སྲིད་འཛིན་ཚའེ་ཡི་ཝུན་མཆོག་ལ་རྒྱལ་སྤྱིའི་གཟེངས་རྟགས་ཐོབ།

སྲིད་འཛིན་ཚའེ་ཡི་ཝུན་མཆོག་ནས་ཐའེ་ཝན་གྱི་དམངས་གཙོ་སྲུང་སྐྱོབ་དང་ཏོག་དབྱིབས་སྔོན་འགོག་ཐད་གྲུབ་འབྲས་ཆེན་པོ་བླངས་བར་ཆེ་བསྟོད་དུ་ལོ་ ༢༠༢༠ ལོའི་ཇོན་མེག་ཁན་མགོ་ཁྲིད་གཟེངས་རྟགས་གནང་གཏན་ཁེལ་ཡོད་འདུག

ཟླ་འདིའི་ཕྱི་ཚེས་ ཏོག་དབྱིབས་གཉན་རིམས་སྔོན་འགོག་གི་ཐད་གྲུབ་འབྲས་ཆེན་པོ་བླངས་ཡོད་སྐོར་སོགས ཉིན་ཧ་ལི་ཕེག་སི་རྒྱལ་སྤྱིའི་བདེ་འཇགས་གླེང་སྟེགས་ (Halifax International Security Forum) ཀྱིས་ཕྱི་ལོ་ ༢༠༢༠ ལོའི་གླེང་སྟེགས་དེའི་ཇོན་མེག་ཁན་མགོ་ཁྲིད་གཟེངས་རྟགས་ (John McCain Prize) དེ། ཐའེ་ཝན་གྱི་སྲིད་འཛིན་ཚའེ་ཡི་ཝུན་མཆོག་ལ་སྤྲོད་རྒྱུའི་ཐག་གཅོད་བྱུང་བ་གསལ་བསྒྲགས་བྱས་འདུག་ལ། དེ་ནི་ཁོང་མོས་སྣེ་ཁྲིད་དེ་ཐའེ་ཝན་གྱི་དམངས་གཙོ་སྲུང་སྐྱོབ་དང་རྒྱ་ནག་གིས་ཐའེ་ཝན་ལ་དྲག་རྒོལ་བྱེད་པར་གདོང་ལེན་བྱས་པར་ངོས་འཛིན་ཐོག་ཐག་གཅོད་བྱས་པ་ཞིག་ཡིན་འདུག

གཟེངས་རྟགས་དེ་དང་འབྲེལ་ནས་ཧ་ལི་ཕེག་སི་རྒྱལ་སྤྱིའི་བདེ་འཇགས་གླེང་སྟེགས་ཀྱི་བསྒྲགས་གཏམ་ནང་། ཚའེ་ཡི་ཝུན་མཆོག་ནི་རྒྱ་སྐད་བཤད་པའི་འཛམ་གླིང་གི་རྒྱལ་ཁབ་ཚང་མའི་ནང་གི་བུད་མེད་ཆབ་སྲིད་པ་ནུས་འཇོན་ཆེ་ཤོས་དེ་ཡིན་པ་ནི་རྩོད་མེད་ཡིན་པ་དང་། རྒྱ་ནག་དམག་གིས་ཐའེ་ཝན་ལ་དབང་ཡོད་བྱས་པ་དང་རྒྱལ་སྤྱིའི་ཚོགས་སྡེ་ཁག་གི་ནང་ཐའེ་ཝན་ཟུར་འདོན་བྱས་པ་ལ་ཁོང་མོས་ཐའེ་ཝན་གྱི་གདོང་ལེན་འཁུར་དུ་བླངས་ཡོད་སྐོར་དང་། ཁོང་མོའི་ལས་ཡུན་རིང་ཐའེ་ཝན་ནང་མཚན་མཐུན་གཉེན་སྒྲིག་ཁྲིམས་མཐུན་ཆགས་ཏེ་ཨེ་ཤ་ཡའི་ནང་མཚན་མཐུན་གཉེན་སྒྲིག་ཁྲིམས་མཐུན་ཆགས་པ་ཐོག་མ་དེ་ཆགས་ཡོད་པ་མ་ཟད། ཏོག་དབྱིབས་གཉན་རིམས་སྔོན་འགོག་གི་ཐད་གྲུབ་འབྲས་ཆེན་པོ་བླངས་ཡོད་སྐོར་སོགས་བཀོད་ཡོད་འདུག

ཐག་གཅོད་དེ་དང་འབྲེལ་ཐའེ་ཝན་གྱི་སྲིད་འཛིན་ཚའེ་ཡི་ཝུན་མཆོག་གིས་སྒེར་གྱི་སྤྱི་ཚོགས་དྲ་ལམ་ཊུའུ་ཝེ་ཊུར་སྟེང་། ཧ་ལི་ཕེག་སི་རྒྱལ་སྤྱིའི་བདེ་འཇགས་གླེང་སྟེགས་ཀྱི་ཇོན་མེག་ཁན་མགོ་ཁྲིད་གཟེངས་རྟགས་ (John McCain Prize) ཐོབ་པར་དགའ་སྤོབས་བྱུང་། གཟེངས་རྟགས་འདི་ནི་ང་གཅིག་པུར་ཐོབ་པ་ཙམ་མིན་པར་ཐའེ་ཝན་མི་མང་ལ་ཐོབ་པ་ཞིག་ཀྱང་ཡིན། སྐུ་གཤེགས་དམ་པ་ཇོན་མེག་ཁན་ལགས་ནི་གུས་བཀུར་ཆེན་པོ་ཐོབ་པའི་ཨ་རིའི་གྲོས་ཚོགས་གོང་མའི་འཐུས་མི་ཞིག་ཡིན་པ་དང་། ཁོང་གི་མི་ཚེ་ཧྲིལ་བོ་རང་དབང་དང་དམངས་གཙོའི་ཆེད་དུ་བཏང་ཡོད་པ་མ་ཟད། ཐའེ་ཝན་གྱི་བདེ་འཇགས་ཆེད་དམ་བཅའ་བརྟན་པོ་འཛིན་མཁན་ཞིག་རེད། ཁོང་ནི་ངའི་གྲོགས་པོ་དང་ཐའེ་ཝན་གྱི་བློས་ཐུབ་ཀྱི་གྲོགས་པོ་ཞིག་རེད། ཁོང་གི་མཚན་ཐོག་ནས་གཟེངས་རྟགས་འདི་གནང་བ་ནི་རྒྱལ་སྤྱིའི་སྤྱི་ཚོགས་ཀྱིས་ཐའེ་ཝན་གྱི་དམངས་གཙོ་ལ་གདེང་འཇོག་ཆེན་པོ་ཞིག་བྱས་པའི་མཚོན་རྟགས་ཤིག་ཡིན་པ་རེད། ཅེས་དང་། རང་དབང་དང་དམངས་གཙོ་ཡིས་ཐའེ་ཝན་གྱི་རིན་ཐང་མཚོན་གྱི་ཡོད་པ་མུ་མཐུད་གསལ་འདོན་བྱ་རྒྱུ་ཡིན་སྐོར་གསུངས་འདུག

ཉེ་ལམ་མགོ་ཁྲིད་ཀྱི་གཟེངས་རྟགས་དེ་སྲིད་འཛིན་ཚའེ་ཡི་ཝུན་མཆོག་ལ་སྤྲོད་པའི་ཐག་གཅོད་བྱེད་སྐབས། ཁེ་ན་ཌ་གཞུང་ནས་ཐག་གཅོད་དེ་ཕྱིར་འཐེན་བྱ་དགོས་པ་དང་། ཐག་གཅོད་ཕྱིར་འཐེན་མ་བྱས་ཚེ་ཁེ་ན་ཌ་གཞུང་ནས་སྤྲོད་བཞིན་པའི་རོགས་དངུལ་སྤྲོད་མཚམས་འཇོག་རྒྱུ་ཡིན་པའི་ཉེན་བརྡ་བཏང་ཡོད་པའི་གནས་ཚུལ་ཞིག་ཐོན་ཡོད་ནའང་། ཁེ་ན་ཌའི་གྲོས་ཚོགས་འོག་མས་གཟེངས་རྟགས་དེ་སྲིད་འཛིན་ཚའེ་ཡི་ཝུན་མཆོག་ལ་སྤྲད་ན་འོས་འཚམས་ཡིན་པའི་སྤྱི་མོས་ཀྱི་གྲོས་ཆོད་བཞག་ཡོད་པ་རེད། དེར་མཐུད་ཁེ་ན་ཌའི་སྲིད་བློན་ཇ་སི་ཊན་ཊུ་རུ་ཌོ་ (Justin Trudeau) ཡིས་གསར་འགོད་གསལ་བསྒྲགས་ཤིག་སྤེལ་ཏེ་ཧ་ལི་ཕེག་སི་རྒྱལ་སྤྱིའི་བདེ་འཇགས་གླེང་སྟེགས་ཀྱིས་མགོ་ཁྲིད་གཟེངས་རྟགས་དེ་སུ་ལ་སྤྲོད་མིན་རང་དབང་གིས་ཐག་གཅོད་བྱས་ཆོག་པ་ཞིག་ཡིན་སྐོར་དང་། གཟེངས་རྟགས་དེ་ཚའེ་ཡི་ཝུན་མཆོན་ལ་སྤྲད་ཚེ་ཁེ་ན་ཌའི་མ་དངུལ་མཚམས་འཇོག་བྱ་རྒྱུ་ཡིན་པའི་གནས་ཚུལ་དེ་བདེན་པ་མིན་པར་ཁེ་ན་ཌ་སྲིད་གཞུང་གིས་མུ་མཐུད་གླེངས་སྟེགས་དེ་ལ་མ་དངུལ་གྱི་རོགས་རམ་བྱ་རྒྱུ་ཡིན་སྐོར་བསྒྲགས་ཡོད་པ་རེད།

