བོད་ཀྱི་
རྒྱ་གར་ནང་གི་བོད་པའི་བུ་མོ་གཉིས་ནུབ་ཡུ་རོབ་གླིང་དུ་འགྲོ་འདོད་ཀྱི་རྨི་ལམ་ཁྲོད། ལྷོ་ཨ་ཧྥི་རི་ཀའི་ནང་ལོ་གཅིག་ལྷག་ལ་དཀའ་སྡུག་དང་བརྙས་བཅོས་མྱངས་པའི་གནས་ཚུལ་འདིས། འུ་ཅག་བོད་པ་ཚང་གི་སྐྱབས་བཅོལ་བ་སྤྱིའི་ལས་དབང་ལ་བསྐྱར་དུ་བསམ་གཞིག་ཅིག་གཏོང་དགོས་བྱུང་སོང་། ལོ་རབས་ལྔ་བཅུ་དང་དྲུག་བཅུའི་ནང་༧གོང་ས་མཆོག་གིས་དབུས་པའི་བོད་པ་མང་པོ་ཞིག་རྒྱ་བལ་འབྲུག་གསུམ་ནང་འབྱོར་མགོ་ཚུགས་པ་རེད། སྐབས་དེར་བོད་ནས་ཡོང་དུས་རྒྱ་ནག་གི་དྲག་པོའི་བཙན་འཛུལ་ལ་བྲོས་བྱོལ་བྱས་པ་དང་། མིའི་ལུང་པར་འབྱོར་སྐབས་ཆབ་སྲིད་ཀྱི་སྐྱབས་བཅོལ་ཞུས་པ་དངོས་ཡོད་གནས་ཚུལ་རེད།
ལོ་རབས་བརྒྱད་ཅུ་དགུ་བཅུའི་ནང་ཡོང་མཁན་ཚོའང་ཆབ་སྲིད་སྐྱབས་བཅོལ་བ་དང་། མང་ཆེ་བ་ཆོས་ལུགས་དང་ཤེས་ཡོན་སྐྱབས་བཅོལ་བ་རེད། ཉིས་སྟོང་ལྔ་དྲུག་ནས་བཟུང་ངེས་པ་དོན་གྱི་ཆབ་སྲིད་སྐྱབས་བཅོལ་བ་རེ་ཟུང་ཡོད་ན་ཡང་། མང་ཆེ་བ་དཔལ་འབྱོར་སྐྱབས་བཅོལ་བ་ཆགས་འདུག ལོ་རབས་དགུ་བཅུ་དང་ཉིས་སྟོང་ནང་ཨ་རི་དང་ཡུ་རོབ་ལུང་པར་སྐྱོད་བསླ་བ་དང་། ཕར་སོང་ན་དངུལ་གང་འཚམ་གསོག་ཐུབ་པ། དངུལ་དེས་ཕྱིར་ཕ་ཡུལ་བོད་དང་རྒྱ་གར་གྱི་སྤུན་མཆེད་ཚོར་རོགས་རམ་ཕྲན་བུ་ཐུབ་པ་བཅས་ལ་བརྟེན་ཏེ། བོད་མི་ཚོ་ཕྱི་རྒྱལ་ཁག་ཏུ་སྐྱོད་པར་འདྲོག་མགོ་ལངས་པ་རེད།
འགྲོ་བ་མིའི་རིགས་ཀྱི་བདེ་སྡུག་ཤོག་ལྷེ་ནང་དུ། ཆབ་སྲིད་སྐྱབས་བཅོལ་བ་དང་ཤེས་ཡོན་སྐྱབས་བཅོལ་བ། དཔལ་འབྱོར་སྐྱབས་བཅོལ་བ་གང་ཡིན་ཡང་། དཀའ་ངལ་ཞིག་གི་འོག་ནས་བྲོས་བྱོལ་བྱས་ཏེ་བློ་ཁེལ་ས་ཞིག་ལ་སྐྱབས་བཅོལ་ཞུས་པ་གཅིག་མཚུངས་རེད། ལྷག་པར་དུ་བོད་ནང་ལ་མཚོན་ན། ཤེས་ཡོན་དང་དཔལ་འབྱོར། ཆོས་དད་སོགས་ཀྱི་དཀའ་ངལ་གང་ཡིན་ཡང་། དེའི་རྒྱབ་ཕུགས་ཆབ་སྲིད་ཅིག་ལ་ཐུག་ཡོད་པ་དོན་དངོས་ཡིན་ཡང་། ད་ལྟའི་འཛམ་གླིང་གི་གནས་བབ་འདིའི་འོག་ཏུ། སྲིད་དོན་དང་ཆོས་ལུགས་སོགས་ལས་དཔལ་འབྱོར་དང་ཤེས་ཡོན་སྐྱབས་བཅོལ་ངོས་ལེན་མེད་པ་དེའང་ཤེས་དགོས།
