོག་ཅེས་བཀག་འགོག་བྱེད་ཐུབ་ཀྱི་མ་རེད། འོན་ཀྱང་ཀློག་པ་པོ་དང་འབྲེལ་ཡོད་དཔྱད་བརྗོད་པའི་ངོས་ནས་དཔྱད་བརྗོད་དང་གདེང་འཇོག་བྱས་ཏེ་དགེ་འདོན་སྐྱོན་སེལ་བྱེད་རྒྱུ་གལ་ཆེན་རེད། གསར་སྐྱེས་རྩོམ་པ་པོ་ཚོ་བསྐྱེད་བསྲིངས་ཡག་པོ་ཞིག་བྱེད་རྒྱུའི་འགན་དེ་འབྲེལ་ཡོད་རྩོམ་རིག་དགེ་རྒན་ཁག་དང་། ཚགས་དེབ་སོགས་ཀྱི་རྩོམ་སྒྲིག་པ་སོགས་ལ་ཡོད་པ་རེད་བསམ་གྱི་འདུག འདི་ག་མཐུན་ཚོགས་ངོས་ནས་བཙན་བྱོལ་བོད་མིའི་མཐོ་སློབ་དང་སློབ་གྲྭ་ཁག་ཏུ་པེན་འཛིན་གྲྭའི་ངོ་བོའི་ཐོག་ནས་རྩོམ་རིག་ཟབ་སྦྱོང་སྤྲོད་པ་དང་། དེ་བཞིན་སྤྱི་ཚོགས་མེ་ལོང་ཐོག་གསར་རྩོམ་བྱེད་མཁན་གྱི་སློབ་མ་ཚོར་དམིགས་ནས་ལེ་ཚན་ཞིག་ཀྱང་གོ་སྒྲིག་བྱས་ཏེ་རྩོམ་ཡོན་འབུལ་རྒྱུ་བྱས་ནས་གསར་སྐྱེས་རྩོམ་པ་པོ་ཚོར་ལམ་སྟོན་དང་སྦྱོང་བརྡར་སྤྲོད་ཀྱི་ཡོད། དེས་གསར་རྩོམ་གྱི་ཁ་ཕྱོགས་དང་རྩོམ་ཡིག་གི་སྤུས་ཚད་ཡག་པོ་ཡོང་བར་གང་འཚམ་ཕན་ཐོགས་ཡོང་བའི་རེ་བ་བྱེད་ཀྱི་ཡོད།

དྲི་བ། བོད་ནང་རྒྱའི་བཙོན་འོག་ཚུད་མཁན་དང་། དེ་བཞིན། འགྲོ་འདུག་རང་དབང་མེད་པར་བཀག་སྡོམ་མནར་གཅོད་མྱོང་བཞིན་པའི་རྩོམ་པ་པོ་མང་དག་ཅིག་ཡོད་པ་ལྟར། རྒྱལ་སྤྱིའི་པེན་མཐུན་ཚོགས་ལ་སྙན་ཞུ་ཕུལ་ཏེ་ཁོང་ཚོའི་བདེ་སྡུག་ཐད་གཟིགས་རྟོག་ཡོང་ཐབས་གང་དག་གནང་ཡོད་པ་དང་། མ་འོངས་པར་ཇི་ལྟར་གནང་རྩིས་ཡོད།

