ཉིན་གྲངས་གསུམ་ཙམ་རིང་ཨ་རིའི་གྲོས་ཚོགས་ཀྱི་རྒྱ་ནག་ཐབས་ཇུས་ལས་དོན་ཚོགས་ཆུང་གི་ཚོགས་གཙོ་མེག་གྷ་ལ་གྷེར་ལགས་ཀྱིས་དབུ་འཁྲིད་པའི་ཨ་རིའི་གྲོས་ཚོགས་འཐུས་མི་བཞི་ལས་གྲུབ་པའི་སྐུ་ཚབ་ཚོགས་ཆུང་ཞིག་གིས་ཐའེ་ཝན་དུ་གཞུང་འབྲེལ་འཚམས་གཟིགས་གནང་བཞིན་ཡོད་པ་རེད།
ཨ་རིའི་གྲོས་ཚོགས་འོག་མའི་ཚོགས་མི་དང་གྲོས་ཚོགས་ཀྱི་རྒྱ་ནག་ཐབས་ཇུས་ལས་དོན་ཚོགས་ཆུང་གི་ཚོགས་གཙོ་མེག་གྷ་ལ་གྷེར་ (Mike Gallagher) ལགས་ཀྱིས་སྣེ་འཁྲིད་པའི་ཨ་རིའི་གྲོས་ཚོགས་འཐུས་མི་བཞི་ལས་གྲུབ་པའི་སྐུ་ཚབ་ཚོགས་ཆུང་ཞིག་ཐའེ་ཝན་ནང་གཞུང་འབྲེལ་འཚམས་གཟིགས་སུ་ཕེབས་ཏེ། ཁ་སང་ཕྱི་ཚེས་ ༢༢ ཉིན་ཐའེ་ཝན་གྱི་སྲིད་འཛིན་ལྕམ་སྐུ་ཚའེ་ཡེན་ཝན་ (Tsai Ing-Wen) མཆོག་དང་། ཐའེ་ཝན་གྱི་དཔོན་རིགས་མཐོ་གྲས་ཁག་ཅིག་དང་མཇལ་འཕྲད་གནང་སྟེ། རྒྱལ་ཁབ་གཉིས་ཀྱི་ཆབ་སྲིད་དང་ཚོང་འབྲེལ་སོགས་འབྲེལ་ལམ་ཡར་རྒྱས་གཏོང་ཐབས་དང་། རྒྱ་ནག་གཞུང་གིས་ཐའེ་ཝན་ལ་དཔལ་འབྱོར་དང་དྲག་དམག་སོགས་ཕྱོགས་མང་པོའི་ཐོག་ནས་གནོན་ཤུགས་སྤྲད་དང་སྤྲོད་མུས་ཡིན་པའི་སྐོར་ལ་གླེང་མོལ་གནང་ཡོད་འདུག
རྒྱ་ནག་ཕྱི་སྲིད་ལྷན་ཁང་གིས་གསར་འགོད་ལྷན་ཚོགས་ཤིག་གི་ཐོག ཨ་རི་དང་ཐའེ་ཝན་གྱི་དཔོན་རིགས་བར་གྱི་གཞུང་འབྲེལ་གྱི་འབྲེལ་ལམ་བསྐྲུན་བཞིན་པ་དང་། ཨ་རིས་ཐའེ་ཝན་གྱི་ནང་སྲིད་ལ་ཐེ་གཏོགས་བྱེད་པར་མཐའ་གཅིག་ཏུ་ངོ་རྒོལ་ཡོད་སྐོར་བརྗོད་འདུག
