ཨ་རིས་བོད་རང་བཙན་པར་རྒྱབ་སྐྱོར་བྱེད་ཀྱི་འདུག

བཙན་བྱོལ་བོད་མིའི་ལྟེ་གནས་ཁག་གཙོས་པའི་ཕྱི་རྒྱལ་ཡུལ་གྲུ་ཁག་ཏུ་༧གོང་ས་མཆོག་གི་སྐུའི་འཁྲུངས་སྐར་སྲུང་གཙི་ཞུ་བཞིན་པ་དང་བསྟུན་ཏེ་རྒྱ་ནག་གཞུང་གིས་ཀྱང་༧གོང་ས་མཆོག་ལ་སྐྱོན་བརྗོད་ཤུགས་ཆེ་རུ་བཏང་འདུག

ཁ་སང་རྒྱ་གར་དུས་བབ་གསར་ཁང་གིས་གནས་ཚུལ་སྤེལ་བའི་ནང་། རྒྱ་ནག་རྒྱལ་སྲིད་སྤྱི་ཁྱབ་ཁང་གསར་འགྱུར་སྡེ་ཚན་གྱི་འགྲོ་བ་མིའི་ཐོབ་ཐང་ལས་དོན་ཁང་གི་འགན་འཛིན་ཟུར་བ་ལའུ་ཀོང་ཅིན་ (Lu Gangjin) གྱིས། ཨ་རིས་བོད་ནི་རྒྱ་ནག་གི་ཆ་ཤས་ཡིན་པ་ཡོངས་ཁྱབ་ཏུ་བསྒྲགས་ཡོད་ཀྱང་། ད་དུང་བོད་རང་བཙན་འཐབ་རྩོད་པ་ཚོར་རྒྱབ་སྐྱོར་བྱེད་བཞིན་ཡོད་པ་དང་། མི་ཁ་ཤས་རྒྱ་ནག་ནས་བྲོལ་བྱོལ་ཕྱིན་ཏེ་ཕྱི་ཕྱོགས་ཀྱི་ཁ་བྲལ་བ་དང་མཉམ་དུ་ལས་ཀ་བྱེད་བཞིན་ཡོད་སྐོར་སོགས་བརྗོད་འདུག ཁོས་བརྗོད་དོན། “ལོ་བརྒྱ་ཙམ་གྱི་སྔོན་ལ་ཨ་རིས་བོད་ནི་རྒྱ་ནག་གི་ཆ་ཤས་ཡིན་པ་ངོས་འཛིན་ཡོད་པའི་ཁྱབ་བསྒྲགས་བྱས་ཡོད་པ་མ་ཟད། ད་ལྟ་ཡང་བོད་རྒྱ་ནག་དང་ཁ་བྲལ་ཐབས་མེད་པའི་ཆ་ཤས་ཤིག་ཡིན་པར་ཡོངས་བསྒྲགས་བྱས་ཡོད་ཀྱང་། ལྐོག་ནས་ད་དུང་ཨ་རིས་བོད་རང་བཙན་འཐབ་རྩོད་པར་རྒྱབ་སྐྱོར་བྱེད་བཞིན་འདུག ” ཅེས་བརྗོད་འདུག

རྒྱ་ནག་གཞུང་ཞབས་པ་ལའུ་ཀོང་ཅིན་གྱིས་ “མི་ཁ་ཤས་རྒྱ་ནག་ནས་བྲོས་བྱོལ་ཕྱིན་ཏེ་ཕྱི་ཕྱོགས་ཀྱི་ཁ་བྲལ་བ་དང་མཉམ་འབྲེལ་བྱས་ཏེ་གཞི་བརྟེན་མེད་པའི་མཐུན་རྐྱེན་སྐྲུན་བཞིན་པ་དེས་རྒྱ་ནག་ནང་དུ་འཚོ་སྡོད་བྱེད་བཞིན་པའི་མི་མང་ལ་བར་ཆད་བཟོ་བཞིན་ཡོད་པ་རེད།” ཅེས་དང་། “དེར་ཕྱི་ཕྱོགས་སུ་ཕུང་དཀྲུག་བྱེད་མཁན་གྱི་གྲྭ་བའི་ཚོགས་པ་ཆུང་ཆུང་ཁ་ཤས་ཡོད་པ་ངས་ཤེས་ཀྱིན་ཡོད།” ཅེས་སོགས་བརྗོད་འདུག

