བོད་ནག་ཆུ་ཨ་མདོ་རྫོང་ཁོངས་ནས་ཡིན་པའི་བུད་མེད་འཛུམ་དཀར་ཞེས་པ་ཞིག་གིས་རང་ཁྱིམ་གྱི་མཆོད་ཁང་ནང་དུ་༧གོང་ས་མཆོག་གི་སྐུ་པར་བཤམས་ཡོད་པའི་ཉེས་མིང་འོག་ལྷ་ས་རུ་བཙན་ཁྲིད་བྱས་ཡོད་འདུག
འབྲེལ་ཡོད་བོད་མི་ཞིག་གིས་འདི་ག་བོད་ཀྱི་དུས་བབ་གསར་ཁང་ལ་གནས་ཚུལ་མཁོ་སྤྲོད་གནང་བ་ལྟར་ན། ཉེ་སྔོན་ཨ་མདོ་རྫོང་རྩ་རིང་གྲོང་རྡལ་གྱི་ས་གནས་དཔོན་རིགས་ཁག་ཅིག་གིས་ཁྱིམ་ཚང་འགའི་ནང་རྟོག་ཞིབ་སྔོག་བཤེར་བྱས་པ་བརྒྱུད། ཟླ་འདིའི་ཕྱི་ཚེས་ ༢༣ ཉིན་གྲོང་མི་འཛུམ་དཀར་ཞེས་པ་ཞིག་གིས་རང་ཁྱིམ་དུ་མཆོད་ཁང་ཆེན་པོ་བཟོས་ཏེ་ནང་དུ་༧གོང་ས་མཆོག་གི་སྐུ་པར་བཤམས་ཡོད་ལུགས་ཀྱི་ཉེས་མིང་འོག་རང་ཁྱིམ་ནས་འཛིན་བཟུང་བྱས་ཡོད་པ་དང་། ཁ་སང་ཕྱི་ཚེས་ ༢༨ ཉིན་ཨ་མདོ་རྫོང་ནས་ལྷ་སར་བཙན་འཁྲིད་བྱས་ཡོད་འདུག
རང་ལོ་ ༢༧ ཡིན་པའི་བུད་མེད་འཛུམ་དཀར་ལགས་ནག་ཆུ་ས་ཁུལ་ཨ་མདོ་རྫོང་རྩ་རིང་གྲོང་རྡལ་རང་ནས་ཡིན་ཞིང་། ཆུང་དུས་ནས་ཕ་མ་གཉིས་དང་ལྷན་དུ་འབྲོག་ལས་བྱས་ཏེ་འཚོ་བ་བསྐྱལ་ཡོད་པ་དང་། ཁྱིམ་ཚང་གི་གཞི་འཛིན་ཡང་ཡིན་འདུག ཕྱི་ལོ་ ༢༠༡༦ ལོར་ཁོང་མོས་ནོར་ཚེ་ཞེས་པའི་སྐྱེས་པ་ཞིག་དང་གཉེན་སྒྲིག་བྱས་ཏེ་བྱིས་པ་གཉིས་ཡོད་འདུག
བོད་ནས་ཉེ་སྔོན་ཡོང་མཁན་ཞིག་གིས་འདི་གའི་གསར་འགོད་པར། ཁོང་ཚོའི་ཕ་ཡུལ་རྔ་བ་ཁུལ་ཁྱུང་མཆུ་རྫོང་ཁོངས་སུ་ཕྱི་ལོ་ ༢༠༠༤ ཙམ་ལ་སྲིད་གཞུང་གིས་མི་མང་ལ་ཚོགས་འདུ་ཆེན་པོ་ཞིག་བསྡུས་ཏེ། ཕྱུག་པོ་ཡར་ཐོན་ཅན་དང་དཔེ་མཚོན་བྱས་རྗེས་ཅན་ཟེར་བའི་ཁྱིམ་ཚང་མང་པོ་ཞིག་ལ་༧གོང་ས་མཆོག་དང་༧པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་རྣམ་གཉིས་མའོ་ཙེ་ཏུང་དང་ཀྲུའུ་ཨིན་ལའེ་གཉིས་མཉམ་དུ་ཡོད་པའི་སྐུ་པར་འཕྲེད་རིང་ཚོན་མེད་ཅིག་གཟེངས་རྟགས་ཀྱི་ཚུལ་དུ་སྤྲད་ཡོད་པ་མ་ཟད། མའོ་ཙེ་ཏུང་སོགས་དམར་ཤོག་གི་མགོ་འཁྲིད་ཚོའི་འདྲ་པར་ཆེན་པོ་རེ་གཟེངས་རྟགས་སུ་སྤྲད་མྱོང་ཡོད་ཀྱང་། ཕྱིས་སུ་༧གོང་ས་མཆོག་གི་སྐུ་པར་སྤྲོད་རྒྱུ་མེད་པ་ཆགས་སོང་སྐོར་བརྗོད་བྱུང་།
༧གོང་ས་རྒྱལ་བ་རིན་པོ་མཆོག་གི་སྐུའི་འཁྲུང་སྐར་བསླེབ་ལ་ཉེ་བ་དང་བསྟུན། འདི་ལོའི་ཕྱི་ཟླ་ ༥ ནས་བཟུང་བོད་ཀྱི་རྒྱལ་ས་ལྷ་གཙོ་བྱས་ཏེ་བོད་ཀྱི་ས་ཁུལ་མང་པོར་མི་མང་གི་ལག་ཁྱེར་ཁ་པར་དང་ཁྱིམ་དུ་སྔོག་བཤེར་དང་། བོད་མི་གནས་མཇལ་བ་དང་ཡུལ་སྐོར་བ་སོགས་ལ་༧གོང་ས་མཆོག་གི་སྐུ་པར་ཡོད་མེད་དང་བཙན་བྱོལ་བོད་མིར་འབྲེལ་བ་ཡོད་མེད་སོགས་ཀྱི་གང་བྱུང་འདྲི་རྩད་བྱེད་བཞིན་ཡོད་འདུག
རྒྱ་ནག་གཞུང་གིས་ཆོས་དད་རང་མོས་ཡོད་ཅེས་བཅའ་ཁྲིམས་སུ་བཀོད་ཅིང་། དྲིལ་བསྒྲགས་ཤུགས་ཆེན་བྱེད་བཞིན་ཡོད་ཀྱང་། བོད་ནང་གི་བོད་མི་སྤྱི་ཡོངས་དང་ལྷག་པར་དུ་སྲིད་གཞུང་གི་ལས་བྱེད་པ་དང་སློབ་ཕྲུག་རྣམས་དབྱར་དགུན་གྱི་གུང་སེང་སྐབས་སུའང་དགོན་པར་མཇལ་སྐོར་དང་། གསུང་ཆོས་ཞུ་བ་སོགས་བྱེད་མི་ཆོག་པའི་བཀའ་ཐེངས་མང་བསྒྲགས་ཡོད་པ་མ་ཟད། གཞུང་ཞབས་རྒྱུགས་ཞུགས་ཀྱི་ཆ་རྐྱེན་ནང་དུ་བོད་ཕྱི་ཕྱོགས་སུ་འབྲེལ་བ་གཏན་ནས་མེད་པའི་ཆ་རྐྱེན་བཏོན་ཡོད་པའི་གནས་ཚུལ་ཡང་ཡང་ཐོན་ཡོད་པ་རེད།
སྐུ་ཁམས་བཟང་། གུས་པ་ནག་ཆུའི་ཨ་མདོ་ནས་ཡིན་ཡང་གནས་ཚུལ་དེ་གོ་མ་སོང་། གསལ་ཙམ་སྒེར་ལ་གསུང་ན་འགྲིག་གམ།