བློ་བཟང་ལུང་རྟོགས་ཀྱིས་བསྒྱུར།
ཉེ་ཆར་ཨུ་རུ་སུ་དང་རྒྱ་ནག་གཉིས་ཀྱིས་གཏིང་ཇེ་ཟབ་ཏུ་བཏང་བའི་མཐུན་གྲོགས་ཀྱི་འབྲེལ་བ་དེ། གློ་བུར་དུ་སྟོབས་དང་ལྡན་པའི་ལག་སྦྲེལ་ཅིག་མ་ཡིན་པར་གཉོམ་ཆུང་ནུས་མེད་ཅིག་ཏུ་མངོན་བཞིན་པ་རེད། ལྷག་པར་དུ་དམག་འཁྲུག་ཅིག་བསླངས་ནས་ནོར་འཁྲུལ་ཧ་ཅང་ཆེན་པོ་ཤོར་བར་བརྟེན། ཕུ་ཊིན་གྱིས་བསམ་བཞིན་མ་ཡིན་ཀྱང་རྒྱ་ནག་གི་འགོ་ཁྲིད་ཚོར་ཐེ་ཝན་དབང་དུ་སྒྱུར་རྩིེས་མ་བྱས་སྔོན་དུ་གཟབ་གཟབ་དགོས་པའི་ཉེན་བརྡ་བཏང་བ་རེད། བསླབ་བྱ་གཞན་ཞིག་ནི་ཞིས་ཅིན་ཕིང་གི་ལས་གྲོགས་ཚོས་དོ་སྣང་བྱེད་ངེས་ཡིན། བསླབ་བྱ་དེས་ཁོ་རང་ལ་དམིགས་བསལ་གྱིས་མ་སྐྱིད་པ་ཞིག་བཟོ་རྒྱུ་ཡིན་པ་སྟེ། རྒྱལ་ཁབ་ཅིག་ཡིན་ན་རང་ཉིད་བླ་ན་མེད་པའི་དབང་སྒྱུར་བ་ཞིག་གི་སྟངས་འཛིན་འོག་འགྲོ་རུ་འཇུག་མི་ཉན་པ་དེ་རེད།
བདུན་ཕྲག་དྲུག་གི་སྔ་རོལ་དུ། རྩོམ་པ་པོས་ཕྱི་ཟླ ༢ པའི་ཚེས་༤ ཉིན་ཁྱབ་བསྒྲགས་བྱས་པའི་ཨུ་རུ་སུ་དང་ལྷན་དུ་བཞག་པའི་ ་་མཚམས་མེད་པའི་མཐུན་གྲོགས་ཀྱི་འབྲེལ་བ་དེ་ཡིས་རྒྱ་ནག་གི་སྟོབས་ཤུགས་ཆེ་རུ་བཏང་ཚུལ་གླེང་ཡོད། དཔེར་ན། ཨུ་རུ་སུའི་ཕྱོགས་ནས་རྒྱ་ནག་དེ་བཞིན་ཉེན་ཁ་ཅན་ཞིག་ཏུ་མཐོང་གི་མེད་པ་དང། རང་ཉིད་ཀྱི་དྲག་པོའི་སྟོབས་ཤུགས་ཡོ་རོབ་ཕྱོགས་སུ་ཁ་བསྒྱུར་བྱས་པར་བརྟེན། ཨ་མེ་རི་ཀས་ཐེ་ཝན་སྲུང་སྐྱོབ་བྱེད་རྒྱུར་འགལ་རྐྱེན་སྤྲད་ནས་གནོན་ཤུགས་འཕར་མ་ཞིག་སྤྲོད་རྒྱུ་དེ་རེད།
ད་ལྟ་དོན་དངོས་ཐོག་ཨུ་རུ་སུའི་དྲག་པོའི་སྟོབས་ཤུགས་ནི་ཕུ་ཊིན་རང་ཉིད་ཚུད་པའི་མི་རྣམས་ཀྱིས་བསམ་ཚོད་ལྟར་དེ་འདྲའི་ནུས་པ་ལྡན་པ་ཞིག་མིན་པར་མངོན་ཞིང། ཁོ་ཚོས་ཡུཀ་རེན་ལ་བཙན་འཇུལ་བྱས་པ་དེ་ནི་མགོ་རྙོག་ཚ་བོ་ཞིག་ཏུ་གྱུར། ཕུ་ཊིན་གྱི་སྐམ་དམག་དང་གནམ་དམག་གཉིས་ནི་ཤོག་ངོས་སུ་སྟོབས་ཤུགས་ཧ་ཅང་ཆེན་པོ་ཡིན་ཀྱང་། དོན་དངོས་ཐོག་དམག་འཁྲུག་རྒྱག་སྐབས་དམག་དོན་གྱི་གྲུབ་འབྲས་ཇི་འདྲའི་ཆུང་བ་ལ་ཨང་བསམ་ནས་འཛམ་གླིང་གི་དབྱེ་ཞིབ་མང་པོ་ཡ་མཚར་སྐྱེ་བཞིན་ཡོད།
