ཨ་རིའི་དམག་སྒར་ལ་མཁའ་དབྱིངས་གཏོར་རྒོལ་ཐེབས་པར་འཁོན་ལན་སློག་རྒྱུ་ཡིན་འདུག 

ཇོར་ཌན་རྒྱལ་ཁབ་ཏུ་ཡོད་པའི་ཨ་རིའི་དམག་སྡེ་ཞིག་ལ་མཁའ་དབྱིངས་ལྟ་ཞིབ་བརྙན་ཆས་བརྒྱུད་གཏོར་རྒོལ་ཐེབས་ཏེ་དམག་མི་གསུམ་བསད་པ་དང་དམག་མི་ ༤༠ ཙམ་ལ་རྨས་སྐྱོན་བཟོས་བར་འཁོན་ལན་སློག་རྒྱུ་ཡིན་འདུག

ཟླ་འདིའི་ཕྱི་ཚེས་ ༢༨ ཉིན་ཨེ་ཤ་ཡའི་ནུབ་རྒྱུད་ཀྱི་ཇོར་ཌན་ (Jordan) རྒྱལ་ཁབ་ཀྱི་བྱང་ཤར་དུ་ཡོད་པའི་རུཀ་བྷན་ (Rukban) ས་ཁུལ་དུ་རྟེན་གཞི་བྱས་པའི་ཨ་རིའི་དམག་སྡེ་ (Tower 22) ལ་མཁའ་དབྱིངས་ལྟ་ཞིབ་བརྙན་ཆས་ (Drone) བརྒྱུད་གཏོར་རྒོལ་བྱས་ཏེ། ཨ་རིའི་དམག་མི་གསུམ་བསད་པ་དང་དམག་མི་ ༤༠ ཙམ་ལ་རྨས་སྐྱོན་ཕོག་ཡོད་པར་བརྟེན། ཨ་རིའི་གཞུང་ནས་གཏོར་རྒོལ་དེ་ཨི་རན་གྱི་ཡུལ་དམག་གིས་བཏང་བ་ཞིག་ཡིན་པའི་སྐྱོན་འཛུགས་བྱས་པ་མ་ཟད། དམག་འཁྲུག་རྒྱག་གི་མེད་ཀྱང་། གཏོར་རྒོལ་གཏོང་མཁན་ལ་རྒོལ་ལན་ངེས་པར་དུ་སློག་རྒྱུ་ཡིན་སྐོར་བརྗོད་འདུག

རེས་གཟའ་ཉི་མའི་ཞོགས་པར་དམག་མི་རྣམས་དམག་སྒར་དུ་གཉིད་ཉལ་བའི་དུས་སྟབས་དང་བསྟུན་མཁའ་དབྱིངས་ལྟ་ཞིབ་བརྙན་ཆས་བེད་སྤྱད་དེ་གཏོར་རྒོལ་བཏང་ཡོད་སྐོར་དང་། རྐྱེན་འདས་སུ་ཕྱིན་པའི་དམག་མི་གསུམ་ནི་རང་ལོ་ ༤༦ ཡིན་པའི་ཝི་ལི་ཡམ་ (William Jerome Rivers) དང་། རང་ལོ་ ༢༤ ཅན་ཀེ་ནི་ཌི་ (Kennedy Ladon Sanders)། རང་ལོ་ ༢༣ ཡིན་པ་ཨེ་ལེག་སི་སོན་ཌི་རི་ཡ་ (Breonna Alexsondria Moffett) བཅས་རེད་འདུག

ཨ་རིའི་སྲིད་འཛིན་རྗོ་བྷའེ་ཌིན་མཆོག་གིས། ཨ་རིའི་ཕྱོགས་ནས་དུས་སྐབས་རན་འཚམ་ཞིག་ལ་གཏོར་རྒོལ་གཏོང་མཁན་ཚོར་ལན་པོ་སློག་རྒྱུ་ཡིན་སྐོར་གསུངས་འདུག་ལ། ཨ་རིའི་རྒྱལ་སྲུང་བདེ་འཇགས་ལྷན་ཁང་ (Pentagon) གི་མགྲིན་ཚབ་པ་ས་བྷི་རི་ནཱ་སིང་ (Sabrina Singh) གིས། ད་ལན་གྱི་གཏོར་རྒོལ་དེ་ཁ་ཆེའི་ཆོས་ལུགས་ཀྱི་གསར་བརྗེའི་སྲུང་དམག་དང་། དཀྱིལ་ཤར་ཨེ་ཤ་ཡའི་རྒྱལ་ཁབ་ལེ་བྷེ་ནོན་ (Lebanon) མི་རིགས་ཀྱི་ཚོགས་པ་ (Hezbollah) ཟེར་བ་གཉིས་ཀྱིས་བྱས་པ་ཞིག་རེད། ཅེས་བརྗོད་འདུག

འདས་ལོའི་ཕྱི་ཟླ་ ༡༠ ཙེས་ ༡༧ ནས་བཟུང་ཨི་རག་ (Iraq) དང་སི་རི་ཡ་ (Syria) རུ་ཡོད་པའི་ཨ་རིའི་དམག་སྡེ་ལ་ཉུང་མཐར་དྲག་རྒོལ་ཐེངས་ ༡༦༥ ཙམ་བྱུང་ཡོད་འདུག་ལ། ཟླ་བ་སྔོན་མའི་ནང་ཨི་རན་གྱི་དམག་སྡེ་ཞིག་གི་གཏོར་རྒོལ་ཁྲོད་ཨ་རིའི་དམག་མི་གསུམ་ལ་རྨས་སྐྱོན་བཟོས་ཡོད་སྟབས། ཨ་རིའི་དམག་གིས་ཨི་རན་གྱི་དམག་སྡེ་དེར་མཁའ་ལམ་ལྟ་ཞིབ་བརྙན་ཆས་བརྒྱུད་དྲག་རྒོལ་བྱས་པའི་གནས་ཚུལ་བྱུང་ཡོད་འདུག ཡིན་ནའང་། འདས་ལོའི་ཕྱི་ཟླ་ ༡༠ ཚེས་ ༧ ཉིན་པ་ལི་སི་ཐན་གྱི་ཧ་མ་སི་དམག་དཔུང་གིས་གློ་བུར་དུ་ཨི་ཟི་རལ་གྱི་སྟེང་དུ་དྲག་རྒོལ་བྱས་ཏེ། ཨི་ཟི་རལ་དང་ཧ་མ་སི་གཉིས་བར་ས་མཚོ་གནམ་གསུམ་གྱི་ཐོག་ནས་དམག་འཁྲུག་བྱུང་མགོ་འཛུགས་པ་ནས་བཟུང་། ཁུལ་དེར་ཡོད་པའི་ཨ་རིའི་དམག་སྡེ་ཁག་ལ་འཐབ་རྒོལ་བྱས་ཡོད་ཀྱང་འཆི་སྐྱོན་གྱི་གནད་དོན་མེད་ཀྱང་། ད་ལན་གྱི་མཁའ་དབྱིངས་ལྟ་ཞིབ་བརྙན་ཆས་བརྒྱུད་འཐབ་རྒོལ་བྱས་ཏེ་ཨ་རིའི་དམག་མི་ལ་འཆི་སྐྱོན་གྱི་གནད་དོན་བྱུང་བ་ཐེངས་དང་པོ་ཡིན་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།