བོད་ནང་གི་ཛ་དྲག་གནས་སྟངས་དང་འབྲེལ་བའི་ཐོག་སྤྱི་འཐུས་མང་པོས་ཆ་ཤས་བླངས་སོང་།

བོད་ནང་གི་ཛ་དྲག་གནས་སྟངས་ཐོག་སྤྱི་འཐུས་མང་པོས་བགྲོ་གླེང་གི་ཆ་ཤས་བླངས་ཏེ་ལས་ཉིན་དང་པོར་གྲོས་ཆོད་གྲོས་འཆར་སྐོར་གྱི་བགྲོ་གླེང་ཚར་མ་སོང་།

དེ་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་དང་པོའི་བོད་ནང་གི་ཛ་དྲག་གནས་སྟངས་ལ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་སྟེང་སྤྱི་འཐུས་ཁྱོན་ ༢༥ ཡིས་ཆ་ཤས་བླངས་སོང་བ་དང་། སྤྱི་འཐུས་དགེ་བཤེས་གངས་རི་ལགས་ཀྱིས། ང་ཚོའི་འགན་ཆེ་ཤོས་ཤིག་ནི་གཞིས་ལུས་རྒྱ་ཆེ་མི་མང་གི་སྙིང་སྟོབས་དང་སེམས་ཤུགས་ཆགས་མི་འཇུག་རྒྱུ་དེ་རེད། ཐོག་མར་ཕར་དགྲ་ལ་ཁ་གཏད་གཅོག་པར་ནང་འཆམ་པོ་དང་ནང་གི་བློ་ཁོག་དང་སེམས་ཤུགས་མི་ཉམས་པ་དང་ཉམས་པ་སླར་གསོ་གནང་རྒྱུ་གལ་ཆེན་པོ་ཞེ་དྲགས་རེད་འདུག་བསམ་གྱི་ཡོད། ཟླ་གཅིག་གཉིས་ཀྱི་ནང་དུ་གཞིས་ལུས་རྒྱ་ཆེ་མི་མང་ནང་མཉམ་ཞུགས་བྱས་པ་ཡིན། གཞིས་ལུས་རྒྱ་ཆེ་མི་མང་གི་རེ་བ་ཡོད་ན་མེད་ན་དེ་༧རྒྱལ་བ་རིན་པོ་ཆེའི་དགོངས་པ་རེད། ༧རྒྱལ་བ་རིན་པོ་ཆེས་དུས་དང་རྣམ་པ་ཀུན་ཏུ་ ངས་རེ་བ་དང་ཡིད་ཆེས་བྱེད་ས་ལམ་དབུ་མ་ཡིན་པ་དང་དབུ་མའི་ལམ་གྱི་ཐོག་ནས་རེ་བ་འགྲུབ་ཀྱི་རེད་ཅེས་བཀའ་སློབ་གནང་གི་ཡོད། འོན་ཀྱང་། བློ་ཕམ་པ་ཞིག་ལ་ཉེ་ལམ་རྒྱལ་ས་ལྡི་ལི་རུ་རང་བཙན་ལྷན་ཚོགས་ཟེར་བ་ཞིག་གི་སྟེང་སྤྱི་འཐུས་ལྷན་ཚོགས་ཀྱིས་སྐུ་ཚབ་བཏང་སོང་། དཔེ་མི་སྲིད་པའི་བློ་ཕམ་བྱུང་། ངས་དེ་ག་ཙམ་ཞུ་ཡི་མེད། ལྷན་ཚོགས་དེ་འདྲ་ཞིག་ལ་བོད་ཀྱི་གཞོན་ནུ་ལྷན་ཚོགས་ནས་ཀྱང་ངོས་ལེན་བྱེད་ཀྱི་མེད། གཞུང་འབྲེལ་གྱི་སྲིད་ཇུས་དང་འགལ་བ་ཞིག་ལ་ང་ཚོའི་སྐུ་ཚབ་གཏོང་དོན་ག་རེ་ཡིན་ནམ། དེ་ཚོགས་གཙོ་གཞོན་གཉིས་ཀྱིས་འགན་མ་འཁུར་བ་རེད་བསམ་གྱི་ཡོད། དེ་འདྲའི་རིགས་ཚོགས་གཙོ་གཞོན་གཉིས་ཀྱིས་ལྟ་དགོས་པ་དང་། མགྲོན་ཤོག་ཡོང་ཡོང་དང་ཁ་ལག་སྤྲད་སྤྲད་ཚང་མར་འགྲོ་རྒྱུ་མེད། འགྲོ་ས་གང་ཡིན་པ་དང་མིན་པ་དེ་ཤེས་དགོས་ཀྱི་ཡོད། ང་ཚོའི་བཙན་བྱོལ་སྒྲིག་འཛུགས་འདིའམ་གྲོས་ཚོགས་རྭ་བ་འདིའི་ནང་གཏན་ལ་འབེབས་པའི་སྲིད་ཇུས་ལམ་དབུ་མའི་དགོངས་དོན་དང་མ་མཐུན་པ་ཞིག་ཡིན་ན་གཞུང་འབྲེལ་ཐོག་ནས་འགྲོ་རྒྱུ་ཡོད་དམ། ཞེས་དོགས་འདྲི་དང་བཅས་བརྗོད་སོང་།

