བུད་མེད་དེའི་རྒན་པོས་བློ་བཟང་ལ་ཞིབ་དུ་ལྟ་ཞོར་དུ། ང་འཚོལ་བཞིན་འདུག་ཟེར་བ་དེ་ཁྱེད་རང་ཡིན་ནམ། ཡ་་ རྒན་མོ་འདི་གཉིས་ཀ་ཇ་ཞིག་བླུགས།་ཟེར་ཞོར་དུ་བུད་མེད་ལོ་ན་ཉི་ཤུ་ལས་བརྒལ་བའི་བུད་མེད་དེར་བཤད་དུས། བློ་བཟང་གི་མི་དེ་ནི་བུད་མེད་དེའི་རྒན་པོ་ཡིན་པ་ཞོར་དུ་ཤེས་ནས། ཡིན། ཡིན། ཟེར་ཞོར་རང་ཉིད་ཀྱི་མགོ་ལ་ལག་པའི་རེག་ཞོར་དུ། དངོས་བཤད་ན། ངས་ཁྱེད་རང་ངོ་མི་ཤེས། དེའི་བསྐོར་གོང་ནས་ངས་ཁྱེད་རང་གི་རྒན་མོ་ལ་འགྲེལ་བཤད་བརྒྱབས་ཟིན་པ་ཡིན།
ཕོ་གསར་དེས་རང་ཉིད་གང་ནས་ཡིན་མིན་དང་། ཁོ་རང་གིས་བློ་བཟང་དང་དགེ་འདུན་རྒྱ་མཚོ་གཉིས་ལ་རོགས་པ་ཅི་ཞིག་བྱེད་ཐུབ་མིན་གྱི་བསྐོར་དྲིས་དུས། བློ་བཟང་གིས་ང་རང་རང་གི་ཉེ་འབྲེལ་ཞིག་འདི་རུ་ཟ་ཁང་ཡོད་པ་དེ་རུ་ཨ་རྒ་ཚེ་རིང་དོན་འགྲུབ་བཟའ་མི་གཉིས་ཀྱི་ཟ་ཁང་གང་དུ་ཡོད་མེད་ཅིག་སྟོན་རོགས་ཞུ། ངས་ཅ་ལག་དག་འདི་ནས་རེ་ཞིག་རིང་འཇོག་རོགས་གནོང་། རྗེས་སུ་ལེན་དུ་ཡོང་ཆོག དགེ་འདུན་རྒྱ་མཚོ་ལ། སྐུ་མཁྱེན་ཉིད་ཀྱིས་འདི་ནས་འདུག་ས་ཞིག་གྲྭ་སྒྲིག་ཞིག་བྱེད་རྒྱུའི་ཐད་དུ་སྐུ་ཉིད་ཀྱིས་རོགས་རམ་ཞིག་བྱེད་རོགས་གནོངས། ཁོ་རང་ལ་ཡི་གེ་གང་ཡང་མེད་པ་ང་དང་གཅིག་པ་ཡིན།
ཕོ་གསར་དེ་ནི་དངོས་ནས་མི་བཟང་ཞིག་ཡིན་པ་མ་ཟད། བློ་བཟང་གི་གང་བཤད་པ་ལྟར། ཁོ་གཉིས་ལ་རོགས་པ་བྱས་དེ། སྔོན་ཆད་ཁོ་གཉིས་ལ་དང་ཐོག་སྒོ་ཕྱེ་མཁན་གྱི་བུ་མོ་ཆུང་ཆུང་དེ་བློ་བཟང་བསྐྱེལ་དུ་བསྔགས། བློ་བཟང་། ཁྱེད་རང་ག་ལེར་ཁོ་མོས་རྗེས་སུ་གོམ་པ་ཁ་ཤས་ཤིག་བཞག་ནས་འགྲོ་དགོས། མོ་རང་གིས་ཁྱེད་རང་ལ་ཟ་ཁང་དེ་སྟོན་ངེས་ཡིན། ཅ་ལག་ཕྱི་དྲོ་ངས་ཁྱེད་རང་ཡོད་སར་བསྐྱེལ་ཆོག ཨ་ཁུ་འདི་ལ་ངས་འདི་ནས་ཁང་བ་ཞིག་གནས་སྐབས་ཀྱི་རིང་དུ་རྙེད་ཐུབ་བྱེད་ངེས་ཡིན།
