ཁ་སང་མོན་རྟ་དབང་གི་སེར་སྐྱ་མི་མང་དང་ལྡི་ལི་ས་གནས་བོད་ཀྱི་གཞོན་ནུ་ལྷན་ཚོགས་གཉིས་ནས་ས་གནས་སོ་སོར་༧གོང་ས་མཆོག་ལ་མཚན་སྨོད་ཞུ་མཁན་ཚོར་ངོ་རྒོལ་ཡོད་པའི་ཞི་བའི་གོམ་བགྲོད་ཀྱི་ལས་འགུལ་སྤེལ་འདུག
ཉེ་སྔོན་གསར་འགྱུར་བརྒྱུད་ལམ་ཁག་དང་སྤྱི་ཚོགས་དྲ་ལམ་ཁག་ཏུ་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་སྨོད་ཞུས་པའི་གནད་དོན་དང་འབྲེལ། ཁ་སང་ཕྱི་ཚེས་ ༡༣ ཉིན་རྒྱ་གར་ཨ་རུ་ན་ཅལ་མངའ་སྡེའི་རྟ་དབང་གི་སློབ་ཕྲུག་ཚོགས་པའི་གོ་སྒྲིག་འོག ཧི་མ་ལ་ཡའི་རི་བརྒྱུད་རྟ་དབང་མི་མང་ ༡༠༠༠ ལྷག་མོན་རྟ་དབང་ཁུལ་གྱི་རྟ་དབང་དགོན་པ་ནས་ (Buddha Park) ཞེས་པའི་ཁྲོམ་རའི་བར་དུ་ཞི་བའི་གོམ་བགྲོད་གནང་ཡོད་འདུག
འདི་གའི་གསར་འགོད་པས་རྟ་དབང་དགོན་པའི་སློབ་དཔོན་ཐུབ་བསྟན་ཚེ་རིང་ལགས་སུ་ཞི་བའི་གོམ་བགྲོད་ཀྱི་སྐོར་ནས་བཀའ་འདྲི་ཞུས་པར་ཁོང་གིས། ད་ལན་གྱི་ཞི་བའི་གོམ་བགྲོད་ཀྱི་འབོད་ཚིག་གཙོ་བོ་ནི། བསམ་རྒྱ་ཐོས་རྒྱ་ཆུང་བ་དང་ཤེས་ཡོན་མེད་པའི་རྐྱེན་གྱིས་ (Shraddha Arya) ཞེས་པའི་གློག་བརྙན་འཁྲབ་སྟོན་མ་ཞིག་གིས་༧གོང་ས་མཆོག་ལ་མཚན་སྨོད་བྱས་ཏེ་སྤྱི་ཚོགས་དྲ་ལམ་ཁག་ཏུ་ཁྱབ་སྤེལ་བྱས་པ་དེ་ཐབས་སྐྱོ་བོ་ཡིན་པ་དང་། དམིགས་བསལ་གྱིས་ང་ཚོ་རྒྱ་གར་ནང་ཡོད་པའི་ (NDTV) དང་གཞན་གསར་ཁང་ཁག་གིས་དེ་འབྲེལ་གནས་ཚུལ་ཁྱབ་སྤེལ་བྱས་པ་དེ་ཡག་པོ་མེད་པ་དང་། དེ་ཚོ་ཚང་མ་ཁོ་ཚོའི་ནོར་འཁྲུལ་ཡིན། གཉིས་པ། ༧གོང་ས་རྒྱལ་བ་རིན་པོ་ཆེ་མཆོག་ནི་ང་ཚོའི་རྩ་བའི་བླ་མ་རེད། ༧གོང་ས་མཆོག་ལ་མཚན་སྨོད་ཞུས་པར་སྐྱོན་བརྗོད་བྱེད་ཀྱི་ཡོད། ཁ་སང་གི་ཞི་བའི་གོམ་བགྲོད་ཀྱི་ལས་འགུལ་དེ་ཐེངས་དང་པོ་མགོ་བཙུགས་པ་རེད། འོན་ཀྱང་མ་འོངས་པར་ཡང་བསྐྱར་མུ་མཐུད་དེ་ཞི་བའི་གོམ་བགྲོད་སོགས་ལས་འགུལ་གང་འདྲ་ཞིག་སྤེལ་དགོས་བྱུང་ཡང་ལས་འགུལ་སྤེལ་རྒྱུ་ཡིན། ཞེས་བརྗོད་བྱུང་།
ཡང་ཁ་སང་རྒྱ་གར་གྱི་རྒྱལ་ས་ལྡི་ལི་རུ་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་བུ་ཕྲུག་ཞིག་ལ་དམིགས་བསལ་བཀའ་སློབ་ལམ་སྟོན་དང་མཇལ་འཕྲད་མཛད་པའི་བརྙན་ཐུང་དེ་བཅད་གཏུབ་དང་བཟོ་སྒྲིག་གིས་བེད་སྤྱོད་ལོག་པར་བཏང་སྟེ། སྤྱི་ཚོགས་དྲ་ལམ་ཁག་གང་སར་བརྒྱུད་སྤེལ་བྱས་དང་བྱེད་བཞིན་པར་མཐའ་གཅིག་ཏུ་ངོ་རྒོལ་དང་དགག་པ་བྱེད་ཀྱི་ཡོད་ཅེས་ཞི་བའི་ངོ་རྒོལ་ཁྲོམ་སྐོར་བྱས་ཡོད་པ་རེད།
ཉེ་སྔོན་༧གོང་ས་མཆོག་ལ་མཚན་སྨོན་ཞུས་པའི་གནད་དོན་དང་འབྲེལ་བོད་མི་ཙམ་དུ་མ་ཟད། བོད་དོན་རྒྱབ་སྐྱོར་བ་དང་འཛམ་གླིང་ཡུལ་གྲུ་གང་སར་བཞུགས་པའི་ནང་པ་དང་དམིགས་བསལ་ནང་ཆོས་ལ་དད་ཅིང་བྱེ་བྲག་ཏུ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་དགོངས་མཁྱེན་རྟོགས་ཡོད་མཁན་གྱི་མི་སྒེར་དང་ཚོགས་སྡེ་ཁག་མང་པོ་ཞིག་གིས། མཚན་སྨོད་ཞུ་མཁན་རྣམས་ལ་སྐྱོན་བརྗོད་དང་ངོ་རྒོལ་ཤུགས་བྱས་པར་བརྟེན། ཟླ་འདིའི་ཕྱི་ཚེས་ ༡༢ ཉིན་མཚན་སྨོད་ཞུ་མཁན་ཐོག་མའི་གྲས་རྒྱ་གར་གྱི་གློག་བརྙན་འཁྲབ་སྟོན་མ་ཨར་ཡ་ (Shraddha Arya) ཡིས་རང་ཉིད་ཀྱི་ནོར་འཁྲུལ་ངོས་བྱས་ཏེ་དགོངས་སེལ་ཞུས་ཡོད།
གསར་འགོད་པ། བསྟན་འཛིན་ཕུར་བུ།
