ཁེ་ན་ཌས་རྒྱ་ནག་གི་གཞུང་ཚབ་མི་སྣ་ཕྱིར་ཕུད་གཏོང་འཆར་ཡོད་ཟེར།

རྒྱ་ནག་གཞུང་གིས་ཁེ་ན་ཌའི་གྲོས་ཚོགས་འཐུས་མིའི་ནང་མི་རྣམས་ལ་གནོན་ཤུགས་སྤྲད་པ་བརྒྱུད། ཁེ་ན་ཌའི་གནད་ཡོད་མི་སྣའི་ཁྲོད་རྒྱ་ནག་ཐོག་ལྟ་སྟངས་ངན་པ་འཛིན་མཁན་མེད་པར་བཟོ་ཐབས་བྱེད་བཞིན་པའི་ཐད། ཁེ་ན་ཌས་སྐྱོན་བརྗོད་དང་སྦྲགས་རྒྱ་ནག་གཞུང་ཚབ་མི་སྣ་ཕྱིར་ཕུད་གཏང་རྒྱུ་ཡིན་སྐོར་བརྗོད་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། རྒྱ་ནག་དམར་ཤོག་ཚོགས་པར་མི་དགའ་བའི་རྣམ་འགྱུར་སྟོན་མཁན་བཀག་འགོག་བྱེད་ཐབས་སུ། རྒྱ་ནག་གཞུང་གིས་ཁེ་ན་ཌའི་གྲོས་ཚོགས་འཐུས་མི་དང་འབྲེལ་ཡོད་ནང་མི་རྣམས་ཀྱི་རྒྱབ་ལྗོངས་གནས་ཚུལ་མཁོ་སྒྲུབ་བྱས་ཏེ། ཁོ་ཚོར་གནོན་ཤུགས་དང་འཇིགས་སྐུལ་བྱེད་བཞིན་ཡོད་པར་བརྟེན། ཁེ་ན་ཌའི་གཞུང་གིས་རྒྱལ་ཁབ་དེའི་ནང་རྒྱ་ནག་གི་གཞུང་ཚབ་པ་སོགས་གཞུང་འབྲེལ་མི་སྣ་ཁག་ཕྱིར་ཕུད་གཏོང་འཆར་ཡོད་སྐོར་བསྒྲགས་འདུག

ཁ་སང་ཕྱི་ཚེས་ ༤ ཉིན་ཁེ་ན་ཌའི་ཕྱི་སྲིད་བློན་ཆེན་ལྕམ་སྐུ་ཇོ་ལི་ (Melanie Joly) ལགས་ཀྱིས། རྒྱ་ནག་གིས་ཁེ་ན་ཌའི་ནང་སྲིད་ལ་ཐེ་ཇུས་བྱེད་བཞིན་པར་རྩ་བ་ཉིད་ནས་ངོས་ལེན་མེད་པ་དང་སྣང་མེད་དུ་འཇོག་གི་མིན། ད་ལྟ་ཁེ་ན་ཌས་རྒྱ་ནག་གི་གཞུང་ཚབ་པ་ཕྱིར་ཕུད་གཏང་རྒྱུ་གཙོས་རྒྱ་ནག་གི་བྱ་བ་བསྒྲུབ་སྟངས་དེ་དག་གི་ཐད་ཐག་གཅོད་ག་འདྲ་ལེན་དགོས་པའི་བསམ་བློ་གཏོང་གི་ཡོད། ཅེས་བརྗོད་ཡོད་འདུག

དེ་འབྲེལ་ཐད་ཁེ་ན་ཌར་ཡོད་པའི་རྒྱ་ནག་གི་གཞུང་ཚབ་ཁང་གིས། རྒྱ་ནག་གཞུང་ཚབ་པས་ (Cong Peiwu) ཁེ་ན་ཌའི་གཞུང་འབྲེལ་མི་སྣ་ཁག་ཐུག་འཕྲད་སྐབས། རྒྱ་ནག་གི་གཞུང་འབྲེལ་མི་སྣ་ཕྱིར་ཕུད་གཏང་རྒྱུའི་འཇིགས་སྐུལ་བྱས་པར་ངོ་རྒོལ་ཤུགས་ཆེན་བྱས་ཡོད། དེ་ནི་མི་སྒེར་གྱིས་བཟོས་པའི་ཆབ་སྲིད་ཀྱི་བསྙོན་འཛུགས་ཤིག་ཆགས་ཀྱི་ཡོད་པ་མ་ཟད། རྒྱ་ནག་གཞུང་གིས་དུས་རྟག་ཏུ་རྒྱལ་ཁབ་གཞན་གྱི་ནང་སྲིད་ལ་ཐེ་གཏོགས་མི་བྱ་རྒྱུའི་དམ་བཅའ་ལག་བསྟར་བྱེད་ཀྱི་ཡོད། ཅེས་ལན་འདེབས་བྱས་འདུག