ཁེ་ན་ཌའི་གྲོས་ཚོགས་འོག་མས་སྤྱི་མོས་གྱི་གྲོས་ཆོད་བཞག་པ་དང་འབྲེལ་ནས་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀྲའོ་ལི་ཅན་ (Zhao Lijian) ཟེར་བས། ཁེ་ན་ཌའི་གྲོས་ཚོགས་འོག་མས་ཐའེ་ཝན་དང་འབྲེལ་བའི་སྤྱི་མོས་ཀྱི་ཐག་གཅོད་དེ་འདྲ་ཞིག་བཞག་པ་ལ་པེ་ཅིན་གྱིས་ངོས་ལེན་མེད་པ་དང་དེར་ངོ་རྒོལ་བྱེད་ཀྱི་ཡོད་པ། ཁེ་ན་ཌ་དང་རྒྱ་ནག་གི་འབྲེལ་བ་ཇེ་སྡུག་དུ་འགྲོ་བཞིན་པའི་སྐབས་སུ། ཁེ་ན་ཌ་གཞུང་གིས་ཐའེ་ཝན་གྱི་གནད་དོན་ནི་ཚོར་བ་རྣོ་བོ་དང་། གཟབ་ནན་གྱིས་ཐག་གཅོད་བྱ་དགོས་པའི་གནད་དོན་ཞིག་ལ་ངོས་འཛིན་དགོས་པ་མ་ཟད། ཕྱོགས་གཉིས་ཀྱི་འབྲེལ་བ་ཇེ་སྡུག་དུ་འགྲོ་བའི་ཐག་གཅོད་ལ་གཡོལ་དགོས་པའི་སྐྱོན་བརྗོད་བྱས་འདུག

ཕྱི་ལོ་ ༢༠༡༡ ལོར་གསར་འཛུགས་བྱས་པའི་ཧ་ལི་ཕེག་སི་རྒྱལ་སྤྱིའི་བདེ་འཇགས་གླེང་སྟེགས་ནི་ཨ་རིའི་ཝ་ཤིན་ཊོན་ཏུ་གཏན་གཞིས་བྱས་ཡོད་པའི་རྒྱལ་སྤྱིའི་སྲིད་གཞུང་དང་དམག་དཔོན། ཤེས་ཡོན་ཁྱད་མཁས་པ་དང་རྩོམ་པ་པོ། ཚོང་ལས་ཆེད་མཁས་པ་སོགས་ཀྱི་རང་དབང་གི་གླེང་སྟེགས་ཤིག་ཡིན་འདུག་པ་དང་། གླེང་སྟེགས་དེའི་མགོ་ཁྲིད་ཀྱི་གཟེངས་རྟགས་དེ་བཞིན་ཕྱི་ལོ་ ༢༠༡༨ ལོ་ནས་བཟུང་ཨ་རིའི་གྲོས་ཚོགས་གོང་མའི་འཐུས་མི་ཇོན་མེག་ཁན་ (John McCain) ལགས་ཀྱི་མཚན་ཐོག་ནས་ལོ་ལྟར་འགྲོ་བ་མིའི་དྲང་བདེན་ལ་འཐབ་རྩོད་བྱེད་མཁན་གྱི་མགོ་ཁྲིད་ལ་སྤྲོད་ཀྱི་ཡོད་འདུག་ལ། གླེངས་སྟེགས་དེའི་མ་དངུལ་ཕྱེད་ཀ་ཙམ་ཁེ་ན་ཌའི་བདེ་སྲུང་ལྷན་ཁང་གིས་ནར་གཏོང་བྱེད་ཀྱི་ཡོད་འདུག ཕྱི་ལོ་ ༢༠༡༩ ལོའི་མགོ་ཁྲིད་གཟེངས་རྟགས་དེ་བཞིན་ཧོང་ཀོང་མི་མང་གིས་རང་དབང་ཆེད་འཐབ་རྩོད་བྱས་པར་ཧོང་ཀོང་མི་མང་ལ་སྤྲད་ཡོད་པ་རེད།

གསར་འགོད་པ། ཀླུ་མགོན་ཐར།