ཡུ་གུར་གྱི་བྱིས་པ་ཚོ་བཙན་གྱིས་དྭ་ཕྲུག་ཁང་དུ་འཇུག་གི་ཡོད་པའི་སྙན་ཐོ་བཏོན།

ཕྱི་ལོ་ ༢༠༡༧ ལོ་ནས་རྒྱ་ནག་གིས་ཡུ་གུར་བའི་ཕ་མ་རྣམས་བཙན་གྱིས་ཤིན་ཅང་སློབ་གསོ་སྒྱུར་བཀོད་ཁང་ཟེར་བའི་ནང་འཇུག་པའི་མགོ་བརྩམས་ཡོད་པ་དང་བསྟུན། ཤུལ་དུ་ལུས་པའི་བྱིས་པ་རྣམས་བཙན་གྱིས་རྒྱ་གཞུང་གི་དྭ་ཕྲུག་ཁང་དང་གཏན་སློབ་སོགས་སུ་བཅུག་སྟེ་རྒྱ་རིགས་ཅན་དུ་བསྒྱུར་ཐབས་བྱེད་ཀྱི་ཡོད་འདུག

བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་དབྱིན་ཡུལ་དུ་རྟེན་གཞི་བྱས་པའི་རྒྱལ་སྤྱིའི་ཉེས་ཡང་ཚོགས་པས་ཞིབ་འཇུག་སྙན་ཐོ་ཞིག་བཏོན་པའི་ནང་། རྒྱ་ནག་གཞུང་གིས་ཕྱི་ལོ་ ༢༠༡༧ ལོའི་ལོ་མགོ་ནས་སྲིད་ཇུས་གསར་པ་ཞིག་བཟོས་ཏེ། བྱིས་པར་ལམ་སྟོན་དང་འབྲེལ་བའི་ལྟེ་གནས་ཁང་དང་གཏན་སློབ། དྭ་ཕྲུག་ཁང་སོགས་འཛུགས་སྐྲུན་བྱས་ཏེ། ཕ་མའི་ཆོག་མཆན་གང་ཡང་མེད་པར་བྱིས་པ་ཚོ་བཙན་གྱིས་རྒྱ་ནག་རང་གི་དྭ་ཕྲུག་ཁང་དུ་འཇུག་གི་ཡོད་པ་དང་། དེའི་ཁྲོད་སྐྱེས་མ་ཐག་པའི་བྱིས་པ་ནས་ལོ་ཆུང་བྱིས་པ་ཚང་མ་ཚུད་ཡོད་སྟབས། རྒྱལ་སྤྱིའི་ཉེས་ཡང་ཚོགས་པས་དྭ་ཕྲུག་ཁང་དུ་བཅུག་ཡོད་པའི་ཡུ་གུར་མི་རིགས་ཀྱི་བྱིས་པ་ཡོངས་ཀློད་གྲོལ་དགོས་པའི་འབོད་སྐུལ་གནང་གི་འདུག

སྙན་ཐོ་དེའི་ནང་། ཕྱི་ལོ་ ༢༠༡༧ ལོར་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་གྲོང་ཚོ་རིམ་པར་རྒྱ་ནག་དབུས་ནས་བཀའ་ཁྱབ་ཅིག་བཏང་སྟེ། ཕ་མ་ངལ་སྩོལ་དང་སློབ་གསོ་སྒྱུར་བཀོད་ཁང་དུ་ཕྱིན་ཞིང་ཤུལ་དུ་ལྷག་པའི་བྱིས་པ་རྣམས་རྒྱ་ནག་གིས་ཆེད་དུ་བཟོས་པའི་དྭ་ཕྲུག་ཁང་དུ་འཇུག་དགོས་ཀྱི་ཡོད་པ་དང་།  ཕྱི་ལོ་ ༢༠༡༧ ནས་ ༢༠༢༠ ལོའི་བར་ཤིན་ཅང་ཡུ་གུར་མི་རིགས་རང་སྐྱོང་ཁུལ་དུ་གྲོང་ཚོ་ ༨༠༠ ལྷག་ཡོད་པ་ལས། གྲོང་ཚོ་རེ་རེའི་ནང་རྒྱ་ནག་གིས་ཆེད་དམིགས་གཏན་སློབ་གཅིག་ནས་གཉིས་བར་འཛུགས་ཐུབ་པའི་དམིགས་འབེན་བཟུང་ཡོད་པ་དང་།  གཏན་སློབ་དང་དྭ་ཕྲུག་ཁང་དེ་དག་ནས་ཡུ་གུར་མི་རིགས་ཀྱི་བྱིས་པ་རྣམས་རྒྱ་རིགས་ཅན་དུ་བསྒྱུར་ཐབས་བྱེད་ཀྱི་ཡོད་པ་རྒྱ་ནག་གཞུང་འབྲེལ་གྱི་ཡིག་ཆ་ཁག་ཏུ་གསལ་ཡོད་སྐོར་སོགས་བརྗོད་འདུག

