ཆོས་བརྒྱུད་ཕན་ཚུན་མཐུན་པོ་བྱོས།

བོད་པ་ཚོས་བླ་མ་ལ་སྐྱབས་སུ་མཆི། སངས་རྒྱས་ལ་སྐྱབས་སུ་མཆི་ཟེར་ནས་སྐྱབས་སུ་འགྲོ་སྟངས་དེ་ངའི་བདེ་སྡུག་ཚང་མ་ཁྱེད་རང་གི་ལག་ཏུ་ཡོད་ཟེར་བ་འདྲ་བོ་ཆགས་འདུག དེ་སངས་རྒྱས་པའི་ཆོས་དང་ཡོངས་སུ་འགལ་བ་རེད་ཅེས་༧གོང་ས་མཆོག་གིས་གསུངས།

ཁ་སང་དང་དེ་རིང་ཉིན་ ༢ རིང་༧གོང་ས་མཆོག་སྦིར་ས་གནས་སུ་རྟེན་གཞི་བྱས་པའི་དཔལ་སྤུངས་ཤེས་རབ་གླིང་གི་རྟེན་བརྟེན་པ་ལེགས་འགྲུབ་རབ་གནས་དང་། བཀའ་ཆོས་སོགས་ཀྱི་མཛད་འཕྲིན་སྐྱོང་བཞིན་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༨།༡༠ ཐོག་ཤེས་རབ་གླིང་གི་ནཱ་རོའི་སྒྲུབ་སྡེར་ཆིབས་སྒྱུར་བསྐྱངས་ཏེ་མནྜལ་རྟེན་གསུམ་འདེགས་འབུལ་དང་། ནཱ་རོའི་ཆོས་དྲུག་དང་འབྲེལ་བའི་རྩ་རླུང་ཉམས་ལེན་སྤྱན་འབུལ་གྲུབ་རྗེས། བཤད་གྲྭ་ལུང་རིགས་འཇམ་དཔལ་གླིང་དུ་ཆིབས་བསྒྱུར་གྱིས་བཤད་གྲྭར་རབ་གནས་གནང་བ་དང་འབྲེལ་གྲུབ་རྒྱལ་ལུགས་ཀྱི་ཚེ་དབང་དང་བྱང་ཆུབ་ལམ་སྒྲོན་གྱི་བཀའ་ཆོས་བསྩལ་སོང་།

སྐབས་དེར་བྱམས་མགོན་ཏཱའི་སི་ཏུ་རིན་པོ་ཆེ་མཆོག་གིས་དབུས་མཁན་སྤྲུལ་དང་གྲྭ་བཙུན། དེ་བཞིན་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པས་གཙོས་སུ་ཇ་བོད་ཁྱིམ་སོགས་ཉེ་འཁོར་སློབ་གྲྭ་ཁག་གི་དགེ་སློབ་དང་། ཕྱོགས་མཐའ་ཁག་ནས་ཡོང་བའི་སེར་སྐྱ་མི་མང་བཅས་དད་ལྡན་ཆོས་ཞུ་བ་ ༦༠༠༠ ལྷག་འདུ་འཛོམས་གནང་འདུག་ལ། བཀའ་ཆོས་ཀྱི་མཇུག་ཏུ་༸བྱམས་མགོན་སི་ཏུ་རིན་པོ་ཆེ་མཆོག་གིས་དབུས་འདུས་མང་ཡོངས་ནས་བརྟན་བཞུགས་བསྟར་འབུལ་ཞིག་ཀྱང་ཞུས་སོང་།