རིམ་བཞིན་ཨུ་རུ་སུ་ནི་ཡུཀ་རེན་གྱི་སྟོབས་ཤུགས་ལས་རྣམ་པར་རྒྱལ་བའམ། ཡང་ན། མངའ་ཁོངས་ལ་བཙན་བཟུང་བྱེད་ཐུབ་པའི་དབང་དུ་བཏང་ན་ཡང་། (དཔེར་ན། དུག་རླངས་དང་རྡུལ་ཕྲན་མཚོན་ཆས་ཕར་རྒོལ་བྱེད་པ་ལྟ་བུ)
ཕུ་ཊིན་དང་ཁོའི་དམག་སྤྱི་རྣམས་ངོ་ཚ་ཁ་སྐྱེངས་དགོས་པའི་གནས་སུ་ལྷུང་རྒྱུ་རེད། དོན་དངོས་ཐོག་ཁོ་ཚོས་འདི་ལས་ལྷག་པ་ཞིག་སྒྲུབ་ཐུབ་དགོས་ངེས་ཀྱང་། དེ་ལས་ལྡོག་སྟེ་དམག་འཁྲུག་གི་འཕེལ་རིམ་ཁྲོད་ཨུ་རུ་སུའི་དམག་དཔུང་ཉམས་ཞན་དུ་འགྲོ་བཞིན་ཡོད་པ་དང་། ཁོ་ཚོའི་དམག་ཆས་ཤོར་པ་ནི་དཔེར་ན་དམག་དཔུང་གི་འཐབ་འཛིང་རླངས་འཁོར་དང་། ཐད་འཕུར་གནམ་གྲུ། མེ་ཤུགས་འཕུར་མདའི་མ་ལག་སོགས་རེད།
ཨུ་རུ་སུའི་དམག་མི་རྣམས་ཀྱིས་རང་ཉིད་ཀྱི་འཐབ་གྲོགས་རྣམས་གསད་པའམ། རྨས་སྐྱོན་ཕོག་ཏེ་བསམ་ཡུལ་ལས་འདས་པའི་སྡུག་སྦྱོང་མྱོང་བཞིན་པ་དང། ཁོ་ཚོའི་དམག་དཔོན་རྣམས་ཀྱིས་དམག་འཁྲུག་བཀོད་འདོམས་ལེགས་པོ་བྱེད་ཐུབ་ཀྱི་མེད་པའི་གནས་ཚུལ་རྣམས་མཐོང་ནས་སེམས་ཤུགས་ཆགས་བཞིན་ཡོད། དམག་འཁྲུག་འདི་མཚམས་འཇོག་བྱུང་རྗེས། ཨུ་རུ་སུའི་ཕྱོགས་ནས་གཏོར་སྐྱོན་ཕོག་པའི་དམག་ཆས་རྣམས་བསྐྱར་སྒྲིག་བྱ་དགོས་པ་དང་། དམག་འཁྲུག་ཁྲོད་གསོན་མཁན་ཚོར་དེ་ཙམ་གྱིས་དོ་སྣང་སྤྲོད་མི་ཐུབ་པ་ཙམ་དུ་མ་ཟད། ཁོ་ཚོ་བེད་སྤྱོད་བྱེད་པའི་ནུས་པ་ཡང་མེད་པར་འགྱུར།
