བོད་ཀྱི་ཆབ་སྲིད་བཙོན་ཟུར་ཁག་ཅིག་ནས་རྒྱ་ནག་གཞུང་གི་བཙོན་འོག་ཏུ་མནར་གཅོད་མྱོང་བཞིན་པའི་བོད་ནང་གི་ཆབ་སྲིད་བཙོན་པ་དང་བཙོན་ཟུར་གྱི་གནས་སྟངས་སྐོར་ནས་གཏམ་བཤད་གནང་སོང་།
དེ་རིང་སྔ་དྲོའི་ཆུ་ཚོད་ ༡༠།༡༥ ཙམ་ལ་དྷ་ས་ས་གནས་མགོ་འཛིན་ལས་ཁུངས་ཀྱི་ཚོགས་ཁང་དུ། བོད་ཀྱི་འགྲོ་བ་མིའི་ཐོབ་དང་མང་གཙོ་འཕེལ་རྒྱས་ལྟེ་གནས་ཁང་དང་། བོད་ཀྱི་གཞོན་ནུ་ལྷན་ཚོགས། བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ་བཅས་ཀྱི་གོ་སྒྲིག་འོག རྒྱལ་སྤྱིའི་མནར་གཅོད་འགོག་རྒོལ་ཉིན་མོ་ཐེངས་ ༣༧ པ་གཙི་སྲུང་ཞུས་སོང་། སྐབས་དེར་ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་དང་། དགེ་བཤེས་ངག་དབང་བདེ་ལེགས་ལགས། བློ་བཟང་ཡོན་ཏན་ལགས། དགེ་འདུན་རིན་ཆེན་ལགས་དང་། ཤེས་རབ་རྒྱ་མཚོ་ལགས་བཅས་དང་། དེ་བཞིན་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་བཅས་འཛོམས་འདུག
རྒྱལ་སྤྱིའི་མནར་གཅོད་འགོག་རྒོལ་ཉིན་མོའི་གལ་གནད་སྐོར་ལ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་ཀྱིས། རྒྱལ་སྤྱིའི་མནར་གཅོད་འགོག་རྒོལ་ཉིན་མོ་ནི་རྒྱལ་སྤྱིའི་ནང་མནར་གཅོད་མྱོང་བཞིན་པའི་མི་རྣམས་ལ་རྒྱབ་སྐྱོར་མཚོན་སླད་གཙི་སྲུང་བྱེད་བཞིན་ཡོད་ཅིང། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཉིན་མོ་འདི་གཙི་སྲུང་བྱེད་དགོས་པ་ཧ་ཅང་གལ་ཆེན་པོ་མཐོང་གི་འདུག བོད་ཀྱི་འཐབ་རྩོད་ཀྱི་ལོ་རྒྱུས་ནང་བོད་པའི་ཆབ་སྲིད་བཙོན་པ་ཧ་ཅང་མང་པོ་ཞིག་གིས་རང་ཉིད་ཀྱི་ཡོད་ཚད་བློས་གཏང་བྱས་ཏེ་འཐབ་རྩོད་བྱས་ཡོད། རྒྱ་གཞུང་གི་བཙོན་ཁང་ནང་གདུག་རྩུབ་མནར་གཅོད་མྱངས་ཡོད་པར་གདུང་སེམས་མཉམ་བསྐྱེད་ཞུ་བཞིན་ཡོད་ལ། བོད་པའི་སྤྱི་ཚོགས་ནང་དུ་མི་རབས་གཞོན་པར་མི་རབས་རྒན་པས་སྐུ་ལས་བསྐྱོན་པ་གོ་རྟོགས་སྤེལ་བ་དང་། སེམས་ཤུགས་སྤར་བ། དེ་བཞིན་བོད་པའི་སྤྱི་ཚོགས་ནང་མཐུན་སྒྲིལ་ཡོང་བའི་དམིགས་ཡུལ་ཞིག་ཀྱང་ཡིན། ཉིན་མོ་འདི་བརྒྱུད་ནས་མནར་གཅོད་མྱོང་བཞིན་པའི་བོད་ཀྱི་ཆབ་སྲིད་བཙོན་པ་རྣམས་ལ་རྒྱ་གཞུང་གི་དྲང་བདེན་གྱི་ཐག་གཅོད་བྱ་དགོས་པའི་གནོན་ཤུགས་སྤྲད་རྒྱུ་གལ་ཆེན་པོ་རེད། ཅེས་བརྗོད་བྱུང་།
