ཁ་སང་གཟའ་ཉི་མའི་ཉིན་ཨོ་སི་ཊོ་ལི་ཡར་གནས་སྡོད་ཕུན་ཚོཊ་མདའ་ལྷ་ཕ་བུ་གཉིས་ཀྱིས་ལོ་གཅིག་རིང་སྤེལ་བའི་དཔའ་བོའི་ཞལ་ཆེམས་བརྒྱུད་བསྒྲགས་ཀྱི་ལས་འགུལ་མཇུག་སྒྲིལ་ཡོད་འདུག
5.jpg)
ཨོ་སི་ཊོ་ལི་ཡའི་མཁར་རྫོང་གསར་བ་ (Australia Newcastle) གནས་སྡོད་ཆབ་སྲིད་བཙོན་ཟུར་ཕུན་ཚོགས་མདའ་ལྷ་ལགས་དང་ཁོང་གི་བུ་བསྟན་འཛིན་གངས་ལྷ་གཉིས་ཀྱིས། སྔར་ལོའི་ཕྱི་ཟླ་ ༡ ཚེས་ ༢༠ ཉིན་ནས་བཟུང་ཨོ་སི་ཊོ་ལི་ཡའི་གྲོང་ཁྱེར་དང་ས་གནས་ཁག་ ༣༦ ནང་། བོད་དོན་དྲིལ་བསྒྲགས་ཀྱི་ཡིག་ཆ་ ༡༡༠༠༠ ལྷག་འགྲེམས་སྤེལ་གནང་སྟེ། ཁ་སང་ཕྱི་ཚེས་ ༡༩ ཉིན་ཕ་བུ་གཉིས་ཀྱི་ལོ་གཅིག་རིང་སྤེལ་བའི་དཔའ་བོའི་ཞལ་ཆེམས་བརྒྱུད་བསྒྲགས་ཀྱིས་ལས་འགུལ་རེ་ཞིག་མཇུག་སྒྲིལ་ཡོད་འདུག
མདའ་ལྷ་ཕ་བུ་གཉིས་ཀྱི་ལས་འགུལ་དེའི་དམིགས་ཡུལ་གཙོ་བོ། ས་གནས་མི་མང་ལ་བོད་ནང་གི་རང་ལུས་མེར་བསྲེཊ་གཙོས་པའི་ཛ་དྲག་གི་གནས་སྟངས་དྲིལ་བསྒྲགས་དང་། བོད་དོན་ཐད་རྒྱབ་སྐྱོར་གནང་རྒྱུའི་འབོད་སྐུལ་ཞུ་ཆེད་ཡིན་འདུག་ལ། འདས་པའི་ལོ་གཅིག་རིང་ཁོང་ཕ་བུ་གཉིས་ཀྱིས་བདུན་ཕྲག་རེའི་ཉིན་གཅིག་རེར་ཆད་མེད་ཐོག ཕྱི་ལོ་ ༢༠༠༨ ལོ་ནས་ད་བར་གྱི་བོད་ནང་གི་ཛ་དྲག་གི་གནས་སྟངས་དང་། བོད་མིའི་རང་ལུས་མེར་བསྲེཊ་ཀྱི་རྒྱུ་རྐྱེན་དང་ཞལ་ཆེམས། རྒྱ་གཞུང་གིས་བོད་ནང་གི་བོད་མི་ཚོར་ཉེས་འཛུགས་འདྲ་མིན་འོག་གང་བྱུང་འཛིན་བཟུང་དང་སྲོག་ཁྲིམས་གཅོད་བཞིན་པའི་གནས་ཚུལ་སོགས་དབྱིན་ཡིག་དང་རྒྱ་ཡིག་གི་ལམ་ནས་འགྲེམས་སྤེལ། བོད་མིའི་སྒྲིག་འཛུགས་དང་སྐུ་སྒེར་གྱི་དྲ་རྒྱ་གཙོས་བོད་དོན་དང་འབྲེལ་བའི་དབྱིན་ཡིག་གི་དྲ་གནས་ཁག བོད་རིགས་ཚོགས་པ་ཁག་གི་ཁ་བྱང་བཅས་མི་མང་ནང་འགྲེམས་སྤེལ་བཅས་བྱས་ཡོད་འདུག
ཁ་སང་གསར་འགོད་པས་ཁ་པར་བརྒྱུད་ཆབ་སྲིད་བཙོན་ཟུར་ཕུན་ཚོགས་མདའ་ལྷག་ལགས་སུ་འདས་པའི་ལོ་གཅིག་གི་ལས་འགུལ་སྐབས་དཀའ་ངལ་ངལ་གཙོ་བོ་ག་རེ་འཕྲད་ཡོད་མེད་དང་། ལས་འགུལ་ལ་གྲུབ་འབྲས་གང་འདྲ་བྱུང་ཡོད་མེད་དྲིས་པར་ཁོང་གིས། “ དཀའ་ངལ་གྱི་ཐད་ནས་ངའི་བུ་བསྟན་འཛིན་གངས་ལྷ་ལོ་ཆུང་ཆུང་ཡིན་པ་དང་། བདུན་ཕྲག་རེའི་ནང་གྲོང་ཁྱེར་དང་ས་གནས་ཁག་འདྲ་མིན་སོང་སྟེ་ཡིག་ཆ་འགྲེམས་སྤེལ་བྱས་སྟབས། ཁོའི་སློབ་སྦྱོང་ཐོག་བར་ཆད་ཏོག་ཙམ་བྱུང་འདུག