རིམ་པ་དམའ་བོའམ་དམག་དཔོན་མང་ཆེ་བ་ནི། ཨ་མེ་རི་ཀ་དང་ཁེ་ན་ཌ། ཡོ་རོབ་བཅས་མཐུན་གྲོགས་ཡིན་པའི་ནེ་ཊོའམ་བྱང་ཆིངས་རྩ་འཛུགས་མནའ་འབྲེལ་དང་མཉམ་དུ་དམག་འཁྲུག་ཅིག་རྒྱག་དགོས་བསམ་ན་སྐྲག་སྣང་སྐྱེས་ངེས་ཡིན། དེར་བརྟེན་ཨུ་རུ་སུའི་ཕྱོགས་ནས་ཡོ་རོབ་ནང་ཨ་མེ་རི་ཀར་གནོན་ཤུགས་སྤྲོད་པར་འདོད་པའི་ཐབས་ཇུས་དེ་གསལ་ཁ་མེད་པ་ཞིག་ཏུ་གྱུར་བ་རེད།
ཕྱོགས་གཅིག་ནས་ཁོ་ཚོས་ཧོལ་རྒྱུགས་ངང་དམག་འཁྲུག་སློང་སྲིད་པ་དེ་བསྟན་འདུག་པར་ནུབ་ཕྱོགས་པ་ཚོས་ངེས་པར་དུ་དོ་སྣང་ཆེན་པོ་སྤྲོད་དགོས། ཕྱོགས་གཞན་ཞིག་ནས་ད་ལྟ་བྱང་ཆིངས་རྩ་འཛུགས་ཀྱིས་ཨུ་རུ་སུའི་རྡུལ་ཕྲན་མཚོན་ཆ་ལས་གཞན་པའི་དྲག་པོའི་དམག་དཔུང་དེ་སྟོགས་ཤུགས་ཞན་པོ་ཡིན་པ་ཤེས་རྟོགས་བྱུང་ཐུབ་ཡོད།
ཨུ་རུ་སུར་ཁ་གཏད་གཅོད་ཆེད་ཡོ་རོབ་ཀྱི་རྒྱལ་ཁབ་རྣམས་ཀྱིས་བདེ་སྲུང་གི་འགྲོ་སོང་ཇེ་མང་དུ་གཏོང་བཞིན་པ་དང་། གཅིག་བྱས་ན། ཨ་མེ་རི་ཀའི་དྲག་པོའི་སྟོབས་ཤུགས་འབོར་ཆེན་པོ་ཞིག་ཡོ་རོབ་ནང་གཏན་འཇགས་འཇོག་དགོས་པའམ། ཡང་ན། ཡོ་རོབ་རྒྱལ་ཁབ་རྣམས་ལ་མཚོན་ཆ་བསྐྱར་སྒྲིག་བྱས་པ་དེ་འདང་ངེས་ཡིན་པའི་ཐག་གཅོད་བྱས་ཏེ་ཨ་རིའི་དམིགས་པ་ཞི་བདེ་རྒྱ་མཚོའི་ནུབ་ཕྱོགས་སུ་གཏོད་ཐུབ་པ་ཡོང་སྲིད།
གང་ལྟར་ཀྱང་ཕུ་ཊིན་གྱིས་ནུབ་ཕྱོགས་པ་ཚོར་དྲག་པོའི་སྟོབས་ཤུགས་གསར་སྐྲུན་བྱེད་དུ་བཅུག་པར་ཞིས་ཅིན་ཕིན་གྱིས་སྐྱོན་བརྗོད་བྱས་ཆོག་ལ། རྒྱལ་སྤྱིའི་སྤྱི་ཚོགས་ཀྱིས་སྲིད་དབང་སྒེར་གཅོད་ཀྱི་ཇག་ཚོགས་ལ་བཟོད་སྒོམ་མི་བྱེད་པའི་སེམས་ཁམས་ནི་དེ་བས་བརྗོད་མི་དགོས་པ་ཞིག་རེད། འོན་ཀྱང་། ཕུ་ཊིན་གྱིས་ཧ་ཅང་གལ་འགངས་ཆེ་བའི་ཉེན་བརྡ་ཞིག་བཏང་བར་ཞིས་ཅིང་ཕིན་ནས་ཐུགས་རྗེ་ཆེ་ཞུ་འོས་པ་ཞིག་སྟེ། དམག་འཁྲུག་གི་མཇུག་འབྲས་ནི་སྔོན་དཔག་བྱ་ཐུབ་བྲལ་བ་ཞིག་ཡིན་པ་དེ་རེད།
གལ་སྲིད་ཉིན་གཅིག་དམག་སྤྱི་དང་དམག་དཔོན་རྣམས་ཀྱིས་ཞིས་ཅིན་ཕིན་ལ་ཐེ་ཝན་གྱི་དམག་འཁྲུག་ཁྲོད་ཁོ་ཚོ་ཨ་རི་ལས་རྣམ་པར་རྒྱལ་ཐུབ་པའི་ཡིད་ཆེས་བརྟན་པོ་ཡོད་ཅེས་བརྗོད་པའི་སྐབས་སུ། གཙོ་འཛིན་ཞིས་ཀྱིས་ཐེ་ཚོམ་དང་བཅས་སྨིན་མ་བསྡུ་དགོས་པར་རྒྱུ་མཚན་ཧ་ཅང་ཡག་པོ་ཞིག་ཡོད། དམག་འཁྲུག་ནི་སྔོན་དཔག་མི་ཐུབ་པ་ཞིག་དང་ཕྱོགས་གཉིས་ཀས་རང་ཉིད་ཀྱི་དགྲ་བོས་བསྒྲུབ་སྲིད་པའི་བྱ་བཞག་ཡོད་ཚད་ལ་ཚོད་དཔག་མི་ཐུབ་པ་ནི་ཡོངས་གྲགས་ཀྱི་གནས་སྟངས་ཤིག་རེད། དགྲ་བོའི་ཕྱོགས་ནས་རྟག་པར་ཧང་སངས་འཇུག་པའི་གནས་ཚུལ་ཐོན་གྱི་ཡོད། ཡོངས་གྲགས་དེ་ཙམ་མིན་པ་ནི་ཕྱོགས་གཞན་གྱིས་ཅི་ཞིག་སྒྲུབ་ཐུབ་མིན་སྔོན་དཔག་དཀའ་བ་དེ་རེད།
དམག་ཆས་ཀྱི་ནུས་སྟོབས་ག་ཚོད་ཅིག་ལྡན་མིན་དེ་དོན་དངོས་སུ་གནད་དོན་ཞིག་ཏུ་གྱུར་མེད། དཔེར་ན། དམག་དཔུང་གི་མཁའ་ཟོན་ནུས་ཤུགས་སྟེ། མེ་ཤུགས་འཕུར་མདའ་དང་། འཚོལ་ཞིབ་མ་ལག བརྡ་འཕྲིན་གྱི་འབྲེལ་བ་བཅས་ལ་ཚོད་ལྟ་བྱས་ཆོག་པར་མ་ཟད། དེ་དག་གི་བྱེད་ནུས་ལ་ཡང་ཚད་མཇལ་ཐུབ། ཡོང་སྲིད་པའི་དགྲ་བོ་ཞིག་གི་དམག་དཔུང་གི་མང་ཉུང་ལ་ཚོད་དཔག་བྱས་ཆོག འོན་ཀྱང་། ལག་ལེན་དངོས་ཀྱི་ནང་ལས་དོན་རྣམས་ལ་གྲུབ་འབྲས་ཐོན་མིན་ནི། དམག་སྦྱོང་དང་། དམག་མིའི་ངར་ཤུགས། ལྟ་སྲུང་། མཁོ་སྤྲོད། འཐབ་རྩལ་སོགས་ལས་དོན་གསལ་ལ་མི་གསལ་བའི་རིགས་མང་པོ་ཞིག་ལ་རག་ལས་ཀྱི་ཡོད།
ཨུ་རུ་སུའི་ཕྱོགས་ནས་ཡུཀ་རེན་ནང་གསལ་སྟོན་བྱེད་བཞིན་པ་ལྟར། དེ་དག་གི་ཁྲོད་རྒྱལ་ཁབ་ཅིག་གིས་རང་ཉིད་ལ་ནུས་ཤུགས་ག་ཚོད་ཅིག་ཡོད་མིན་རྒྱུས་ལོན་མེད་པ་ཡོང་སྲིད་ལ། དེ་བཞིན་རྒྱལ་ཁབ་གཞན་ལ་ཕར་རྒོལ་ཀྱི་ནུས་པ་ནི་དེ་བས་ཀྱང་བཤད་མ་དགོས་པ་ཞིག་རེད། འོ་ན། དམག་སྤྱི་ཆེན་མོ་ཚོ། ང་ཚོས་ཐེ་ཝན་མཚོ་འགག་བརྒལ་ནས་བཙན་འཛུལ་གྱི་དམག་དཔུང་ཞིག་གཏོང་ཐུབ་པར་ཁྱེད་ཚོར་གདེང་ཚོད་ཅི་འདྲ་ཞིག་ཡོད་དམ་་ ཅེས་ཞིས་ཅིན་ཕིན་གྱིས་འདྲི་སྲིད།
