ནག་པོ་གཤིན་རྗེ་གཤེད།
དྲན་ཚུལ་ཞིག་ནས་ཕྱིར་འདང་རེ་བྱས་ན་ལྔ་བཅུ་ང་བརྒྱད་ལོའི་རླུང་དམར་ཁྲོད་ཀྱི་མི་ཤི་རྟ་འགྱེད་ཀྱི་གོད་ཆག་ངན་པ་དེ་དག <<ནགས་ཚང་ཞི་ལུའི་སྐྱིད་སྡུག>> གི་དེབ་ངོགས་ན་གློག་བརྙན་བཞིན་མིག་མདུན་དུ་བཤམས་ཡོང་ལ། གཏམ་རྒྱུད་དེའི་ཁྲོད་ན་ཡང་བོད་ཀྱི་སྐྱེད་མ་རྣམས་ནི་རང་ལས་གཞན་གཅེས་བར་འཛིན་མཁན་གྱི་ཆེས་བློ་ལྡན་དང་། ཆེས་ངང་རྒྱུད་རིང་བ། ཆེས་རྟུལ་ཕོད་ཅན་དང་། ཆེས་བློ་རྒྱ་ཅན། ཆེས་དཔའ་མཛངས་ཅན་ཞིག་ཡིན་པའི་ངེས་ཤེས་ང་ལ་སྐྱེས་སུ་བཅུག་ཡོད། སྤྱིར་ང་ནི་ང་བརྒྱད་ལོའི་རླུང་དམར་ཁྲོད་དུ་མནར་གསོན་པ་ཞིག་མིན་ལ། ད་དུང་དེའི་སྐབས་ཀྱི་བཀྲེས་ལྟོགས་ཀྱི་ན་ཟུག་མྱང་མྱོང་བ་ཞིག་དེ་བས་ཀྱང་མིན་མོད། ངས་རྒན་པ་ཚོས་དེའི་སྐོར་གྱི་གཏམ་རྒྱུད་དག་བཤད་ནས་ལ་ལ་ཞིག་གིས་མིག་མཆི་འདོན་པ་མཐོང་མྱོང་། དེ་དུས་ང་ལ་ཅི་ཡིན་མི་ཤེས་པའི་ཚོར་བ་ཞིག་གིས་གཙེས་ནས་ངས་ཚོད་ཚོད་ལ་རྒྱ་རྒན་ཞིག་ལ་རྡུང་འདོད་ཀྱི་གླེན་རྟགས་སྐྱེས་མྱོང་། ཁོ་ཚོས་བཤད་པའི་གཏམ་རྒྱུད་རིང་ཐུང་མི་གཅིག་པ་དག་ལ་ཉན་ཉན་སྟབས། ངས་ཀྱང་ཁོ་ཚོ་དང་འདས་ཟིན་པ་ཚོ་ལ་རང་བཞིན་གྱི་སེམས་ཁུར་སྐྱེས་མྱོང་།
ལྷག་དོན་ཨ་ཁུ་ནུས་བློས་དངོས་བྲིས་སྐྱིད་སྡུག་གི་དེབ་དེས་གསལ་གསལ་ཐིང་ཐིང་ཞིག་མངོན་བཅུག་པས་དེའི་སྐབས་ཀྱི་བོད་མི་གཅིག་པུ་མིན་པར་རྒྱ་ནག་ལ་ཡང་ལོ་ནག་སྲིད་ཇུས་རླུང་ནག་དེས་ཧ་ཅང་མནར་བ་མཐོང་ཐུབ། <<ནགས་ཚང་ཞི་ལུའི་སྐྱིད་སྡུག>> ནང་གི་ཨ་མ་ཞིག་གི་ཞིམ་མེད་ཀྱི་སྤོབས་པ་དང་། ལྷག་བསམ་དཀར་བོ་འདི་ལྟར་ “མ་རྒན་རང་སྲོག་ཤོར་ཡང་། བུ་ཕྲུག་སྤྱང་ཀིར་མ་སྤྲད།” ཅེས་བྲིས་ཡོད་ལ། ངས་དེ་ཀློག་ཐེངས་རེར་སྙིང་རྗེ་དང་ཡ་ང་ཞིག་གིས་མིག་ཆུ་རང་དབང་མེད་པར་ཤོར་འགྲོ། དེ་ཁྱེད་ཀྱི་ཀློག་ནའང་མིག་ཆུ་མི་ཤོར་བ་མི་སྲིད། ལྔ་བརྒྱད་ཀྱི་རླུང་ནག་དེའི་ཁྲོད་ནས་བཟའ་ཚང་ཁ་བྲལ་དང་བདེ་སྐྱིད་རྩ་རླུང་བཞིན་གཏོར་དུས་མ་བུ་དེ་གཉིས་ཀྱང་འདུག་ཡུལ་མེད་པར་འཁྱམ་སྐབས་སྤྱང་ཚོགས་དང་འཕྲད་པ་ལོས་ཡིན། སྤྱང་ཚོགས་རུབ་ནས་ཡོང་སྐབས་ཨ་མ་དེ་ཁ་ལྦུབ་ཏུ་ལོག་ནས་བྲང་ཁ་གཅེས་བའི་བུ་ཕྲུག་བཟུང་ནས་ཡོད་ལ་སྤྱང་ཚོགས་ཀྱིས་མོའི་རྒྱབ་དང་བླ། རྩིབ་མའི་ཤ་སོགས་ཟོས་ནས་རྒྱུ་མའང་ས་རུ་ལྷུང་ཡོད་པའི་སྣང་བརྙན་དེ་མཐོང་དུས་ཨ་མས་རང་ཉིད་གཞན་གྱི་ཁ་ཟས་ལ་སྦྱིན་ནས་ཕྲུ་གུ་སྐྱོབ་ཐབས་གནང་འདུག ལེའུ་དེ་མཐོང་དུས་ངས་ང་བརྒྱད་ཀྱི་ལོ་ནག་ཞིག་ངང་གིས་དྲན་ན་ཤ་གཟེར་རུས་གཟེར་རྒྱག་གིན་འདུག འདི་ལྟར་ཡུམ་ཆེན་ཚོ་ནི་སྐྱེས་པ་ལས་རླབས་ཆེ་ལ། སྐྱེས་པ་ལས་རྟུལ་ཕོད་ཆེ། སྐྱེས་པ་ཚོ་ལས་དཔའ་སྙིང་ལྡན་ཞེས་ཡིད་ཆེས་དང་བློ་སྟོབས་ཀྱིས་སྒྲོག་ཐུབ།
དེ་ན་ ༡༩༥༨ ལོའི་ནས་ལོ་ནག་མཇུག་བསྒྲིལ་རྗེས་འུ་ཚོ་བདེ་སྐྱིད་དང་གུ་ཡངས་ཐོབ་པ་རེད་དམ་ཟེར་ན་དེ་བས་ཀྱང་མ་རེད། ང་སློབ་གྲྭ་འགྲིམ་བཞིན་པའི་སྐབས་ཤིག་ནས་ “འཆར་ལྡན་བུ་སྐྱེས་” ཟེར་བའི་རྒྱ་ནག་གི་སྲིད་ཇུས་ཤིག་རླུང་དམར་བཞིན་གཡུག་གིན་འདུག ངས་དེ་དོན་ཆེར་གཏོགས་མེད་ལ་ང་ལ་མཚོན་ན་དེ་ནི་འབྲེལ་བ་ཅི་ཡང་མེད་པ་ལྟ་བུ་ཞིག་གི་ལྟ་ཚུལ་བྱུང་སྟབས། དེ་ལ་བསམ་ཤེས་དང་ཡིད་འཇོག མཐའ་ན་དབྱེ་ཞིབ་ཙམ་བྱེད་པའི་འདུན་པ་ཡང་སྐྱེས་མྱོང་མི་འདུག