སྤྱི་འཐུས་བློ་བཟང་རྒྱ་མཚོ་སྲི་ཐར་ལགས་ཀྱིས། རྒྱ་ནག་གཞུང་གིས་བོད་ནང་གི་བྱིས་པ་རྣམས་གཏན་འཇགས་སློབ་གྲྭ་བཏང་ནས་རྒྱ་སྒྱུར་སློབ་གསོ་སྤེལ་མུས་ཡོད་པར་བརྟེན། རྒྱལ་སྤྱིའི་ཐོག་དེའི་སྐོར་ལ་དོ་སྣང་བྱེད་བཞིན་ཡོད་པའི་རྐྱེན་གྱིས། རྒྱ་གཞུང་གིས་གཏན་འཇགས་སློབ་གྲྭའི་སྐོར་ལ་འགྲེལ་བརྗོད་ལོགས་པར་རྒྱག་པའི་ཐབས་ཤེས་བྱེད་བཞིན་པའི་ཐོག མཉམ་འབྲེལ་རྒྱལ་ཚོགས་ཀྱི་རྒྱ་ནག་མཐུན་ཕྱོགས་རྒྱལ་ཁབ་ཀྱི་སྐུ་ཚབ་དང་། རྒྱལ་སྤྱིའི་གསར་འགོད་པ། ཉམས་ཞིབ་པ་ཁག་ཅིག་བོད་ནང་དུ་ལྟ་སྐོར་དུ་ཁྲིད་ཡོད་འདུག དེ་བཞིན་ཉེ་ཆར་རྒྱ་གཞུང་གི་གོ་སྒྲིག་བྱས་པའི་པེ་ཅིན་གྱི་བོད་རིག་པའི་ཚོགས་འདུ་སྟེང་དུ། རྒྱལ་སྤྱིའི་མི་སྣ་བེད་སྤྱོད་བྱས་ཏེ་བོད་ནང་གི་གཏན་འཇགས་སློབ་གྲྭ་འགྲེལ་བརྗོད་ལོགས་པ་བྱས་ཡོད་པ་མ་ཟད། བོད་ཀྱི་མིང་གི་ཚབ་དུ་ཞིས་ཙང་བེད་སྤྱོད་བྱེད་བཞིན་ཡོད་པ་གསར་བ་གང་ཡང་མིན་ཡང་། རྒྱལ་སྤྱིའི་སྙན་ཐོ་ཁག་ཏུའང་ཉམས་ཞིབ་པ་ཚང་མས་ཤར་ཏུར་ཀི་སི་ཐན་གྱི་ཚབ་ཏུ་ཤིན་ཅང་བེད་སྤྱོད་བྱེད་བཞིན་ཡོད་པས། དེང་སང་བོད་ཀྱི་མིང་ཚབ་ཏུའང་ཞིས་ཙང་བེད་སྤྱོད་བྱས་ཏེ་བོད་ཀྱི་ས་ཁུལ་ཡོངས་རྫོགས་མི་ཚུད་བའི་ཉེན་ཁ་ཡོད་པ་དང་། དེ་ལ་འགྲེལ་བརྗོད་ལོགས་པ་ཞིག་རྒྱག་བཞིན་ཡོད་དུས། ང་ཚོའི་ངོས་ནས་བརྡ་ལན་ཡག་པོ་སྤྲད་དགོས་ཀྱི་འདུག ཞེས་བརྗོད་སོང་།