དེ་མིན་དམིགས་བསལ་དཀའ་ངལ་གང་ཡང་འཕྲད་མ་སོང་། གྲུབ་འབྲས་ཀྱི་ཐད་ནས་ཀྱང་མི་གཉིས་ཀྱི་ལས་འགུལ་ལ་དམིགས་བསལ་གྲུབ་འབྲས་ཆེན་པོ་ཐོན་ཐུབ་རྒྱུ་ཁག་པོ་ཡིན་ནའང་། ངེད་གཉིས་ཀྱིས་ལས་འགུལ་རིམ་པ་སྤེལ་སྐབས་མི་མང་ཁྲོད་བོད་དོན་དོ་སྣང་བྱེད་མཁན་མང་དུ་འགྲོ་གི་འདུག་ལ། ལས་འགུལ་འདི་ལ་བརྟེན་ནས་ཕྱི་གླིང་བའི་ཁྲོད་ཁ་པར་དང་གློག་འཕྲིན་བརྒྱུད་དེ་ངེད་གཉིས་ཀྱི་ལས་འགུལ་གྱིས་ཕན་ཐོགས་བྱུང་སོང་ཟེར་མཁན་དང་། མ་འོངས་པར་བོད་དོན་ལ་རྒྱབ་སྐྱོར་གནང་རྒྱུ་ཡིན་ཞེས་ཁས་ལེན་བྱེད་མཁན་གང་ལ་གང་འཚམ་བྱུང་སོང་། དེ་དག་ངེད་གཉིས་ཀྱི་གྲུབ་འབྲས་ཤིག་ཏུ་ངོས་འཛིན་བྱེད་ཀྱི་ཡོད། ” ཅེས་བརྗོད་བྱུང་།
ཐེངས་འདིའི་ལས་འགུལ་བརྒྱུད་ཁོང་ལ་ངོས་ཟིན་གང་འདྲ་བྱུང་ཡོད་མེད་དང་། མ་འོངས་པར་ལས་འགུལ་སྤེལ་འཆར་ཡོད་མེད་དྲིས་པར་ཁོང་གིས། “ གཙོ་བོ་ང་ཚོས་ལས་འགུལ་གྱི་ཆེ་ཆུང་ལ་མ་ལྟོས་པར་གོམ་པ་བརྒྱབ་པ་ཡིན་ན། འཛམ་གླིང་མི་མང་གིས་དོ་སྣང་དང་ཧ་གོ་ཐུབ་པ་ཞིག་བྱུང་གི་ཡོད་པ་དང་། རང་དབང་ལུང་པར་ཡོད་པའི་བོད་མི་ཚོས་བསྒྲུབ་ཐུབ་པ་དང་སྒྲུབ་དགོས་པའི་འགན་སྟེ། བོད་ནང་གི་བོད་མིའི་བདེ་སྡུག་རྒྱལ་སྤྱིར་གླེང་ཐུབ་ཀྱི་འདུག་བསམ་པའི་ངོས་ཟིན་ཐོབ་སོང་། གང་ལྟར། ངེད་ཕ་བུ་གཉིས་ཀྱི་ལོ་གཅིག་གི་ལས་འགུལ་དེ་ཐོག་མའི་དམ་བཅའ་ལྟར་ཁ་སང་མཇུག་སྒྲིལ་སོང་བ་རེད། ད་ཆར་ངེད་གཉིས་ལ་མ་འོངས་པར་འདི་ལྟར་ལས་འགུལ་སྤེལ་རྒྱུ་ཡིན་ཞེས་ཁ་ཕྱོགས་གསལ་བོ་མེད་ཀྱང་། ཕྱི་རྒྱལ་གྱི་སྐྱིད་པའི་ལུང་བར་བསླེབས་ཏེ་སྡུག་པའི་ཕ་ཡུལ་བརྗེད་ན་འགྲིག་གི་མེད་སྟབས། ཕ་ཡུལ་གྱི་གནས་སྟངས་དང་དཀའ་ངལ་མ་བརྗེད་པར་དུས་ནམ་ཡང་ལས་འགུལ་རབས་དང་རིམ་པ་སྤེལ་རྒྱུའི་དམ་བཅའ་ལ་འགྱུར་བ་མེད། མ་འོངས་པར་རིམ་པས་ལས་འགུལ་ག་རེ་སྤེལ་མིན་ཐག་གཅོད་བྱ་འཆར་ཡོད། ” ཅེས་བརྗོད་བྱུང་།
གསར་འགོད་པ། དོན་གོ
ངོ་མ་ཕ་བུ་གཉིས་ཀྱིས་ལས་འགུལ་རྒྱུན་རིང་བོ་སྤེལ་འདུག ད་སྐབས་ནུབ་ཕྱོགས་སར་མ་གཏོགས་རྒྱ་གར་ཕྱོགས་ནས་ལས་འགུལ་སྤེལ་མཁན་དཀོན་པོ་འདུག ཁྱེད་ཕ་བུ་གཉིས་ལ་དངོས་ཤུགས་རྒྱུད་གསུམ་ནས་ཐུགས་རྗེ་ཆེ། ངོ་མ་བོད་མི་ས་ཡ་དྲུག་གི་བདེན་དོན་གྱིས་ཆེད་དུ། ཕུ་ཕྲུག་ཆུང་ཆུང་དེ་དག་གིས་རང་ཉིད་ཀྱི་སར་མ་བསྡད་པར་ལུས་འགུལ་སྤེལ་བ་བསྔགས་བརྗོད་ཡོད།