རེས་གཟའ་ཟླ་བའི་དགོང་མོར་རྒྱ་ནག་ནན་ཅིན་ནས་ཁྲོན་ཆིན་དུ་སྐྱོད་བཞིན་པའི་གྲུ་གཟིངས་ཤིག་འབྲི་ཆུའི་ནང་ནུབ་སྟེ་ད་ལྟ་ད་དུང་ལྷག་ཡོད་འདུག
གཟའ་ཟླ་བའི་རྒྱ་ནག་གི་དགོང་མོའི་ཆུ་ཚོད་ ༩།༢༨ སྟེང་། རྒྱ་ནག་ནན་ཅིན་ནས་ཁྲོན་ཆིན་ལ་འགྲོ་བཞིན་པའི་ཤར་ཕྱོགས་སྐར་མདའ་ཞེས་པའི་གྲུ་གཟེངས་ཆེན་པོ་ཞིག་འབྲི་ཆུའི་ནང་ནུབ་ཡོད་པ་དང་། གྲུ་གཟེངས་དེའི་ནང་མི་ ༤༥༨ ཡོད་པ་ལས་ལོ་ཆུང་ཤོས་ ༣ དང་ཆེ་ཤོས་ ༨༠ ཡིན་འདུག
མྱུར་སྐྱོབ་པའི་འཚོལ་ཞིབ་བྱས་པ་བརྒྱུད་དེ་རིང་སྔ་དྲོ་བར་མི་ ༡༤ གསོན་པོར་རག་ཡོད་པ་དང་། འདས་གྲོངས་སུ་ཕྱིན་པའི་ཕུང་བོ་ ༡༨ རྙེད་སོན་བྱུང་ཡོད་འདུག གཞན་མི་ ༤༠༠ ད་དུང་འདས་གསོན་གྱི་གནས་ཚུལ་གང་ཡང་མ་ཤེས་པར་ལྷག་ཡོད་འདུག དེ་རིང་བྷེ་བྷེ་སིའི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱལ་སྤྱིའི་གསར་འགོད་པ་རྣམས་མཐའ་ཐུག་སྲུང་སྐོར་བའི་ཕྱི་ལོགས་སུ་བཀག་འདུག ཅེས་འཁོད་འདུག
བྷེ་བྷེ་སོ་གསར་ཁང་རྒྱ་ཡིག་སྡེ་ཚན་ལ་རྒྱ་ནག་བརྒྱུད་ལམ་ཁག་ནས་གནས་ཚུལ་འབྱོར་བ་ལྟར་ན། དོན་རྐྱེན་དེ་བྱུང་སྟེ་ཅུང་མ་འགོར་བར། རྒྱ་ནག་དབུས་དྲིལ་བསྒྲགས་ལྷན་ཁང་གིས་ས་གནས་ལ་བརྡ་ཡིག་ཅིག་བཏང་སྟེ། ཞིང་ཆེན་དང་གྲོང་ཁྱེར་རིམ་པའི་གསར་འགོད་པ་གཅིག་ཀྱང་དོན་རྐྱེན་བྱུང་ཡུལ་དུ་རྒྱུས་ལོན་བྱེད་པར་གཏོང་མི་ཆོག་པ་དང་། ད་སྔ་འབྱོར་ཟིན་པ་དག་ཀྱང་གང་མགྱོགས་ཕིར་འཕུད་གཏོང་དགོས་པའི་བཀའ་ཁྱབ་བཏང་ཡོད་པ་མ་ཟད། བརྒྱུད་ལམ་ཁག་ཚང་མས་གཅིག་གྱུར་ཐོག་ཞིན་ཧྭ་གསར་ཁང་གི་གནས་ཚུལ་བརྒྱུད་སྤེལ་བྱེད་དགོས་པ་དང་། པར་དང་བརྙན་སོགས་ཀྱིང་དབུས་བརྙན་འཕྲིན་ཁང་ནས་མཁོ་སྤྲོད་བྱས་པའི་པར་མ་གཏོགས་གཞན་བེད་སྤྱོད་གཏང་མི་ཆོག་ཅེས་བཀའ་ཕབ་འདུག
རྒྱ་ནག་གི་སྲིད་བློན་ལི་ཁེ་ཆང་དོན་རྐྱེན་བྱུང་ཡུལ་དུ་བསྐྱོད་དེ། ནུས་པ་ཡོད་ཚད་ཀྱིས་མིའི་ཚེ་སྲོག་སྐྱོབ་ཐབས་བྱེད་དགོས་པའི་བཀོད་འདོམ་བྱས་ཡོད་འདུག ཤར་ཕྱོགས་སྐར་མདའ་ཞེས་པའི་གྲུ་གཟེངས་དེ་ད་ལྟ་ད་དུང་ཅན་ལེ་ཏཱ་མཱ་ཀྲུའི་རྒྱ་མཚོའི་ནང་ལྷག་ཡོད་པ་དང་། གནམ་གཤིས་ཡག་པོ་མེད་པ་དང་ཆུ་རྙོག་སོགས་ཀྱི་དབང་གིས་མྱུར་སྐྱོབ་པ་ཚོར་དཀའ་ངལ་ཆེན་པོ་འཕྲད་བཞིན་ཡོད་འདུག
གྲུ་གཟིངས་དེའི་མགོ་གཙོ་ཀྲོང་ཧྲོན་ཝིན་ (Zhang Shunwen) དང་འགན་འཛིན་ཡཱང་ཀྲོན་ཆན་ (Yang Zhongquan) གཉིས་ཉེན་རྟོག་པས་བཀག་ཉར་བྱས་ཡོད་འདུག ཤར་ཕྱོགས་སྐར་མདའ་རྟགས་ཅན་གྱི་གྲུ་གཟིངས་དེ་ ༡༩༩༤ ལོར་བཟོ་སྐྲུན་བྱས་ཡོད་པ་དང་། གྲུ་གཟིངས་དེའི་ནང་འགྲུལ་བ་ ༥༣༤ ཤོང་གི་ཡོད་འདུག དོན་རྐྱེན་བྱུང་སྐབས་ཅང་སུ་ཞིང་ཆེན་ནན་ཅིན་ནས་ཁྲོན་ཆིན་ལ་སྐྱོད་བཞིན་ཅིང་། དེ་གཉིས་བར་སྤྱི་ལེ་ ༡༥༠༠ ལྷག་ཡོད་འདུག
གསར་འགོད་པ། འཇིགས་མེད་རྒྱ་མཚོ།