དངོས་ནས་ལས་དྲང་ན་ལམ་དྲང་ན་ཟེར་བ་ཅི་མ་བདེན། བློ་བཟང་གིས་བུ་མོ་ཆུང་ཆུང་དེའི་རྗེས་སུ་འགྲོ་ཞོར་དུ་ཚོང་ཁང་ཞིག་ནས་ཐ་མག་སྒམ་ཆུང་བཀང་གི་གོང་ཚད་ལ་སྐད་ཆ་དྲིས་དུས། རྒྱ་སྒོར་བཅུ་རེད་ཅེས་ལན་བཏབ་དུས་ཁོ་རང་གི་སྣང་བ་ལ་གོང་ཁེ་བོ་རེད་སྙམ་ཞོར་དུ་ཉོས་དེ་ཐ་མག་ཞིག་ཁ་ནང་དུ་འཛུགས་ཤོར་དུ་རྒྱ་སྒོར་བཅུ་ཧིན་སྒོར་ག་ཚོད་ཅིག་གནས་མིན་བསམ་བློ་བཏང་དུས། དེ་ནི་ཧིན་སྒོར་ལྔ་བཅུ་ལས་བརྒལ་བའི་ཐ་མག་ཞིག་ཡིན་པ་དྲན་ཞོར་དུ། སེམས་པ་ལྷོད་དུ་འབབ་པའི་ཚུགས་ཀ་ཞིག་སྟོན་བཞིན། བུ་མོ་ཆུང་ཆུང་དེའི་རྒྱབ་ལོག་ལ་མིག་འཕེན་ཞོར་དུ་སོང་།
བུ་མོ་ཆུང་ཆུང་འགྲམ་གྱི་འགག་སྒོ་ཡོད་སའི་ཡར་འདབས་ཀྱི་ཚོང་ཁང་དང་ཟ་ཁང་མི་ཉུང་བ་ཞིག་བང་བསྒྲིགས་དེ་ཡོད་པ་དེའི་ཟ་ཁང་ཞིག་གི་ནང་དུ་འཛུལ་མ་ཐག ཁོ་རང་ཡང་ཟ་ཁང་དེའི་ནང་དུ་འཛུལ་དུས། བུ་མོ་ཆུང་ཆུང་དེས་ཟ་ཁང་ནང་གི་རྒན་པོ་ལོ་ན་ལྔ་བཅུ་ལས་བརྒལ་བ་ཞིག་ལ་སྐད་ཆ་བཤད་བཞིན་འདུག་པ་དེས། བློ་བཟང་མཐོང་མ་ཐག ཡ་་ ནང་དུ་ཤོག་ཟེར་ཞོར། བུ་མོ་ཆུང་ཆུང་དེར་ཁྱེད་རང་ཐུགས་རྗེ་ཆེ་ཞེས་ལམ་འཇུག་བྱས།
ཡ་དེ་ནས་བཙོག ཁྱེད་རང་གང་ནས་ཡོང་བ་ཡིན། སུ་དགོས་ཀྱི་ཡོད། ཕར་ཕྱོགས་ནས་ཡོང་བ་ཞིག་ཡིན་ནི་མིན་ན་ཟེར་ཞོར། ཟ་ཁང་གི་ནང་ནས་ཁང་ཆུང་ཞིག་གི་སྒོ་ཕྱེ་ཞོར་དུ་དྲིས། བློ་བཟང་གིས་ང་ཁྱེད་རང་གི་རྒན་མོ་ཨ་ཅེ་འཚོ་མོའི་ཉེ་འབྲེལ་ཞིག་ཡིན། ངས་ཀྱང་རང་ཉིད་ཀྱི་ཉེ་འབྲེལ་བསྐོར་གང་འདྲ་ཞིག་ཡིན་མིན་