ཀོ་པའོ་ཞོན་ཏང་ནས་ཕྱིར་འཕུད་བཏང་།

དམག་དཔོན་འདིའི་སྐོར་ལ་རྒྱ་ནག་གཞུང་གིས་བསྒྲགས་པའི་གསར་འགྱུར།

ཟླ ༧ པའི་ཚེསས ༣༠ ཉིན། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཚོགས་འདུའི་ཐོག ཀྲུང་དབྱང་དམག་ཨུའི་སྒྲིག་ཁྲིམས་ཞིབ་བཤེར་ཨུ་ལྷན་གྱིས《ཀུའོ་པའོ་ཞུང་ལ་རྩ་འཛུགས་ཀྱིས་བརྟག་དཔྱད་བྱས་ཚུལ་དང་ཐག་གཅོད་བསམ་འཆར་གྱི་སྙན་ཞུར》གྲོས་ཞིབ་བརྒྱུད་པ་མ་ཟད་གྲོས་འཆམ་བྱུང་སྟེ། ཀུའོ་པའོ་ཞུང་ཏང་ཁོངས་ནས་ཕྱིར་ཕུད་རྒྱུའི་ཉེས་ཆད་བཅད་པ་དང་། ལྐོག་རྔན་བླངས་པའི་བྱས་ཉེས་ཚབས་ཆེན་གྱི་གནད་དོན་དང་ཁུངས་ཆེས་མཐོའི་མི་དམངས་ཞིབ་དཔྱོད་ཁང་གིས་དམག་དོན་ཞིབ་དཔྱོད་ལས་ཁུངས་ལ་དབང་ཆ་སྤྲད་པ་ལྟར་ཁྲིམས་ལྟར་ཐག་གཅོད་བྱེད་རྒྱུ་རེད།

༢༠༡༥ལོའི་ཟླ ༤ པའི་ཚེས ༩ ཉིན། ཀྲུང་གུང་ཀྲུང་དབྱང་གིས་ཏང་གི་སྒྲིག་ཁྲིམས་སྲོལ་ཡིག་ལྟར་ཀུའོ་པའོ་ཞུང་ལ་རྩ་འཛུགས་ཀྱིས་བརྟག་དཔྱད་བྱེད་པར་ཐག་བཅད། ཞིབ་བཤེར་བྱས་པ་བརྒྱུད། ཀུའོ་པའོ་ཞུང་གིས་ལས་གནས་ཀྱི་སྟབས་དང་བསྟུན་ནས། མི་གཞན་པར་གོ་གནས་སྤོར་བ་སོགས་ཀྱི་ཐད་ཁེ་ཕན་བསྐྲུན་པ་དང་། ཐད་ཀར་རང་ཉིད་བརྒྱུད་པའམ་ཁྱིམ་མི་བརྒྱུད་ལྐོག་རྔན་ཚབས་ཆེན་བླངས་པའི་བྱས་ཉེས་དེ་ཏང་གི་སྒྲིག་ཁྲིམས་དང་འགལ་ཡོད་པ་མ་ཟད། ལྐོག་རྔན་བླངས་པའི་དོགས་ཡོད་བྱས་ཉེས་ཚབས་ཆེན་ཡིན་ལ་ཤུགས་རྐྱེན་ངན་པ་ཐེབས་ཡོད་པ་རེད།