བཀའ་ཆོས་སྐབས་༸གོང་ས་མཆོག་གིས་སངས་རྒྱས་ཀྱི་ཆོས་མ་ནོར་བ་བྱེད་དགོས་སྐོར་བཀའ་གནང་དོན། ང་ཚོ་བོད་པའི་སྤྱི་ཚོགས་ནང་ཁ་གཏུག་གིས་ཞུས་པ་ཡིན་ན། སངས་རྒྱས་པའི་ཆོས་ཟེར་བ་དེ་ག་འདྲ་ཡིན་པ་ཤེས་ཀྱི་ཡོད་པ་མ་རེད། བླ་མ་ལ་སྐྱབས་སུ་མཆི། སངས་རྒྱས་ལ་སྐྱབས་སུ་མཆི་ཟེར་བ་མ་གཏོགས་མི་འདུག་གཱ སྐྱབས་སུ་འགྲོ་སྟངས་འདྲ་ བོ་དེའང་ངའི་བདེ་སྡུག་ཚང་མ་ཁྱེད་རང་གི་ལག་ཏུ་ཡོད་པ་རེད་ཟེར་བ་འདྲ་བོ་ཆགས་འདུག དེ་སངས་རྒྱས་པའི་ཆོས་དང་ཡོངས་སུ་འགལ་བ་རེད། འཇིག་རྟེན་བཀོད་པ་པོ་འདོད་མཁན་ཡིན་ན། ངའི་བདེ་སྡུག་ཚང་མ་ཁྱེད་ཀྱིས་མཁྱེན་ཞེས་ལབ་ན་འགྲིག་གི་ཡོད་པ་རེད། འཇིག་རྟེན་བཀོད་པ་པོས་ང་ཚོ་ཚང་མ་བཀོད་པ་རེད། ང་ཚོའི་བདེ་སྡུག་ཚང་མ་ ཁོང་གི་ཕྱག་ཏུ་ཡོད་པ་ཟེར་གྱི་ཡོད་ཀྱང་། སངས་རྒྱས་ཀྱི་ཆོས་ཀྱིས་བདག་ཉིད་བདག་གི་མགོན་ཡིན་གསུངས་འདུག་མ་གཏོགས་བཅོམ་ལྡན་འདས་འཇིག་རྟེན་བཀོད་པ་པོ་ཡིན་གསུང་གི་མི་འདུག

ནང་པའི་གཞུང་དུ་འཇིག་རྟེན་བཀོད་པ་པོ་འདོད་པ་ཡིན་ན། རིག་པས་གནོད་པ་ཡོད་པ་མང་པོ་གསུངས་འདུག འཇིག་རྟེན་བཀོད་པ་པོ་འདོད་མཁན་ཚོར་ཕན་གྱི་ཡོད་པས་འགྲིག་གི་ཡོད་པ་རེད། ང་ཚོས་ཇུས་གཏོགས་བྱ་རྒྱུ་ཡོད་པ་མ་རེད། སངས་རྒྱས་པ་རང་གི་ཆོས་ལུགས་ཀྱི་ཐོག་ནས་བཤད་ན། འཇིག་རྟེན་བཀོད་པ་པོ་འདོད་པ་ཡིན་ན་འགྲིག་མིན་མང་པོ་གསུང་གི་ཡོད་པ་རེད། དེར་བརྟེན་སངས་རྒྱས་བཅོམ་ལྡན་འདས་ཀྱིས་གལ་ཆེན་པོ་བྱས་ནས་ང་ཚོའི་སྡུག་བསྔལ་དེ་བག་ཆགས་ཀྱིས་སེལ་བ་མེད་པ་དང་། སྡུག་བསྔལ་གྱི་རྒྱུ་སྡིགས་པ་དེ་ཆོས་ཀྱིས་འཁྲུད་རྒྱུ་མེད་པ་གསུངས་ཡོད་པ་རེད། ཅེས་གསུངས་སོང་།