གསལ་བོ་ཞིག་བཤད་རྒྱུ་མེད་ཀྱང་། ཁྱེད་ཚང་གི་བུ་གྲྭ་བ་ཆོས་བཟང་དང་ང་ཚོ་ཨ་ཁུ་གཅིག་གི་དགེ་ཕྲུག་ཡིན་དུས་སུ་ང་རང་དངོས་ནས་ཆུང་ཆུང་ཡིན་ལ། ཁོས་ག་དུས་ཡིན་ཡང་། ང་ལ་ང་ཚོ་ཉེ་ས་ཡིན་ནི་རེད་ཟེར་ནས་བཤད་མྱོང་བ་དང་། ཉིན་ཁ་ཤས་ཀྱི་རྗེས་སུ་ཕར་ཕྱོགས་ནས་ས་འདི་བརྒྱུད་དེ་ཡོང་རྒྱུའི་སྐད་ཆ་བཤད་དུས། ཕ་མ་གཉིས་ཀྱིས་ཀྱང་། ཨ་ཅེ་འཚོ་མོ་འཚོལ་ནས་སོང་ཟེར་བ་དང་། ཉེ་ས་ཡིན་རབས་བཤད་སོང་།
རྒན་པོ་ཚེ་རིང་དོན་འགྲུབ་ཀྱིས། ཡ་ཡ་ ལམ་ནས་ཁག་མ་སོང་ངམ། དེས་ན་ནམ་ཐོན་ནི་ཡིན། འགྲམ་ནས་བསྡོད་ཆོག་པའི་ལག་ཁྱེར་ཡོད་དམ་ཟེར་ནས་དྲི་མཇུག་མ་རྫོགས་གོང་དུ་ཨ་ཅག་ཞིག་གིས་སྒོ་ཕྱེ་ནས་ནང་དུ་སླེབས། སྐབས་དེར་བློ་བཟང་ཡར་བླངས་དུས། བླངས་མི་དགོས། བསྡོད་བསྡོད་ཅེས་བཤད།
རྒན་པོ་ཚེ་རིང་དོན་འགྲུབ་ཀྱིས། འདི་ཁྱེད་རང་གི་ཉེ་འབྲེལ་ཞིག་ཡིན་ཟེར་བཞིན་འདུག ཁོ་རང་འཇིག་གྲོལ་ཚང་གི་བུ་ཡིན་ཟེར། ཁྱེད་རང་གི་ངོ་ཤེས་ཀྱི་ཡོད་དམ་ཞེས་དྲི་བ་རང་གི་རྒན་མོ་ལ་བཏང་།
ཨ་ཅེ་འཚོ་མོས། རེད་རེད། འཇིག་གྲོལ་ཚང་གི་ཡིན་ན་ང་ཚོ་ཉེ་ས་ཡིན་ནི་རེད། ད་དེ་ཚང་ལ་བུ་དང་བུ་མོ་ཁ་ཤས་ཤིག་ཡོད་པ་སྔ་ས་ནས་ཐོས་མྱོང་ཡོད་ཀྱང་། ཐུག་མྱོང་ཞིག་ཡོད་ནི་མ་རེད། ཡོད་པས་དབང་དུ་བཏང་ཡང་། དེ་ཚོ་དངོས་ནས་ཆུང་ཆུང་རེད། ང་རང་ནང་དང་ཁ་བཀར་ནས་ལོ་ངོ་བཅུ་ལྷག་ཞིག་འགྲོ་བཞིན་ཡོད་པ་ཁྱེད་རང་གི་ཤེས་གསལ་རེད། སྐབས་རེར་ནང་དུ་སོང་ཡང་ཟླ་རེ་ཟུང་ལས་འདུག་གི་ཡོད་པ་མ་རེད། ད་གང་ནས་ཤེས་ཟེར་བཞིན། བློ་བཟང་ལ་ཁ་ཕྱོགས་ནས།
སྔོན་ཆད་གྲྭ་བ་རེད། དེང་སང་མིན།
