རྒྱ་གར་གྱི་མཐའ་མཚམས་དམག་མི་རྣམས་ལ་བོད་རིག་པའི་བསླབ་གཞི་སློབ་ཁྲིད་བྱེད་ཀྱི་ཡོད་འདུག

རྒྱ་གར་གཞུང་གིས་མཐའ་མཚམས་ཀྱི་དམག་མི་དང་གཞུང་འབྲེལ་མི་སྣ་རྣམས་ལ་བོད་ཀྱི་སྐད་ཡིག་ལོ་རྒྱུས་དང་བཅས་པའི་བསླབ་གཞི་སློབ་ཁྲིད་ཀྱིས། ཧིན་བོད་ས་མཚམས་ཀྱི་གནད་དོན་ཁག་ལ་སྔར་ལྷག་དོ་སྣང་བྱ་རྒྱུ་ཡིན་འདུག

ད་ལྟའི་ཆར་རྒྱ་དཀར་ནག་གཉིས་དབར་ས་མཚམས་རྩོད་རྙོག་གི་དཀའ་ངལ་འཕྲད་བཞིན་པའི་སྐབས་འདིར། རྒྱ་གར་གཞུང་གིས་ཧིན་བོད་མཐའ་མཚམས་སུ་བཅའ་སྡོད་བྱེད་བཞིན་པའི་རྒྱ་གར་གྱི་དམག་མི་རྣམས་དང་དེ་འབྲེལ་གྱི་གཞུང་འབྲེལ་མི་སྣ་ཁག་གིས། བོད་ཀྱི་ལོ་རྒྱུས་དང་རིག་གཞུང་། སྐད་ཡིག བོད་ཀྱི་ས་ཁམས་ཆགས་ཚུལ་བཅས་ལ་གོ་རྟོགས་གང་ལེགས་བྱུང་ཆེད་བོད་རིག་པའི་བསླབ་གཞི་ཞིག་མགོ་འཛུགས་བྱས་ཏེ། མ་འོངས་པར་རྒྱ་གར་གྱི་དམག་མི་ཚོར་ཧིན་བོད་མཐའ་མཚམས་ཀྱི་གནད་དོན་དང་འབྲེལ་བའི་ཐག་གཅོད་ལེན་པར་སྟབས་བདེ་བཟོ་རྒྱུ་ཡིན་པ་རེད།

རྒྱ་གར་གྱི་མཐའ་མཚམས་དམག་མི་དང་གཞུང་འབྲེལ་མི་སྣར་བོད་རིག་པའི་བསླབ་གཞི་སློབ་ཁྲིད་ལག་བསྟར་གྱི་ལས་གཞི་དེ་ནི། རྒྱ་གར་དབུས་བཀོད་འདོམ་དམག་དཔུང་གི་ལས་ཁུངས་དང་། འབྲས་ལྗོངས་ཀྱི་རྣམ་རྒྱལ་བོད་རིག་པ་ཞིབ་འཇུག་ལྟེ་གནས་ཁང་ (Namgyal Institute of Tibetology) དང་དབུས་ཧི་མ་ལ་ཡའི་རིག་གཞུང་སློབ་གཉེར་ཁང་ (Central Institute of Himalayan Culture Studies (CIHCS) བཅས་ཀྱི་བར་རྒྱུས་ལོན་གྲོས་ཆོད་ཅིག་བཞག་སྟེ་བྱུང་བ་ཞིག་ཡིན་ཞིང་། འདི་ལོའི་ཕྱི་ཟླ་ ༣ པ་ནས་ ༦ བར་རྒྱ་གར་གྱི་གཞུང་འབྲེལ་ལས་བྱེད་ ༡༥ དང་དམག་མི་ ༥ བཅས་ལ་ཟླ་གསུམ་གྱི་བོད་རིག་པའི་སློབ་ཁྲིད་ཐོག་མ་དེ་སྤྲད་ཡོད་འདུག་ལ། ཕྱི་ཟླ་ ༡༡ པའི་ནང་སླར་ཡང་སློབ་ཐུན་གསར་པ་ཞིག་མགོ་འཛུགས་བྱ་འཆར་ཡོད་པ་རེད།

རྒྱ་གར་གཞུང་འབྲེལ་གྱི་གནས་ཚུལ་ལྟར་ན། ད་ལན་ནི་རྒྱ་གར་གྱི་དམག་མི་རྣམས་ལ་བོད་ཀྱི་སྐད་ཡིག་གཙོས་ལོ་རྒྱུས་དང་རིག་གཞུང་སོགས་ཡོངས་གྲགས་ཐོག་སློབ་ཁྲིད་གནང་བ་ཐོག་མ་དེ་ཆགས་ཀྱི་ཡོད་པ་ལྟར། ཧིན་བོད་མཐའ་མཚམས་ཀྱི་རྒྱ་གར་དམག་མི་དང་གཞུང་འབྲེལ་མི་སྣ་དག་བོད་རིག་པའི་སློབ་ཁྲིད་ནང་ཞུགས་མིན་རང་ཉིད་ཀྱི་འདོད་པ་ཡིན་ཡང་། བོད་རིག་པར་སྦྱོང་བ་བྱེད་མཁན་རྣམས་ལ་གོ་གནས་དང་མ་འོངས་པར་གནས་སྤོར་བྱེད་ཕྱོགས་བཅས་ཀྱི་ཁེ་སྤོགས་ཡོད་སྐོར་བརྗོད་འདུག་ལ། ད་བར་དུ་རྒྱ་གར་རྒྱལ་ཡོངས་ཀྱི་དམག་མི་གྲངས་ ༡༥༠ ཙམ་གྱིས་བོད་རིག་པའི་བསླབ་གཞིར་སྦྱོང་བ་བྱས་ཡོད་འདུག

རྒྱ་གར་དམག་མིའི་ནང་བོད་རིག་པའི་སློབ་ཁྲིད་ལག་བསྟར་གྱི་ལས་གཞི་དེ་ཐོག་མར་ཟླ་གཅིག་དང་ཕྱེད་ཙམ་རིང་གཏན་འཁེལ་བྱས་ཡོད་ཀྱང་། རྒྱ་གར་ནང་བཀོད་འདོམ་དམག་དཔུང་ཁང་ ༦ ཡོད་པའི་ནང་གི་ཤར་རྒྱུད་བཀོད་འདོམ་དམག་དཔུང་ཁང་གིས། དབུས་བཀོད་འདོམ་དམག་དཔུང་ཁང་ལ་བོད་རིག་པའི་སློབ་ཁྲིད་ཀྱི་དུས་ཡུན་ཇེ་རིང་དུ་གཏོང་དགོས་པའི་རེ་སྐུལ་ཞུས་པ་ལྟར། ད་ལྟ་བོད་རིག་པའི་སློབ་ཁྲིད་ཀྱི་དུས་ཡུན་ཟླ་གསུམ་རིང་ཡིན་ཞིང་། རྒྱ་གར་དབུས་བཀོད་འདོམ་དམག་དཔུང་ཁང་གིས་རྒྱལ་ཡོངས་སུ་བོད་རིག་པའི་བསྟི་གནས་ཁང་ ༧ ཙམ་ཡོད་པ་ངོས་འཛིན་ཐུབ་པའི་ཁྲོད། ད་ལྟ་ཨ་རུ་ན་ཅལ་གྱི་དབུས་ཧི་མ་ལ་ཡའི་རིག་གཞུང་སློབ་གཉེར་ཁང་དང་འབྲས་ལྗོངས་ཀྱི་རྣམ་རྒྱལ་བོད་རིག་པ་ཞིབ་འཇུག་ལྟེ་གནས་ཁང་གཉིས་སུ་བསླབ་གཞི་ལག་བསྟར་བྱེད་མུས་ཡིན་འདུག

དེ་འབྲེལ་ཐད་ཤར་རྒྱུད་བཀོད་འདོམ་དམག་དཔུང་གི་སྡེ་ཁག་བཞི་( 4 Corps ) པའི་དམག་མི་རྒན་གྲས་ཤིག་གིས། ཟབ་ཁྲིད་དེས་དམག་མི་ཚོར་བོད་ཀྱི་སྐད་ཡིག་དང་། རིག་གཞུང་། ལོ་རྒྱུས་དང་ཆབ་སྲིད་སོགས་ཀྱི་གནས་སྟངས་ཐད་ལ་བློ་སྐྱེད་ཆེན་པོ་ཐོབ་ཀྱི་ཡོད་པ་མ་ཟད། ཧིན་བོད་ས་མཚམས་སུ་དམག་མི་འགྲེམས་འཇོག་སོགས་བྱེད་སྐབས། ཁོང་ཚོར་དམིགས་བསལ་གྱི་བློ་སྤོབས་དང་ནུས་སྟོབས་འཕར་མ་ཞིག་སྤྲད་ཀྱི་ཡོད་སྐོར་འགྲེལ་བརྗོད་བྱས་འདུག གཞུང་འབྲེལ་མི་སྣ་གཞན་ཞིག་གིས། ཁོང་ཚོ་བོད་མི་གཞིས་ཆགས་དང་རྒྱ་གར་ནང་གནས་སྡོད་བོད་མི་དང་འབྲེལ་ལམ་ཡག་པོ་ཡོད་ལ། བསླབ་གཞི་དེས་བོད་མིར་སྔར་ལས་ལྷག་པའི་མཐུན་ལམ་དང་བོད་ཀྱི་རིག་གཞུང་སོགས་ཀྱི་ཐད་ལ་གོ་རྟོགས་ཡོང་བར་ཕན་ཐོགས་ཆེན་པོ་ཡོད་སྐོར་བརྗོད་ཡོད་པ་རེད།