ལན། བོད་ནང་གི་ཛ་དྲག་གནད་དོན་སྐོར་དང་། རྒྱ་དམར་གཞུང་གིས་ལག་བསྟར་བྱེད་བཞིན་པའི་སྲིད་བྱུས་དང་བྱེད་ཐབས་ལ་ངོ་རྒོལ་རྩོམ་ཡིག་བྲིས་ཏེ་བཙོན་ཏུ་ཚུད་པའི་རང་རིགས་རྩོམ་པ་པོ་མང་པོ་ཞིག་ཁྲིམས་འོག་ཏུ་མནར་གཅོད་མྱོང་བཞིན་ཡོད་པ་རེད། དེ་ཚོའི་ནང་ཁག་གཅིག་ནི་ལོ་མང་རིང་ཁྲིམས་ཐག་བཅད་ཡོད་པ། དཔེར་ན། མཆོད་མེ་དྲ་བ་གསར་འཛུགས་བྱེད་མཁན་དཀོན་མཆོག་ཚེ་འཕེལ་ལ་ལོ་བཅོ་ལྔ་དང་། ནག་ཆུ་ནས་ཡིན་པའི་ལྷ་མོ་སྐྱབས་ལ་ཆབ་སྲིད་ཀྱི་ལས་འགུལ་སྤེལ་བར་བསྙད་དེ་ལོ་བཅོ་ལྔ། ལྷིང་འཇགས་མེད་པའི་ཧི་མ་ལ་ཡ་ཞེས་པའི་རྩོམ་ཡིག་འབྲི་གནང་མཁན་སྒྲོལ་མ་སྐྱབས་ལ་ལོ་བཅུའི་ཁྲིམས་ཐག་བཅད་ཡོད་པ་རེད། དེ་བཞིན་ཁག་གཅིག་བཙོན་གྲོལ་ཐོབ་ཀྱང་བཙོན་ཁང་ནང་མནར་གཅོད་དབང་གིས་དབང་པོ་སྐྱོན་ཅན་དང་དྲན་ཤེས་རྒྱུན་ལྡན་མ་ཡིན་པ་བཟོས་ཡོད་པ་རེད། དཔེར་ན་ངའི་ཕ་ཡུལ་དང་ཞི་བའི་བཅིང་འགྲོལ་ཞེས་པའི་རྩོམ་ཡིག་འབྲི་མཁན་བྱ་མདོ་རིན་ཆེན་བཟང་པོ་ལྟ་བུར་མཚོན་ན། དང་ཐོག་བཙོན་འཇུག་བྱེད་སྐབས་ཐང་ཐང་ཡིན་ནའང་། བཙོན་ནས་ཕྱིར་བཏོན་དུས་དབང་པོ་སྐྱོན་ཅན་དང་དྲན་ཤེས་རྒྱུན་ལྡན་མ་ཡིན་པ་བཟོས་ཡོད་འདུག དེ་བཞིན་བཙོན་ཁང་ནས་ཕྱིར་བཏོན་ཡོད་ཀྱང་། བསམ་བློ་དང་འགྲོ་འདུག་སྤྱོད་གསུམ་གང་ཅིར་རྒྱ་དམར་གྱི་དམ་དྲག་འོག་ཡོད་པའི་རྩོམ་པ་པོ་ཧ་ཅང་མང་པོ་རེད། དཔེར་ན་ཚེ་རིང་འོད་ཟེར། ཞོགས་དུང་ངམ་བཀྲ་རྒྱལ། སྒོ་ཤེས་རབ་རྒྱ་མཚོ། རང་བྱུང་། འཇམ་དབྱངས་སྐྱིད་སོགས་མང་པོ་ཡོད་པ་རེད། རྩོམ་བྲིས་སོགས་ལ་བརྟེན་ནས་རྩོམ་པ་པོ་ལས་གནས་ནས་ཕུད་པ་དེ་འདྲའང་མང་པོ་རེད། བཙོན་འོག་ཏུ་མནར་གཅོད་མྱངས་དང་མྱོང་བཞིན་པའི་རང་རིགས་རྩོམ་པ་པོ་དེ་ཚོའི་སྐོར་ལ་རྩད་གཅོད་ཡག་པོ་དང། དེ་ཚོའི་ཆེད་དུ་ལས་འགུལ་ཁ་ཚ་དགོས་གཏུགས་སྤེལ་རྒྱུ་ནི་ང་ཚོ་ཕྱི་ལོགས་སུ་ཡོད་པའི་གཞུང་སྒེར་ཚོགས་གསུམ་དང། ལྷག་པར་དུ་ང་ཚོའི་མཐུན་ཚོགས་ལ་མཚོན་ན། ཐད་ཀར་འབྲེལ་བ་ཡོད་པའི་ལས་འགན་ཞིག་ཆགས་བསྡད་ཡོད་པ་རེད། འདི་ག་མཐུན་ཚོགས་ངོས་ནས་རྒྱལ་སྤྱིའི་པེན་ལ་བོད་ནང་གི་བཙོན་འོག་གི་རྩོམ་པ་པོ་རྣམས་ཀྱི་སྐོར་གནས་ཚུལ་གང་ཐུབ་བཏང་ཡོད་པ་དང། རྒྱལ་སྤྱིའི་པེན་གྱི་བཙོན་འོག་ཏུ་ཚུད་པའི་རྩོམ་པ་པོའི་སྡེ་ཚན་གྱི་མིང་གཞུང་ནང་བོད་ཀྱི་རྩོམ་པ་པོ་ཚོའི་མིང་ཐོ་ཚུད་ཡོད་པ་དང། ཚོགས་འདུ་སྔ་ཕྱིའི་ཐོག་དེ་ཚོའི་སྐོར་གླེང་སློང་དང་གྲོས་ཆོད་འཇོག་ཐུབ་པ་བྱུང་ཡོད། དེ་བཞིན་པེན་གྱི་ཡན་ལག་ཚོགས་པ་ཁག་ནས་འཛམ་གླིང་གི་རྒྱལ་ཁབ་མ་འདྲ་བའི་ནང་ལོ་རེ་བཞིན་བཙོན་འོག་རྩོམ་པ་པོའི་རྗེས་དྲན་ཉིན་མོར་ང་ཚོ་བོད་ཀྱི་བཙོན་འོག་རྩོམ་པ་པོ་ཚོའི་སྐོར་ཀྱང་གླེང་སློང་དང་རྗེས་དྲན་བྱེད་ཀྱི་ཡོད་པ་རེད། ཉེ་ཆར་འདི་ག་མཐུན་ཚོགས་ངོས་ནས་ཀྱང་ཕྱི་ཟླ་བཅུ་གཅིག་པའི་ཚེས་བཅོ་ལྔ་ཉིན་རྡ་རམ་ས་ལར་བཙོན་འོག་ཏུ་ཡོད་པའི་རྒྱལ་སྤྱིའི་རྩོམ་པ་པོའི་ཉིན་མོ་དང་འབྲེལ་ནས་རང་རིགས་རྩོམ་པ་པོ་ཚོའི་ཆེད་དུས་དྲན་སྲུང་བརྩིའི་བགྲོ་གླེང་འཚོགས་ཡོད་ལ། དེའི་གནས་ཚུལ་རྒྱལ་སྤྱིའི་པེན་ལ་བཏང་ཡོད། ང་ཚོའི་མཐུན་ཚོགས་ཀྱི་ངོས་ནས་བཙོན་འོག་ཏུ་ཡོད་པའི་རྩོམ་པ་པོ་རྣམས་ཀྱི་གནས་ཚུལ་བརྩད་གཅོད་བྱས་ཏེ་ཁུངས་ལྡན་གྱི་སྙན་ཐོ་ཞིག་འདོན་རྒྱུ་དང། དེ་བཞིན་རྩོམ་པ་པོ་བཙོན་དུ་བཅུག་པ་བྱུང་ཚེ་དུས་ཐོག་ལ་གནས་ཚུལ་འཚོལ་བསྡུ་བྱས་ཏེ་འབྲེལ་ཡོད་གཞུང་སྒེར་དང་གསར་ལམ་ཁག་ཏུ་ཁྱབ་བསྒྲགས་ཡོང་ཐབས་དང། རྒྱལ་སྤྱིའི་པེན་སོགས་འབྲེལ་ཡོད་ཚོགས་སྡེར་གནས་ཚུལ་སྙན་ཞུ་འབུལ་རྒྱུ། ཁོ་ཚོ་བཙོན་འཇུག་གི་རྒྱུ་རྐྱེན་ཆགས་པའི་བརྩམས་ཆོས་དཔར་འགྲེམས་སོགས་ཡོང་ཐབས་ལ་འབད་རྩིས་ཡོད།

