ཁ་སང་རྒྱ་ནག་གཞུང་གིས་རྒྱལ་ཁབ་ཀྱི་དབུ་ཁྲིད་སུ་ཞིག་གིས་རྣམ་པ་གང་འདྲ་ཞིག་གི་ཐོག་ནས་༧གོང་ས་མཆོག་ལ་མཇལ་འཕྲད་གནང་བ་ཡིན་ནའང་མཐའ་གཅིག་ཏུ་ངོ་རྒོལ་ཡོད་ལུགས་བསྒྲགས་འདུག
ཟླ་འདིའི་ཕྱི་ཚེས་ ༥ ཉིན་ཨ་རིའི་རྒྱལ་ས་ཝ་ཤཱིང་ཊོན་དུ་ཚོགས་འཆར་ཡོད་པའི་རྒྱལ་ཡོངས་སྨོན་ལམ་གསོལ་སྟོན་ཐོག ༧གོང་ས་མཆོག་དང་ཨ་རིའི་སྲིད་འཛིན་ཨོ་བྷ་མ་རྣམ་གཉིས་ལྷན་ཞུགས་གནང་བར་གདན་འདྲེན་ཞུས་ཡོད་སྟབས། ཁ་སང་རྒྱ་གཞུང་གི་ཕྱི་འབྲེལ་མགྲིན་ཚབ་པ་ཧོང་ལི་ཡིས། རྒྱལ་ཁབ་ཀྱི་དབུ་ཁྲིད་སུ་ཞིག་གིས་རྣམ་པ་གང་འདྲ་ཞིག་གི་ཐོག་ནས་༧གོང་ས་མཆོག་ལ་མཇལ་འཕྲད་གནང་བ་ཡིན་ནའང་། རྒྱ་གཞུང་གིས་མཐའ་གཅིག་ཏུ་ངོ་རྒོལ་ཡོད་སྐོར་བསྒྲགས་འདུག
ཕྱི་ཚེས་ ༢ ཉིན་གྱི་གསར་འགོད་ལྷན་ཚོགས་ཤིག་གི་ཐོག གསར་འགོད་པ་ཞིག་གིས་ཕྱི་ཚེས་ ༥ ཉིན་༧གོང་ས་མཆོག་ཨ་རིའི་རྒྱལ་ཡོངས་སྨོན་ལམ་གསོལ་སྟོན་ཐོག་ཞུགས་འཆར་ཡོད་པས། རྒྱ་གཞུང་ལ་དེའི་ཐོག་བསམ་ཚུལ་ཅི་ཡོད་ཅེས་དྲིས་པར་རྒྱ་གཞུང་གི་མགྲིན་ཚབ་པ་ཧོང་ལི་ཡིས། བོད་ཀྱི་གནད་དོན་ལ་ཐེ་གཏོགས་བྱེད་པ་དེ་རྒྱ་ནག་གི་རྩ་བའི་ཁེ་ཕན་དང་མི་རིགས་བར་གྱི་མཛའ་བརྩེ་ལ་འབྲེལ་བ་ཡོད་སྟབས། རྒྱལ་ཁབ་གང་ཞིག་གིས་བོད་ཀྱི་གནད་དོན་བེད་སྤྱད་དེ་རྒྱ་ནག་གི་ནང་སྲིད་ལ་ཐེ་གཏོགས་བྱས་ན་ང་ཚོས་དེར་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་ལ། རྒྱལ་ཁབ་ཀྱི་མགོ་ཁྲིད་སུ་ཞིག་གིས་རྣམ་པ་གང་འདྲ་ཞིག་གི་སྒོ་ནས་ཏཱ་ལའི་བླ་མར་ཐུག་འཕྲད་བྱས་ནའང་མཐའ་གཅིག་ཏུ་ངོ་རྒོལ་བྱེད་ཀྱི་ཡོད། ཨ་རིའི་ཕྱོགས་ནས་བོད་ཀྱི་གནད་དོན་ཐད་ཀྱི་དམ་བཅར་བརྩི་སྲུང་བྱས་ཏེ། ཨ་རྒྱ་བར་གྱི་ཕྱོགས་ཡོངས་ཀྱི་འབྲེལ་ལམ་གཞི་རྩར་བཟུང་ནས་དེ་འབྲེལ་གྱི་གནད་དོན་འོས་འཚམ་གྱིས་ཐག་གཅོད་བྱེད་པའི་རེ་བ་ཡོད། ཅེས་བརྗོད་འདུག
ཡང་གསར་འགོད་པས་ཕྱི་ཚེས་ ༣༡ ཉིན་ཁ་ཆེ་འཇིགས་སྐུལ་དྲག་སྤྱོད་ཚོགས་པ་(ISIS)ཡིས། ཉི་ཧོང་གི་གསར་འགོད་པ་ཞིག་གི་སྐེ་བཅད་ནས་དམར་གསོད་བཏང་བ་དེར་རྒྱ་གཞུང་ལ་བསམ་ཚུལ་ཅི་ཡོད་དྲིས་པར། རྒྱ་ནག་ཕྱོགས་ནས་འཇིགས་སྐུལ་རིང་ལུགས་ཀྱི་བྱ་སྤྱོད་ཚང་མར་ངོ་རྒོལ་བྱེད་ཀྱི་ཡོད་ལ། ཉེས་མེད་ཀྱི་མི་མང་ལ་ཚད་བརྒལ་གྱི་དྲག་སྤྱོད་སྤེལ་བར་ངོ་རྒོལ་བྱེད་ཀྱི་ཡོད། རྒྱལ་སྤྱིའི་སྤྱི་ཚོགས་ཀྱིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་རྩ་དོན་དང་། སྤྱི་མོས་བྱུང་བའི་རྒྱལ་སྤྱིའི་མཉམ་འབྲེལ་རྩ་དོན་གཞིར་བཟུང་ནས་སྔར་ལས་མཉམ་འབྲེལ་ཤུགས་སྣོན་རྒྱག་དགོས་པ་དང་། མཉམ་འབྲེལ་གྱི་ཐོག་ནས་འཇིགས་སྐུལ་རིང་ལུགས་པའི་དྲག་སྤྱོད་ལ་ཁ་གཏད་བཅག་སྟེ། ས་ཁུལ་དང་འཛམ་གླིང་ཁྱོན་ཡོངས་ཀྱི་བདེ་འཇགས་སྲུང་སྐྱོབ་བྱེད་དགོས་པ་རེད་བསམ་གྱི་ཡོད། ཅེས་བརྗོད་འདུག
གསར་འགོད་པ། པདྨ་མཚོ།
རྒྱ་གཞུང་གིས་འཛམ་གླིང་ནང་ཡུལ་གྲུ་ཁག་གི་དབུ་ཁྲིད་རྣམས་ཀྱི་སྒེར་གྱི་སྐུ་དབང་ལ་ཐེ་ཇུས་དང་ཚོད་འཛིན་དཔུང་ངོམ་བྱེད་པ་ལ་ངོ་རྒོལ་བྱེད་དགོས།