ཨ་རིའི་གྲོས་ཚོགས་གོང་མའི་ནང་རྒྱ་ནག་ལ་ཁ་གཏད་གཅོག་པའི་ཁྲིམས་འཆར་ཞིག་གཏན་འབེབ་གནང་།

ཁ་སང་ཕྱི་ཚེས་ ༩ ཉིན་ཨ་རིའི་གྲོས་ཚོགས་གོང་མའི་ནང་གསར་གཏོད་དང་འགྲན་སྡུར་གྱི་ཁྲིམས་འཆར་ (The Innovation and Competition Act) ཞེས་པ་ཞིག་རྒྱ་ནག་ལ་ཁ་གཏད་གཅོག་ཐབས་སུ་མང་མོས་ཀྱི་ཐོག་ནས་གཏན་འབེབས་གནང་ཡོད་པ་དང་། ཁྲིམས་འཆར་དེའི་ནང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཐོག་ཨ་རིའི་སྲིད་ཇུས་དང་རྒྱལ་སྤྱིའི་ཐོག་འགན་འཁྲི་ལེན་ཕྱོགས། དེ་བཞིན་ཨ་རིའི་དམིགས་བསལ་བོད་དོན་འབྲེལ་མཐུད་པ་བསྐོ་ཕྱོགས་སོགས་ཀྱི་སྐོར་བཀོད་ཡོད་འདུག

ཁྲིམས་འཆར་དེའི་དོན་ཚན་ ༣༣༠༦ ནི་ཨ་རི་གཞུང་གི་བོད་དོན་སྲིད་ཇུས་འཛིན་ཕྱོགས་སྐོར་རེད་འདུག་ལ། དེའི་ནང་ཨ་རིའི་དམིགས་བསལ་བོད་དོན་འབྲེལ་མཐུད་པ་བསྐོ་ཕྱོགས་དང་འབྲེལ་ཨ་རིའི་གྲོས་ཚོགས་གོང་མའི་ལམ་སྟོན་དང་མོས་མཐུན་ཡོད་པའི་ཐོག་ཨ་རིའི་སྲིད་འཛིན་གྱིས་བོད་དོན་དམིགས་བསལ་འབྲེལ་མཐུད་པ་ཞིག་བསྐོ་བཞག་གནང་རྒྱུ། ཡང་ན། ཨ་རིའི་ཕྱི་སྲིད་ལྷན་ཁང་གི་དྲུང་ལས་ཀྱི་གནས་རིམ་ཚད་མཉམ་ཡོད་པའི་ལས་བྱེད་ཅིག་བསྐོ་བཞག་གནང་རྒྱུ་ཡིན་སྐོར་བཀོད་ཡོད་འདུག

ཡང་པེ་ཅིན་དུ་བཅའ་སྡོད་ཨ་རིའི་གཞུང་ཚབ་ཁང་གི་ནང་བོད་ཀྱི་སྡེ་ཚན་ཞིག་གསར་འབྱེད་དགོས་སྐོར་ལ། ཨ་རིའི་གཞུང་གིས་ཁྲིན་ཏུའུ་གྲོང་ཁྱེར། ཡང་ན་བོད་ཀྱི་རྒྱལ་ས་ལྷ་སར་ཨ་རིའི་དོན་གཅོད་ཁང་ཞིག་བཙུགས་མ་ཐུབ་བར་དུ་རྒྱ་ནག་གི་རྒྱལ་ས་པེ་ཅིན་དུ་བཅའ་སྡོད་ཨ་རིའི་གཞུང་ཚབ་ཁང་གི་ཆབ་སྲིད་སྡེ་ཚན་ནང་བོད་དང་འབྲེལ་བའི་སྡེ་ཚན་ཞིག་དགོས་པ་དང་། དེའི་ནང་ཉུང་མཐར་ཨ་རིས་ཐད་བསྐོ་བྱས་པའི་ལས་མི་གཉིས་དང་། ཉུང་མཐར་ས་གནས་ཀྱི་ལས་དོན་དང་འབྲེལ་བའི་མི་གཅིག་བསྐོ་རྒྱུ་ཡིན་སྐོར་བཀོད་འདུག

