རྒྱ་གཞུང་གིས་གསར་འགོད་པའི་ཐོག་དབང་འཛིན་དམ་བསྒྲགས་ཆེ་ཆེར་འཛིན་པར་བརྟེན་རྒྱ་ནག་གི་གྲགས་ཆེ་བའི་གསར་ཤོག་གི་རྩོམ་སྒྲིག་པ་ཞིག་ལས་སྣེ་ནས་རྩ་དགོངས་ཞུས་པའི་གནས་ཚུལ་ཞིག་སྦི་སྦི་སི་དྲ་གནས་སུ་ཐོན་ཡོད།
དེ་ཡང་རྒྱ་ནག་ལྷོ་ཕྱོགས་མེ་ཊོ་པོ་ལི་སི་ཉིན་རེའི་གསར་ཤོག་(Southern Metropolis Daily)གི་རྩོམ་སྒྲིག་པ་སྐུ་ཞབས་ཡུ་ཤའོ་ལ་ཧེ་(Yu Shaolei)ལགས་རང་ཉིད་ཀྱི་ལས་སྣེ་ནས་རྩ་དགོངས་ཞུས་ཡོད་པ་དང་། ད་ནས་བཟུང་རྒྱ་ནག་དམར་ཤོག་གི་རྗེས་སུ་འབྲང་རྒྱུ་མིན། ཞེས་ཁོང་གི་རྩ་དགོངས་ཞུ་རྒྱུའི་ཡིག་གེའི་ནང་དེ་ལྟར་བྲིས་ཡོད་འདུག་པ་མ་ཟད། ད་བར་ཁོང་རང་ཉིད་ཀྱི་སྤྱི་ཚོགས་དྲ་རྒྱའི་སྟེང་ཞིབ་བཤེར་སོ་ལྟ་བྱེད་མི་ཚོར་འཚམས་འདྲིའི་ཡིག་འཕྲིན་ཞིག་ཀྱང་བྲིས་ཡོད་འདུག
སྤྱིར་དེང་སྐབས་རྒྱ་གཞུང་གིས་གསར་འགྱུར་བརྒྱུད་ལམ་ཁག་གི་ཐོག་དམ་དྲག་བཀོད་འདོམས་ཤུགས་ཇེ་ཆེ་ཆེར་གཏོང་བའི་སྐབས་ཤིག་ཆགས་ཡོད་པ་དང་། ལྷག་པར་རེས་གཟའ་ཟླ་བའི་ཉིན་སྐུ་ཞབས་ཡུ་ཤའོ་ལ་ཧེ་ལགས་ཀྱིས་ལས་སྣེ་ནས་རྩ་དགོངས་ཞུ་རྒྱུའི་འདྲ་པར་ཀྱང་ཁོང་རང་གི་རིག་གཞུང་སྡེ་ཚན་གྱི་དྲ་རྒྱ་(SinaWeibomicroblog account) ཞེས་པ་དེའི་ནང་སྤེལ་ཡོད་འདུག
ཁོང་གི་རིག་གཞུང་སྡེ་ཚན་གྱི་དྲ་ཚིགས་དེའི་སྟེང་གསར་འགོད་པ་རྣམས་རྒྱ་ནག་དམར་གཞུང་གི་མཚན་གནས་སྲིད་བྱུས་དང་མཐུན་པ་བྱ་དགོས་པའི་བཀོད་འདོམས་དེར་མ་བཟོད་པར་གསར་འགོད་པའི་ལས་གནས་ལས་རྩ་དགོངས་ཞུ་དགོས་བྱུང་ཞེས་ཀྱང་བཀོད་ཡོད་འདུག
འདི་ལོའི་ཕྱི་ཟླ་གཉིས་པའི་ནང་སྲིད་འཛིན་ཞི་ཅིང་ཕིང་གིས་རྒྱལ་ཁབ་ཀྱི་གསར་འགྱུར་བརྒྱུད་ལམ་ཐོག་ལྟ་སྐོར་དུ་ཕེབས་སྐབས་ཁོང་གིས་གསར་འགོད་པ་རྣམས་ནས་རྒྱ་ནག་དམར་གཞུང་ལ་དོན་དམ་གྱི་འཆམ་མཐུན་ངེས་པར་དུ་བྱ་དགོས་ཞེས་དང་། རྒྱལ་ཁབ་ཀྱི་མཚན་གནས་སྲིད་བྱུས་དང་མཐུན་པའི་ལས་དོན་བྱ་དགོས། ཞེས་བརྗོད་ཡོད་འདུག
དེ་བཞིན་ཁོང་གིས་དྲ་ཚིག་སྟེང་། ངོས་རང་ལོ་མང་རིང་པུས་མོ་བཙུགས་དྲགས་པས་ད་ཆ་ལངས་ཐུབ་དཀའ་བ་དང་། དེ་ལྟར་བྱས་ཏེ་ལོ་ན་རྒས། ང་རང་གི་ཝི་པོ་ weibo དྲ་རྒྱའི་སྟེང་ལྟ་སྲུང་བྱེད་མི་རྣམས་ལོ་མང་རིང་ངས་ཁྱེད་རྣམས་ལ་སེམས་ངལ་གྱི་དཀའ་ཚེགས་སྤྲད་པར་དགོངས་གསོལ་ཞུ་རྒྱུ་དང་། ད་ནས་བཟུང་ཁྱེད་རྣམས་ཡུན་རིང་རྗེས་ཀྱི་དབུག་རིང་ཞིག་ལྷོད་དང་བཅས་གཏོང་རྒྱུའི་དུས་ཚོད་ཅིག་ཡིན། ཁྱེད་རྣམ་ཀྱི་མ་འོངས་མདུན་ལམ་གྱི་ཁ་ཕྱོགས་གསར་པ་བདེ་ལེགས་ངང་གྲུབ་པའི་འཚམས་འདྲི་ཡོད། ཅེས་སོགས་བྲིས་ཡོད་འདུག
ཚེ་རིང་དབྱངས་ཅན་གྱིས་བསྡུས།