རྒྱ་ནག་ཕྱོགས་ནས་གནས་ཚུལ་འདོན་སྤེལ་བྱས་པ་ལྟར་ན་ཨ་རིའི་དམག་དཔུང་གི་སྦྱོང་བརྡར་བྱེད་བཞིན་པའི་དམག་གི་རྩེད་འགྲན་མང་ཆེ་བ་ལས་ཁོ་ཚོ་རྒྱལ་ཁ་ཐོབ་པ་དེ་བདེན་ན། ཝ་ཞིན་ཀྲོན་དང་ཁེན་སྦེ་རའི་ཕྱོགས་ནས་དེའི་སྐོར་ལ་བློ་འཚབ་བྱེད་དགོས་ངེས་རེད། འོན་ཀྱང་། དེ་ནི་རྒྱ་ནག་ལ་གདེང་ཚོད་སླེབས་པའི་རྒྱུ་མཚན་འདང་ངེས་ཤིག་མིན། བྱ་བ་འདི་དག་ནི་གཏན་འཁེལ་བྱེད་རྒྱུ་ལས་སླ་བོ་ཞིག་རྩ་བ་ནས་མིན།
པེ་ཅིང་ཕྱོགས་ནས་གཟབ་གཟབ་བྱེད་དགོས་པའི་གནད་དོན་གཞན་ཞིག་ཡོད་པ་སྟེ། རྒྱ་ནག་གི་དམག་དོན་ཡོ་ཆས་མང་ཆེ་བ་ཞིག་ཨུ་རུ་སུ་ནས་ནང་འདྲེན་བྱས་དང་བྱེད་བཞིན་པའམ། ཨུ་རུ་སུའི་འཕྲུལ་རིགས་རྨང་གཞི་བཞག་ནས་བཟོས་པ་རེད། གཅིག་མཚུངས་ཡིན་པའི་ཡོ་ཆས་དེ་དག་གིས་ཡུཀ་རེན་གྱི་ནང་ལས་དོན་ཡག་པོ་སྒྲུབ་ཐུབ་ཀྱི་མེད་པ་ཡིན་ན། དེ་དག་གིས་ཨ་རིའི་ཁ་གཏད་གཅོད་ཐུབ་པར་འདོད་པའི་ལྟ་ཚུལ་རྣམས་ལ་ད་ལྟ་ངེས་པར་དུ་ཐེ་ཚོམ་ཆེན་པོ་སྐྱེས་གཞིར་གྱུར་ཡོད། དེར་བརྟེན། ཕུ་ཊིན་དང་སྡུག་བསྔལ་མྱོང་བཞིན་པའི་ཡུག་ཁུ་རེན་མི་དམངས་ལ་ཐུགས་རྗེ་ཆེ་ཞུ་རྒྱུ་ཡིན། གང་ཡིན་ཟེར་ན། མ་འོངས་པའི་ལོ་ཤས་རིང་ཐེ་ཝན་བདེ་འཇགས་ངང་གནས་ཐུབ་པར་རེ་བ་བརྒྱབ་ཆོག་པ་རེད།
ཞིས་ཅིན་ཕིང་གིས་རྒྱ་ནག་གི་འགོ་ཁྲིད་བྱས་ནས་ལོ་བཅུ་ཙམ་འགྲོ་བཞིན་ཡོད་པ་དང་། རྒྱ་ནག་དམར་ཕྱོགས་ཚོགས་པས་སྔོན་ཆད་ལས་རྒྱུན་ལ་བཅད་མཚམས་བཟོས་ཡོད། དེ་ཡང་མི་གཅིག་གིས་དབང་ཆ་ཡོད་ཚད་བདག་བཟུང་བྱེད་པ་དང་རྒྱལ་ཁབ་ཅིག་ཆགས་འཇིག་གི་གནས་སུ་ཁྲིད་རྒྱུར་སྔོན་འགོག་བྱ་རྒྱུའི་ཆེད་དུ་ཡིན། ཕྱི་ལོ་༡༩༧༦ ལོའི་བར་གཙོ་འཛིན་མའོ་ཡི་གནས་སྐབས་སུ་དེ་ལྟའི་ཉམས་མྱོང་ཐོབ་མྱོང་ཡོད།
