༧གོང་ས་མཆོག་གིས་ད་ལྟའི་བར་དུ་ཧུར་ཐག་འབད་ཐག་བྱས་པ་ཡིན་ལ། ད་དུང་ཡང་ལོ་བརྒྱ་ལྷག་རིང་མཁན་ཆེན་ཞི་བ་འཚོ་དང་ཁྲི་སྲོང་ལྡེའུ་བཙན་གྱི་དགོངས་པ་དང་མཐུན་པ་ཞིག་ཧུར་ཐག་གནང་དགོས་བསམ་ནས་བཞུགས་ཡོད་པའི་བཀའ་བསྩལ།
དེ་རིང་ཕྱི་ཚེས་ ༡༩ དང ༢༠ ཉིན་གཉིས་རིང་༧གོང་ས་རྒྱལ་བ་རིན་པོ་ཆེ་མཆོག་ལ་སོག་པོའི་བླ་མའི་དགེ་རྒན་གྱི་གསུང་ཆོས་གོ་སྒྲིག་ཚོགས་པས་ཇི་ལྟར་གསོལ་འདེབས་ཞུས་པ་ལྟར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དགའ་ལྡན་ལྷ་བརྒྱ་མའི་ཆོས་འབྲེལ་བཀའ་དྲིན་དབུ་འཛུགས་བསྐྱངས་སོང་།
སྐབས་དེར་༧གོང་ས་མཆོག་གིས། ང་ཚོ་རྒྱ་གར་འཕགས་པའི་ཡུལ་དུ་བཙན་བྱོལ་བ་ཆགས་ནས་སྡོད་བཞིན་པའི་སྐབས། དེ་རིང་ང་ཚོར་ཆོས་འབྲེལ་བྱེད་པའི་གོ་སྐབས་བྱུང་བ་རེད། རྗེ་རིན་པོ་ཆེའི་འཁྲུངས་ས་དང་ང་སྐྱེས་ས་ཐག་ཉེ་བོ་ཡིན་པས་ངེད་གཉིས་ཕ་ཡུལ་གཅིག་པ་རེད། རྗེ་བཙུན་བློ་བཟང་གྲགས་པ་ཞེས་གསུངས་པ་ནང་བཞིན་ངོས་ལའང་ཕལ་ཆེར་བློ་བཟང་གྲགས་པ་ལབ་ཆོག་གི་རེད།
ངོས་ཀྱི་མི་ཚེར་ཕྱིར་མིག་ཅིག་བལྟས་པ་ཡིན་ན། བསྟན་པའི་བྱ་བ་སྤྱི་དང་བྱེ་བྲག་ཏུ་བོད་གངས་ཅན་ལྗོངས་ཀྱི་བསྟན་པ་དང་འགྲོ་བའི་དོན་དུ་ཞབས་འདེགས་གང་འཚམ་བསྒྲུབས་ཡོད། འཛམ་གླིང་སྤྱི་ཡོངས་ཀྱི་ཆ་ནས་ཞུས་ན། འཛམ་གླིང་ཞི་བདེ་ཡོང་ཐབས་ཀྱི་གཙོས་འཛམ་གླིང་གི་ཁོར་ཡུག་སྲུང་སྐྱོབ་དང་། ཁ་ཡོད་ལག་ཡོད་ཀྱི་གནས་ཚུལ་ཞིག་ལ་འཛམ་གླིང་གི་ཆོས་ལུགས་ཚང་མ་མཐུན་སྒྲིལ་ཡོང་བར་བྱས་རྗེས་གང་འཚམ་བཞག་ཡོད།
འཛམ་གླིང་འདིའི་སྟེང་རྗེ་རིན་པོ་ཆེ་དང་ཕ་ཡུལ་གཅིག་པའི་ཨ་མདོ་བ་ཞིག་གིས་གཉན་འཕྲང་ཆེ་བའི་དུས་སྐབས་འདིར་དངོས་གནས་རྗེ་རིན་པོ་ཆེའི་དགོངས་པ་དང་མཐུན་པའི་ཞབས་འདེགས་གང་ལ་གང་འཚམ་བསྒྲུབས་ཡོད། ངོས་ནས་རྗེས་སུ་ཡི་རངས་ཞུ་ཡི་ཡོད་ལ། དེ་རིང་ཆོས་གྲོགས་ཚོར་དེ་ཞུ་འདོད་བྱུང་སོང་། སྤྱི་ཡོངས་ཀྱི་ཆ་ནས་ང་ཚོ་ཚང་མ་སྟོན་པ་བཅོམ་ལྡན་འདས་ཀྱི་རྗེས་འབྲང་བ་ཆགས་བསྡད་ཡོད། གཉིས་ནས་དཔལ་ན་ལནྡྲའི་ཆོས་བརྒྱུད་འཛིན་མཁན་ཆགས་ཡོད། བྱེ་བྲག་ཏུ་བོད་གངས་ཅན་ལྗོངས་སུ་ཡོད་པའི་ཟབ་ཅིང་རྒྱ་ཆེ་བའི་གནས་མཐའ་དག་ཚང་བའི་ཆོས་བརྒྱུད་ཀྱི་རྗེས་འབྲང་བ་ཆགས་བསྡད་ཡོད།