དྲི་བ། སྤྱིར་བཙན་བྱོལ་སྤྱི་ཚོགས་ནང་རྩོམ་རིག་གི་གནས་བབ་སྐྱོ་བོ་རེད། མ་འོངས་པར་སྤྱི་ཚོགས་ཁྲོད་རྩོམ་རིག་ལ་གདེང་འཇོག་ཡོང་ཐབས་དང་། རྩོམ་རིག་གིས་སྤྱི་ཚོགས་ཁྲོད་ནུས་པ་འཐོན་ཐུབ་ཐབས་ལ་འབད་བརྩོན་ཇི་ལྟར་གནང་རྩིས་ཡོད།

ལན། མི་འབོར་དང་ཆ་རྐྱེན་ལ་ལྟོས་ནས་བཤད་ན་བཙན་བྱོལ་ནང་རྩོམ་རིག་གི་གནས་བབ་ཧ་ཅང་སྐྱོ་བོ་རེད་བསམ་གྱི་མེད། འདི་ག་མཐུན་ཚོགས་ཀྱི་ངོས་ནས་ཟླ་རེ་བཞིན་འདོན་སྤེལ་བྱེད་བཞིན་པའི་སྤྱི་ཚོགས་མེ་ལོང་ཐོག་རྩོམ་རིག་གི་ལེ་ཚན་བཞག་ཡོད་ལ། དེ་བཞིན་རྩོམ་རིག་སྐོར་གྱི་ཟབ་སྦྱོང་དང་བགྲོ་གླེང་སོགས་གོ་སྒྲིག་བྱེད་བཞིན་ཡོད། བོད་ཕྱི་ནང་གཉིས་ནས་བལྟ་ཀློག་ཐུབ་པའི་ང་ཚོའི་མཐུན་ཚོགས་ཀྱི་དྲྭ་རྒྱའི་ཐོག་རྩོམ་ལུས་སྣ་ཚོགས་ཀྱི་རྩོམ་རིག་བརྩམས་ཆོས་འགོད་སྤེལ་བྱེད་ཀྱི་ཡོད། གཞན་ཡང་ང་ཚོའི་ངོས་ནས་རྩོམ་རིག་འགྲན་བསྡུར་ཞིག་སྤེལ་ཐབས་ལ་འབད་བརྩོན་བྱ་རྩིས་ཡོད།

དྲི་བ། ད་ལྟའི་ཆར་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ནི་དར་རྒུད་དང་གླེང་སློང་འདྲ་མིན་འོག་ཚུད་པའི་ཚོགས་སྡེ་ཞིག་ཏུ་གྱུར་ཡོད་པ་རེད། མ་འོངས་པར་ཚོགས་སྡེ་འདི་མིང་དོན་མཚུངས་ཤིང་གསོན་ཤུགས་ལྡན་པ་ཞིག་ཡོང་རྒྱུར་རེ་བ་དང་བློ་སྤོབས་ཡོད་དམ།

ལན། སྤྱིར་བཏང་ཚོགས་པ་གང་དང་གང་ཡིན་རུང་སྐྱོན་དང་གླེང་རྙོག་མེད་ས་དཀོན་པོ་རེད། ཡིན་ནའང་། གནད་འགག་ཆེ་ཤོས་ནི་ནོར་འཁྲུལ་ངོས་ཟིན་དང་ཉམས་མྱོང་ཕྱོགས་བསྡོམས་བྱས་ཏེ་ཕྱིན་ཆད་ཤུགས་སྣོན་རྒྱག་རྒྱུ་དེ་རེད། ང་རང་སྒེར་ངོས་ནས་མཚོན་ན། མཐུན་ཚོགས་འདི་མིང་མཐོང་དང་སྤུས་ཚད་ལྡན་པའི་ཤེས་ཡོན་ཅན་གྱི་ཚོགས་སྡེ་ནུས་ལྡན་བཟོ་ཐུབ་ན། འཆི་གསོན་གྱི་འགག་རྩར་ཐུག་པའི་རང་མི་རིགས་ཀྱི་བདེན་པའི་འཐབ་རྩོད་ཁྲོད་ནུས་པ་ཆེན་པོ་འདོན་ཐུབ་པའི་ཚོགས་སྡེ་གལ་ཆེན་ཞིག་ཆགས་རྒྱུའི་རེ་བ་བྱེད་བཞིན་ཡོད། རྒྱུ་མཚན་དེ་ལ་བརྟེན་ནས་ང་དང་ངའི་ལས་རོགས་ཚང་མས་ལྷག་བསམ་རྣམ་དག་གིས་ཤུགས་སྣོན་རྒྱག་བཞིན་ཡོད་ལ། ཀུན་སློང་རྣམ་དག་ཅིག་ཁྱེར་ནས་ལས་ཀ་ཡག་པོ་ཞིག་བྱས་ན་འབྲས་བུ་ཡག་པོ་ཞིག་འབྱུང་ཐུབ་པའི་རེ་བ་དང་ཡིད་ཆེས་བྱེད་ཀྱི་ཡོད། ཐུགས་རྗེ་ཆེ།

གསར་འགོད་པ། ཚེ་རིང་རྒྱལ།

༼བོད་ཀྱི་དུས་བབ་སྤྱིའི་འདོན་ཐེངས་ ༥༧༤ ལས་འདིར་བདམས་བཀོད་བྱས།༽