ཁེ་ན་ཌའི་གསང་བའི་ལས་ཁུངས་ཀྱིས་ཁེ་ན་ཌའི་གྲོས་ཚོགས་འཐུས་མི་མེ་ཁལ་ (Michael Chong) དང་ཧོང་ཀོང་དུ་ཡོད་པའི་ཁོང་གི་ནང་མིའི་རྒྱབ་ལྗོངས་གནས་ཚུལ་སོགས་མཁོ་སྒྲུབ་བྱས་ཏེ། གྲོས་ཚོགས་འཐུས་མི་ཁོང་ནས་མགོ་བརྩམས་ཏེ་འབྱུང་འགྱུར་ཁེ་ན་ཌའི་ནང་རྒྱ་ནག་ཐོག་དགག་པ་རྒྱག་མཁན་གྱི་གནད་ཡོད་མི་སྣའི་རིགས་བཀག་འགོག་བྱེད་ཐབས་བྱས་ཡོད་སྐོར་བརྗོད་འདུག་པ་མ་ཟད། ཁེ་ན་ཌའི་སྲིད་བློན་སྐུ་ཞབས་ཇ་སི་ཊིན་ཊུ་རུ་ཌོ་ (Justin Trudeau) ལགས་དང་ཁོའི་གཞུང་གིས་རྒྱ་ནག་གི་གཞུང་ཚབ་པ་ཕྱིར་ཕུད་མི་གཏོང་བར་སྐྱོན་བརྗོད་བྱས་ཡོད་འདུག

དེ་འབྲེལ་གྲོས་ཚོགས་འཐུས་མི་མེ་ཁལ་ (Michael Chong) ལགས་ཀྱིས། ཁེ་ན་ཌའི་མི་མང་པོའི་ནང་མི་ཕྱིའི་རྒྱལ་ཁབ་ཁག་ཏུ་ཡོད་པ་ལྟར། ང་རང་གི་ནང་མིའང་ཕྱིའི་རྒྱལ་ཁབ་ཏུ་ཡོད། རྒྱ་ནག་གཞུང་གིས་ཕྱིའི་རྒྱལ་ཁབ་ཏུ་ཡོད་པའི་ནང་མི་རྣམས་ལ་འཇིགས་སྐུལ་བྱས་ཏེ། རང་ཁྱིམ་དུ་ཡོད་པའི་ཁེ་ན་ཌའི་མི་མང་གཅུན་ཐབས་བྱེད་བཞིན་པ་ནི་གནད་དོན་ཚབས་ཆེན་ཞིག་ཡིན་པ་མ་ཟད། རྒྱལ་སྲིད་བདེ་འཇགས་ལ་འཇིགས་སྐུལ་བྱས་པ་ཞིག་ཆགས་ཀྱི་ཡོད་པ་རེད། ཅེས་བརྗོད་ཡོད་པ་དང་། གྲོས་ཚོགས་འཐུས་མི་མེ་ཁལ་དང་ (Michael Chong) ལགས་ཀྱིས། ཕྱི་ལོ་ ༢༠༢༡ ལོར་ཁེ་ན་ཌའི་གྲོས་ཚོགས་ནང་རྒྱ་ནག་གཞུང་གིས་ཡུ་གུར་མི་རིགས་རྩ་གཏོར་གྱི་བྱ་སྤྱོད་སྤེལ་བཞིན་པར་ངོས་འཛིན་དགོས་པའི་གྲོས་ཆོད་ཅིག་བཏོན་ཡོད་འདུག

འོན་ཀྱང་། བྷི་བྷི་སིའི་གནས་ཚུལ་ནང་། ཁེ་ན་ཌའི་སྲིད་བློན་ཇ་སི་ཊིན་ཊུ་རུ་ཌོ་ (Justin Trudeau) ལགས་ཀྱིས། གོ་ལ་དང་འཕྲིན་ཡིག་ (Globe and Mail) གསར་ཁང་གིས་གནད་དོན་དེའི་ཐོག་གནས་ཚུལ་བཏོན་པ་བརྒྱུད་མ་གཏོགས་གནས་ཚུལ་གང་ཡང་ཤེས་རྟོགས་བྱུང་མེད་པ་དང་། གསང་བའི་ལས་ཁུངས་ཀྱིས་གནད་དོན་དེའི་ཐོག་སེམས་འཚབ་བྱས་ཏེ་གླེང་སློང་ཤུགས་ཆེན་བྱེད་རིན་མེད་པའི་ཁར། གནད་དོན་དེ་ནི་ཚབས་ཆེན་ཞིག་མིན་སྐོར་འགྲེལ་བརྗོད་བྱས་ཡོད་འདུག

སྤྱིར་རྒྱལ་ཁབ་ཅིག་གིས་རང་གི་མང་ཚོགས་ཁྲོད་རྒྱལ་ཁབ་གཞན་ཞིག་ལ་མི་དགའ་རྣམ་འགྱུར་ཤུགས་ཆེན་བསྐྲུན་ཐབས་སུ་རྒྱལ་ཁབ་གཞན་དེའི་གཞུང་ཚབ་མི་སྣ་ཕྱིར་ཕུད་གཏང་རྒྱུ་ནི་ལག་ཆ་ཡག་ཤོས་ཤིག་ཡིན་པ་དབྱེ་ཞིབ་པས་བརྗོད་འདུག་ལ། ཐེངས་འདིའི་རྒྱ་ནག་གཞུང་ཚབ་པ་ཕྱིར་ཕུད་གཏོང་བའི་སྐྱོན་འཛུགས་དེ་ཡང་། ཁེ་ན་ཌའི་གསང་བའི་ལས་ཁུངས་གཞན་གྱི་གནས་ཚུལ་ཁག་ཅིག་གིས། རྒྱ་ནག་གིས་ཁེ་ན་ཌའི་འོས་བསྡུའི་ནང་ཐེ་གཏོགས་བྱེད་ཀྱིན་ཡོད་པའི་སྐྱོན་འཛུགས་བྱས་པ་ལ་བརྟེན་ནས་བྱུང་བ་ཞིག་ཡིན་པ་བྷི་བྷི་སིས་བརྗོད་འདུག

གསར་འགོད་པ། བསྟན་འཛིན་ཕུར་བུ།