སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་སྤེལ་གླིང་གིས་ཡུ་རོབ་རྒྱལ་ཁབ་སི་པན་ནང་རྗེ་བཙུན་མི་ལ་རས་པའི་མཛད་རྣམ་ཐང་གའི་ལམ་ནས་འགྲེམས་སྟོན་གནང་གིན་འདུག
ཁ་སང་ཕྱི་ཚེས་ ༡༢ ཉིན་གྱི་དགོང་མོའི་ཆུ་ཚོད་ ༧།༣༠ སྟེང་ཡུ་རོབ་རྒྱལ་ཁབ་སི་པེན་གྱི་གྲོང་ཁྱེར་བྷར་སི་ལོ་ནའི་བོད་ཁང་དུ་སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་སྤེལ་གླིང་གིས་ལོ་གཉིས་ལྷག་རིང་རྗེ་བཙུན་མི་ལ་རས་པའི་མཛད་རྣམ་ཐང་གའི་འགྲེམས་སྟོན་ཞིག་མགོ་འཛུགས་གནང་ཡོད་འདུག་ལ། འགྲེམས་སྟོན་དེ་ཟླ་འདིའི་ཕྱི་ཚེས་ ༡༢ ནས་ཕྱི་ལོ་ ༢༠༢༤ ཟླ་ ༡ ཚེས་ ༡ དབར་ཉིན་གྲངས་ ༢༠ རིང་སི་པེན་གྱི་བྷར་སི་ལོ་ན་བོད་ཁང་དུ་འཚོག་བཞིན་ཡོད་འདུག
ད་ལན་གྱི་རྗེ་བཙུན་མི་ལ་རས་པའི་མཛད་རྣམ་ཐང་གའི་ལམ་ནས་འགྲེམས་སྟོན་དབུ་འཛུགས་ཉིན་གྱི་མཛད་སྒོའི་སྟེང་། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་སི་པེན་གྱི་སྐད་ཡིག་ནང་གཏམ་བཤད་སྤེལ་ཡོད་ཅིང་། ལྷ་རིས་པ་སྐལ་བཟང་དམ་ཆོས་ལགས་ཀྱིས་རྗེ་བཙུན་མི་ལ་རས་པའི་མཛད་རྣམ་སྐོར་ལ་ངོ་སྤྲོད་དང་། འགུལ་རིས་པ་བསྟན་འཛིན་ཉི་སྒྲོན་ལགས་ཀྱིས་མི་ལ་རས་པའི་མགུར་ཁག་ཅིག་ངག་ལམ་ནས་བླངས་པ་སོགས་བྱས་ཡོད་པ་མ་ཟད། ཕྱི་གླིང་བའི་ཡུལ་མི་དང་ས་གནས་བོད་མི་ཁག་ཅིག་བཅས་འགྲེམས་སྟོན་ནང་མཉམ་ཞུགས་གནང་ཡོད་འདུག
དེ་འབྲེལ་དེ་རིང་འདི་གའི་གསར་འགོད་པས་ཁ་པར་བརྒྱུད་ལྷ་བྲིས་པ་སྐལ་བཟང་དམ་ཆོས་ལགས་སུ་འགྲེམས་སྟོན་འདི་འཚོགས་པའི་དམིགས་ཡུལ་གཙོ་བོ་ག་རེ་ཡིན་སྐོར་དྲིས་པར་ཁོང་གིས། སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་སྤེལ་གླིང་ནས་བོད་ཀྱི་གྲུབ་ཆེན་མི་ལ་རས་པའི་མཛད་པ་འཕྲིན་ལས་ཐང་གའི་སྒྱུ་རྩལ་གྱི་ལམ་ནས་བྲིས་ཡོད་པ་དེ་དག་ཕྱིའི་རྒྱལ་ཁབ་ཏུ་གོ་རྟོགས་སྤེལ་རྒྱུ་དང་། ང་ཚོའི་བོད་ལ་རྣལ་འབྱོར་བ་མང་པོ་བྱུང་ཡོད་པ་དེའི་ནང་ནས་གཙོ་བོ་མཆོག་ཏུ་གྱུར་བ་དེ་རྗེ་བཙུན་མི་ལ་རས་པ་ཡིན་པར་བརྟེན། ཁོང་གི་རྣམ་ཐར་དང་ཐང་གའི་རིག་གཞུང་། སྒོམ་སྒྲུབ་ཉམས་ལེན་གྱི་བརྒྱུད་རིམ་སོགས་འཛམ་གླིང་ས་ཕྱོགས་གང་སར་སྟོན་རྒྱུའི་ཆེད་དུ་འགྲེམས་སྟོན་འདི་གོ་སྒྲིག་ཞུས་པ་ཡིན། ཞེས་བརྗོད་བྱུང་།
མ་འོངས་པར་འགྲེམས་སྟོན་དེ་དང་འབྲེལ་ནས་ས་གནས་གཞན་ལ་སྐོར་སྐྱོད་ཀྱི་ལས་རིམ་འཚོག་འཆར་ཡོད་མེད་ཐད་ལ་ལྷ་བྲིས་པ་སྐལ་བཟང་དམ་ཆོས་ལགས་ཀྱིས། ད་ལྟའི་ཆར་མི་ལ་རས་པའི་མཛད་རྣམ་ཐང་གའི་ལམ་ནས་འགྲེམས་སྟོན་འཚོག་བཞིན་པ་དེ་སི་པན་རྒྱལ་ཁབ་མ་གཏོགས་འཛམ་གླིང་གི་རྒྱལ་ཁབ་གཞན་དུ་སྟོན་རྒྱུའི་འཆར་གཞི་མེད། འོན་ཀྱང་། མ་འོངས་པར་རྒྱལ་སྤྱིའི་སྤྱི་ཚོགས་ལ་ཁ་ཕྱོགས་ཏེ་བོད་ཀྱི་ཐང་བྲིས་སྒྱུ་རྩལ་འདི་འཛམ་གླིང་ནང་གོ་རྟོགས་སྤེལ་སླད། བཟོ་རིག་པའི་སྐོར་དང་ཐང་གའི་བྱུང་རིམ་དང་ལོ་རྒྱུས། ཐང་ག་ལ་རྒྱུ་ཆ་གང་ཚང་དགོས་པ་སོགས་ངོ་སྤྲོད་བྱ་རྒྱུ་དང་ཆབས་ཅིག རྣལ་འབྱོར་བ་རྗེ་བཙུན་མི་ལ་རས་པའི་ལོ་རྒྱུས་དང་ཁོང་གི་མཛད་པ་འཕྲིན་ལས་གང་དང་གང་བསྐྱངས་ཡོད་པ་སོགས་ཀྱི་བརྒྱུད་རིམ་གྱི་ཐང་ག་ཁྱོན་ ༨༠༠ ལྷག་བྲིས་ཡོད་པར་བརྟེན། ཐང་ག་དེའི་བརྒྱུད་ནས་བོད་ཀྱི་སྲོལ་རྒྱུན་གྱི་ཐང་བྲིས་སྒྱུ་རྩལ་དང་བོད་ཀྱི་རྣལ་འབྱོར་བ་ཆེན་པོ་རྗེ་བཙུན་མི་ལ་རས་པའི་མཛད་པ་འཕྲིན་ལས་སོགས་སྒྱུ་རྩལ་གྱི་ལམ་ནས་འཛམ་གླིང་ཡོངས་ལ་གོ་རྟོགས་སྤེལ་འཆར་ཡོད་སྐོར་སོགས་བརྗོད་བྱུང་།
འདི་ལོའི་ཕྱི་ཟླ་ ༧ ཚེས་ ༥ ཉིན་བཞུགས་སྒར་གཙུག་ལག་ཁང་གི་ཉེ་འགྲམ་དུ་ཡོད་པའི་བོད་ཀྱི་འགྲེམས་སྟོན་ཁང་དུ། སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་སྤེལ་གླིང་གིས་ལོ་གཉིས་ལྷག་རིང་རྗེ་བཙུན་མི་ལ་རས་པའི་མཛད་རྣམ་ཐང་གའི་ལམ་དུ་འབྲི་བཞེང་བྱས་པ་ལེགས་འགྲུབ་བྱུང་བའི་འགྲེམས་སྟོན་མཛད་སྒོ་འཚོགས་ཡོད་ཅིང་། སྐབས་དེར་ལྷ་རིས་པ་སྐལ་བཟང་དམ་ཆོས་ལགས་ཀྱིས། བོད་ཀྱི་ཐང་ག་འཛམ་གླིང་དུ་ངོ་སྤྲོད་བྱ་རྒྱུ་དང་། ལྷག་པར་བོད་ཀྱི་གྲུབ་ཆེན་མི་ལ་རས་པའི་མཛད་པ་འཕྲིན་ལས་ཐང་གའི་སྒྱུ་རྩལ་གྱི་ལམ་ནས་བོད་ཀྱི་གཞོན་སྐྱེས་རྣམས་ལ་དོ་སྣང་ཡོང་ཆེད་དུ་ཡིན་སྐོར་སོགས་འགྲེལ་བརྗོད་གནང་འདུག་ལ། འགྲེམས་སྟོན་གྱི་མཛད་སྒོའི་སྟེང་སྐུ་མགྲོན་གཙོ་བོ་བོད་མི་མང་སྤྱིི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་རྣམ་གཉིས་དང་། དྷ་སའི་སེར་སྐྱ་མི་མང་ཁག་ཅིག་དང་གསར་འགོད་པ་སོགས་མཉམ་ཞུགས་གནང་ཡོད་འདུག
ལྷ་བྲིས་པ་སྐལ་བཟང་དམ་ཆོས་ལགས་ནི་ལོ་ན་ཆུང་དུས་ཕ་མ་དང་དགོན་པ་སོགས་བོད་ཀྱི་རི་མོ་དང་ཐང་ག་འབྲི་བའི་ཁོར་ཡུག་ཅིག་ནས་འཚར་ལོངས་བྱུང་ཞིང་། ཁོར་ཡུག་དེའི་བག་ཆགས་ཁྲོད་ཆུང་བྱིས་པའི་དུས་ནས་རི་མོ་འབྲི་རྒྱུར་ཧ་ཅང་དགའ་པོ་ཡོད་མཁན་ཞིག་ཏུ་གྱུར། ཕྱིས་སུ་རྒྱ་གར་ནང་བསླེབས་རྗེས། ཁོང་གིས་བཙན་བྱོལ་གྱི་འཚོ་བའི་དཀའ་སྡུག་གི་གཡུལ་ས་ནས་རང་ཉིད་ཀྱི་ཕུགས་འདུན་དང་དགའ་ཕྱོགས་རྒྱུན་འཁྱོངས་བྱས་ཏེ། ལྷ་བྲིས་འཛིན་གྲྭར་ཟུར་ཞུགས་དང་རང་སྦྱོང་ལ་བརྟེན་ནས་བོད་ཀྱི་ལྷ་བྲིས་སྒྱུ་རྩལ་རིག་གནས་ལ་སློབ་གཉེར་བྱས་པ་དང་། ད་ལྟ་ཁོང་གིས་བཞུགས་སྒར་དྷ་རམ་ས་ལར་སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་སྤེལ་ཁང་ཞེས་པ་ཞིག་དང་། སྐལ་བཟང་བོད་ཀྱི་ཐང་བྲིས་སྒྱུ་རྩལ་འགྲེམ་ཚོང་ཁང་ཞེས་པ་གཉིས་བཙུགས་ཡོད་པ་དང་། མ་འོངས་པར་སྐལ་བཟང་བོད་ཀྱི་ཐང་བྲིས་སྒྱུ་རྩལ་འགྲེམ་ཚོང་ཁང་དེ་བོད་ཀྱི་ཐང་བྲིས་སྒྱུ་རྩལ་རིག་གནས་འགྲེམས་སྟོན་ཁང་ཞིག་ཏུ་འཕེལ་རྒྱས་བཏང་སྟེ། ལོ་རྒྱུས་རང་བཞིན་ལྡན་པའི་གནའ་དེང་གི་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་རིག་གནས་མི་ཉམས་རྒྱུན་འཛིན་དང་དར་ཁྱབ་གཏོང་ཐབས་སུ་འབད་བརྩོན་བྱེད་བཞིན་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