ཚོགས་འདུས། ཀུའོ་པའོ་ཞུང་གི་སྒྲིག་འགལ་ཁྲིམས་འགལ་གྱི་བྱས་ཉེས་ཚབས་ཆེན་བསགས་པའི་གནད་དོན་ལ་ཞིབ་བཤེར་ཐག་གཅོད་ནན་མོ་བྱས་པ་དེས། བློ་མཐུན་ཞིས་ཅིན་ཕིང་སྤྱི་ཁྱབ་ཧྲུའུ་ཅི་ཡིན་པའི་ཏང་ཀྲུང་དབྱང་གིས་སྒོ་ཀུན་ནས་ཏང་ནན་གྱིས་སྐྱོང་པ་དང་། ཁྲིམས་ལྟར་དམག་སྐྱོང་། དམག་དཔུང་ནན་གྱིས་སྐྱོང་པའི་ཆབ་སྲིད་ཀྱི་ཆོད་སེམས་བརྟན་པོ་མཚོན་ཡོད་ལ། ཏང་ཀྲུང་དབྱང་གིས་བློ་བརྟན་འགྱུར་མེད་སྒོས་རུལ་སུངས་ལ་ཆད་གཅོད་བྱེད་པའི་འགྱུར་མེད་ཀྱི་བློ་སྟོབས་ཀྱང་མཚོན་ཡོད། ཏང་ཡོངས་དང་དམག་མི་ཡོངས་ཀྱིས་ངེས་པར་དུ་དེང་སྐབས་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་གྱི་འཐབ་རྩོད་དུས་བབ་སྔར་བཞིན་ཛ་དྲག་ལ་རྙོག་འཛིང་ཆེ་བར་ངོས་འཛིན་གསལ་པོ་བྱེད་རྒྱུ་དང་། བློ་བརྟན་འགྱུར་མེད་ངང་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་གཏིང་ཟབ་སྤེལ་ཏེ། མི་གང་ཞིག་གི་དབང་ཆའི་ཆེ་ཆུང་དང་གོ་གནས་མཐོ་དམན་ག་འདྲ་ཡིན་རུང་། ཏང་གི་སྒྲིག་ཁམས་དང་རྒྱལ་ཁབ་ཀྱི་བཅའ་ཁྲིམས་དང་འགལ་ཚེ། གཅིག་ཀྱང་མ་ལུས་པར་རྩད་ཞིབ་ཐག་གཅོད་ནན་མོ་བྱེད་རྒྱ་ལས་རྒྱ་ཡན་དུ་གཏོང་པའམ་ལྷོད་གཡེང་གང་ཡང་གཏོང་མི་སྲིད་པར་འདོད།

ཚོགས་འདུའི་ཐོག རིམ་པ་ཁག་གི་ཏང་ཨུད་ཀྱིས་ཏང་ཡོན་ལས་བྱེད་པ་དང་ལྷག་དོན་མཐོ་རིམ་དང་འབྲིང་རིམ་གྱི་འགོ་ཁྲིད་ལས་བྱེད་པའི་སློབ་གསོ་དང་དོ་དམ། ལྟ་སྐུལ་ལ་ཤུགས་སྣོན་བྱེད་རྒྱུ་དང་། རུལ་རྒོལ་གཙང་སྤེལ་གྱི་ཁྲིམས་སྲོལ་དང་ལམ་ལུགས་འཛུགས་བསྐྲུན་ལ་ཤུགས་སྣོན་བྱས་ཏེ། སྒྲིག་ཁྲིམས་དང་སྒྲིག་སྲོལ་གྱི་ཚོད་འཛིན་ནུས་པ་བཏོན་པ་བརྒྱུད། རུལ་སུངས་བྱེད་མི་ཕོད་པ་དང་རུལ་སུངས་བྱེད་མི་ཐུབ་པ། བྱེད་འདོད་མེད་པའི་ལམ་སྲོལ་གོ་ཆོད་ཆགས་པར་སྐུལ་འདེད་བྱེད་རྒྱུ་དང་། ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་འཐབ་རྩོད་ཐད་སྔར་བས་གྲུབ་འབྲས་གསར་པ་ལོན་དགོས། རིམ་པ་ཁག་གི་འགོ་ཁྲིད་ལས་བྱེད་པས་ངེས་པར་དུ་མར་ཁེ་སི་རིང་ལུགས་ཀྱི་འཇིག་རྟེན་ལྟ་ཚུལ་དང་མི་ཚེ་ལྟ་ཚུལ། རིན་ཐང་ལྟ་ཚུལ་བརྟན་པོ་ཆགས་པར་བྱས་ཏེ། རང་རྟོགས་སྒོས་ཏང་གཤིས་བློ་སྦྱོང་ལ་ཤུགས་སྣོན་དང་། ཏང་གི་ཆབ་སྲིད་སྒྲིག་ཁྲིམས་དང་ཆབ་སྲིད་ཀྱི་སྒྲིག་ལམ་ནན་བརྩི་བྱས་ཏེ། དབང་ཆའི་ལྟ་བ་དང་། གོ་གནས་ཀྱི་ལྟ་བ། ཁེ་ཕན་གྱི་ལྟ་བ་ཡང་དག་ཆགས་པར་བྱ་རྒྱུ་དང་། “ནན་གསུམ་དྲང་གསུམ”གྱི་བླང་བྱ་སྣེ་ཁྲིད་དེ་ལག་བསྟར་བྱེད་རྒྱུ་དང་། སྤྱོད་གཙང་རང་གཅུན་གྱི་གཏན་འབེབས་ཁག་སྣེ་ཁྲིད་དེ་བརྩི་སྲུང་། རུལ་སུངས་ལ་སྣེ་ཁྲིད་དེ་ངོ་རྒོལ་བྱེད་དགོས་ཤིང་། རང་རྟོགས་སྒོས་བསླུ་བྲིད་སྣ་དང་ཚོད་བགམ་སྣ་ཚོགས་ཐེག་པར་བྱས་ནས། ་ཏང་གི་སྔོན་ཐོན་རང་བཞིན་དང་སྤྱོད་གཙང་རང་བཞིན་ནམ་ཡང་རྒྱུད་ལས་མི་ཉམས་པ་ཡོང་དགོས་ཚུལ་ནན་གྱིས་བསྟན།

