རྒྱལ་ཚོགས་ཀྱི་ཆེད་མཁས་པས་བོད་ནང་གི་རྒྱ་བསྒྱུར་སྲིད་ཇུས་ལ་སྐྱོན་བརྗོད་གནང་འདུག

རྒྱལ་ཚོགས་ཀྱི་སློབ་གསོའི་ཆེད་མཁས་གསུམ་ནས་རྒྱ་གཞུང་གིས་བོད་ནང་གི་ཕ་མ་བུ་ཕྲུག་རྣམས་བཙན་གྱིས་ཁ་བྲལ་དུ་བཏང་སྟེ་བཅའ་སྡོད་སློབ་གྲྭ་ཁག་གི་ནང་བཅུག་སྟེ་བོད་ཀྱི་སྐད་ཡིག་རིག་གཞུང་དང་བཅས་པ་རྩ་གཏོང་གཏོང་བའི་སྲིད་ཇུས་ལག་བསྟར་བྱེད་བཞིན་པ་དེར་སྐྱོན་བརྗོད་ནན་པོ་གནང་འདུག

ཟླ་འདིའི་ཕྱི་ཚེས་ ༦ ཉིན་མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་གནད་དོན་ཐོག་དམིགས་བསལ་ཆེད་མཁས་པ་སྐུ་ཞབས་ཧྥར་ནཱན་ཌི་ཊེ་ཝཱ་རེན་ནེས་(Fernand de Varennes) ལགས་དང་། སློབ་གསོའི་ཐོབ་ཐང་ཐོག་དམིགས་བསལ་ཆེད་མཁས་པ་ལྕམ་ཧྥ་རི་ཌ་ཤཱ་ཧེ་ཌི(Farida Shaheed)ལགས། རིག་གཞུང་ཐོབ་ཐང་ཐོག་ཆེད་མཁས་པ་ཨ་ལེ་ཛིན་ཌ་ཛིན་ཐཱ་ཁི་(Alexanda Xanthaki) ལགས་བཅས་ཀྱིས་རྒྱ་ནག་གཞུང་གིས་བོད་ནང་གི་བྱིས་པ་འབུམ་ ༡༠ བཙན་གྱིས་ཕ་མ་དང་ཁ་བྲལ་དུ་བཅུག་སྟེ། རྒྱ་ནག་གཞུང་གི་བཅའ་སྡོད་སློབ་གྲྭར་བཅུག་ནས་བོད་ཀྱི་སྐད་ཡིག་རིག་གཞུང་རྩ་གཏོར་གཏོང་བཞིན་པར་སྐྱོན་བརྗོད་གནང་བའི་ནང་། རྒྱ་གཞུང་གིས་བོད་ཐོག་འཛིན་པའི་སྲིད་ཇུས་འདིས་བོད་ཀྱི་ཆོས་དད་རང་དབང་དང་། སྐད་ཡིག་ཐོབ་ཐང་སོགས་རྩིས་མེད་རྡོག་རོལ་བཏང་ཡོད་པ་མ་ཟད། རྒྱ་ནག་གཅིག་གི་སྲིད་ཇུས་ལངས་ཕྱོགས་ཐོག་ནས་བོད་ཀྱི་སྐད་ཡིག་སྲུང་སྐྱོབ་བྱེད་མཁན་དང་ཤེས་ཡོན་པ་བཅས་ལ་གདུག་རྩུབ་མནར་གཅོད་གཏོང་བཞིན་ཡོད་སྐོར་གསལ་བསྒྲགས་གནང་འདུག

ཡང་ཆེད་མཁས་པ་དེ་གསུམ་གྱིས་རྒྱ་ནག་གཞུང་གི་བཅའ་སྡོད་སློབ་གྲྭའི་ནང་དུ་བོད་སྐད་ཡིག་དང་། ལོ་རྒྱུས། རིག་གཞུང་སོགས་སྦྱོང་སའི་ཁོར་ཡུག་ཅི་ཡང་མེད་པ་མ་ཟད། སློབ་ཚན་ཚང་མ་རྒྱའི་སྐད་ཡིག་གཅིག་པོའི་ཐོག་ནས་སློབ་སྦྱོང་བྱེད་དགོས་པས། བོད་པའི་བྱིས་པ་རྣམས་ལ་རང་ཉིད་ཀྱི་སྐད་ཡིག་སྦྱོང་བའི་གོ་སྐབས་འཕྲོག་ཡོད་པ་དང་།  ཕ་མ་བུ་ཕྲུག་རྣམས་ཁ་བྲལ་བའི་འཚོ་བ་རོལ་བཞིན་ཡོད་པས་བོད་ཀྱི་ངོ་བོ་རྩ་བརླག་ཏུ་གཏོང་ཐབས་བྱེད་བཞིན་ཡོད་ལ། ཉེ་བའི་ལོ་འདི་དག་གི་རིང་རྒྱ་ནག་གི་ས་གནས་ཁག་ཏུ་བཅའ་སྡོད་སློབ་གྲྭ་མང་པོ་ཡོད་པའི་ནང་བོད་པའི་བྱིས་པ་རྣམས་ཀྱིས་བརྒྱ་ཆ་ ༢༠ ལྷག་ཟིན་གྱི་ཡོད་འདུག  ཞེས་འགྲེལ་བརྗོད་གནང་འདུག

དེའི་ཐད་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས། རྒྱལ་ཚོགས་ཀྱི་ཆེད་མཁས་པའི་གསར་འགོད་གསལ་བསྒྲགས་བྱས་པ་བཞིན་བོད་ནང་གི་ཕ་མ་བུ་ཕྲུག་ཁ་བྲལ་བཅུག་སྟེ། རྒྱ་ནག་གི་བཅའ་སྡོད་སློབ་གྲྭ་ཁག་ནང་བོད་པའི་བྱིས་པ་རྣམས་ལ་རྒྱ་སྒྱུར་སློབ་གསོ་སྤྲོད་བཞིན་པའི་གྲངས་འབོར་ཧ་ཅང་མཐོ་བོ་ཡོད་པས། དེ་ནི་བོད་ཀྱི་སྐད་ཡིག་རིག་གཞུང་རྩ་མེད་གཏོང་བའི་འཆར་གཞི་ཞིག་ཡིན་པར་བརྟེན། རྒྱལ་ཚོགས་ཀྱིས་བཅའ་སྡོད་སློབ་གྲྭ་དེ་དག་སྒོ་བརྒྱག་ཏུ་འཇུག་དགོས་པའི་སྙན་ཐོ་འདོན་དགོས་སྐོར་བརྗོད་འདུག

ཕྱི་ལོ་ ༢༠༢༢ ཟླ་ ༡༡ ཚེས་ ༣༠ ཉིན་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོ་དང་གྲོས་ཚོགས་གོང་མའི་འཐུས་མི་སྐུ་ཞབས་ཇེ་ཧྥི་རེ་ཨ་མེར་ཁི་ལེས་(Jeff Merkley)མཆོག་དང་། གྲོས་ཚོགས་འོག་མའི་འཐུས་མི་ཇེམ་མེག་གྷོ་ཝིན་(Jim McGovern)་མཆོག་རྣམ་གཉིས་ཀྱིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་སྐུ་ཞབས་ཝོལ་ཁེར་ཌུར་ཀ་(Volker Turk)མཆོག་གི་མཚན་ཐོག་ཏུ་བོད་ནང་གི་བྱིས་པ་རྣམས་བཙན་གྱིས་ཁྱིམ་དང་ཁ་བྲལ་དུ་བཅུག་སྟེ། རྒྱ་ནག་གཞུང་གི་བཅའ་སྡོད་སློབ་གྲྭར་སྐྱེལ་བཞིན་པའི་གནད་དོན་ཐོག་ཞིབ་འཇུག་ནན་པོ་གནང་དགོས་པའི་སྙན་ཞུ་ཕུལ་འདུག