དེ་ནས་ལོ་ཤས་རྗེས་ལ་ངེད་ཚོའི་སྡེ་བའི་བུ་མོ་རྣམས་འཕྲལ་མར་ཚོགས་འདུ་ལ་ཡོང་དགོས་པ་དང་། དེ་ནས་རིམ་བཞིན་གྲོང་བརྡལ་ལ་སོང་ནས་གཤག་བཅོས་བྱེད་དགོས་པ་རེད་ཟེར། དེའི་ཁྲོད་ལ་ངའི་བརྩེ་བའི་གཅེན་མོ་ཡང་ཡོད་པ་རེད། དེ་ནས་ང་ཡ་མཚན་ཅུང་སྐྱེས་བྱུང་ལ་འཆར་ལྡན་བུ་སྐྱེས་ཞེས་པའི་གོ་དོན་ཡང་གཞི་ནས་གཏོགས། ཕྲུ་གུ་སྐྱེས་ཚད་ཚོད་འཛིན་དང་། ཚད་བཀག་ལས་བརྒལ་ན་ཆད་པ་ཡོད་པའི་བོད་རྩ་མེད་བཟོ་བྱེད་ཀྱི་འཆར་ལྡན་རླུང་དམར་ཞིག་ཡིན་པ་གཞི་ནས་གཏོགས། འོན་ཀྱང་རླུང་ཡན་དེ་འདི་ལྟར་གཡུག་ནས་གཤག་དགོས་པ་གཤགས་ནས་གསོད་དགོས་པ་དག་བསད་ཚར་བ་རེད། སྐྱེས་དགོས་པའི་རྣམ་ཤེས་གང་མང་ཞིག་འགག་ཚར་བ་རེད། རླུང་ནག་དེ་གཡུག་མགོ་བཙུགས་པ་དང་གཡུག་བཞིན་པ་ངས་ཤེས་མོད་གཡུག་པའི་ཁྲོད་ནས་སེམས་ཚོར་འདི་ཟེར་བ་ཞིག་དྲང་མོར་བཤད་ན་ངས་རྙེད་མ་སོང་ལ་མཐོང་ཡང་ཐུབ་མ་སོང་ཟེར་ན་མ་འགྲིག་པ་མེད།
༢༠༡༧ ཟླ་ ༢ ཚེས་ ༤ ཉིན་ངས་ཁོམ་སྐབས་དང་བསྟུན་ཏེ་ཁ་པར་གྱི་སྒོ་ཕྱེས་ནས་ “མདའ་རྫོང་རྩེད་ར་” ཞེས་པའི་སྐད་འཕྲིན་ཚོགས་པའི་ནང་མིག་ཉུལ་ཤིག་བྱས་པ་ཡིན། དེའི་ནང་དུ་གཤིས་བཟང་བུ་མོ་ཟེར་བ་ཤིག་གིས་ང་རང་སློབ་གྲྭར་འགྲོ་བའི་གོ་སྐབས་བྱུང་མ་སོང་ལ། རང་ཉིད་ཀྱི་དུས་སྐབས་དེའི་འཚོ་བའི་སྐབས་དཀའ་སྡུག་གང་མང་ཐོད་ལ་རྐང་བཙུགས་ནས་བཟོས་ཡོང་སྟབས། ཐེག་དཀའ་བའི་དུས་རིམ་ཞིག་གི་མགོ་འདི་ལྟར་གླེང་བཞིན་འདུག མུ་མཐུད་ནས་ཉན་པ་ཡིན་ “ང་ལ་བུ་བཞི་དང་བུ་མོ་གཅིག་ཡོད། ང་ནི་བྱིས་པ་ཅུང་མང་པའི་ཨ་མ་ཞིག་ཡིན” ཞེས་གླེང་གཞི་མགོ་བཙུགས་སོང་ལ། བྱིས་པ་ལྔའི་ཨ་མ་ཡིན་ཟེར་ན་དེང་གི་དུས་ཚོད་འདི་ལ་ཅུང་ཧང་སང་སང་བྱེད་པའི་དུས་ཤིག་ཡིན་སྟབས། ངས་ཀྱང་སེམས་ལ་ཕྲུ་གུ་ངོ་མ་མང་པོ་འདུག་བསམ་བྱུང་།
