བོད་ཧིན་མཐའ་མཚམས་སུ་འགོག་སྲུང་དམག་དཔུང་བདུན་གསར་འགྲེམ་བྱ་རྒྱུ་ཡིན་འདུག

རྒྱ་གར་གཞུང་གིས་རྒྱ་ནག་གི་གནོན་ཤུགས་འགོག་སྲུང་སླད་བོད་ཧིན་མཐའ་མཚམས་སུ་འགོག་སྲུང་དམག་དཔུང་བདུན་འགྲེམ་འཇོག་བྱ་རྒྱུ་ཡིན་འདུག

རྒྱ་དཀར་ནག་གཉིས་ཀྱི་ཆེས་མཐོའི་དམག་དོན་མི་སྣས་ཐུག་འཕྲད་ལན་མང་བྱས་ཏེ་བོད་ཧིན་མཐའ་མཚམས་ཁུལ་གྱི་རྒྱ་དཀར་ནག་གཉིས་ཀྱི་རྩོད་རྙོག་ཞི་འགྲིག་ཡོང་ཐབས་བྱེད་ཀྱིན་ཡོད་ཀྱང་། འདས་པའི་ལོ་ཤས་རིང་བོད་ཧིན་མཐའ་མཚམས་ཁུལ་དུ་རྒྱ་དཀར་ནག་གཉིས་བར་རྩོད་རྙོག་ཡང་ཡང་འབྱུང་མུས་ཡིན་པ་ལྟར། ཁ་སང་ཕྱི་ཚེས་ ༡༥ ཉིན་རྒྱ་གར་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་གཞུང་གིས་བོད་ཧིན་མཐའ་མཚམས་ཁུལ་དུ་རྒྱ་ནག་དམག་དཔུང་གི་གནོན་ཤུགས་འགོག་རྒོལ་ཆེད། བོད་ཧིན་མཐའ་མཚམས་ཁག་ཏུ་རྒྱ་གར་གྱི་འགོག་སྲུང་དམག་དཔུང་བདུན་འགྲེམ་འཇོག་བྱ་འཆར་ཡོད་འདུག

དེའི་ཐད་རྒྱ་གར་གཞུང་གི་ཆེ་མཐོའི་དམག་དོན་མི་སྣས། རྒྱ་གར་གྱི་མཐའ་མཚམས་དམག་དཔུང་གསར་འཛུགས་བྱ་རྒྱུའི་ལས་གཞི་འདི་ནི། བོད་ཧིན་མཐའ་མཚམས་དམག་དཔུང་གི་ལས་གཞི་གསར་པ་ཞིག་ཡིན་པ་དང་། ལས་གཞི་དེའི་ཆེད་དམག་མི་གྲངས་ ༩༤༠༠ ལྷག་ཁ་སྣོན་བྱས་ཡོད་ཅིང་། དམག་དཔུང་དེ་དག་གིས་རྒྱ་གར་དང་ཤིན་ཅང་གི་མཐའ་མཚམས་ཁུལ་གྱི་ཀ་ར་ཀོ་རམ་ལ་ནས་ (Karakoram Pass) སྤྱི་ལེ་ ༣༤༨༨ ཡོད་པའི་རྒྱ་གར་ཨ་རུ་ན་ཅལ་མངའ་སྡེའི་རྫི་ལི་ལ (Jelep La) བར་གྱི་བོད་ཧིན་མཐའ་མཚམས་ཁུལ་དུ་སོ་ལྟ་དང་སྐོར་གཡེང་། འགེབ་སྲུང་སོགས་བྱ་རྒྱུ་ཡིན་སྐོར་སོགས་བརྗོད་འདུག

