སྤྲུལ་སྐུ་ཆོས་དབྱིངས་ཡེ་ཤེས་རིན་པོ་ཆེ་དང་འབྲས་ལྗོངས་ནས་ཡིན་པའི་མཁན་པོ་ཀཿཐོག་རིག་འཛིན་རྡོ་རྗེ་རིན་པོ་ཆེ་རྣམ་གཉིས་ལ་ཧྥི་ལི་པིན་སིའི་རྒྱལ་རྒྱུད་ཀྱི་སྤྱི་ཚོགས་ཞབས་ཕྱིའི་ཆེས་མཐོའི་གཟེངས་རྟགས་ཕུལ་ཡོད་འདུག
ཟླ་འདིའི་ཕྱི་ཚེས་ ༡༠ ཉིན་གྱི་དགོང་མོར་ཨ་མེ་རི་ཁའི་ཁེ་ལི་ཧྥོ་ནི་ཡ་མངའ་སྡེའི་ལྷོ་ཕྱོགས་སུ་ཡོད་པའི་ལི་དབང་རྫོང་(Orange County) གྱི་གསེར་གྱི་རྒྱ་མཚོའི་ཚོགས་ཁང་(Golden Sea Hall )དུ། གླིང་ཕྲན་རྒྱལ་ཁབ་ཧྥི་ལི་པིན་གྱི་རྒྱལ་རྒྱུད་ཀྱི་ཆེས་མཐོའི་གཟེངས་རྟགས་(Royal Maharlika Knighthood & Awards)ཞེས་པ་འབུལ་བའི་མཛད་སྒོ་བསྡུས་ཡོད་པ་དང་། མཛད་སྒོའི་ཐོག་རྒྱལ་མོ་མ་རེ་ཡ་(Maria Amor Torres)དང་ཨ་ཧྥེ་རི་ཀའི་བྷེ་ནན་རྒྱལ་ཕྲན་མཉམ་འབྲེལ་རྒྱལ་ཁབ་ཀྱི་རྒྱལ་རྒྱུད་སྲས་མོ་སིམ་ཕུ་སོན་གཉིས་ཀྱིས་འཛམ་གླིང་ཞི་བདེ་དང་ཁོར་ཡུག་སྲུང་སྐྱོབ། ལས་རིགས་གསར་གཏོད་སོགས་ཀྱི་ཐོག་གྲུབ་འབྲས་འབུར་དུ་ཐོན་མཁན་རྣམས་ལ་འབུལ་སྲོལ་ཡོད་པ་ལྟར། བོད་དང་ཨ་རི། རྒྱ་གར། ཧྥི་ལི་པིན། སྦིར་ཛིལ། སེང་གྷ་ལ། བྷིན་(Benin)། སོ་ལོ་མོན། གྷ་ནཱ། ཨེ་ཊ་ལི། ཁན་གྷོ། ནེ་ཇི་རི་ཡ། ཨི་ཁོ་ཨ་ཌོར་སྤྱི་མཐུན་རྒྱལ་ཁབ་(Republic of Ecuador)། བྱང་མཱ་སི་ཌོ་ནི་ཡ་(North Macedonia)སོགས་ནས་ཡིན་པའི་མི་སྣ་ ༧༠ ལ་རྒྱལ་རྒྱུད་ཀྱི་ཆེས་མཐོའི་གཟེངས་རྟགས་དེ་ཕུལ་ཡོད་པ་དང་། གཟེངས་རྟགས་བཞེས་མཁན་ནང་ཨ་རིའི་སི་ཡ་ཊོལ་མངའ་སྡེའི་ནང་ཡོད་པའི་ཧེ་རུ་ཀ་ལྟེ་གནས་(Heruka Institute)ཀྱི་དབུ་འཛིན་སྤྲུལ་སྐུ་ཆོས་དབྱིངས་ཡེ་ཤེས་རིན་པོ་ཆེ་དང་། འབྲས་ལྗོངས་ཀྱི་གསང་ཆེན་རྙིང་མའི་མཐོ་སློབ་ཐེག་དགུའི་ལེགས་བཤད་གླིང་གི་མཁན་པོ་ཀཿཐོག་རིག་འཛིན་རྡོ་རྗེ་རིན་པོ་ཆེ་རྣམ་པ་གཉིས་ལའང་གཟེངས་རྟགས་དེ་ཕུལ་འདུག