ཁོ་མའི་བཤད་སྟངས་ལས་རྫུན་ཚིག་དང་རང་བསྟོད་སོགས་གང་ཡང་མི་འདུག་སྟབས། གླེང་དོན་རྣམས་ལ་ཉན་སྤྲོ་བའི་འདུ་ཤེས་ཤིག་རང་བཞིན་གྱིས་སླེབས་བྱུང་། “ང་ལ་ཕྲུ་གུ་ལྔ་ཡོད་སྟབས་ང་ཁྲིམས་ལ་ཐོག་པ་” རེད་ཟེར། རྒྱ་ནག་མ་གཏོགས་རྒྱལ་ཁབ་གཞན་ཞིག་གིས་ཚིག་འདི་གོ་ན་ཧང་སང་བ་དང་ཡིད་ངོར་མི་ཤོང་པ་ཞིག་ཡིན། འོན་ཀྱང་རྒྱ་གཞུང་ལ་མཚོན་ན་འདི་ནི་རྒྱུན་ལྡན་ཞིག་ལས་གཞན་ཅི་ཡང་མིན། འདི་ནི་རྒྱ་གཞུང་གིས་ཆེད་དུ་བཙུགས་པའི་མི་འབོར་དང་རྣམ་ཤེས་འཕྲོག་པའི་སྲིད་ཇུས་ཏེ་<<འཆར་ལྡན་བུ་སྐྱེས་>>ཟེར་བའི་ལས་འགུལ་རླུང་དམར་དེ་རེད། དེའི་སྐབས་རྒྱ་གཞུང་གིས་རྣམ་ཤེས་ཚོད་འཛིན་བྱེད་རྩིས་བྱས་པ་རེད་ལ། མི་དང་མིའི་བར་གྱི་མཛའ་བ་དང་ཕོ་མོའི་འཁྲིག་སྤྱོད་ཀྱི་རང་དབང་བཙན་འཕྲོག་བྱས་པ་རེད།
གཤིས་བཟང་བུ་མོས་བཤད་རྒྱུར་ “སུན་གཙེར་དང་དཀའ་སྡུག་གང་མང་ཞིག་གི་ཁྲོད་ནས་ཕྲུ་གུ་བཞི་སྐྱེས་ཟིན་ལ། ད་དུང་བུ་མོ་ཞིག་ཀྱང་དགོས་སྙིང་འདོད་པས་སྐྱེས་སུ་བཅུག་པ་ཡིན། བུ་མོ་དེ་སྐྱེས་རྗེས་རྒྱལ་ཁབ་ཀྱི་ཁྲིམས་དང་འགལ་བའི་ཉེས་ཅན་པ་རེད་ཟེར་ནས་འཆར་ལྡན་ཁྲིམས་དང་འགལ་མཁན་ཚོ་ངལ་རྩོལ་བསྒྱུར་བཀོད་བྱེད་སའི་ས་ཆ་ཞིག་ཡོད་པ་རེད། དེ་རུ་ཆད་པ་ཐོག་མཁན་ཚོ་ཚང་མ་འབྱོར་ཐོ་བཀོད་པར་རྒྱ་སྒོར་ལྔ་བཅུ་སྤྲོད་དགོས་པ་དང་། ཆད་པ་ནི་ལས་ཀ་ལས་རྒྱུ་དེ་རེད། ཆད་པ་དེ་ཡོད་མཁན་ཚོ་རྒྱུག་ཤར་གློད་དགོས་པ་རེད། དེའི་རྗེས་ཞང་ནང་དུ་སོང་ནས་སྟོན་ཐོག་བསྡུས་ནས་གཡུལ་གཅོག་པ། སྤྱོད་ཁང་གཙང་བཟོ། སྲང་ལམ་འཕྱག་པ་སོགས་བྱེད་དགོས་པ་རེད། དཀའ་སྡུག་དེ་འདྲ་མང་པོ་མྱང་པའི་མཐར་ང་ཚོ་གཤག་བཅོས་བྱེད་དགོས་པ་རེད་ཟེར་ནས་བརྟག་དཔྱད་བྱས་པས་དཀོན་མཆོག་གསུམ་གྱི་བཀའ་དྲིན་ལ་བསྟེན་ནས་ངའི་སྙིང་ནད་པ་རེད་ཟེར།
