སི་པན་རྒྱལ་ཁབ་ཀྱི་རང་སྐྱོང་ས་ཁུལ་གྷེལ་ལི་ཤི་ནང་མེ་འཁོར་བརྡབ་སྐྱོན་ཤོར་ཏེ་འགྲུལ་བཞུད་པ་ ༧༧ རྐྱེན་འདས་དང་མི་ ༡༤༠ ཙམ་ལ་རྨས་སྐྱོན་ཚབས་ཆེན་ཕོག་ཡོད་འདུག
ཁ་སང་ཕྱི་ཚེས་ ༢༤ ཉིན་གྱི་ཕྱི་དྲོ་ཡུལ་དེའི་ཆུ་ཚོད་༨།༤༡ སྟེང་སི་པན་གྱི་རྒྱལ་ས་ནས་གྷེལ་ལི་ཤིའི་གྲོང་ཁྱེར་ཧྥེ་རོལ་( Ferrol)ཞེས་པར་སྐྱོད་བཞིན་པའི་མྱུར་བགྲོད་མེ་འཁོར་ཞིག་སི་པན་ནུབ་བྱང་རང་སྐྱོང་མངའ་ཁུལ་གྷེལ་ལི་ཤིའི་གྲོང་ཁྱེར་སན་ཤི་ཡ་གྷོ་ཊི་( Santiago de Compostela) ཡི་ཉེ་འཁྲིས་སུ། ལྕགས་ལམ་ཐོག་ནས་འགྲེད་བརྡབ་ཤོར་ཏེ་མི་ ༧༧ རྐྱེན་འདས་དང་། མི་ ༡༤༠ ཙམ་ལ་རྨས་སྐྱོན་བཟོས་ཡོད་འདུག
སི་པན་ལྕགས་ལམ་བཟོ་སྐྲུན་ལས་ཁུངས་ཀྱིས་མེ་འཁོར་དེའི་ནང་འགྲུལ་བ་དང་ཞབས་ཞུ་བ་ཁྱོན་མི་ ༢༣༨ ཙམ་ཡོད་པ་དང་། མེ་འཁོར་དེ་གྲོང་ཁྱེར་སན་ཤི་ཡ་གྷོ་ཊིའི་ས་ཚུགས་སུ་མ་འབྱོར་བའི་སྤྱི་ལེ་ ༤ ཙམ་གྱི་སར་འགྲེད་བརྡབ་ཤོར་ཡོད་ཅིང་། ད་སྔ་རྒྱུ་རྐྱེན་ཅི་ཡིན་དང་མི་ཤི་རྨས་ཀྱི་གྲངས་ཀ་ཏན་ཏན་ཞིག་བཤད་ཐབས་མེད་སྐོར་སི་པན་བརྙན་འཕྲིན ( AFP)བརྒྱུད་བརྗོད་འདུག
ལྕགས་ལམ་ཆེད་མཁས་པས་བརྗོད་པ་ལྟར་ན། མེ་འཁོར་བརྡབ་སྐྱོན་བྱུང་དོན་གཙོ་བོ་ནི། མེ་འཁོར་ཁ་ལོ་བས་ལྕགས་ལམ་ཅུང་ཁུག་ཀྱོག་ཡིན་ས་རུ་མེ་འཁོར་མྱུར་ཚད་ཚོད་འཛིན་མ་བྱས་སྟབས། མེ་འཁོར་ལྕགས་ལམ་ལས་ཁ་ཤོར་ཏེ་འགྲེད་བརྡབ་དོན་རྐྱེན་བྱུང་བ་ཡིན་ཚུལ་བརྗོད་ཡོད་པ་དང་། སི་པན་གཞུང་ཕྱོགས་ནས་ད་སྔ་དོན་རྐྱེན་དེའི་སྐོར་ལ་གསལ་བཤད་གང་ཡང་བྱས་མི་འདུག
དོན་རྐྱེན་དེ་བྱུང་མ་ཐག་སི་པན་གཞུང་གིས་ཆེད་མཁས་རྟོག་ཞིབ་མི་སྣ་དང་སྨན་པའི་རུ་ཁག་རྒྱལ་ས་མལ་ཊིར་ཊི( Madrid) ནས་ཆེད་བཏང་གནམ་གྲུ་བརྒྱུད་ས་གནས་སུ་བཏང་སྟེ་གནས་ཚུལ་ལ་ཞིབ་འཇུག་དང་རྨས་མ་མྱུར་སྐྱོབ་བྱེད་བཞིན་ཡོད་པ་དང་། དེ་རིང་སྔ་དྲོར་སི་པན་གྱི་སྲིད་བློན་རཱ་ཇོ( Mariano Rajoy)ལགས་ཡུལ་དེར་ཕེབས་ཏེ་འདས་གྲོངས་སུ་ཕྱིན་པ་ཚོར་གདུང་སེམས་མཉམ་སྐྱེད་དང་རྨས་སྐྱོན་ཕོགས་མཁན་དག་ལ་ཐུག་འཕྲད་སེམས་གསོ་བྱས་ཡོད་འདུག
དེ་རིང་ཕྱི་ཚེས་ ༢༥ ཉིན་ནི་ཡུལ་དེར་སྐད་གྲགས་ཆེ་བའི་ཡེ་ཤུའི་སྐྱེས་ཆེན་སཱན་ཌི་ཇམ་སི་ ( Saint James) མཆོག་ལ་རྗེས་དྲན་བྱེད་པའི་ཡེ་ཤུ་ཆོས་ལུགས་ཀྱི་དུས་ཆེན་ཞིག་ཏུ་ཁེལ་ཡོད་ཀྱང་། མེ་འཁོར་བརྡབ་སྐྱོན་གྱི་གནས་ཚུལ་དེ་བྱུང་འཕྲལ་རྗེས་དྲན་མཛད་སྒོ་མཚམས་འཇོག་བྱས་ཏེ་མྱ་ངན་དང་གདུང་སེམས་མཉམ་སྐྱེད་ཞུས་ཡོད་འདུག སྐྱེས་ཆེན་སཱན་ཌི་ཇམ་སི་མཆོག་ནི་སྟོན་པ་ཡེ་ཤུའི་ཐུགས་སྲས་ ༡༢ ཡོད་པའི་ནང་གི་གཅིག་ཡིན་ཞིང་། ཁོང་སྐུ་གྲོངས་རྗེས་གྲོང་ཁྱེར་འདིའི་ནང་དུར་སྦས་བྱས་ཡོད་པའི་ལོ་རྒྱུས་ཡོད་འདུག
ཐེངས་འདིའི་མེ་འཁོར་དོན་རྐྱེན་ནི་སི་པན་གྱི་མེ་འཁོར་དོན་རྐྱེན་གྱི་ལོ་རྒྱུས་ཁྲོད་མི་གྲངས་མང་ཤོས་དེ་ཆགས་ཡོད་འདུག
གསར་འགོད་པ། ལྷ་སྐྱབས་རྒྱལ།