དེ་བཞིན་རྒྱ་གར་གཞུང་གིས་བོད་ཧིན་མཐའ་མཚམས་ཁུལ་དུ་རྒྱ་ནག་གི་གནོན་ཤུགས་དང་འཇབ་རྒོལ་སོགས་མི་ཡོང་སླད། མཐའ་མཚམས་བརྟན་སྲུང་བྱེད་ཀྱི་ཡོད་ཀྱང་། ཕྱི་ལོ་ ༢༠༢༠ ལོ་དང་འདས་ལོའི་ཕྱི་ཟླ་ ༡༢ ནང་རྒྱ་དཀར་ནག་གཉིས་ཀྱི་དམག་མིའི་གདོང་ཐུག་བྱུང་བའི་གནད་དོན་དང་། ད་ལྟའི་རྒྱ་གར་མཐའ་མཚམས་ཁུལ་གྱི་གནས་བབ་ལ་གཞིགས་ནས། རྒྱ་གར་གཞུང་གིས་ཧིན་སྒོར་བྱེ་བ་ ༡༨༠༠ ལྷག་གི་འགྲོ་སོང་བཏང་ནས་བོད་ཧིན་གཉིས་ཀྱི་མཐའ་མཚམས་ས་ཐིག་ (LAC) ཁུལ་དུ་དམག་སྒར་སོགས་བཟོ་རྒྱུ་ཡིན་པ་མ་ཟད། ཕྱི་ལོ་ ༢༠༢༥ ནང་ཚུད་རྒྱ་གར་གཞུང་གིས་ཧིན་སྒོར་བྱེ་བ་ ༡༦༨༡ ལྷག་གི་མ་དངུལ་བཏང་ནས་དར་ཆ་ནས་སྙེ་མོ་མཐུད་པའི་སྤྱི་ལེ ༤།༡ ཅན་གྱི་ཕུག་ལམ་གསར་རྒྱག་བྱས་ཏེ། རྒྱ་གར་བྱང་ཁུལ་ནས་མཐའ་མཚམས་ཁུལ་དུ་དམག་མི་འགྲེམ་འཇོག་དང་མཚོན་ཆ་དབོར་འདྲེན་སྟབས་ཇེ་བདེར་ཡོང་ཐབས་བྱེད་ཀྱིན་ཡོད་འདུག

གཞན་ཡང་འདས་ལོའི་ཕྱི་ཟླ་ ༧ ཚེས་ ༢༡ ཉིན་རྒྱ་ནག་གཞུང་གིས་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་བོད་ཧིན་ས་མཚམས་སུ་ཁེལ་བའི་བོད་ལྷུན་རྩེ་རྫོང་ནས་ཤིན་ཅང་གི་མཱ་ཛ་ (Mazha) བར་སྤྱི་ལེ་ ༤༦༡།༠༠༠ ཡོད་པའི་མཐའ་མཚམས་ཀྱི་མྱུར་སྐྱོད་གཞུང་ལམ་ G695 ཟེར་བ་ཞིག་གསར་རྒྱག་གི་ལས་གཞི་སྤེལ་མགོ་བཙུགས་ཡོད་ལ། རྒྱ་ནག་གཞུང་གིས་སྤང་ཀོང་མཚོའི་ཁུལ་དུའང་གཞུང་ལམ་སོགས་གསར་རྒྱག་བྱས་ཡོད།  རྒྱ་དཀར་ནག་གཉིས་བར་གྷལ་ཝན་ལུང་གཤོངས་ (Galwan valley) དང་།  བདེ་མཆོག་ (Demchok) ཁུལ། འདེབས་བཟང་ (Depsang ) ཁུལ་དུའང་རྩོད་རྙོག་ཡང་ཡང་འབྱུང་གིན་ཡོད་པས། རྒྱ་གར་གཞུང་གིས་ཕྱོགས་ཡོངས་ནས་མཐའ་མཚམས་ཁུལ་གྱི་འཛུགས་སྐྲུན་གྱི་ལས་གཞི་གོང་མཐོར་བཏང་དང་གཏོང་མུས་ཡིན་པ་མ་ཟད། རྒྱ་གར་གཞུང་གིས་རྒྱ་ནག་གི་དམག་ཤུགས་ལ་གདོང་རྒོལ་ཆེད། བོད་ཧིན་མཐའ་མཚམས་ཀྱི་ཆུ་ཤུལ་ (Chushul) ནས་བདེ་མཆོག་ (Demchok) བར་སྤྱི་ལེ་ ༡༣༥ ཅན་གྱི་གཞུང་ལམ་གསར་རྒྱག་གི་ལས་གཞི་ལག་བསྟར་བྱེད་མགོ་བཙུགས་ཡོད་ཅིང་། རྒྱ་གར་གཞུང་གི་མཐའ་མཚམས་ཀྱི་དམག་མི་དང་གོ་མཚོན་དབོར་འདྲེན་བྱ་སའི་གཞུང་ལམ་དེ་མི་ལོ་གཉིས་ཀྱི་ནང་ཚུད་དུ་འཛུགས་སྐྲུན་ཚར་བ་བྱ་རྒྱུ་ཡིན་འདུག

གསར་འགོད་པ། དཔལ་ལྡན།