སྤྱིར་ངའི་མགོ་ཐོག་ལ་སྡུག་མང་པོ་ཡོང་སྟབས་དེ་འདྲ་ཞིག་ཆགས་པ་རེད། ཡིན་ཡང་ཁོ་ཚོས་ང་ལ་ཡི་གེ་བྲིས་ནས་མཛུབ་ཐེལ་གནོན་དགོས་ཟེར། ངའི་ཕ་དྲིན་ཆེན་གྱིས་ཡི་གེ་ཅི་ཞིག་འབྲི་དགོས་པ་རེད་ཅེས་བྲིས་པས་ཁྱེད་ཀྱི་བུ་མོའི་སྙིང་ནད་པ་ཡིན་པས་ཤི་ཡང་སྐྱོན་མེད་ཅེས་འབྲི་དགོས་པ་རེད་ཟེར། དེ་ནས་ངའི་ཕ་དྲིན་ཅན་གྱིས་རྡོ་ཞིག་འཁྱེར་ཡོང་ནས། ང་ལ་བུ་མོ་འདི་གཅིག་པུ་ལས་མེད། ངའི་བུ་མོ་ཤི་དགོས་ན་ད་ལྟ་རང་ཁྱེད་རང་ཚོས་གསོད་རོགས་ཞེས་ཁོ་ཚོ་ལ་འཛིང་སྟབས་ང་གཤག་བཅོས་བྱེད་མ་དགོས་བར་ཐར་བ་རེད། དེ་ནི་དཀོན་མཆོག་གསུམ་གྱི་ཐུགས་རྗེ་བཀའ་དྲིན་ཡིན། ང་རང་དཀོན་མཆོག་གསུམ་ལ་དད་པ་དང་ཡིད་ཆེས་ཡོད” ཅེས་གསུངས། མཚམས་འདིར་ངས་ཉམས་འཇོག་ཅིག་བྱེད་དུས་ངའི་མིག་མཐར་རློན་ཤར་ཤར་དུ་གྱུར་འདུག་ལ་ད་དུང་མོ་ལ་སེམས་འགུལ་དང་གདུང་སེམས་སྐྱེད་རོགས་བྱས།
ཁོ་མོའི་མི་མཐུད་གསུང་དོན་ “སྤྱིར་ང་རྩེ་ལ་དགོད་ཞིག་ཡིན་པས་ཁྱིམ་མཚེས་དང་ཡུལ་མི་ལ་འཆམ་པོ་ཡོད་པས་རྩེ་རོགས་དགོད་རོགས་བུ་མོ་མང་པོ་ཡོད། ངའི་བུ་ཆུང་གསུམ་པ་མངལ་དུ་ཡོད་དུས་གྲོགས་མོ་ཚོས་ཕྲུ་གུ་གཉིས་ཀྱིས་འགྲིག་འདུག དེ་འདྲའི་མང་པོ་ཞིག་གིས་ཅི་བྱེད། མངལ་གྱི་ཕྲུ་གུ་དེ་སྨན་ཁང་དུ་སོང་ནས་མར་དེད་ཞོག ཁོ་ཚོས་ཀྱང་ཕྲུ་གུ་གསུམ་པ་དེ་སྨན་ཁང་དུ་སོང་ནས་མེད་པ་བཟོས་ཡིན། ཞེས་བརྗོད་མཁན་འདུག ངའི་ཡུལ་ནས་སྨན་ཁང་ལ་ཧ་ཅང་ཐག་ཉེ་བོ་ཡིན། སྨན་ཁང་དེའི་ནང་དུ་སོང་ནས་བལྟས་ཚེས་ཕྲུ་གུ་གསོད་མཁན་མང་པོ་ཡོད་སྟབས། དེ་དག་མཐོང་ཚེ་སེམས་པ་སྐྱོ་སྣང་གིས་ཁེངས་འགྲོ་” ཞེས་མཚམས་འདིར་ཁོ་མོ་སྐྱོ་སྣང་དང་ཡིད་གདུང་གིས་ངུ་ངག་ལ་ཅུང་ཤོར་ཡོད་པ་རྟོགས་ཐུབ། “ང་ལ་དེ་ལྟར་བཤད་མཁན་གྱི་གྲོགས་མོ་དེ་ཚོ་རང་གི་ཤ་ལས་ཆད་པའི་བུ་ཕྲུག་སོད་ཟེར་མཁན་གྱི་དགྲ་བོ་ངོ་མ་ཞིག་རེད་བསམ་ནས། ཡུན་གྱིས་འགྲོགས་འདྲེས་བཅད་པ་ཡིན” སྐབས་འདི་ནས་སྐྱེད་མ་ཚོ་ནི་བཤད་ཕོད་རྟུལ་ཕོད་ཅན་ཞིག་ཡིན་ཞེས་པ་ངས་འུར་དུ་བསྲིངས་མེད། ང་ངོ་མ་གཤིས་བཟང་བུ་མོའི་གཤིས་ཀ་དང་བསམ་རྒྱ། རྟུལ་ཕོད་ཀྱིས་ཡིད་འགུལ་ཐེབས་བཅུག་སོང་།
