བོད་པའི་ཁྱིམ་ཚང་རེའི་མི་གཅིག་ངེས་པར་བཅིངས་གྲོལ་དམག་མིར་ཞུགས་དགོས་པ་བཟོས་ཡོད་འདུག

རྒྱ་ནག་གིས་བོད་པའི་མི་ཚང་རེ་ནས་དམག་མི་བསྡུ་རུབ་ཀྱིས་རྒྱ་གར་ལ་ས་མཚམས་རྩོད་རྙོག་སློང་གི་ཡོད་པའི་སྐབས་འདིར་རྒྱ་དཀར་ནག་བར་ས་མཚམས་རྩོད་རྙོག་ཞི་འགྲིག་ཡོང་བར་གྲོས་མོལ་མགོ་འཛུགས་བྱས་ཡོད་འདུག

One soldier per family: China PLA recruiting Tibetan youth for deployment at LAC

འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས། འདས་ལོའི་ལོ་མཇུག་ཙམ་ནས་རྒྱ་ནག་གཞུང་གིས་རྒྱ་དཀར་ནག་གི་མཐའ་མཚམས་ས་ཐིག་ (LAC) ཕྱོགས་སུ་ཁེལ་བའི་བོད་ཀྱི་གྲོང་ཚོ་ཁག་གི་བྱིས་པ་དང་རྒས་འཁོགས་ཕུད་པའི་གཞན་ཕོ་མོ་དབྱེར་མེད་ཀྱིས་གྲོང་མི་ཡོངས་ལ་དམག་སྦྱོང་སྤྲད་དེ། མཐའ་མཚམས་སྲུང་སྐྱོབ་སླད་དམག་འཁྲུག་རྒྱག་དགོས་ཟེར་བའི་དམག་དོན་ལས་འགུལ་སྤེལ་ཡོད་སྐོར་བརྗོད་པ་ལྟར། དེ་རིང་རྒྱ་གར་དུས་བབ་གསར་ཁང་སོགས་ཀྱིས་སྤེལ་བའི་གནས་ཚུལ་ནང་། རྒྱ་ནག་གཞུང་གིས་བོད་ཀྱི་ས་མཚམས་ཁག་གི་ཁྱིམ་ཚང་རེའི་ཁྱིམ་མི་གཅིག་ངེས་པར་དུ་བཅིངས་གྲོལ་དམག་མིར་ཞུགས་བཅུག་སྟེ། རྒྱ་དཀར་ནག་བར་རྩོད་རྙོག་ཏུ་གྱུར་བའི་ས་མཚམས་སྲུང་སྐྱོབ་བྱེད་སླད་དམག་ཤུགས་རྒྱ་སྐྱེད་བཏང་ཡོད་སྐོར་བརྗོད་འདུག

དེ་རིང་གི་རྒྱ་གར་ཞེས་པའི་གནས་ཚུལ་ལྟར་ན། རྒྱ་ནག་གིས་བཙན་གྱིས་བོད་པའི་ཁྱིམ་ཚང་རེའི་མི་གཅིག་ངེས་པར་བཅིངས་གྲོལ་དམག་མིར་ཞུགས་དགོས་པའི་བཀའ་བཏང་བ་དང་སྦྲགས། དམག་ཞུགས་མ་བྱས་གོང་བོད་མི་གཞོན་སྐྱེས་རྣམས་རྒྱ་ནག་དམར་ཤོག་ཚོགས་པར་བློ་དཀར་ཡིན་མིན་གྱི་འདྲི་རྩད་གཅོད་ཀྱི་ཡོད་ཅིང་། བོད་པའི་དམག་མི་རྣམས་ཆེད་དུ་ས་བབས་མཐོ་ཞིང་ཡུལ་ཁམས་ཁོར་ཡུག་ལ་རྒྱུས་མངའ་ཟབ་སའི་རྒྱ་ནག་དཀར་ནག་གི་མཐའ་མཚམས་ས་ཐིག་ཁུལ་དུ་མངགས་གཏོང་བྱེད་ཀྱི་ཡོད་འདུག་ལ། གནས་ཚུལ་ནང་རྒྱ་ནག་གིས་བོད་ཀྱི་ས་མཚམས་ཁག་གི་གྲོང་གསེབ་གང་དག་ནས་དམག་མི་བསྡུ་རུབ་བྱེད་ཀྱི་ཡོད་པ་གསལ་མི་འདུག