ཕ་མ་དང་བུ་ཕྲུག་བཙན་གྱིས་ཁ་བྲལ་གཏོང་བ་ནི་འགྲོ་བ་མིའི་ཐོབ་ཐང་རྡོག་རོལ་བཏང་བ་ཞིག་ཆགས་ཀྱི་ཡོད་པ་ལྟར། མཉམ་འབྲེལ་རྒྱལ་ཚོགས་ཀྱི་མི་རིགས་རྩ་གཏོར་དང་འབྲེལ་བའི་གཏན་འབེབ་གྲོས་ཡིག་གི་དོན་ཚན་གཉིས་པའི་ནང་། མི་རིགས་ཤིག་གི་བྱིས་པ་རྣམས་བཙན་དབང་གིས་མི་རིགས་གཞན་གྱི་སྡེ་ཁག་ཏུ་བཅུག་པ་ནི་མི་རིགས་རྩ་གཏོར་གཏོང་གི་ཡོད་པའི་ནག་ཉེས་ཤིག་ཡིན་སྟབས། ད་རེས་སྙན་ཐོ་འདི་རྒྱ་ནག་གཞུང་ནས་ཡུ་གུར་མི་རིགས་རྩ་གཏོར་གཏོང་གི་ཡོད་པའི་བདེན་དཔང་གསར་བ་ཞིག་ཆགས་ཀྱི་ཡོད་པ་རེད་ལ། རྒྱལ་སྤྱིའི་ཉེས་ཡངས་ཚོགས་པའི་རྒྱ་ནག་ཉམས་ཞིབ་པ་ཨལ་ཁན་ (Alkan Akad) ལགས་ཀྱིས། ཡུ་གུར་བའི་ཕ་མ་རྣམས་རང་གི་བུ་ཕྲུག་ལ་བདག་སྐྱོང་སླད་ཕྱིར་རང་ཁྱིམ་དུ་ལོག་ཚེ་གང་བྱུང་འཛིན་བཟུང་བཀག་ཉར་དང་ཉེས་ཆད་ཕོག་གི་ཡོད་པ་དང་། བྱིས་པ་རྣམས་གཏན་སློབ་དང་དྭ་ཕྲུག་ཁང་ནས་ཕྱིར་ཐོན་ཆོག་གི་མེད་པས།  རྒྱ་ནག་གིས་ཤིན་ཅང་ཁུལ་དུ་ཡ་ང་སྙིང་རྗེ་བྲལ་ཞིང་མི་གྲངས་འབོར་ཆེན་བཀག་ཉར་བྱས་པ་དེས། ཁ་བྲལ་དུ་ཕྱིན་པའི་ཕ་མ་དང་བྱིས་པ་ཚོ་མཉམ་འཛོམས་ཡོང་ཐབས་བྲལ་བའི་གནས་སྟངས་ཤིག་གི་འོག་བཞག་ཡོད། ཅེས་བརྗོད་ཡོད་པ་རེད།