བོད་གངས་ཅན་གྱི་ལྗོངས་ལ་གཙོ་བོ་ཆོས་རྒྱལ་སྲོང་བཙན་སྒམ་པོ་དང་བྱེ་བྲག་ཏུ་ཁྲི་སྲོང་ལྡེའུ་བཙན་གྱི་ལམ་སྟོན་འོག ད་ལྟ་བར་དུ་ཧི་མ་ལ་ཡའི་རི་རྒྱུད་ཀྱི་བོད་མི་ང་ཚོ་ཚང་མ་དངོས་གནས་དྲང་གནས་ཏག་ཏག་འགྲོ་བཞིན་པ་ཆགས་ཡོད། འཛམ་གླིང་འདིའི་སྟེང་ཁྲི་སྲོང་ལྡེའུ་བཙན་གྱི་ཆོས་བརྒྱུད་འཛིན་མཁན་ང་ཚོ་བོད་པ་ཆགས་ཡོད། ངོས་རང་ལ་ཆ་བཞག་ན་རྨི་ལམ་སོགས་ལ་བལྟས་ཡོང་དུས། ངོས་ཁྲི་སྲོང་ལྡེའུ་བཙན་གྱི་སྐྱེས་པ་ཡིན་པ་གསལ་བོ་ཐོན་ཡོང་གི་འདུག རྨི་ལམ་ལའང་ངོས་ཁྲི་སྲོང་ལྡེའུ་བཙན་གྱི་སྐྱེས་པ་ཡིན་པ་མངོན་གསལ་ཡོང་གི་འདུག
ངོས་ཀྱི་ངོས་ནས་ག་ཚོད་ཐུབ་ཐུབ་ཀྱིས་ཁྲི་སྲོང་ལྡེའུ་བཙན་གྱི་ལམ་སྟོན་དགོངས་པ་གནང་བཞག་པ་དེ་ཚོ་ཉམས་པ་སོར་ཆུད་དང་མི་ཉམས་གོང་འཕེལ་ཡོང་བར་གང་ཐུབ་ཅི་ཐུབ་ཀྱིས་འབད་བརྩོན་གནང་གི་ཡོད། ཁྱེད་ཚོ་མི་མང་ལ་ཆ་མཚོན་ན། ངོས་ལ་ཡིད་ཆེས་བྱས་ཏེ་ངོས་ཀྱི་རེ་འདུན་དང་བསམ་ཚུལ་བཏོན་བཞག་པ་དེ་ཚོར་ཡིད་ཆེས་བློས་འགེལ་ནས་འགྲོ་བཞིན་ཡོད། ཐུགས་རྗེ་ཆེ་ཞུ་རྒྱུ་ཡིན།
ང་ཚོ་བོད་གངས་ཅན་གྱི་ལྗོངས་སུ་མཁན་ཆེན་ཞི་བ་འཚོ་དང་གཙོ་ཆེ་ཤོས་མགོན་པོ་ཀླུ་སྒྲུབ་དང་འཕགས་པ་ཐོགས་མེད་སོགས་ཀྱི་ཆོས་ལུགས་བརྒྱུད་ནས་ཡོད་པའི་བསམ་བློའི་འགྲོ་སྟངས་དེ་དག་ཚན་རིག་དང་མཐུན་པ། བསམ་བློ་རྒྱ་ཆེ་ཞིང་གུ་ཡངས་པ། འཛམ་གླིང་གི་དངོས་ཡོད་ཀྱི་དཀའ་ངལ་སེལ་བར་ཁ་ཡོད་ལག་ཡོད་ཀྱིས་ཕན་ཐོགས་ཀྱིན་ཡོད། ངོས་མཁན་ཆེན་ཞི་བ་འཚོའི་རྗེས་འབྲང་བ་ཆགས་བསྡད་ཡོད་ལ། ཆོས་རྒྱལ་ཁྲི་སྲོང་ལྡེའུ་བཙན་གྱི་སྐྱེས་པ་ཡིན་པ་གསལ་བོ་ཞེ་དྲགས་ཡོང་གི་འདུག དེར་བརྟེན། ད་ལྟའི་བར་དུ་ངོས་ནས་ཧུར་ཐག་འབད་ཐག་བྱས་པ་ཡིན་ལ། ད་དུང་ཡང་ལོ་བརྒྱ་ལྷག་མཁན་ཆེན་ཞི་བ་འཚོ་དང་ཁྲི་སྲོང་ལྡེའུ་བཙན་གྱི་དགོངས་པ་དང་མཐུན་པ་ཞིག་ཧུར་ཐག་བྱེད་དགོས་བསམ་ནས་བསྡད་ཡོད། ཁྱེད་རང་ཚོ་ཚང་མས་དེ་ལུགས་ཀྱིས་ཐུགས་སྨོན་ཡག་པོ་གནང་རོགས། ཞེས་གསུངས།
གསར་འགོད་པ། དོན་གྲུབ་བཀྲ་ཤིས། སྐལ་བཟང་སྦྱིན་པ།
