བོད་རིགས་བུད་མེད་ཚེ་རིང་མཚོ་ཞེས་པ་ཞིག་གིས་རྒྱ་ནག་ཉེན་རྟོག་པའི་བྱ་སྤྱོད་ལ་འཁྱོག་བརྗོད་བྱས་ནས་སྤྱི་མང་དང་དྲ་ལམ་སྒྲིག་གཞིར་གཏོར་བརླག་བཏང་ཡོད་ཚུལ་གྱི་ཉེས་མིང་གཡོགས་ཏེ་བཀག་ཉར་ཁང་དུ་བཅུག་འདུག
ཟླ་འདིའི་ཕྱི་ཚེས་ ༡༩ ཉིན་བོད་རང་སྐྱོང་ལྗོངས་ཟེར་བའི་སྦྲ་ཆེན་རྫོང་ཉེན་རྟོག་པས་ཚེ་རིང་མཚོ་ཞེས་པའི་བོད་པའི་བུད་མེད་ཅིག་འཛིན་བཟུང་བྱས་ཏེ་ཉིན་གྲངས་བཅོ་ལྔའི་རིང་བཀག་ཉར་ཁང་དུ་བཅུག་སྟེ་འདྲི་རྩད་བྱེད་བཞིན་ཡོད་འདུག
ཟླ་འདིའི་ཕྱི་ཚེས་ ༢༥ ཉིན་སྦྲ་ཆེན་རྫོང་ཉེན་རྟོག་ཁང་གིས་དེ་འབྲེལ་གནས་ཚུལ་བསྒྲགས་པ་ལྟར་ན། ཟླ་འདིའི་ཕྱི་ཚེས་ ༡༩ ཉིན་གྱི་ཉིན་རྒྱབ་ཏུ། བོད་རང་སྐྱོང་ལྗོངས་སྦྲ་ཆེན་རྫོང་ (贡日) ཉེན་རྟོག་ཁང་གི་ཞིབ་བཤེར་ས་ཚིགས་སུ། བོད་རིགས་བུད་མེད་ཚེ་རིང་མཚོ་དང་མོའི་རོགས་པ་ཞིག་གི་རླངས་འཁོར་ལ་ཞིབ་བཤེར་འདྲི་རྩད་བྱེད་སྐབས། ཚེ་རིང་མཚོ་ཡིས་ཞིབ་བཤེར་ལ་གཞོགས་འདེགས་བྱས་མེད་པས་འགྲོ་སྐྱོད་བཀག་སྡོམ་བྱས་ཡོད་པར་བརྟེན། ཚེ་རིང་མཚོ་ཡིས་གནད་དོན་དེར་འཁྱོག་བརྗོད་དང་རྫུན་བཟོ་བྱས་པའི་བརྙན་ཐུང་མ་འདྲ་བ་གསུམ་སྤྱི་ཚོགས་དྲ་ལམ་དུ་བཏང་སྟེ་སྤྱི་མང་དང་དྲ་ལམ་གྱི་སྒྲིག་གཞིར་གཏོར་བརླག་བཏང་ཡོད་སྐོར་བསྒྲགས་འདུག
འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་གནས་ཚུལ་མཁོ་སྤྲོད་པས། ཚེ་རིང་མཚོ་ལགས་ཀྱིས་ཞེད་སྣང་གང་ཡང་མེད་པར་ཕྱི་ལོ་ ༢༠༡༥ ཙམ་ནས་བཟུང་བོད་ནང་དུ་ཡོད་པའི་རྒྱ་ནག་ཉེན་རྟོག་པ་དག་གིས་ཁྲིམས་མེད་ལུགས་མེད་ཀྱི་བྱ་སྤྱོད་སྤེལ་ཏེ། བོད་མི་རྣམས་ལ་ཐུབ་ཚོད་དང་དབྱེ་འབྱེད་གཏོང་གི་ཡོད་སྐོར་རྒྱ་ནག་གཞུང་གི་ཁྲིམས་ལུགས་དང་མཐུན་པའི་ཐོག་ནས་ཐེར་འདོན་ཐེངས་མང་བྱས་ཡོད་པ་དང་། ཁོང་མོས་དུས་རྒྱུན་འཛིན་བཟུང་བཙོན་འཇུག་བྱས་ནའང་བདེན་པའི་གནས་ལུགས་བཤད་ཀྱི་ཡིན་ཞེས་སྤོབས་པ་ཆེན་པོས་བརྗོད་མཁན་ཞིག་ཡིན་སྐོར་འགྲེལ་བརྗོད་གནང་བྱུང་།
ཡང་སྦྲ་ཆེན་ཉེན་རྟོག་ཁང་གིས་སྤེལ་བའི་དེ་འབྲེལ་གནས་ཚུལ་ལྟར་ན། ཕྱི་ལོ་ ༢༠༢༢ ཟླ་ ༡༡ ཚེས་ ༡ ཉིན་ལྷ་ས་གྲོང་ཁྱེར་ཉེན་རྟོག་ཁང་གིས་ཚེ་རིང་མཚོ་ཡིས་ཏོག་དབྱིབས་རིམས་ནད་ཀྱི་བཀག་སྡོམ་ལ་བརྩི་སྲུང་མ་བྱས་པའི་ཉེས་མིང་འོག་ཉིན་གྲངས་ ༡༠ བཀག་ཉར་བྱས་ཡོད་འདུག ཡང་འདི་ལོའི་ཕྱི་ཟླ་ ༡༠ ཚེས་ ༢༦ ཉིན་དྲ་ལམ་དུ་རྒྱ་ནག་གཞུང་དང་ལས་བྱེད་པའི་སྐོར་ལ་གནས་ཚུལ་རྫུན་བསྒྲགས་བྱས་པའི་ཉེས་མིང་འོག བོད་མཚོ་སྔོན་ཞིང་ཆེན་སྐྱེ་རྒུ་མདོ་གྲོང་ཁྱེར་ཉེན་རྟོག་པས་ཉིན་གྲངས་ ༡༥ རིང་ཁོང་མོ་བཀག་ཉར་བྱས་མྱོང་ཡོད་འདུག
ཚེ་རིང་མཚོ་ལགས་ནི་བོད་མཚོ་སྔོན་ཞིང་ཆེན་ཁྲི་ཀ་རྫོང་ནས་ཡིན་ཞིང་། ད་ལྟ་རང་ལོ་ ༣༩ ཡིན་འདུག
གསར་འགོད་པ། སྐལ་བཟང་སྦྱིན་པ།