མི་མང་བོ་ཞིག་རྒྱ་གར་དུ་འགྲོ་དུས་གྲྭ་བ་ཡིན་ཡང་། ཕྱིར་ཡོང་དུས་གྲྭ་བ་ལོག་འདུག
བློ་བཟང་གིས་སྐད་ཆ་དེར་ལན་གང་ཡང་འདེབས་རྒྱུ་མེད་པ་ལྟར། ཁ་རོག་གེར་བསྡད་དུས། ཨ་ཅེ་མཚོ་མོ་ཡིས། ཡ་ འདི་ནས་བསྡོད་དང་། ང་ཚོས་ག་རེ་བྱེད་དགོས་མིན་ག་ལེར་ལྟ་ཆོག ཟ་ཁང་ནང་དུ་རོགས་པ་རེ་བྱོས་ན་འགྲིག་གི་རེད། སྔོན་ལ་ནང་དུ་ཁ་པར་ཞིག་གཏོང་དུ་སོང་། ཟ་ཁང་གི་འགྲམ་ཏག་ཏག་ན་སྤྱི་སྤྱོད་ཁ་པར་གཏོང་ས་ཞིག་ཡོད་པ་རེད། དེ་སོང་ནས་ཁ་པར་ཞིག་གཏོང་ནས་ཤོག ནང་གི་མི་ཚོས་སེམས་བདེ་འགྲོ་ནི་རེད།
ཨ་ཕ། ང་ཡིན། བློ་བཟང་། ད་ལྟ་ང་རང་འགྲམ་དུ་འབྱོར་ཡོད་ལ། ཨ་ཅེ་འཚོ་མོ་ཚང་གི་ནང་དུ་ཡོད་ཅེས་རང་གི་ཕ་རྒན་ལ་འཇིག་གྲོལ་ལ་བཤད་དུས། བློ་བཟང་གི་ཕ་རྒན་གྱིས། ད་དངོས་ནས་ཡག་པོ་རེད། ཨ་མ་ད་ནངས་ཀྱང་དགོན་པར་སོང་དེ་བསང་ཤུག་བཞག་པ་རེད། དེ་ནས་ས་མཚམས་བར་དུ་བསྐྱོད་ཆོག་པའི་ལག་ཁྱེར་རེག་མིན་ཐད་དུ་ཨ་རྒ་ཚེ་རིང་དོན་འགྲུབ་ལ་གསལ་བོ་ཞིག་དྲིས་ན། ཕལ་ཆེར་ཁོ་རང་གི་ཤེས་ངེས་ཡིན། ཡར་མར་དུ་འགྲོ་གི་མ་འདུག ཉེན་ཁ་ཆེ་རབས་གོ་རྒྱུ་འདུག ཨོ་དེས་ན་ད་དུང་། ང་ཚོའི་སྡེ་བའི་ནང་གི་རིག་འཛིན་ཡང་དེ་ན་ཚོང་བྱས་དེ་བསྡད་ཡོད་པ་རེད། དེ་ཐུག་ན་དེས་ཀྱང་རོགས་བྱེད་སྲིད་པ་ཡིན།
བློ་བཟང་གིས་རང་གི་ཕ་རྒན་གྱིས་སྐད་ཆ་དེ་དག་སེམས་སུ་བཟུང་དེ། ཕྱིར་ཟ་ཁང་དུ་སོང་ནས་རྒན་པོ་ཚེ་རིང་དོན་འགྲུབ་ལ་སྡེ་བ་གཅིག་པའི་ཕོ་གསར་རིག་འཛིན་བསྐོར་དྲིས་དུས། རིག་འཛིན་ཟེར་བའི་ཕོ་གསར་དེ་ནི་ཉིན་ལྟར་ཁོང་ཚང་གི་ཟ་ཁང་དུ་ཐེངས་རེར་བསྐོར་ར་རྒྱག་གི་ཡོད་རབས་བཤད་སྟབས། ཁོ་རང་ཡང་སེམས་ལྷོད་དུ་འབབ་ནས་ཟ་ཁང་གི་ཐབ་ཚང་ནང་དུ་ལས་རོགས་འདྲ་བྱས་དེ་ཉིན་བཀང་བོར་དེ་ནས་བསྡད། ས་རུབ་དེ་འོང་བའི་སྐབས་ཤིག་ལ། རྒན་པོ་ཚེ་རིང་དོན་འགྲུབ་ཀྱིས་བློ་བཟང་ལ་ཐབ་ཚང་ནང་དུ་ཡོད་པ་དེ་ནས་སྐད་བཏང་།