ཡང་ཁྲིམས་འཆར་དོན་ཚན་ ༣༣༠༧ ནང་༧གོང་ས་སྐུ་ཕྲེང་བཅུ་བཞི་པའི་སྐུའི་ཡང་སྲིད་དང་འབྲེལ་རྒྱ་ནག་དམར་གཞུང་དང་སྲིད་གཞུང་གཞན་སུ་ཞིག་གིས་ཐེ་ཇུས་བྱས་ཚེ། བོད་བརྒྱུད་ནང་བསྟན་དང་བོད་མིའི་ཆོས་ལུགས་དད་མོས་རང་དབང་རྡོག་རོལ་དུ་བཏང་བ་ཞིག་ལ་ངོས་འཛིན་གྱི་སྲིད་ཇུས་ནན་ཏན་གྱིས་འཛིན་གྱི་ཡོད་པ་དང་། རྒྱལ་སྤྱིའི་ཐོག་ནུས་ཤུགས་བཏོན་ཏེ་བོད་བརྒྱུད་ནང་བསྟན་པ་རྣམས་ཀྱི་རང་དབང་སྲུང་སྐྱོབ་ཆེད། བོད་བརྒྱུད་ནང་བསྟན་གྱི་དབུ་ཁྲིད་རྣམས་ཀྱི་༧གོང་ས་མཆོག་གི་སྐུའི་ཡང་སྲིད་འཚོལ་ཕྱོགས་དང་ཁྲི་གསོལ་གནང་བའི་སྐུ་དབང་ལ་ཨ་རིའི་ཕྱི་སྲིད་ལྷན་ཁང་གིས་རྒྱབ་སྐྱོར་གནང་རྒྱུ་དང་། རྒྱ་ནག་གཞུང་གིས་༧གོང་ས་མཆོག་གི་སྐུའི་ཡང་སྲིད་ཐག་གཅོད་ཀྱི་འགན་དབང་ཡོད་སྐོར་བརྗོད་བཞིན་པར་ངོ་རྒོལ་བྱེད་པ། དེ་བཞིན་རྒྱ་ནག་གཞུང་གིས་བོད་བརྒྱུད་ནང་བསྟན་པ་རྣམས་ཀྱི་ཆོས་དད་རང་དབང་ལ་ཐེ་ཇུས་བྱེད་བཞིན་པར་ངོས་ལེན་མི་བྱེད་པ་བཅས་བཀོད་འདུག

རྒྱ་ནག་ལ་དོན་ཕན་ལྡན་པའི་ཐོག་ཁ་གཏད་གཅོག་ཐབས་སུ་ཡུ་རོབ་དང་འཛམ་གླིང་ཁྱོན་ཡོངས་ཀྱི་ཨ་རིའི་མཐུན་གྲོགས་རྣམས་ཀྱི་འབྲེལ་ལམ་ཤུགས་ཆེ་རུ་བཏང་སྟེ། རྒྱ་ནག་ཕྱོགས་ཀྱི་དཔལ་འབྱོར་དང་དམག་དོན། ཕྱི་སྲིད་བཅས་ཀྱི་ཉེན་ཁ་ལ་གདོང་ལེན་བྱ་རྒྱུ་དང་། ས་གནས་ཀྱི་རྩོད་རྙོག་ཁག་རྒྱལ་སྤྱིའི་ཁྲིམས་སྒྲིག་གཞིར་བཟུང་ཐོག་ཞི་བའི་ངང་འདུམ་སྒྲིག་བྱེད་པ་དར་སྤེལ་གཏང་རྒྱུ། རྒྱ་ནག་གཞུང་གིས་བོད་བརྒྱུད་ནང་བསྟན་པ་དང་ཡུ་གུར་མི་རིགས། གྲངས་ཉུང་ཁ་ཆེ་མི་རིགས་དང་ཡི་ཤུ་བ་སོགས་ལ་གཉའ་གནོན་བྱེད་བཞིན་པ་མཚམས་འཇོག་བྱ་ཐབས་བྱས་ཏེ་དམངས་གཙོ་དང་འགྲོ་བ་མིའི་ཐོབ་ཐང་གི་རིན་ཐང་གོང་སྤེལ་གཏང་རྒྱུ་ཡིན་སྐོར་བཀོད་འདུག

ཡང་རྒྱ་ནག་གཞུང་གིས་བོད་དང་ཧོང་ཀོང་། ཤར་ཏུར་ཀི་སི་ཐན་བཅས་ཀྱི་ནང་ལག་བསྟར་བྱེད་བཞིན་པའི་དྲག་གནོན་བྱེད་པའི་སྲིད་ཇུས་ཁག་ལ་ཨ་རི་དང་ཡུ་རོབ་མཐུན་ཚོགས་ཀྱི་རྒྱལ་ཁབ་ཁག་གིས་བློ་འཚབ་ཆེན་པོ་བྱེད་ཀྱི་ཡོད་པ་དང་། དྲག་གནོན་ཅན་གྱི་སྲིད་ཇུས་དེ་དག་རྒྱལ་ཁབ་གཞན་གྱི་ནང་མི་ཡོང་བའི་སྔོན་འགོག་ཆེད་རྒྱལ་སྤྱིའི་ཁྲིམས་སྒྲིག་དང་ལས་གཞི་ཁག་གི་ཐོག་ནས་མཉམ་འབྲེལ་ཤུགས་ཆེར་བྱེད་དགོས་སྐོར་སོགས་བཀོད་འདུག