རྒྱ་བལ་འབྲུག་གསུམ་ནང་གི་བོད་པ་ཚོར་སྐྱབས་བཅོལ་བ་དངོས་གནས་ཤིག་གི་ཐོབ་ཐང་རེག་གི་མེད་པ་དང་། སྲིད་འབྱོར་རིག་གསུམ་གང་ཅིར་དཀའ་ངལ་ཡོད་པ་དངོས་ཡོད་ཡིན། བོད་ནས་ཡོང་མཁན་ཆབ་སྲིད་དང་ཆོས་དད་ཀྱི་དཀའ་ངལ་ཡོད་མཁན་ལ་གདམ་ཀ་གཞན་མེད་ནའང་། ཤེས་ཡོན་དང་དཔལ་འབྱོར་སྐྱབས་བཅོལ་ཞུ་མཁན་ཚོས་ངེས་པར་དུ་བསམ་བློ་ནན་ཏན་གཏོང་རན་རེད། དེང་སྐབས་རྒྱ་ནག་ཁྱོན་ཡོངས་ཀྱི་དཔལ་འབྱོར་ཡར་རྒྱས་དང་བསྟུན་ཏེ། བོད་ནང་གི་དཔལ་འབྱོར་གནས་སྟངས་ཀྱང་རྒྱ་བལ་འབྲུག་གསུམ་ལས་བཟང་ལ། ཤེས་ཡོན་གོ་སྐབས་ཀྱང་རྒྱ་བལ་འབྲུག་གསུམ་ལས་ཡག་པ་མིན་ཡང་སྐྱོ་བ་མིན།
འདས་པའི་ལོ་ཤས་གོང་ནས་བཟུང་ཨ་རི་དང་ནུབ་ཕྱོགས་སུ་འགྲམ་ཆུ་ལྡང་རིན་མེད་པ་ཆགས་བཞིན་ཡོད། ལྷག་པར་དུ་ཡུ་རོབ་ནང་བོད་པ་སྐྱབས་བཅོལ་བའི་ཡིག་ཆ་ནག་པོ་ཆགས་བཞིན་པའི་གནས་ཚུལ་ཧ་ཅང་ཛ་དྲག་རེད། དེང་སྐབས་ནུབ་ཕྱོགས་ནས་ཕ་ཡུལ་བོད་ནང་དངུལ་གཏོང་བ་ལས་ལྡོག་སྟེ། ནུབ་ཕྱོགས་སུ་སྡོད་མཁན་ཚོར་ཁང་པ་ཉོ་བ་སོགས་ལ་བོད་ནང་གི་སྤུན་ཉེ་ཚོས་ཚུར་ནུབ་ཕྱོགས་ལ་རྒྱ་སྒོར་གཏོང་གི་ཡོད་པའི་གནས་ཚུལ་ཡང་གོ་རྒྱུ་འདུག
བོད་ནས་རྒྱ་གར་དུ་ལམ་ཁྲིད་པར་རྒྱ་སྒོར་ཁྲི་ལྔ་དྲུག་སྤྲོད་དགོས་ལ། རྒྱ་གར་ནས་ནུབ་ཕྱོགས་སུ་སྐྱོད་པར་ཧིན་སྒོར་འབུམ་བཅུ་ནས་ཉི་ཤུའི་སྐད་ཆ་རེད། དངུལ་འབོར་ཆེན་སྤྲད་ཀྱང་དམིགས་ཡུལ་དུ་བསླེབ་ཐུབ་མིན་ལས་ལ་བཅོལ་དགོས་ཤིང་། གལ་སྲིད་ཨ་ཧྥི་རི་ཀར་ལུས་པའི་བུད་མེད་དེ་གཉིས་ལྟར། ལམ་བར་ནས་ལྷག་པ་དང་འཛིན་བཟུང་ཐེབས་པ་སོགས་བྱུང་ན། རི་བོང་དང་སྡོམ་པ་གཉིས་ཀ་ཤོར་བའི་དཔེ་ལྟར། མི་ཚེ་འཕྲོ་བརླག་ཏུ་འགྲོ་རྒྱུའི་ཉེན་ཁའང་སོ་སོ་དང་འགྲོག་ནས་ཡོད་སྟབས། འདི་ནི་ཁྱོད་ཀྱིས་རིན་སྤྲོད་དེ་ཉོས་པའི་ཕམ་ཁ་སྡུག་ཤོས་དེ་ཡིན།།