རིག་འཛིན་གྱིས་བློ་བཟང་མཐོང་མ་ཐག ཧ་ལས་པའི་ངང་དུ། ཨ་ཨ་། ད་གྲྭ་བ་ལོག་ཟིན་པ་འདྲ། ཡ་དེ་ནས་ནམ་ཐོན་ནི་ཡིན། སོགས་སྐད་ཆ་འདྲ་མིན་མང་བོ་ཞིག་གི་ནང་དོན་མཐར་ཐུག་ནི་ཁོ་གཉིས་ཀྱིས་འགྲམ་ནས་ཡར་མར་འགྲོ་བསྡོད་ཆོག་པའི་ས་མཚམས་བར་དུ་ཐོན་ཆོག་པའི་ལག་ཁྱེར་ཇི་ལྟར་རེག་མིན་བསྐོར་གླེང་དུས། རིག་འཛིན་གྱིས་ཁོ་རང་ལ་ངོ་ཤེས་ཤིག་ཡོད་ཀྱང་། དེ་གོང་ཆེན་པོ་ལེན་བཞིན་འདུག སྔོན་ཆད་ཡིན་ན། འགྲམ་རང་ནས་བཟོ་རྒྱུར་དཀའ་ངལ་ཡོད་པ་མ་རེད། ན་ནངས་ནས་བཟུང་དེ་ཡར་མར་དུ་འགྲོ་མཁན་མང་དུ་སོང་སྟབས། འདི་ནས་བཟོ་མཚམས་བཞག་ཡོད་པ་རེད། དེའི་སྟབས་ཀྱི་གཉན་ལམ་ནས་བཟོ་བཞིན་འདུག དེ་ཡང་རྒྱ་སྒོར་གཅིག་སྟོང་ནས་གཉིས་སྟོང་བར་རེད་འདུག འུ་གཉིས་སྡེ་བ་གཅིག་ཡིན་པ་དང་། ཁོ་རང་ཡང་ངས་ངོ་ཤེས་ཤིག་ཡིན་སྟབས། གོང་རན་པོ་ཞིག་བྱས་དེ་བཟོ་ཐུབ་ངེས་ཡིན། དེ་ལས་ནང་དུ་ཁ་པར་གཏོང་ཐུབ་པ་ཡིན་ན། གཟའ་འཁོར་གཅིག་ནང་དུ་ཕ་ཡུལ་ནས་བཟོ་ཐུབ་ངེས་ཡིན་ལ། སྒོར་མོ་ཡང་མང་བོ་ཞིག་འགྲོ་ནི་མ་རེད། ཁྱེད་རང་གི་ཐོག་མར་ནང་དུ་ཁ་པར་ཞིག་རྒྱོབས་དེ། ངས་དེ་ལྟར་བཤད་ཀྱི་འདུག་ཟེར་ནས་ཁྱེད་ཚང་གི་ཕ་རྒན་ལ་ཤོད་དང་། དེ་ནས་འུ་གཉིས་ཀྱིས་ལྟ་ཆོག སྤྱིར་ན་ཁྱེད་རང་ང་ཡོད་སར་འགྲོ་ཟེར་དགོས་པ་རེད་མོད། ང་རང་ཡང་བཟའ་ཚང་དང་འཐོར་ནས། དེང་སང་རང་གི་ཨ་ཅེ་ནང་དུ་བསྡད་ཡོད་སྟབས། བདེ་བོ་ཞིག་མ་རེད། སང་ཉིན་ཐུག་ཟེར་ནས་བུད་སོང་།