“མངལ་དུ་ཆགས་པའི་བྱིས་པ་རྣམས་མི་ཞིག་གི་འདུ་ཤེས་མི་འདུག ངོ་མ་ཡ་ང་བ་ཞིག་རེད། ངོ་མ་ཁྲེལ་གཞུང་མེད་པ་ཞིག་རེད། ང་ནི་རང་རྒྱུད་ལ་དཀོན་མཆོག་གསུམ་ལ་ཡིད་ཆེས་དང་དད་པ་གཙང་མ་ཞིག་ཡོད་སྟབས་དཀོན་མཆོག་གི་བཀའ་དྲིན་གྱིས་དེའི་ཕྱོགས་ན་སྡུག་པ་ཞིག་མེད་བསམ་ཡོད། ཚེ་ཕྱི་མར་འགྲོ་དུས་ལག་པ་གཡུག་ནས་འགྲོ་རྐྱང་ཡིན་བསམ་ཡོད། ང་ལྟ་བུའི་ཆེས་སྤྱིར་བཏང་གི་མི་ཞིག་གིས་བསམ་ཚུལ་ཆེན་པོ་ཞིག་བཟུང་། ངས་བོད་མི་རིགས་ཀྱི་མི་གྲངས་ཀྱི་ཆེད་དུ་རང་ཉིད་ནས་མགོ་བཟུང་སྟེ་ཕྲུ་གུ་ལྔ་སྐྱེས་ན་བོད་གངས་ཅན་ན་རླབས་ཆེན་གྱི་ཡུམ་ཆེན་ཅི་འདྲའི་མང་པ་ཞིག་མེད་དམ། དེ་ཚང་མས་ཕྲུ་གུ་ལྔ་རེ་བཙས་ན་ང་ཚོ་ལ་མི་རིགས་ཀྱི་གྲངས་འབོར་ག་ཚོད་མང་དུ་མི་འགྲོའམ། ཚུལ་འདི་ལ་བསམ་བློ་བཏང་ནས་ངས་མངལ་དུ་ཡོད་པའི་ཕྲུ་གུ་རྣམས་གསོན་དུ་བཅུག་པ་ཡིན།” ཁྱེད་ཀྱིས་འདི་ལྟར་བརྗོད་དུས་ངའི་མིག་ཀོང་མཆི་མ་ཡིན་ལ་སེམས་ཁོང་ཡིད་སྨོན་དང་སྨྲེང་སེམས་ཀྱིས་ཁེངས། བཀའ་དྲིན་ཆེ་གཤིས་བཟང་བུ་མོ།
མཐའ་མཇུག་ཁོ་མོས་འདི་ལྟར་བརྗོད་བྱུང་” སྲིད་ལོས་དགོས་ང་ཚོའི་རེ་བ་བཅངས་ས་རེད། ཆོས་ཀྱང་དགོས་པ་འདུག་རང་སེམས་ལ་ཆོས་ཤིག་ཡོད་པའི་བཀའ་དྲིན་གྱིས་རྒྱལ་ཁབ་ཀྱིས་སློབ་གསོ་བཏང་ཡང་བུ་མོ་ལྔ་བཙས་ཐུབ་པ་བྱུང་། ངོ་ཚོའི་གྲོང་བརྡལ་མགོ་གཙོས་ང་མི་མང་ཁྲོད་ནས་ཡར་ལངས་དུ་བཅུག་ནས་ཕྲུ་གུ་གཅིག་བཙས་ན། ཡང་བསྐྱར་གཅིག་སྐྱེས་འཇུག་གི་འདུག་ཟེར་ནས་གཤེ་གཤེ་གཏོང་བཞིན་མིག་ནང་མཛུབ་མོ་ཀེར་བ་སོགས་ཀྱང་བྱས་མྱོང་། ཉིན་ཞིག་གི་མཚན་མོར་སྡེ་བའི་ནང་གི་ལས་བྱེད་དང་གྲོང་བརྡལ་ལས་བྱེད་སོགས་ཡོང་ནས་བཙན་ཤེད་དང་འུར་སྒྲོག་བྱས་ནས་ང་གྲོང་བརྡལ་མགོ་གཙོའི་སར་ཁྲིད་ནས་ཉེས་ཆད་སྟེར་བའི་ཡི་གེ་དང་མཛུབ་ཐེལ་སོགས་གནོན་དུ་བཅུག་སོང་ལ། ཉེས་ཆད་སྒོར་ལྔ་བཅུ་དེ་ཕྱི་ཉིན་སྤྲད་དགོས་པ་ངས་རང་ཉིད་ལ་ཡོད་པའི་སྒོར་རྡོག་དེ་དང་གཞན་གྱི་ལག་ཏུ་གཡར་བ་སོགས་བྱས་ནས་ཉེས་ཆད་སྒོར་ལྔ་བཅུ་དེ་མ་ཚང་བར་དཀའ་ལས་ངོ་མ་མྱང་སོང་། ” འ་་་་འ་་་་མཚམས་འདིར་ངས་ཞིབ་ཏུ་ལྟ་དུས་ང་སྐྱོ་སེམས་ཀྱིས་ངུ་བཞིན་འདུག ལྷག་དོན་སྒོར་ལྔ་བཅུ་དེ་དེའི་སྐབས་ཀྱི་འཚོ་བ་དང་དཀའ་སྡུག་ངོ་མ་མི་ཐེག་པ་ཞིག་ཡིན་པ་སྒོར་རྡོག་ལྔ་བཅུ་དེས་གསལ་འདོན་བྱས་བྱུང་།
ད་དུང་ཁྱོད་དང་ཁྱོད་ཀྱི་གྲོགས་མོ་གཉིས་ཀྱིས་ཉེས་ཆད་སྒོར་ལྔ་བཅུ་དེ་སྤྲད་རྗེས་རང་གི་དཀའ་སྡུག་ཁུར་ནས་ཕྲུ་གུ་གསོ་སྐྱོང་བྱེད་པའི་ཐོབ་དབང་ཙམ་ཡང་མེད་པ་འདི་ལ་ཞེན་པ་ལོག་ཞིང་། གཞུང་གིས་ཉེས་ཆད་བཅད་པའི་སྒོར་རྡོག་དེ་དག་གིས་རང་གི་ཕྲུ་གུ་རྣམས་ལ་གྱོན་ཆས་ཙམ་ཡང་ཉོ་མ་ཐུབ་པ་དེ་ལ་འཕང་སེམས་དང་ལྷན་དུ་ངུས་པ་དེ། ངོ་མ་ཅི་འདྲའི་ཡིད་གར་འོང་བའི་སྐྱོ་གར་ཞིག ཅི་འདྲའི་གཞན་སེམས་ཆེ་བའི་ཡུམ་ཆེན་ཞིག ངོ་མ་ཡིན། ཡུམ་ཆེན་ཚོ་ཁྱེད་ཚོ་བཀའ་དྲིན་ཆེ། ཁྱེད་ཅག་གིས་ངལ་བ་ཁྱད་དུ་བསད་པ་འདི་དག་མཐོང་ཐོས་བྱུང་དུས་ངའི་ཨ་མའི་ང་ཚོ་གཅེན་གཅུང་བཅུ་བཙས་པ་དོན་དག་ཆུང་ཆུང་ཞིག་མིན་པ་ཡུན་གྱིས་རྟོགས། ཨ་མ་བཀའ་དྲིན་ཆེ། ངས་ཁྱེད་ལ་སྨོན་པ་ཞིག་ལས་ཅི་ཡང་བསྒྲུབ་ཐུབ་མ་སོང་། བཀའ་དྲིན་ཆེ། ས་སྟེང་འདི་ན་ཡུམ་ཆེན་ཚོ་འཇིག་རྟེན་འདིའི་འོད་སྣང་ཡིན་ལ། འཇིག་རྟེན་འདིའི་བདེ་སྐྱིད་ཀྱི་འབྱུང་ཁུངས་ཀྱང་ཁྱེད་ཚོ་ཡིན།