གསར་འགོ་པས། ད་ལྟའི་བར་བོད་མི་ ༡༤༠ ལྷག་གིས་རང་ལུས་མེར་བསྲེགས་གནང་ཏེ་ཁོང་ཚོས་༧གོང་ས་མཆོག་བོད་ནང་ཕྱིར་ཕེབས་ དགོས་པ་དང་བོད་ལ་རང་དབང་དགོས་པའི་འབོད་སྒྲའི་སྐོར་དྲི་བ་དྲིས་སྐབས། ཁོས་དྲག་སྤྱོད་དེའི་རིགས་རྒྱལ་སྤྱིའི་རྣམ་འགྱུར་ལ་དམིགས་ཡོད་པ་དང་། ༢༠༠༨ ལོར་པེ་ཅིན་ཨོ་རྩལ་སྐབས་བོད་རང་བཙན་འཐབ་རྩོད་པ་ཁ་ཤས་ཀྱིས་ཨོ་རྩལ་དཔལ་འབར་བརྒྱུད་སྤྲོད་ལ་གནོད་སྐྱོན་བཟོ་ཐབས་བྱས་ཏེ་རྒྱ་ནག་མི་མང་ལ་ཞེ་འཁོན་བསླངས་ཡོད་པ་དང་། ༢༠༢༢ ལོའི་དགུན་ཁའི་ཨོ་རྩལ་འགྲན་སྡུར་དེ་རྒྱ་ནག་ནང་འཚོགས་ན་འགྲིག་གི་མེད་པའི་ངོ་རྒོལ་བྱེད་ཀྱི་ཡོད་པ་རེད། ཅེས་བརྗོད་འདུག

ཁོས་མུ་མཐུད་དུ་༧གོང་ས་མཆོག་དགུང་གྲངས་བརྒྱད་ཅུའི་འཁྲུངས་སྐར་སྲུང་གཙིའི་སྐོར་ལ། “ཁོས་ཏཱ་ལའི་བླ་མའི་སྐྱེས་སྐར་ཐེངས་གཉིས་པ་ཟླ་བདུན་པའི་ཚེས་ ༦ ཉིན་ཨ་རི་ནས་སྲུང་གཙི་བྱེད་བཞིན་པ་དེའི་ནང་ལ་ཕྱི་ཕྱོགས་ཀྱི་ཤུགས་རྐྱེན་ཆེན་པོ་ཡོད་པ་ཁྱོད་ཀྱིས་མཐོང་ཐུབ། ཁོ་ཆོས་ཀྱི་མགོ་ཁྲིད་ཅིག་ཡིན་སྟབས་ཆོས་ཕྱོགས་ཀྱི་བྱེད་སྟངས་ལ་ངས་འགྲེལ་བཤད་རྒྱག་གི་མེད། འོན་ཀྱང་ཁོ་ལ་མངོན་པར་མི་གསལ་བའི་ཆབ་སྲིད་ཀྱི་ཕུགས་བསམ་ཞིག་ཡོད་པ་མ་ཟད། ལོ་མང་པོ་ཞིག་ལ་ཁོས་དུས་རྒྱུན་དུ་རླབས་ཆེན་གྱི་བོད་རང་བཙན་ཟེར་བའི་ཐོག་ལས་ཀ་བྱེད་བཞིན་ཡོད་རེད།” ཅེས་བརྗོད་འདུག

ཁོས་བསྐྱར་བཤད་ནན་བརྗོད་ཀྱིས། པེ་ཅིན་གཞུང་གི་ལངས་ཕྱོགས་ནི། བོད་དེ་རྒྱ་ནག་དང་ཁ་འབྲེལ་ཐབས་མེད་པའི་ཆ་ཤས་ཤིག་ཡིན་པ་མ་ཟད། ཕྱི་ཕྱོགས་ཀྱི་ཤུགས་རྐྱེན་མེད་པ་ཡིན་ན་རྒྱ་དཀར་ནག་གཉིས་ཀྱི་འབྲེལ་ལམ་ཡག་ཏུ་འགྲོ་རྒྱུ་མ་ཟད། བོད་དང་རྒྱ་གར་གྱི་འབྲེལ་ལམ་ཡང་ད་ལྟ་ལས་ཡག་ཏུ་འགྲོ་བ་རེད། ཅེས་སོགས་བརྗོད་འདུག

གསར་འགོད་པ། འཇིགས་མེད་རྒྱ་མཚོ།