ཨུ་རུ་སུས་ཡུ་ཀེ་རེན་ལ་བཙན་འཛུལ་དམག་འཁྲུག་བསླངས་བར་བརྟེན་ཨ་རི་སོགས་འཛམ་གླིང་རྒྱལ་ཁབ་མང་པོས་ཨུ་རུ་སུར་དཔལ་འབྱོར་དང་ཕྱི་འབྲེལ་མི་སྣ་འགྲོ་འོང་སོགས་ཀྱི་ཐོག་ནས་བཀག་སྡོམ་ཉེས་ཆད་གཅོད་བཞིན་པ་ལྟར་ཨུ་རུ་སུས་ཨ་རིའི་གནད་ཡོད་མི་སྣ་ ༥༠༠ ཙམ་ཡུལ་དེའི་ནང་ཡོང་མི་ཆོག་པའི་ཐག་གཅོད་བྱས་འདུག
ཁ་སང་ཕྱི་ཚེས་ ༡༩ ཉིན་ཨུ་རུ་སུ་གཞུང་གིས་གསལ་བསྒྲགས་ཤིག་སྤེལ་ཏེ། ཨ་རིའི་སྲིད་འཛིན་རྗོ་བྷའེ་ཌིན་མཆོག་གི་སྲིད་གཞུང་གིས་ཨུ་རུ་སུ་ལ་མུ་མཐུད་ནས་དམ་དྲག་དང་ཉེས་ཆད་གཏོང་བཞིན་འཁོན་ལན་དུ། ཨ་རིའི་སྲིད་འཛིན་ཟུར་པ་ཨོ་བྷ་མ་དང་། ཨ་རིའི་གཞུང་ཚབ་པ་། ཨ་རིའི་གྲོས་ཚོགས་གོང་མའི་འཐུས་མི་ཁག་ཅིག དེ་བཞིན་སི་ཨན་ཨན་གྱི་གསར་འགོད་པ་ནིག་པེ་ཊོན་ ་(Nick Pato Walsh) དང་། གཙོ་སྐྱོང་བ་ཨེ་རིན་ (Erin Burneet) དང་ཁོལ་བྷར་ཌི་ (Stephen Colbert) སོགས་ཚུད་པའི་ཨ་རིའི་མི་སེར་ ༥༠༠ ཙམ་ཨུ་རུ་སུའི་ནང་ཡོང་མི་ཆོག་པའི་ཐག་གཅོད་བྱས་འདུག
དེ་འབྲེལ་ཨུ་རུ་སུའི་ཕྱི་སྲིད་ལྷན་ཁང་གིས་བསྒྲགས་གཏམ་སྤེལ་བའི་ནང་། འདི་ལོའི་ཕྱི་ཟླ་ ༤ པའི་ནང་ཨུ་རུ་སུའི་གསར་འགོད་པ་དང་ཨུ་རུ་སུའི་ཕྱི་སྲིད་བློན་ཆེན་ (Sergei Lavrov) སོགས་ཨ་རིའི་ནང་འགྲོ་བའི་ཐོངས་མཆན་སྤྲད་མེད་པར་བརྟེན། ཨ་རིའི་རྒྱལ་ཁབ་ཀྱི་གནད་ཡོད་མི་སྣ་སོགས་ཨུ་རུ་སུའི་ནང་ཡོང་མི་ཆོག་པའི་བཀའ་རྒྱ་བཏང་བ་ཞིག་ཡིན་སྐོར་བཀོད་འདུག
ཨུ་རུ་སུའི་དམག་དཔུང་གིས་ཡུ་ཀེ་རེན་ནང་དྲག་པོའི་བཙན་འཛུལ་བྱས་པར་བརྟེན། ཨ་རི་གཙོས་པའི་ནུབ་གླིང་དམངས་གཙོའི་རྒྱལ་ཁབ་མང་པོས་ཨུ་རུ་སུར་དཔལ་འབྱོར་ཉེས་ཆད་ལྕི་མོ་བཅད་དེ་དམག་མཚམས་འཇོག་པར་གནོན་ཤུགས་སྤྲོད་བཞིན་ཡོད་པ་དང་། ད་བར་ཨ་རིའི་གཞུང་གིས་ཨུ་རུ་སུའི་ཡུལ་མི་ ༢༠༠༠ ཙམ་ལ་དམ་དྲག་བྱེད་བཞིན་པའི་ཐོག གནམ་གྲུ་དང་དམག་གི་མཐུན་རྐྱེན་སོགས་མཚམས་བཞག་སྟེ་ཨུ་རུ་སུ་དང་ཚོང་འབྲེལ་མེད་པ་བཟོས་ཡོད་འདུག་ལ། ཨུ་རུ་སུའི་ཕྱོགས་ནས་རླངས་རྫས་སོགས་ཕྱིར་འཚོང་ཐད་དམ་དྲག་བྱས་པར་བརྟེན་འཛམ་གླིང་རྒྱལ་ཁབ་མང་པོར་ཤུགས་རྐྱེན་ཐེབས་ཀྱི་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