གནས་ཚུལ་ནང་རྒྱ་གར་དབུས་འབྲེལ་ཡོད་ལས་བྱེད་ཅིག་གིས། ང་ཚོར་གསང་བའི་གནས་ཚུལ་འབྱོར་ཏེ་རྒྱ་ནག་གིས་བོད་པའི་ཁྱིམ་ཚང་རེ་ནས་ངེས་པར་དུ་མི་གཅིག་དམག་མིར་ཞུགས་བཅུག་སྟེ། ལ་དྭགས་དང་ཨ་རུ་ན་ཅལ་ཁུལ་གྱི་རྒྱ་དཀར་ནག་བར་རྩོད་རྙོག་ཏུ་གྱུར་བའི་ས་མཚམས་སུ་བཏང་ནས་རྒྱ་གར་དམག་མིར་ཁ་གཏད་གཅོག་འཆར་འདུག ཅེས་བརྗོད་ཡོད་པ་དང་། བོད་མི་ཁྱིམ་ཚང་རེ་ནས་བཅིངས་གྲོལ་དམག་མིར་ཞུགས་མཁན་རེ་དགོས་པའི་གནས་ཚུལ་དེ་རྒྱ་གར་གསང་བའི་ལས་ཁུངས་ནས་ཐོག་མར་ཤེས་རྟོགས་བྱུང་ཡོད་འདུག

ཕྱི་ལོ་ ༢༠༢༠ ལོར་རྒྱ་དཀར་ནག་གཉིས་རྒྱ་གར་བྱང་ཕྱོགས་ལ་དྭགས་སྤང་གོང་མཚོའི་ལྷོ་ངོས་སུ་ཆགས་པའི་གྷལ་ཝན་ (Galwan) ལུང་ཁུལ་དུ་ས་མཚམས་རྩོད་རྙོག་གི་རྐྱེན་པས་དམག་འཁྲུག་ཤོར་རྗེས། ཕྱོགས་གཉིས་ཞི་མོལ་ལམ་ནས་དམག་མི་ཕྱིན་འཐེན་དང་ས་མཚམས་རྩོད་རྙོག་ཞི་འགྲིག་ཡོང་ཐབས་ཡོད་ཀྱང་། འདས་ལོའི་ལོ་མཇུག་ནས་རྒྱ་ནག་གིས་སླར་ཡང་ལ་དྭགས་ཁུལ་དུ་དམག་མི་འབོར་ཆེན་འགྲེམས་འཇོག་བྱས་སྟབས། ཕྱོགས་གཉིས་བར་ས་མཚམས་རྩོད་རྙོག་གི་གྲོས་མོལ་ལམ་ལྷོང་མ་བྱུང་བར་དཀའ་རྙོག་ཏུ་གྱུར་བ་དང་། དམིགས་བསལ་ཉེ་ལམ་ནས་རྒྱ་ནག་གིས་མཐའ་མཚམས་སྲུང་སྐྱོབ་ཀྱི་དམག་ཤུགས་རྒྱ་སྐྱེད་བཏང་སྟེ། ལ་དྭགས་དང་ཨ་རུ་ན་ཅལ་ཁུལ་གྱི་རྒྱ་དཀར་ནག་གི་རྩོད་རྙོག་ས་ཁུལ་དུ་དམག་སྒར་དང་དམག་མི། དམག་ཆས་སོགས་སྔར་བའི་ཇེ་མང་དུ་བཏང་ཡོད་པ་རེད།

དེ་མཚུངས་བཞིན། རྒྱ་གར་གཞུང་ནས་ཀྱང་ཕྱོགས་ཡོངས་ཀྱི་རྒྱ་གར་བའི་མཐའ་མཚམས་སྲུང་སྐྱོབ་ཀྱི་དམག་ཤུགས་རྒྱ་སྐྱེད་བཏང་སྟེ། ད་ལྟ་རྒྱ་དཀར་ནག་བར་འདེབས་བཟང་ལ་དང་ཆུ་མིག གྷོ་ར་སོགས་ཀྱི་ས་མཚམས་ནས་རྩོད་རྙོག་འབྱུང་གི་ཡོད་ཅིང་། དེ་རིང་གསར་དུ་ཐོན་པའི་གནས་ཚུལ་ལྟར་ན། དེ་རིང་ནས་རྒྱ་དཀར་ནག་བར་ས་མཚམས་རྩོད་རྙོག་ཞི་འགྲིག་གི་གྲོས་མོལ་ཐེངས་ ༡༢ པ་མགོ་འཛུགས་བྱས་ཡོད་སྐོར་འདུག་ལ། ད་ལྟ་རྒྱ་དཀར་ནག་གཉིས་ལ་ས་མཚམས་རྩོད་རྙོག་ཁུལ་དུ་དམག་མི་ཁྱོན་ཁྲི་ ༥ ནས་ ༦ བར་ཡོད་འདུག

གསར་འགོད་པ། སྐལ་བཟང་སྦྱིན་པ།