དེ་རིང་ཕྱི་ཚེས་ ༢༠ ནས་བདུན་ཕྲག་གཅིག་རིང་བོད་མིའི་སྒྲིག་འཛུགས་ཕྱི་འབྲེལ་ལས་ཁུངས་ཀྱི་གོ་སྒྲིག་འོག་བོད་དོན་ཞུ་གཏུགས་ཀྱི་པར་རིས་འགྲེམ་སྟོན་ཞིག་གནང་གི་འདུག
བོད་ཀྱི་འགྲེམ་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས། བོད་ཀྱི་དུས་བབ་ཀྱི་པར། ༢༠༢༣།༡༡།༢༠
དེ་རིང་ནས་བདུན་ཕྲག་གཅིག་རིང་བོད་མིའི་སྒྲིག་འཛུགས་ཕྱི་འབྲེལ་ལས་ཁུངས་ཀྱི་གོ་སྒྲིག་འོག བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་དོན་ཞུ་གཏུགས་ཞེས་པའི་བརྗོད་གཞིའི་ཐོག་བོད་དོན་ཐད་ཀྱི་འགྲེམ་སྟོན་ཞིག་གནང་མགོ་བཙུགས་ཡོད་ཅིང་། འགྲེམ་སྟོན་འདི་བརྒྱུད་བཞུགས་སྒར་ཁུལ་དུ་ཕེབས་མུས་ཡིན་པའི་རྒྱ་གར་གྱི་ཡུལ་སྐོར་བ་གཙོས། རྒྱལ་སྤྱིའི་ཡུལ་སྐོར་བ་སོགས་ལ་བོད་ཀྱི་ཆོས་རིག་གཙོས་བོད་དོན་ཐོག་གོ་རྟོགས་སྤེལ་ཐབས་གནང་རྒྱུ་ཡིན་འདུག
དེའི་ཐད་བོད་ཀྱི་འགྲེམ་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས། བོད་ཀྱི་འགྲེམ་སྟོན་ཁང་གིས་དེ་རིང་ནས་བདུན་ཕྲག་གཅིག་རིང་ཐེག་ཆེན་ཆོས་གླིང་གཙུག་ལག་ཁང་གི་ར་བའི་ནང་དུ་བོད་དོན་ཞུ་གཏུགས་ཞེས་པའི་ཐོག་འགྲེམས་སྟོན་གྱི་ལས་རིམ་ཞིག་མགོ་བརྩམས་ཡོད་ཅིང་། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེའི་འོག་ནས། ཡུལ་སྐོར་སྤྲོ་འཆམ་པ་དང་དད་ལྡན་ཆོས་ཞུ་བ་མང་དག་ཅིག་འདིར་ཕེབས་མུས་ཡིན་ལ། འདིར་ཕེབས་མཁན་མང་དག་ཅིག་བོད་དོན་ལ་དོ་སྣང་ཡོད་པར་ངོས་འཛིན་བྱེད་ཀྱི་ཡོད་སྐོར་དང་། སྤྱིར་བོད་ཀྱི་འགྲེམ་སྟོན་ཁང་གིས་རྒྱ་གར་གྱི་ས་གནས་མང་དག་ཅིག་ཏུ་འགྲེམ་སྟོན་བྱས་དང་བྱེད་མུས་ཡིན་པ་དང་། དེ་རིང་འདིར་ཕེབས་མཁན་མང་དག་ཅིག་ལ་བོད་དོན་ཐོག་དོ་སྣང་ཡོད་མཁན་ཞིག་ཏུ་ངོས་འཛིན་བྱེེད་ཀྱི་ཡོད་སྐོར་སོགས་འགྲེལ་བརྗོད་གནང་བྱུང་།
ཡང་ཁོང་གིས། སྤྱིར་བོད་ཀྱི་འགྲེམ་སྟོན་ཁང་གིས་མི་མང་ལ་བོད་དོན་ཐད་གོ་རྟོགས་སྤེལ་རྒྱུ་དེ་ཧ་ཅང་གལ་ཆེན་ཞིག་ལ་ངོས་འཛིན་བྱེད་ཀྱི་ཡོད་སྟབས། ད་ལན་འདིར་བདུན་ཕྲག་གཅིག་རིང་འགྲེམས་སྟོན་བྱ་རྒྱུ་དང་། དེ་བཞིན་ད་ལན་གྱི་འགྲེམ་སྟོན་འདི་ཡག་པོ་ཞིག་བྱུང་ཚེ། མ་འོངས་པར་བརྗོད་གཞི་མི་འདྲ་བ་མང་པོ་ཞིག་གི་ཐོག་འགྲེམ་སྟོན་བྱ་འཆར་ཡོད་ཅིང་། ལྷག་པར་ཕྱི་ཟླ་ ༡༢ དེ་༧གོང་ས་རྒྱལ་བ་རིན་པོ་ཆེ་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་བའི་སྐབས་དང་བསྟུན། ༧གོང་ས་རྒྱལ་བ་རིན་པོ་ཆེ་མཆོག་གི་མཛད་པ་འཕྲིན་ལས་དང་འབྲེལ་བའི་སྐོར་སྐྱོད་ཀྱི་འགྲེམ་སྟོན་ཞིག་བྱ་འཆར་ཡོད་སྐོར་སོགས་འགྲེལ་བརྗོད་གནང་བྱུང་།
བདུན་གཅིག་རིང་གི་བོད་དོན་ཞུ་གཏུགས་ཞེས་པའི་འགྲེམ་སྟོན་འདིའི་སྟེང་། ཧིན་བོད་ཀྱི་འབྲེལ་བ་ཞེས་པ་དང་སྦྲགས་ནས། བོད་དང་རྒྱ་གར་གྱི་གནའ་རབས་ཀྱི་འབྲེལ་ལམ་སྐོར་གྱི་འགྲེམ་སྟོན་དང་། དེ་ནས་ཕ་ཡུལ་ཕྱོགས་སུ་རྒྱང་ལྟ་ཞེས་པའི་བརྗོད་གཞིའི་འོག་བོད་ཀྱི་ཆོས་རིག་དང་། རང་བྱུང་ཁོར་ཡུག་སོགས་ཚུད་པའི་བོད་དོན་ཐད་ཀྱི་འགྲེམ་སྟོན། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེ་མཛད་འཕྲིན་སོགས་ཀྱི་སྐོར་ལ་པར་རིས་འགྲེམ་སྟོན་གནང་རྒྱུ་ཡིན་འདུག
གསར་འགོད་པ། དཔལ་ལྡན།
རྩོམ་སྒྲིག་པ། སྐལ་བཟང་སྦྱིན་པ།