ཁ་སང་ཕྱི་ཚེས་ ༢༢ ཉིན་ཐའེ་ཝན་གྱི་རྒྱལ་ས་ཐའེ་པའེ་ (Taipei) རུ་སྐུ་ཞབས་མེག་གྷ་ལ་གྷེར་ལགས་ཀྱིས། ད་ལན་གྱི་གཞུང་འབྲེལ་འཚམས་གཟིགས་འདི་བརྒྱུད་ཨ་རིའི་ངོས་ནས་ཐའེ་ཝན་གྱི་གཟེངས་སུ་ཐོན་པའི་དམངས་གཙོའི་གནས་བབ་ལ་རྒྱབ་སྐྱོར་ཡོད་པ་སྟོན་ཆེད་དང་། འབྱུང་འགྱུར་ཨ་རིའི་རྒྱལ་ཡོངས་འོས་བསྡུའི་ནང་སྲིད་འཛིན་གྱི་རྒྱལ་ཁ་སུ་ལ་ཐོབ་པ་ཡིན་ཡང་། ཨ་རིས་ཐའེ་ཝན་ལ་སྔར་བཞིན་རྒྱབ་སྐྱོར་མུ་མཐུད་དུ་གནང་རྒྱུ་དང་། རྒྱ་ནག་གཞུང་གིས་ཆབ་སྲིད་ཀྱི་ཐོག་ནས་ཨ་རིར་གནོན་ཤུགས་ཅི་ཙམ་སྤྲད་མིན་ལ་མ་ལྟོས་པར། ཨ་རིས་ཐའེ་ཝན་ལ་རྒྱབ་སྐྱོར་གནང་རྒྱུ་ཡིན་སྐོར་ནན་བརྗོད་གནང་ཡོད་འདུག
དེ་བཞིན་ཐའེ་ཝན་གྱི་སྲིད་འཛིན་ལྕམ་སྐུ་ཚའེ་ཡེན་ཝན་མཆོག་གིས། ཨ་རིའི་གཞུང་གིས་ཐའེ་ཝན་གྱི་བདེ་འཇགས་ཀྱི་ནུས་པ་གོང་འཕེལ་དུ་གཏོང་བར་མུ་མཐུད་དུ་རོགས་རམ་གནང་བར་ཐུགས་རྗེ་ཆེ་ཞུ་རྒྱུ་ཡིན། ང་ཚོ་མཉམ་རུབ་ཀྱི་ཐོག་ནས་དམངས་གཙོ་དང་རང་དབང་སྲུང་སྐྱོབ་ཀྱིས་ཞི་བདེ་རྒྱུན་གནས་ཐུབ་པར་འབད་བརྩོན་བྱེད་ཀྱི་ཡོད་པ་རེད། ཨ་རི་དང་ཐའེ་ཝན་གཉིས་ཀྱིས་མཉམ་ལས་ནུས་པ་གོང་མཐོར་གཏང་རྒྱུ་དང་། ཕྱོགས་གཉིས་ཀྱི་འབྲེལ་ལམ་སོགས་ཡར་རྒྱས་གཏོང་བར་ཤུགས་སྣོན་གནང་རྒྱུ་ཡིན་སྐོར་སོགས་གསུངས་འདུག
ད་ལན་གྱི་འཚམས་གཟིགས་དེ་རྒྱ་ནག་དང་ཐའེ་ཝན་གཉིས་བར་གྱི་གནས་བབ་ཛ་དྲག་ཅན་གྱི་དུས་སྐབས་ཤིག་ཏུ་ཁེལ་ཡོད་པ་མ་ཟད། རྒྱལ་སྤྱིའི་གནད་དོན་དབྱེ་ཞིབ་པ་ཁག་ཅིག་གིས། ད་ལན་འཚམས་གཟིགས་གནང་བ་དེས་རྒྱ་ནག་ལ་ཁོང་ཁྲོ་སློང་གཞི་ཞིག་ཡིན་པ་དང་། ཨ་རྒྱ་གཉིས་ཀྱི་འབྲེལ་ལམ་ལ་དོ་ཕོག་འགྲོ་ངེས་ཡིན་སྐོར་རྗོད་ཀྱིན་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