རྒྱ་ནག་ལ་ཁ་གཏད་གཅོག་ཐབས་སུ་ཨ་རིའི་གྲོས་ཚོགས་ཀྱི་གསར་གཏོད་དང་འགྲན་སྡུར་གྱི་ཁྲིམས་འཆར་དེའི་དམག་དོན་དང་མཚོན་ཆ། དཔལ་འབྱོར་དང་ཚོང་ལས། འཕྲུལ་རིགས་དང་འཕྲུལ་ལས་ཀྱི་བདག་དབང་སོགས་རྒྱ་ནག་དང་འབྲེལ་བའི་གནད་དོན་མང་པོ་ཞིག་ཚུད་ཡོད་འདུག་པ་དང་། ཨ་རིའི་འཕྲུལ་རིགས་དང་ཉམས་ཞིབ་ཀྱི་སྡེ་ཁག་གོང་འཕེལ་དང་ཐོན་སྐྱེད་ཇེ་མང་དུ་གཏོང་ཐབས་སུ་ཨ་སྒོར་དུང་ཕྱུར་ ༢༥༠༠ ཙམ་གྱི་མ་དངུལ་གནང་རྒྱུ་ཡིན་འདུག་ལ། རྒྱ་ནག་གི་སྤྱི་ཚོགས་དྲ་ལམ་གྱི་མཉེན་ཆས་ཊིག་ཊོག་ (TikTok) ཨ་རིའི་གཞུང་འབྲེལ་གྱི་གློག་ཀླད་དང་ཁ་པར་སོགས་ཀྱི་ནང་བེད་སྤྱོད་བྱ་རྒྱུར་བཀག་འགོག་དང་། རྒྱ་ནག་གིས་བཟོས་པའི་མཁའ་སྐྱོད་པར་ཆས་ (Drone) སོགས་ཨ་རིས་ཉོ་མཚམས་འཇོག་རྒྱུ་ཡིན་འདུག དེ་བཞིན་ཨ་རིའི་ནང་ཐའེ་ཝན་གྱི་ཕྱི་སྲིད་མི་སྣ་དང་དམག་སྡེ་ཡིས་གཞུང་འབྲེལ་གྱི་ཐོག་ནས་ཐའེ་ཝན་གྱི་རྒྱལ་དར་བེད་སྤྱོད་བྱེད་ཆོག་པ་སོགས་བཀོད་ཡོད་འདུག

ཨ་རིའི་གྲོས་ཚོགས་གོང་མའི་ནང་ཁྲིམས་འཆར་དེ་མང་མོས་ཀྱིས་གཏན་འབེབ་བྱུང་བ་དང་འབྲེལ་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝིན་པིན་གྱིས། ཨ་རིའི་གྲོས་ཚོགས་གོང་མའི་ཁྲིམས་འཆར་དེ་ཡིས་ཐའེ་ཝན་དང་ཧོང་ཀོང་། ཤར་ཏུར་ཀི་སི་ཐན་དང་བོད་བཅས་ཀྱི་གནད་དོན་དང་འབྲེལ་རྒྱ་ནག་གི་ནང་སྲིད་ལ་ཐེ་ཇུས་བྱེད་ཀྱི་ཡོད་པ་དང་། ཨ་རི་གཞུང་གིས་ཁྲིམས་འཆར་དེ་འཕྲལ་དུ་མཚམས་འཇོག་བྱེད་དགོས་པ། དེ་བཞིན་རྒྱ་ནག་གཞུང་གིས་མུ་མཐུད་རྒྱལ་ཁབ་ཀྱི་བདག་དབང་དང་བདེ་སྲུང་། ཁེ་དབང་ལ་སྲུང་སྐྱོབ་བྱ་རྒྱུ་ཡིན་སྐོར་དང་། ཨ་རི་ཡིས་རྒྱ་ནག་དེ་བཞིན་འཆར་སྣང་ཁྲོད་ཀྱི་དགྲ་བོར་མཐོང་གི་ཡོད་པ་དེར་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་སྐོར་བརྗོད་འདུག