གླིང་ཕྲན་རྒྱལ་རྒྱུད་མཱ་ཧར་ལི་ཀ་(Royal Maharlika)ཡི་གཞུང་འབྲེལ་དྲ་ལམ་དུ་བོད་ཀྱི་རྒྱལ་དར་མཉམ་སྦྱར་གནང་བའི་སྤྲུལ་སྐུ་ཆོས་དབྱིངས་མཆོག་ལ་གཟེངས་རྟགས་དེ་ཕུལ་དགོས་དོན་སྐོར་གྱི་འགྲེལ་བཤད་ནང་། ལོ་མང་རིང་ཁོང་གིས་བྱིས་པ་དང་དབང་པོ་སྐྱོན་ཅན། སེམས་ཁམས་ཀྱི་དཀའ་ངལ་ཡོད་པའི་མི་དང་དུད་འགྲོ་སོགས་ལ་བྱམས་དང་བརྩེ་བ་ཆེན་པོས་རོགས་མགོན་གནང་བཞིན་ཡོད་པར་བརྟེན། གླིང་ཕྲན་རྒྱལ་རྒྱུད་ཀྱི་ཆེས་མཐོའི་གཟེངས་རྟགས་དེ་ཕུལ་བ་ཡིན་སྐོར་བྲིས་འདུག
གཟེངས་རྟགས་འབུལ་བའི་མཛད་སྒོའི་ཐོག་ཏུ་ཧྥི་ལི་པིན་སིའི་གླིང་ཕྲན་རྒྱལ་མོ་མ་རེ་ཡ་ལགས་ཀྱིས། དེ་རིང་འདིར་ང་ལ་བཀུར་བར་འོས་པའི་སྐུ་མགྲོན་རྩ་ཆེན་ཞིག་ངོ་སྤྲོད་ཞུ་རྒྱུ་དང་སྦྲགས། ཁོང་ལ་རྒྱལ་རྒྱུད་ཀྱི་ཚད་མཐོའི་སྤྱི་ཚོགས་ཞབས་ཕྱིའི་གཟེངས་རྟགས་དབུལ་རྒྱུ་ཡིན། ཁོང་གི་མཚན་ལ་སྤྲུལ་སྐུ་ཆོས་དབྱིངས་ཡེ་ཤེས་རིན་པོ་ཆེ་ཞུ་བ་དང་ཁོང་བོད་ཡུལ་དུ་འཁྲུངས་ཏེ་དེང་སང་ཨ་མེ་རི་ཀར་བཞུགས་ཡོད། ཁོང་གིས་འདས་པའི་ལོ་མང་རིང་འཛམ་གླིང་གི་ས་ཕྱོགས་མང་པོར་གནས་པའི་རྒན་རྒོན་དང་བུད་མེད། བྱིས་པ་དང་དབང་པོ་སྐྱོན་ཅན། སེམས་ཁམས་ཀྱི་དཀའ་ངལ་ཡོད་པའི་མི་དང་དུད་འགྲོ་མགོན་མེད་སོགས་ལ་རོགས་མགོན་དུས་དང་དུས་སུ་གནང་བར་བརྟེན། གོང་གསལ་སྐྱེ་འགྲོ་འདི་དག་ལ་བདེ་སྐྱིད་བསྐྲུན་ཞིང་མ་འོངས་མདུན་ལམ་ལ་རེ་བའི་འོད་སྣང་བསྐྲུན་ཡོད། ཅེས་སོགས་གསུངས་ཡོད་འདུག