ཐེངས་འདིའི་རྒྱལ་སྤྱིའི་ཉེས་ཡང་ཚོགས་པའི་སྙན་ཐོ་ལྟར་ན། རྒྱ་ནག་གཞུང་གིས་ཡུ་གུར་མི་རིགས་ཀྱི་བྱིས་པ་རྣམས་བཙན་གྱིས་དྭ་ཕྲུག་ཁང་དུ་འཇུག་དོན་ནི། གྲངས་ཉུང་མི་རིགས་གཞན་གྱི་ཕ་མ་རྣམས་ལ་བུ་ཕྲུག་གཅེས་སྐྱོང་དང་འབྲེལ་བའི་སྦྱོང་བརྡར་སྤྲོད་ཐབས་དང་། ཕྱོགས་གཞན་ཞིག་ནས་ཡུ་གུར་བའི་བྱིས་པ་རྣམས་རྒྱ་རིགས་བྱིས་པའི་འཚར་ལོངས་གཅིག་མཚུངས་བཞིན་རྒྱ་སྐད་རྒྱ་ཡིག་གི་ཁོར་ཡུག་ཁོ་ནའི་འོག་འཚར་ལོངས་བྱུང་འཇུག་གི་ཡོད་པ་དང་།  ཁོ་ཚོའི་ཚོགས་སྡེ་ཁག་དང་ཉིན་རེའི་འཚོ་བའི་ཁ་ཕྱོགས་སོགས་ལ་འགྱུར་བཅོས་ཀྱི་སྲིད་ཇུས་རིགས་སྤེལ་ཏེ་ཕྱོགས་ཡོངས་ནས་ཡུ་གུར་མི་རིགས་རྩ་གཏོར་གཏོང་འདོད་ཡོད་པའི་རྣམ་པ་མངོན་གསལ་དུ་གྱུར་ཡོད་པ་རེད།

རྒྱ་ནག་གི་ཤེས་རིག་ལྷན་ཁང་ལྟར་ན། ཕྱི་ལོ་ ༢༠༡༧ ནས་ ༢༠༡༩ བར་རྒྱ་ནག་གཞུང་གིས་གཏན་སློབ་ཁག་ཏུ། ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་ཕ་མ་དང་ཁ་བྲལ་དུ་ཕྱིན་པའི་བྱིས་པ་ ༨༨༠༥༠༠ སློབ་འཇུག་བྱས་ཏེ། དེ་སྔོན་སློབ་ཕྲུག་གྲངས་ ༤༩༧༨༠༠ ཡོད་པའི་གྲངས་འབོར་དང་བསྡུར་ཚེ་བརྒྱ་ཆ་ ༧༦།༩ ཙམ་འཕེལ་ཡོད་པ་རེད་ལ། ཕྱི་ལོ་ ༢༠༡༧ ལོ་ནི་ཏག་ཏག་རྒྱ་ནག་གིས་ཤིན་ཅང་ཁུལ་དུ་སློབ་གསོ་སྒྱུར་བཀོད་ཁང་ཟེར་བ་བཙུགས་ཏེ། ཡུ་གུར་བ་ས་ཡ་གཅིག་ལྷག་ལ་དམར་ཤོག་ཚོགས་པའི་ལྟ་གྲུབ་གཙོས་པའི་རྒྱ་སྐད་རྒྱ་ཡིག་སློབ་པ་དང་། ཆབ་སྲིད་ཀླད་པ་འཁྲུད་ཐབས་ཀྱི་སྲིད་ཇུས་དངོས་སུ་ལག་བསྟར་མགོ་བཙུགས་པའི་ལོ་ཞིག་ཡིན་པ་དང་། ཡུ་གུར་མི་རིགས་ཀྱི་གནས་བབ་དབྱེ་ཞིབ་པ་སྐུ་ཞབས་རྫན་ (Adrian Zenz) ལྟར་ན། ཕྱི་ལོ་ ༢༠༡༩ ལོའི་ཤིན་ཅང་གི་སློབ་གསོ་སྒྱུར་བཀོད་ཁང་ཟེར་བའི་ནང་ཡུ་གུར་བ་ས་ཡ་གཅིག་དང་ཕྱེད་ཀ་ཙམ་ཡོད་པ་གསལ་འདོན་གནང་ཡོད།

གསར་འགོད་པ། སྐལ་བཟང་སྦྱིན་པ།