སྤྱི་འཐུས་ཚེ་རིང་ལྷ་མོ་ལགས་ཀྱིས། རྒྱ་གཞུང་གིས་ཆོས་ལུགས་བྱེད་སྒོ་སྤེལ་བའི་དོ་དམ་ཁྲིམས་སྒྲིག་སྔ་ཕྱི་ཐེངས་གསུམ་ལ་བཏོན་ཡོད་ཅིང་། ཕྱི་ལོ་ ༡༩༩༤ ལོར་ཐེངས་དང་པོ་བཏོན་ཡོད་པ་དང་། དེ་ལ་དོན་ཚན་ ༡༥ འདུག ཕྱི་ལོ་ ༢༠༠༥ ལོར་ཐེངས་གཉིས་པ་བཏོན། དེར་དོན་ཚན་ ༡༥ འདུག ཕྱི་ལོ་ ༢༠༢༣ ལོར་ལེའུ་ ༡༠ དང་དོན་ཚན་ ༧༦ འདུག བོད་ནང་དགོན་པའི་ལྷ་སྐུ་ལ་སོགས་པའང་རྒྱ་ནག་གི་ཁྱད་ཆོས་དགོས་པ་ཞིག་བཏོན་ཡོད་འདུག སྔོན་མའི་རྒྱ་གཞུང་གི་ཆོས་ལུགས་ལས་དོན་གྱི་སྲོལ་ཡིག་ཁག་ཏུ་དགོན་པ་གྲྭ་ཚང་གི་གཡས་གཡོན་ཏུ་ཡུལ་སྐོར་སྤྲོ་འཆམ་བྱེད་ཡུལ་འཛུགས་སྐྲུན་བྱེད་དགོས་ཚེ། ངེས་པར་ཏུ་དགོན་པ་གྲྭ་ཚང་གི་ཁྱད་ཆོས་དང་མཐུན་དགོས་བྲིས་ཡོད་པ་རེད། ཐེངས་འདིའི་སྲོལ་ཡིག་ཏུ་དགོན་པའི་ལྷ་སྐུ་ཐང་ག་དང་བཅས་པའི་འཛུགས་སྐྲུན་ཐམས་ཅད་ཀྱང་རྒྱ་ནག་ཅན་ཏུ་སྒྱུར་དགོས་པ་དང་། རྒྱ་གཞུང་གིས་བོད་ནང་གི་དགོན་པ་ཁག་ཅིག་ཏུ་འདུ་ཤེས་གསུམ་གྱི་སློབ་གསོ་ཞེས་པ་ཞིག་སྤེལ་ཏེ། དགོན་སྡེ་ཁག་ཏུ་ཆོས་ལུགས་དད་མོས་རང་དབང་རྩ་གཏོར་གཏོང་བཞིན་ཡོད་པ་དེར། རྒྱལ་སྤྱིའི་སྟེང་དུ་ཞུ་གཏུགས་བྱེད་པར་གལ་ཆེན་པོ་རེད་ཞེས་བརྗོད་སོང་།

དེ་བཞིན་སྤྱི་འཐུས་ཆོས་གྲགས་རྒྱ་མཚོ་ལགས་དང་། སྤྱི་འཐུས་པདྨ་མཚོ་ལགས། རྒྱལ་ལྡོང་ཕུར་བ་རྡོ་རྗེ་ལགས། ཨ་ཀྲོང་རིན་ཆེན་རྒྱལ་མཚན་ལགས། དོན་གྲུབ་བཀྲ་ཤིས་ལགས་བཅས་ཀྱིས་བོད་ཀྱི་སྐད་ཡིག་སྲུང་སྐྱོབ་ཀྱི་གལ་ཆེན་རང་བཞིན་དང་། རྒྱ་གཞུང་གིས་བོད་ནང་གི་བྱིས་པ་རྣམས་གཏན་འཇགས་སློབ་གྲྭར་བཏང་ནས་རྒྱ་སྒྱུར་སློབ་གསོ་སྤེལ་བཞིན་ཡོད་པའི་ཐོག་ལ་གདུང་སེམས་མཉམ་བསྐྱེད་དགོས་སྐོར་གསུངས་སོང་།

གསར་འགོད་པ། བྱམས་པ་ཚེ་རིང་དང་སྐལ་བཟང་སྦྱིན་པ།

རྩོམ་སྒྲིག་པ། སྐལ་བཟང་སྦྱིན་པ།