ཕྱི་ལོ་༢༠༢༡ ལོའི་རྒྱལ་སྤྱིའི་བོད་དོན་ལས་འགུལ་ཁང་གི་སྙན་ཐོའི་ནང་དུ། རྒྱ་ནག་དམར་ཤོག་ཚོགས་པས་རང་ལོ་ ༦ ནས་ ༡༨ བར་གྱི་བོད་པའི་བྱིས་པ་བརྒྱ་ཆ་ ༨༠ ཙམ་རང་གི་ཁྱིམ་ཚང་ཕ་མ་དང་ཕ་ཡུལ། སྐད་ཡིག་སོགས་དང་བཙན་གྱིས་ཁ་བྲལ་དུ་བཅུག་སྟེ། རྒྱ་གཞུང་གིས་མི་སེར་སྤེལ་ལུགས་ཀྱི་སྲིད་ཇུས་སྤེལ་སའི་བཅའ་སྡོད་སློབ་གྲྭར་རྒྱ་བསྒྱུར་གྱི་སློབ་གསོ་སྤྲོད་བཞིན་ཡོད་པ་མ་ཟད། བོད་ཀྱི་སྐད་ཡིག་རིག་གནས་འཆད་སའི་བོད་པའི་སློབ་གྲྭ་ཁག་སྒོ་བརྒྱབ་པ་དང་གཏོར་བཤིག་གཏོང་གི་ཡོད། ཅེས་དང་། རྒྱ་ནག་གཞུང་གི་མགོ་ཁྲིད་ཚོས་བོད་མིའི་ཕ་མ་དང་བྱིས་པ་གཉིས་ཀྱི་རང་དབང་དང་ཐོབ་ཐང་ནག་གསུབ་གཏོང་བཞིན་ཡོད་པ་མ་ཟད། བོད་ཀྱི་ཕ་མ་རྣམས་ཀྱི་རང་ཉིད་ཀྱི་བྱིས་པའི་མ་འོངས་པའི་འཚར་ལོངས་དང་ཤེས་ཡོན་སྤྲོད་ཕྱོགས་ཀྱི་ཐོབ་ཐང་ཡོད་ཚད་བཙན་འཕྲོག་བྱས་ཡོད་པ་དང་། ལོ་ཆུང་བྱིས་པའི་ཐོབ་ཐང་ལའང་རྩིས་མེད་རྡོག་རོལ་གཏོང་པའི་གནད་དོན་དེར། ཕྱི་ལོ ༢༠༢༣ ཟླ་ ༣ པའི་ནང་འཚོག་རྒྱུ་ཡིན་པའི་འགྲོ་བ་མིའི་ཐོབ་ཐང་ལྷན་ཚོགས་སྐབས་སུ་རྒྱ་ནག་ནང་གི་བོད་པའི་ཤེས་ཡོན་ཐོབ་ཐང་དང་། ཆོས་དད་རང་དབང་། གྲངས་ཉུང་མི་རིགས་ཀྱི་གནད་དོན་བཅས་ངེས་པར་དུ་གླེང་སློང་བྱེད་དགོས་པ་མ་ཟད། བོད་ནང་གི་སློབ་གྲྭ་ཁག་དང་། ཕ་མ་བུ་ཕྲུག་གི་ཐོབ་ཐང་གནད་དོན་ཐད་ཞིབ་འཇུག་བྱེད་པའི་ཚོགས་ཆུང་གསར་འཛུགས་ཀྱིས་གང་མགྱོགས་ཞིབ་འཇུག་བྱེད་དགོས་སྐོར་བཀོད་འདུག

ཕྱི་ལོ་ ༢༠༢༢ ཟླ ༡༡ ཚེས་ ༢ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས། འདི་ལོའི་སྟོབས་ཆེན་རྒྱལ་ཁབ་བདུན་གྱིས་མཉམ་འབྲེལ་བསྒྲགས་གཏམ་ནང་རྒྱ་ནག་གི་འགྲོ་བ་མིའི་ཐོབ་ཐང་དང་དམིགས་བསལ་བོད་དང་ཡུ་གུར་གྱི་འགྲོ་བ་མིའི་ཐོབ་ཐང་གི་གནས་སྟངས་གླེང་སློང་གནང་བར་བསྔགས་བརྗོད་དང་སྦྲགས། ད་རེས་སྟོབས་ཆེན་རྒྱལ་ཁབ་བདུན་གྱི་མགོ་ཁྲིད་རྣམས་ནས་ཚོགས་ཆེན་ཐོག ༧སྐུའི་ཡང་སྲིད་ཀྱི་དབུས་པའི་ཆོས་དད་རང་དབང་དང་བོད་མིའི་འགྲོ་བ་མིའི་ཐོབ་ཐང་གི་གནས་སྟངས། བོད་ནང་རང་དབང་གི་ཐོག་ནས་ཞིབ་འཇུག་དང་རྒྱལ་སྤྱིའི་གསར་འགོད་པ་བསྐྱོད་ཆོག་པ་སོགས་རྒྱ་ནག་གཞུང་དང་ལྷན་གླེང་སློང་དགོས་པའི་ཞུ་བསྐུལ་གནང་ཡོད་འདུག

གསར་འགོད་པ། བྱམས་པ་ཚེ་རིང་།