རྒྱ་ནག་མི་མང་གིས་རྒྱུ་མཚན་དེ་དག་གི་རྒྱབ་ལྗོངས་ཤེས་ཀྱི་ཡོད། མི་གཅིག་གིས་སྟོབས་ཤུགས་ཡོད་ཚད་གཅིག་སྡུད་བྱས་པ་དེ་ཚོགས་པ་གཅིག་དང་བསྡུར་ན་ནོར་འཁྲུལ་འབྱུང་སླ་བ་དང་། སྟོབས་ཤུགས་ཤིན་ཏུ་ཆེ་བའི་དབང་སྒྱུར་པ་རྣམས་ཀྱིས་རང་ཉིད་ཀྱི་འདོད་བློ་དང་མི་མཐུན་པའི་སློབ་སྟོན་པ་རྣམས་ཀྱིས་ཉེན་བརྡ་སྣང་མེད་གཏོང་བ་དེ་རེད།
དེ་ལྟ་ན་ཡང་གཙོ་འཛིན་ཞིས་ཀྱིས་ལས་རྒྱུན་གྱི་བཅད་མཚམས་མེད་པར་བཏང་པ་དང་། ད་ལོའི་ལོ་མཇུག་ནས་འགོ་བརྩམ་ཏེ་ཡང་བསྐྱར་ལོ་ལྔའི་རིང་དབང་སྒྱུར་བྱ་འཆར་ཡོད་པ་རེད། དབྱེ་ཞིབ་པ་མང་ཆེ་བས་ཁོ་རང་ལོ་བཅོ་ལྔ་ལས་ལྷག་སྡོད་འདོད་ཡོད་པར་ཚོད་དཔག་བྱེད་བཞིན་ཡོད་ལ་ཁོ་རང་མུ་མཐུད་ནས་སྡོད་ཐུབ་སྲིད། ད་ནི་ང་ཚོས་ཕུ་ཊིན་ལ་ཅིག་བལྟས་ན། ཁོས་རང་ཉིད་ཀྱི་རྒྱལ་ཁབ་དེ་བཞིན་བྱུས་ཉེས་ཀྱི་དམག་འཁྲུག་ནང་ལྷུང་བཅུག་པ་དང་། ནུབ་ཕྱོགས་པས་གདོང་ལེན་བྱས་པར་བརྟེན་དཔལ་འབྱོར་ཉམས་རྒུད་ལ་བཏང་བ་མཐོང་ནས། གཙོ་འཛིན་ཞིས་ཀྱི་མཐའ་སྐོར་གྱི་མཐོ་རིམ་དཔོན་རིགས་རྣམས་ཀྱིས་སྔོན་ཆད་ཀྱི་སྒྲིག་གཞི་དེ་ཐབས་ཤེས་ལེགས་པོ་ཞིག་ཡིན་པ་ཕལ་ཆེར་ཁོ་ཚོས་ཡང་བསྐྱར་བསམ་བློ་གཏོང་ངེས་རེད།
ཁོ་ཚོ་ནི་སྟོབས་མེད་ནུས་མེད་ཅིག་མ་ཡིན་ལ། རྒྱ་ནག་དམར་ཕྱོགས་ཚོགས་པ་ཆ་ཚང་ད་དུང་གཙོ་འཛིན་ཞིས་ལ་དབང་པ་ཞིག་ཀྱང་མིན། གཅིག་བྱས་ན་ཁོ་རང་ལས་རྒྱུན་རྗེས་མ་ཡང་བསྐྱར་ཐོབ་པ་དང། ད་དུང་ལོ་ལྔ་ལྷག་སྡོད་ཐུབ་སྲིད་མོད་དེའི་རྗེས་སུ་མུ་མཐུད་སྡོད་མི་ཐུབ།
རྩོམ་པ་པོ་སྦེར་ཌི་ལེ་ཕེ་རེ་ཊི(Bradley Perrett) ལགས་ནི་ཕྱི་ལོ་༢༠༠༤ ནས་༢༠༢༠ བར་པེ་ཅིང་དུ་རྟེན་གཞི་བྱས་པའི་གསར་འགོད་པ་ཞིག་དང་། རྒྱ་ནག་ཉམས་ཞིབ་པ་གྲགས་ཅན་ཞིག་ཡིན་པ་རེད།
མ་རྩོམ་གྱི་འབྲེལ་ཐག https://www.canberratimes.com.au/story/7673174/russias-unintended-warning-to-china-wars-can-go-wrong/