ཨ་རིའི་གྲོས་ཚོགས་གོང་མས་ཁྲིམས་འཆར་དེ་མང་མོས་ཐོག་གཏན་འབེབ་བྱུང་བར་ཨ་རིའི་སྲིད་འཛིན་བྷའེ་ཌིན་མཆོག་ནས་བསྔགས་བརྗོད་གནང་སྟེ། དུས་རབས་ཉེར་གཅིག་གི་འགྲན་བསྡུར་ནང་ཞུགས་སྟེ་རྒྱལ་ཁ་ཐོབ་ཐབས་བྱེད་ཀྱི་ཡོད་པ་དང་། ཨ་རི་ཡིས་ངེས་པར་དུ་རང་ཉིད་གསར་གཏོད་ཅན་དང་གྲུབ་འབྲས་ཆེ་ཤོས་ཀྱི་རྒྱལ་ཁབ་ཅིག་ཡིན་པའི་གནས་བབ་མུ་མཐུད་མཇུག་སྐྱོང་བྱེད་དགོས་པ་མ་ཟད། རྗེས་སུ་ལུས་པའི་ཉེན་ཁ་ལ་འཛེམས་ཐབས་མེད་སྐོར་གསུངས་འདུག་ལ། གྲོས་ཚོགས་གོང་མའི་འཐུས་མི་ཅག་ཤུ་མར་ (Chuck Schumer) ལགས་ཀྱིས་རྒྱ་ནག་ལ་ཁ་གཏད་གཅོག་པའི་ཁྲིམས་འཆར་དེ་ནི་ཧ་ཅང་གལ་ཆེན་ཡིན་པ་དང་། ཨ་རིས་འདི་ལྟ་བུས་ཁྲིམས་འཆར་གཏན་འབེབ་མ་བྱས་ཚེ་འཛམ་གླིང་གི་སྟོབས་ཆེན་རྒྱལ་ཁབ་ཡུན་རིང་བྱེད་མི་ཐུབ་སྐོར་གསུངས་ཡོད་འདུག དེ་བཞིན་ཨ་རིའི་བཟོ་ལས་ཁང་མང་པོ་ཞིག་གིས་ཀྱང་ཁྲིམས་འཆར་དེར་བསྔགས་བརྗོད་བྱེད་བཞིན་ཡོད་འདུག

ཨ་རིའི་གྲོས་ཚོགས་གོང་མའི་ནང་ཁྲིམས་འཆར་དེར་རྒྱབ་སྐྱོར་གནང་མཁན་འཐུས་མི་ ༦༨ བྱུང་ཡོད་པ་དང་འཐུས་མི་གྲངས་ ༣༢ གྱིས་དགག་བྱ་གནང་སྟེ་མང་མོས་ཐོག་གཏན་འབེབ་བྱུང་ཡོད་འདུག ཨ་རིིའི་སྲིད་འཛིན་བྷའེ་ཌིན་མཆོག་ནས་ཁྲིམས་འཆར་དེར་མཚན་རྟགས་བསྐྱོན་ཏེ་དངོས་སུ་ཁྲིམས་ལ་མ་བསྒྱུར་སྔོན་དུ་ཨ་རིའི་གྲོས་ཚོགས་འོག་མའི་ནང་ཁྲིམས་འཆར་དེར་རྒྱབ་སྐྱོར་ཡོད་མེད་ཀྱི་འོས་བསྡུ་བྱེད་དགོས་ནའང་། ཁྲིམས་འཆར་དེ་ད་ལྟ་གྲོས་ཚོགས་འོག་མའི་ནང་དུས་ནམ་ཞིག་ལ་འཁྱེར་ཡོང་གི་ཡོད་མེད་གསལ་ཁ་ཆགས་མི་འདུག་ལ། གནད་དོན་དབྱེ་ཞིབ་པས་ཁྲིམས་འཆར་དེ་ནི་རྒྱ་ནག་ལ་ཁ་གཏད་གཅོག་ཐབས་སུ་ཨ་རིའི་ཆབ་སྲིད་ཚོགས་གཉིས་ཀྱི་ངོས་ནས་རྒྱབ་སྐྱོར་ཚད་མཐོ་བྱུང་བའི་གྲས་ཤིག་ཡིན་པ་མ་ཟད། ཨ་རིའི་འཕྲུལ་རིགས་ཐོན་སྐྱེད་དང་བཟོ་ལས་ཕྱོགས་སུ་མ་དངུལ་ཆེ་ཤོས་བཏང་བའི་ཁྲིམས་འཆར་ཞིག་ཡིན་པ་བརྗོད་ཀྱི་འདུག