ཡང་ཁོང་གིས་བོད་ཀྱི་ཆོས་བརྒྱུད་ཕན་ཚུན་འཆམ་མཐུན་སྔར་ལྷག་ཡོང་ཐབས་དགོས་སྐོར་གསུངས་སོང་། ང་ཚོ་ནང་པའི་ཆོས་པ་ཞིག་ཆགས་ཡོད་སྟབས། ཆོས་ལུགས་ཚང་མར་མཐུན་པོ་དགོས་པ་དཔེ་གལ་ཆེན་པོ་རེད། ད་ལྟའི་ཆར་བྱམས་བརྩེ་བཤད་མཁན་དེ་ཆོས་ལུགས་པའི་ནང་མ་གཏོགས་མི་འདུག བྱམས་བརྩེ་བཤད་མཁན་ཕན་ཚུན་བར་མ་འཆམ་པར་རྒྱག་རེས་བརྒྱབ། གསོད་རེས་བྱས་བསྡད་པ་ཡིན་ན་ཐབས་སྐྱོ་བོ་རེད། དེར་བརྟེན་ཆོས་ལུགས་ཕན་ཚུན་བར་མཐུན་པོ་བྱེད་རྒྱུ་ཞེ་དྲག་གལ་ཆེན་པོ་རེད། སྔ་མོ་ཡིན་ན་ཆོས་བརྒྱུད་སོ་སོས་ཆོས་བརྒྱུད་གཅིག་བསྟན་པ་གཅིག་བྱས་ནས་འགྲོ་བཞིན་ཡོད་ཀྱང་། དེ་རིང་ཁ་སང་ཆོས་དུ་མ་དང་། བསྟན་པ་དུ་མ་ཟེར་བའི་དུས་སྐབས་ཤིག་སླེབ་ཡོང་གི་ཡོད་ལ། རིམ་གྱིས་ཆོས་བརྒྱུད་ཕན་ཚུན་བར་མཐུན་པོ་བྱེད་པ་ཤུགས་ཆེ་རུ་འགྲོ་བ་ཞིག་ཏན་ཏན་རེད་འདུག ང་རང་ཚོ་བོད་པ་རང་ཉིད་ལ་ཆ་བཞག་ནའང་། ཆོས་བརྒྱུད་ཕན་ཚུན་མཐུན་པོ་བྱེད་རྒྱུ་དཔེ་གལ་ཆེན་པོ་ཆགས་འདུག

འཛམ་བུ་གླིང་འདིའི་སྒང་ལ་ཆོས་དད་མི་འདྲ་བ་རྒྱུ་མཚན་དུ་བྱས་ནས་གསོད་རེས་གཏོང་གི་འདུག་པ་དེ་ཧ་ཅང་ཐབས་སྐྱོ་བོ་རེད། ང་རང་ཚོ་བོད་པའི་ལོ་རྒྱུས་ལ་བསམ་བློ་ཞིག་བཏང་ན་ཡང་། ང་རང་ཚོས་སྔ་མོར་དཔེར་ན་དགེ་ལུགས་པས་བཀའ་བརྒྱུད་དང་རྙིང་མར་བརྡུངས་བ་དང་། ཡང་སྐབས་རེར་བཀའ་བརྒྱུད་རྙིང་མ་ཡིས་དགེ་ལུགས་པར་བརྡུངས་ནས་དམག་བརྒྱབ་པའི་གནས་ཚུལ་བྱུང་ཡོད་པ་རེད། མིང་ལའང་སེར་དམག་ཟེར་ནས་སེར་དམག་ཕབ་ཡོད་པ་རེད། ང་ཚོ་རྒྱ་གར་ནང་བསླེབས་པའི་དུས་ཡུན་ནང་ཆོས་བརྒྱུད་ཁག་གི་དབུ་འཁྲིད་རྣམ་པ་ཚང་མ་ཕན་ཚུན་ངོ་ཤེས་དང་ནང་ཚགས་ཆགས་ནས་མཐུན་པོ་ཡོད་པ་དེ་ཞེ་དྲག་ཡག་པོ་རེད། ཅེས་གསུངས་བ་དང་འབྲེལ། ད་དུང་ཡང་ཆོས་བརྒྱུད་ཚང་མས་ཕན་ཚུན་ངོ་ཤེས་པ་ཙམ་མ་ཡིན་པར། ཆོས་བརྒྱུད་ཕན་ཚུན་གྱི་གཞུང་ལ་སློབ་སྦྱོང་དང་བགྲོ་གླེང་སོགས་བརྒྱུད་ནས་ཚང་མ་སྔར་ལས་སེམས་ཐག་ཉེ་བོ་ཡོང་ཐབས་གནང་དགོས་པ་ཧ་ཅང་གལ་ཆེན་པོ་ཡིན་སྐོར་སོགས་གསུངས་སོང་།

གསར་འགོད་པ་པདྨ་མཚོས། སྦིར་ཤེས་རབ་གླིང་ནས་སྤེལ།