མཛད་སྒོའི་ཐོག་སྤྲུལ་སྐུ་ཆོས་དབྱིངས་ཡེ་ཤེས་མཆོག་གིས། ཧྥི་ལི་པིན་སིའི་གླིང་ཕྲན་རྒྱལ་མོ་མ་རེ་ཡ་ལགས་ཀྱིས། འཛམ་གླིང་ས་ཕྱོགས་གང་སར་རོགས་རམ་གནང་མུས་ཡིན་པར་བསྔགས་བརྗོད་གནང་བ་དང་འབྲེལ། བུད་མེད་རྣམས་ནི་ཁྱིམ་ཚང་རེ་རེའི་བྱམས་བརྩེའི་གཞི་རྩ་དང་། རྒྱལ་ཁབ་རེ་རེའི་ཞི་བདེའི་སྣེ་ཁྲིད་པ་ཡིན་སྐོར་དང་། ཁོང་གིས་མུ་མཐུད་སྤྱི་ཚོགས་ཞབས་ཕྱི་གང་ཐུབ་གནང་རྒྱུ་ཡིན་སྐོར་སོགས་གསུང་བཤད་གནང་ཡོད་འདུག
ཕྱི་ལོ་ ༢༠༡༨ ལོར་ཨ་རིའི་གྲོས་ཚོགས་འཐུས་མི་ལོ་སི་ཁོ་རེ་ཡ་(Luis Correa ) ལགས་ཀྱིས་མཚམས་སྦྱོར་གནང་བ་བརྒྱུད། སྤྲུལ་སྐུ་ཆོས་དབྱིངས་ཡེ་ཤེས་མཆོག་ལ་ཨ་རིའི་གྲོས་ཚོགས་འཐུས་མིའི་མཚན་གནས་དང་འབྲེལ་བའི་ཆོས་ལུགས་ལ་བརྟེན་པའི་སྤྱི་ཚོགས་ཞབས་ཕྱིའི་གཟེངས་རྟགས་ཤིག་ཀྱང་ཕུལ་ཡོད་འདུག
སྤྲུལ་སྐུ་ཆོས་དབྱིངས་ཡེ་ཤེས་རིན་པོ་ཆེ་ཕྱི་ལོ་ ༡༩༦༩ ལོར་བོད་མཚོ་སྔོན་ཞིང་ཆེན་དུ་སྐུ་འཁྲུངས་ཤིང་། སྐུ་ན་ཆུང་དུས་ནས་སློབ་ཆུང་འགྲིམས་ཤིང་སློབ་མཐར་ཕྱིན་རྗེས་དགོན་པར་ཆོས་ཞུགས་ཀྱིས་ལཱ་མོ་ཡོངས་འཛིན་རིན་པོ་ཆེ་དང་། དགེ་བཤེས་བྱམས་པ་འཕྲིན་ལས་སོགས་ཀྱི་མདུན་ནས་ལོ་བཅུའི་རིང་བོད་ཀྱི་རིག་གནས་ཆེ་ཆུང་མང་པོར་སློབ་གཉེར་གནང་། ཁོང་གིས་ཀླུ་སྨྱོན་ཧེ་རུ་ཀ་ཞེས་པའི་མཚན་ཐོག་ནས་བོད་ནང་དུ་སྦྲང་ཆར་སོགས་དུས་དེབ་དང་གསར་འགྱུར་ཚགས་པར་སོགས་སུ་བརྩམས་ཆོས་ཧ་ཅང་མང་པོ་སྤེལ་གནང་ཡོད་པ་མ་ཟད། བོད་ནང་གི་ཞིང་ཆེན་རིམ་པའི་རྩོམ་ཡིག་བྱ་དགའ་ཡང་ཐོབ་ཡོད་འདུག་ལ། སྒྱུ་རྩལ་རྩོམ་རིག་གི་དེབ་ ༡༣ ལྷག་དང་དབྱིན་དེབ་ཡང་རེ་ཟུང་བྲིས་གནང་ཡོད་འདུག ཕྱི་ལོ་ ༡༩༩༤ ལོར་རྒྱ་གར་ནང་བཙན་བྱོལ་དུ་ཕེབས་ཏེ་ཕྱི་ལོ་ ༢༠༠༥ ལོར་ཨ་རིར་ཕེབས་ཡོད་འདུག
གསར་འགོད་པ། དཔལ་ལྡན།
རྩོམ་སྒྲོག་པ། པདྨ་མཚོ།