ཚོགས་འདུའི་ཐོག མི་དམངས་དམག་དཔུང་ནི་དུས་ནམ་ཡང་ཏང་དང་མི་དམངས་ཀྱི་ཡིད་རྟོན་རུང་པའི་དཔུང་སྡེ་ཡིན་ཏེ། བཅོས་སྒྱུར་སྒོ་འབྱེད་བྱས་པ་ནས་བཟུང་། ཏང་ཀྲུང་དབྱང་གི་འགོ་ཁྲིད་བརྟན་པོའི་འོག རྒྱལ་སྲུང་དང་དམག་དཔུང་འཛུགས་སྐྲུན་ཐད་གྲུབ་འབྲས་མངོན་གསལ་ལོན་ཡོད་པ་དང་། མི་དམངས་དམག་དཔུང་གིས་རྒྱལ་ཁབ་ཀྱི་བདག་དབང་དང་བདེ་འཇགས། གོང་འཕེལ་བཅས་ཀྱི་ཁེ་ཕན་ལ་སྲུང་སྐྱོབ་ཐད་དང་། མི་དམངས་ཀྱི་འཚོ་བ་བརྟན་བདེ་རོལ་བ་སོགས་ཀྱི་ཐད་བྱས་རྗེས་མི་དམན་པ་བཞག་ཡོད་རེད། ས་ཁུལ་ཁག་དང་སྡེ་ཚན་ཁག་གིས་དམག་དཔུང་འཛུགས་སྐྱོང་དང་བཅོས་བསྒྱུར་ཐད་སྔར་བཞིན་ཐུགས་ཁུར་དང་རྒྱབ་སྐྱོར་བྱེད་དགོས་ལ། དམག་སྲིད་དང་དམག་དམངས་མཐུན་སྒྲིལ་ལ་སྲུང་སྐྱོབ་དང་སྐུལ་འདེད་བཏང་ནས། དམག་དཔུང་སྟོབས་ལྡན་ཡོང་བའི་དམིགས་ཡུལ་མངོན་འགྱུར་ཐད་འགན་སྲུང་བརྟན་པོ་བྱེད་དགོས། དམག་དཔུང་གི་རིམ་པ་ཁག་གིས་བསམ་བློ་ཆབ་སྲིད་འཛུགས་བསྐྲུན་དང་སྤྱོད་ཚུལ་འཛུགས་བསྐྲུན་དམ་འཛིན་དོན་འཁྱོལ་བྱས་ནས། ནན་ཏན་སྒོས་དམག་ཡོངས་ཀྱི་ཆབ་སྲིད་ལས་དོན་གྲོས་ཚོགས་ཀྱི་དགོངས་དོན་ལག་བསྟར་དོན་འཁྱོལ་བྱེད་རྒྱུ་དང་། བསམ་བློ་སྔོན་ཐོན་ཡིན་པ་རྒྱུན་འཁྱོངས་བྱེད་པ། དམག་སྦྱོང་དམག་གྲབས་རྒྱུན་འཁྱོངས་བྱེད་པ། ནན་པོ་ཞེས་པའི་རང་དཔེ་གཞན་སྟོན་རྒྱུན་འཁྱོངས་བྱས་ནས། ཏང་དང་དམག་དཔུང་གི་གཟི་བརྗིད་སྲོལ་རྒྱུན་དང་སྤྱོད་ཚུལ་བཟང་པོ་འཛིན་སྐྱོང་དར་སྤེལ་བཏང་ཐོག མི་དམངས་དམག་དཔུང་གི་ཆབ་སྲིད་ཀྱི་རང་མདངས་ནམ་ཡང་མི་ནུབ་བྱ་རྒྱུ་དང་། ཚད་མཐོའི་བརྟན་ལྷིང་དང་གཅིག་སྡུད་གཅིག་གྱུར་ལ་ཁག་ཐེག་བྱས་ནས། དམག་དཔུང་སྟོབས་ལྡན་ཡོང་པ་དང་དམག་དཔུང་དར་རྒྱས་གཏོང་བའི་དྲང་ནུས་སྟོབས་ཆེན་དེ་སྔར་བས་གཅིག་སྡུད་བྱེད་དགོས་ཞེས་ནན་གྱིས་བསྟན།