རྒྱ་ནག་གཞུང་གིས་ ༢༠༠༨ ལོར་བོད་མདོ་སྨད་ཀན་ལྷོ་ཀླུ་ཆུ་རྫོང་དུ་བོད་མི་ཚོས་རྒྱ་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་གནང་སྐབས་འཛིན་བཟུང་བྱས་ཏེ། ལོ་ ༨ དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པའི་ཀླུ་ཆུ་རྫོང་ཤིས་ཚང་དགོན་པའི་གྲྭ་ཆོས་གྲགས་རྒྱ་མཚོ་ལགས། དེ་རིང་ཚེས་ ༢༡ ཉིན་གྱི་སྔ་དྲོ་ཀན་སུའུ་ལན་ཀྲུའུ་གྲོང་ཁྱེར་གྱི་བཙོན་ཁང་གིས་ཀློད་གྲོལ་བཏང་ཡོད་པ་དང་། ཕྱིར་རང་ཡུལ་དུ་འབྱོར་སྐབས་ནང་མི་ཉེ་འབྲེལ་དང་ས་གནས་སྐྱ་སེར་གཉིས་ཀྱིས་ཕེབས་བསུ་བྱས་ཡོད་འདུག
ངྷ་ས་གནས་སྡོད་འཕྲིན་ལས་ལགས་ཀྱིས་བརྗོད་པ་ལྟར་ན། རང་ལོ་ ༣༡ ཡིན་པའི་གྲྭ་ཆོས་གྲགས་རྒྱ་མཚོ་ལགས་ནི་ཀན་ལྷོ་ཁུལ་ཀླུ་ཆུ་རྫོང་ཤིས་ཚང་ཚོ་བ་བཅུ་གཉིས་ཀྱི་ནང་ཚན་རྒྱ་སྒུར་སྡེ་བ་ནས་ཡིན་པ་དང་། ཆུང་དུས་ནས་ཤིས་ཚང་དགོན་པའི་ཆོས་སྒོར་ཞུགས་ཏེ་སློབ་གཉེར་གནང་ཡོད་འདུག ༢༠༠༨ ལོར་ཀླུ་ཆུ་རྫོང་དུ་སྐྱ་སེར་གཉིས་ཀྱི་རྒྱ་ནག་གཞུང་ལ་ཞི་བའི་ངོ་རྒོལ་གནང་སྐབས་མཉམ་ཞུགས་བྱས་ཏེ། ལོ་དེའི་ཕྱི་ཟླ་ ༤ བའི་ཚེས་ ༡༥ ཉིན་རྒྱ་ནག་གཞུང་གིས་ཁོང་གཙོས་པའི་ཤིས་ཚང་དགོན་པའི་གྲྭ་བ་ ༢༣ དང་ས་གནས་ཀྱི་མི་མང་པོ་འཇུ་བཟུང་གིས་གཅར་རྡུང་བཏང་སྟབས། ཁོང་དང་གྲྭ་འཇམ་དབྱངས་བསྟན་པ་གཉིས་ཀྱིས་སྐབས་དེའི་ལས་འགུལ་དང་འབྲེལ་བའི་ནག་ཉེས་ཆ་ཚང་ངོས་ལེན་གནང་ཡོད་པ་དང་། ཕྱིས་སུ་རྒྱ་ནག་གཞུང་གིས་སྐབས་དེར་འཛིན་བཟུང་བྱས་པའི་སྐྱ་སེར་བོད་མི་གཞན་རྣམས་ཀློད་གྲོལ་བཏང་སྟེ། གྲྭ་ཆོས་གྲགས་རྒྱ་མཚོར་ལོ་ ༨ དང་། འཇམ་དབྱངས་བསྟན་པར་ལོ་ ༧ བཅས་ཀྱི་བཙོན་འཇུག་ཁྲིམས་ཐག་བཅད་ཡོད་འདུག
དེ་རིང་སྔ་དྲོ་གྲྭ་ཆོས་གྲགས་རྒྱ་མཚོ་ལགས་བཙོན་འཇུག་དུས་ཡུན་རྫོགས་དེ་ཀློད་གྲོལ་བཏང་ཡོད་ཀྱང་། སྐབས་དེར་ཁོང་དང་མཉམ་དུ་འཇུ་བཟུང་ཁྲིམས་ཐག་བཅད་པའི་གྲྭ་འཇམ་དབྱངས་བསྟན་པ་ལགས་མུ་མཐུད་ལན་ཀྲུའུ་བཙོན་ཁང་དུ་བཀག་ཉར་བྱས་ཡོད་འདུག་ལ། དུས་ནམ་ཞིག་ལ་ཀློད་གྲོལ་གཏོང་མིན་གསལ་ཁ་མེད་པར་ལྷག་འདུག
རང་དགོན་དུ་ལོག་པར་འཚམས་འདྲི་དང་སྐུ་ལུས་བདེ་ཐང་ཡིན་པར་སྨོན། བོད་ཀྱི་དཔའ་བོ་དཔའ་མོ་དག་གིས་མཛད་རྗེས་པ་རྗེས་སུ་ཡི་རངས་ཡོད།