འདི་ལོའི་ཕྱི་ཟླ་ ༡ ཙམ་ནས་ལ་དྭགས་དང་འབྲས་ལྗོངས་སུ་འཁེལ་བའི་ཧིན་བོད་ས་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་འབྱུང་བཞིན་པའི་གནས་སྟངས་དང་། རྒྱ་ནག་གི་དྲིལ་བསྒྲགས་དང་ཤུགས་རྐྱེན་ལ་ཁ་གཏད་གཅོག་ཆེད་རྒྱ་གར་གྱི་དམག་མི་ཚོས་བོད་ཀྱི་ལོ་རྒྱུས་དང་། རིག་གནས། སྐད་ཡིག་བཅས་སྦྱོང་རྒྱུའི་ལས་གཞི་དེ་ཐོག་མར་མགོ་འཛུགས་བྱས་པ་ཞིག་ཡིན་པ་རེད་འདུག

རྒྱ་གར་གྱི་དམག་མིར་བོད་རིག་པའི་སློབ་ཁྲིད་ལག་བསྟར་བྱེད་བཞིན་པའི་ཐད། རྒྱ་ནག་གཞུང་འབྲེལ་གོ་ལའི་དུས་བབ་ཟེར་བའི་སྟེང་དཔྱད་ཞིབ་བཅར་འདྲི་ཞིག་བྱས་པའི་ནང་། རྒྱ་གར་གྱིས་དམག་མི་དང་གསང་བའི་མི་སྣ་དག་ལ་བོད་ཀྱི་ལོ་རྒྱུས་དང་སྐད་ཡིག་རིག་གཞུང་དང་བཅས་པ་སློབ་ཁྲིད་ཀྱིས། རྒྱ་གར་གྱི་འཇམ་པོའི་སྟོབས་ཤུགས་རྒྱ་སྐྱེད་དང་དམག་དོན་གྱི་གསང་བའི་ལས་གཞི་གོང་མཐོར་གཏོང་འདོད་ཡོད་པ་མ་ཟད། རྒྱ་གར་ལ་ས་མཚམས་རྩོད་རྙོག་གི་དཀའ་ངལ་སེལ་འདོད་མེད་པ་དང་ཕུགས་རྒྱང་རིང་པོར་ས་མཚམས་ཁུལ་དུ་གནས་སྡོད་བྱེད་རྩིས་ཡོད་པའི་སྐྱོན་བརྗོད་བྱས་འདུག

བཅར་འདྲི་དེའི་ནང་ཚེ་ཧྥ་གཙུག་ལག་སློབ་ཆེན་གྱི་རྒྱལ་ཁབ་ཀྱི་སྲིད་ཇུས་ལྟེ་གནས་ཁང་གི་འགན་འཛིན་ཆིན་ཧྥན་ (Qian Feng) ཟེར་བས། རྒྱ་གར་གྱི་དམག་མི་རྣམས་ལ་བོད་རིག་པའི་སློབ་ཁྲིད་བྱེད་ཀྱི་ཡོད་པར་ཧ་ལས་དོན་ཅི་ཡང་མེད། དེས་རྒྱ་གར་གྱི་དམག་མི་རྣམས་ས་མཚམས་ཁུལ་དུ་གཏན་སྡོད་བྱེད་རྩིས་ཡོད་པའི་ཕུགས་བསམ་བཟུང་ཡོད་པ་བསྟན་པ་མ་ཟད། དུས་རྒྱུན་དུ་རྒྱ་ནག་ལའང་དོགས་ཟོན་བྱེད་ཀྱི་ཡོད་པའི་རྐུབ་བརྡོལ་ཡོད་སྐོར་དང་། རྒྱ་ནག་གིས་མཐོ་སྒང་གི་རྒྱལ་ཁོངས་དང་མཐའ་མཚམས་སྲུང་སྐྱོབ་བྱ་རྒྱུ་ཡིན་པའི་ལངས་ཕྱོགས་བརྟན་པོ་བཟོས་ཡོད། གལ་སྲིད་ད་ཐེངས་རྒྱ་གར་གྱིས་བསླབ་བྱ་ལེན་མ་ཐུབ་པའམ་ཡང་ན་མུ་མཐུད་དྲག་རྩུབ་སྤེལ་རྩིས་ཡིན་ཚེ། རྒྱ་ནག་གི་མཇུག་མ་རྫོགས་པར་དུ་འཐབ་རྩོད་བྱ་རྒྱུ་ཡིན། ཞེས་རྒྱ་གར་ལ་ཉེན་བརྡ་བཏང་ཡོད་པ་རེད།

གསར་འགོད་པ། དཔལ་ལྡན། སྐལ་བཟང་སྦྱིན་པ།