ཕ་རྒན་འཇིག་གྲོལ་གྱིས་རང་གི་བུ་བློ་བཟང་གིས་གང་བཤད་པ་ལྟར། ཕྱིར་ཉིན་ཁ་པར་གཏོང་རྒྱུ་བྱས་དེ། ཕྱིར་ཉིན་ཨ་ཅེ་འཚོ་མོ་བཟའ་མི་གཉིས་ཀྱིས་ཟ་ཁང་ནང་དུ་གང་ཐུབ་ཅིག་བྱས་དེ་ལས་རོགས་བྱེད་བཞིན་བསྡད་ཡོད་པ་རེད།
ཕྱིར་ཉིན་ཕ་རྒན་གྱིས་བློ་བཟང་ལ་ཁྱེད་རང་གི་དེ་ནས་སྒུག་བསྡོད་དང་། ལག་ཁྱེར་འདི་ནས་མགྱོགས་པོ་བཟོ་ཐུབ་ཀྱི་འདུག་ན་ཡང་། ཁྱེད་རང་གི་ཐོབ་ཐང་ལག་ཁྱེར་གྱི་འདྲ་བཤུས་ཤིག་དགོས། དཔར་གློག་བརྒྱབ་དེ་སྐུར་དགོས་ཀྱི་འདུག བློ་བཟང་གིས་རང་གི་ཐོབ་ཐང་ལག་ཁྱེར་དེ་མགྱོགས་འཕྲིན་དཔར་བཤུས་སྟེང་དུ་སྐུར་ནས། སྐར་ཆ་ཁ་ཤས་ཀྱི་རྗེས་སུ་ཕ་རྒན་ལ་སླར་ཡང་ཁ་པར་བཏང་དུས། འབྱོར་ཡོད་པ་ཤེས་པ་དང་། ཕ་རྒན་གྱིས་ཉིན་ལྔ་དྲུག་གི་རྗེས་སུ་ཁ་པར་ཞིག་ཡང་བསྐྱར་གཏོང་ཞེས་ཕ་རྒན་འཇིག་གྲོལ་གྱིས་བློ་བཟང་ལ་བཤད།
ཉིན་དགུའི་རིང་དུ་བློ་བཟང་གིས་རང་གི་གང་ཐུབ་ཀྱིས་ཟ་ཁང་ནང་དུ་རོགས་བྱེད་པ་དང་ཐབ་ཚང་ནང་དུ་རོགས་བྱེད་པ་སོགས་བྱས་དེ་བསྡད་ན་ཡང་གནས་ཚུལ་གང་ཡང་འཕྲད་མེད་མོད། ཉིན་དགུའི་ཉིན་གོང་དེ་འདྲ་ཞིག་ཕྱི་རྒྱལ་བ་ཁ་ཤས་ཤིག་ཟ་ཁང་དུ་སླེབས་པར། དེ་རུ་དབྱིན་སྐད་ཀྱི་གོ་བརྡ་འཕྲོད་མཁན་མ་བྱུང་སྟབས། རྒན་པོ་ཚེ་རིང་དོན་འགྲུབ་ཀྱིས་བློ་བཟང་ལ་ཁྱེད་རང་གིས་དབྱིན་སྐད་རྒྱག་ཤེས་ཀྱི་ཡོད་དམ་ཟེར་ནས་དྲིས།
དེས་ན་ཁོང་ཚོ་ལ་ཟས་རིན་འདི་དག་ངོ་སྤྲོད་ཅིག་གནོང་རོགས།
བློ་བཟང་གིས་ཟས་ཐོ་དེ་ལག་དུ་བཟུང་ནས་ཕྱི་རྒྱལ་བ་དེ་དག་གི་གམ་དུ་སོང་དེ་དབྱིན་སྐད་ཐར་ཐོར་ཞིག་ཤེས་པ་དེ་བཤད་དུས། ཕྱི་རྒྱལ་བ་དེ་དག་གིས་ཀྱང་གདོང་ལ་འཛུམ་མདངས་ཤིག་རྒྱས་ཤོར་དུ་བློ་བཟང་གི་འགྲེལ་བཤད་ལ་ཞིབ་དུ་ཉན།
གློ་བར་དུ་རྒན་པོ་ཚེ་རིང་དོན་འགྲུབ་ཀྱིས་བློ་བཟང་ལ། ད་ཁྱེད་རང་ངའི་ངོ་ཤེས་ཤིག་གི་སར་སྤོར་དགོས་ཀྱི་འདུག འགྲིག་མ་སོང་། དེ་སྔོན་ཁྱེད་རང་གིས་དབྱིན་སྐད་བཤད་བཞིན་པའི་སྐབས་དེར་ང་ཚོས་ཉམས་མ་བཞག་པར་ནང་གི་མགྲོན་པོ་དག་ལ་མ་བལྟས་པར་ཁྱེད་རང་ལ་ལོ་ཙྭ་བྱེད་དུ་བཅུགས་པ་དེ་ནོར་འདུག སྐབས་དེ་དུས་ཟ་ཁང་ནང་དུ་སོ་ཉུལ་བ་སྐད་གྲགས་ཡོད་པ་ཞིག་ཡོད་པ་དེ་འདི་རུ་འདུག
མུ་འགོད།
སྤུན་ཟླ་ཚོ་ཉིན་རེ་བཞིན་བློ་བཟང་ལ་་བསྐོར་ར་རེ་བྱེད་དུ་འོང་བ་དགའ་བཞིན་ཡོད། སྤྲོ་བཞིན་ཡོད། ལྟ་བཞིན་ཡོད། སྒུག་ནས་འདུག
ཕ་བཟང་བུ་རྣམ་དཔྱོད་སྤྱོད་པའི་དུས་སུ་སླེབས་འདུག བལ་ཡུལ་ལ་གློག་གི་དཀའ་ངལ་ག་འདྲ་འཕྲད་ཀྱང་ངས་ཁྱོད་ལ་སེམས་ཁུར་བྱེད་ཁོ་ཐག་ཡིན་ལ་སྨོནལམ་ཡང་རྒྱག་ཁོ་ཐག་ཡིན །
ཨ་ཤུ་རེ་གོ་རང་གི་རང་བཙོང་ན་འགྱོད་གི་རིས།
རྟོགས་ལྡན་རིན་པོ་ཆེ་ལགས།ང་ཀ་རྡོར་སྒང་གསུམ་ལ་སོང་ནས་ཕྱིར་སླེབས་ཡོད།ཡིན་ནའང་དེ་ཕྱོགས་ནས་ཀྱང་ཁྱོད་ཀྱི་རྩོམ་ཡིག་འདི་བཀླགས་པ་ཡིན།འོན་ཀྱང་མཆན་འདེབས་སའི་བོད་ཡིག་མེད་སྟབས་དེ་རིང་བར་དུ་ལུས་སོང་བ་རེད།ཨོ་ཁྱོད་ཀྱི་ཕ་མ་གཉིས་གང་དུ་ཡོད།ང་དེ་རིང་ཞོགས་པར་རྡ་སར་འབྱོར་བ་ཡིན།ཐོག་མར་ཁྱོད་ཀྱི་ཟིན་བྲིས་སུ་འཛུལ་བ་ཡིན།
རེད་རེད། ད་ཡིན་ན་འདིས་སོ་ཉུལ་འདྲ་ཡང་ས་ཁར་ཤོང་ས་རེད་ཀོ བུ་ངར་བ་འདི་ལ་ར་བ་འདྲ་ཡོད་ས་རེད་དཱ།
སོ་ཉུལ་གྲགས་ཅན་དེ་བླ་བྲང་བསྟན་འཛིན་ཟེར་བའི་གསར་བུ་དེ་མིན་ནམ། ཁྲི་ཀའི་རིག་འཛིན་ཟེར་བའི་མི་ངན་དེ་མིན་ནམ། འདི་གཉིས་བལ་ཡུལ་དུ་དུས་རྒྱུན་བསྡད་ཡོད།