ཡང་ཁོང་མོས། དེ་རིང་ཉིན་མོ་འདི་དང་བསྟུན་ནས་ང་ཚོས་མཚན་རྟགས་བསྡུ་རུབ་ཅིག་བྱེད་བཞིན་ཡོད། བོད་ཀྱི་ཆབ་སྲིད་བཙོན་པའི་ལོ་རྒྱུས་ནང་སྤྲུལ་སྐུ་བསྟན་འཛིན་དགེ་ལེགས་རིན་པོ་ཆེ་མཆོག་ཧ་ཅང་གལ་གནད་ཀྱི་མི་སྣ་ཞིག་ཆགས་ཡོད། ཕྱི་ལོ་ ༢༠༡༥ ལོར་ཁོང་རྒྱ་གཞུང་གི་བཙོན་ཁང་ནང་འདས་གྲོངས་སུ་ཕྱིན་ཏེ། ད་ལྟའི་བར་ལོ་ངོ་ ༡༠ ཙམ་འགྲོ་བཞིན་ཡོད་ཀྱང་། རྒྱ་གཞུང་གིས་དེའི་སྐོར་ནས་གསལ་ཁ་གང་ཡང་བྱས་མེད། རྒྱ་ནག་གཞུང་གིས་རྒྱལ་སྤྱིའི་མནར་གཅོད་འགོག་རྒོལ་ལ་ངོས་ལེན་བྱས་ཏེ་མཚན་རྟགས་བརྒྱབ་ཡོད་དུས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་གཙོས་བཙོན་ཁང་ནང་འདས་གྲོངས་སུ་ཕྱིན་པའི་བོད་ཀྱི་ཆབ་སྲིད་བཙོན་པའི་གནས་སྟངས་ཕྱི་གསལ་ནང་གསལ་བཟོ་དགོས་པ་འབོད་སྐུལ་ཞུ་བཞིན་ཡོད། དེ་བཞིན་ཉིན་གྲངས་ཉི་ཤུའི་རིང་སྤྱི་ཚོགས་དྲ་ལམ་བརྒྱུད་དེ་བོད་ཀྱི་བཙོན་པ་མང་པོའི་གནས་སྟངས་སྐོར་ནས་གོ་རྟོགས་སྤེལ་བཞིན་ཡོད། ཅེས་བརྗོད་བྱུང་།
ཆབ་སྲིད་བཙོན་ཟུར་དགེ་བཤེས་ངག་དབང་བདེ་ལེགས་ལགས་ཀྱིས། རྒྱ་གཞུང་གིས་བོད་ས་ཡོངས་རྫོགས་བཙན་བཟུང་བྱེད་མགོ་བཙུགས་སྐབས། ཁོང་གི་སྤོ་ལགས་ཀྱིས་རྒྱ་གཞུང་གིས་བཙན་བཟུང་ལ་ངོ་རྒོལ་བྱས་ཏེ་འདས་གྲོངས་སུ་གྱུར་བ་དང་། ཁོང་གི་ཨ་མ་ལགས་ལ་སྤོ་ལགས་ཀྱི་ཉེས་མིང་འོག་ནས་གྲལ་རིམ་གྱི་ཞྭ་མོ་གཡོགས་ཏེ་མནར་གཅོད་ཚད་མེད་བྱས་པའི་འོག་འཚར་ལོངས་བྱུང་བའི་མི་རབས་གསུམ་པ་ཆགས་ཡོད་ཅིང་། བོད་ཀྱི་རྒྱལ་ས་ནས་མི་རབས་གསར་པས་རྒྱ་གཞུང་གི་སྲིད་ཇུས་ལ་ངོ་རྒོལ་བྱས་ཏེ་བཙོན་ཁང་ནས་མནར་གཅོད་མྱོང་མཁན་ཞིག་ཆགས་ཡོད། ཅེས་བརྗོད་སོང་།
ཆབ་སྲིད་བཙོན་ཟུར་དགེ་འདུན་རིན་ཆེན་ལགས་ཀྱིས། ཕྱི་ལོ་ ༡༩༨༥ ལོར་ང་རང་ལྷ་སར་སླེབས་ཅིང་། ཕྱི་ལོ་ ༡༩༩༥ ལོར་ཕྱི་ལོགས་སུ་ཡོང་བ་རེད། དེའི་བར་དུ་ངས་སྣེ་ཤན་པའི་ལས་ཀ་ལོ་དྲུག་ཙམ་བྱས་པ་རེད། གོ་སྐབས་དེ་བརྒྱུད་ནས་གང་ཐུབ་ཅི་ཐུབ་ཀྱིས་བོད་དོན་སྐོར་གྱི་གནས་ཚུལ་ཁྱབ་སྤེལ་བྱས་པ་ཡིན། རྒྱ་གཞུང་གི་སྲིད་ཇུས་འོག་ནས་གནས་ཚུལ་ཁྱབ་སྤེལ་ཕྱི་གསལ་ནང་གསལ་བྱས་ཐུབ་མེད། ངས་བོད་དོན་ཁྱབ་བསྒྲགས་བྱས་པ་དེ་རྒྱུ་དང་རྐྱེན་ལ་བརྟེན་ནས་བྱུང་བ་ཞིག་རེད་ལ། རྒྱ་གར་ནས་སྒེར་གྱི་འཚོ་བའི་དོན་དུ་ལས་ཀ་བྱེད་མཁན་ཞིག་ལས་འཇོན་ཐང་ཅན་གང་ཡང་མ་རེད། ངས་ལས་ཀ་ཏོག་ཙམ་བྱས་པ་དེ་ཧ་ཅང་གི་གོ་སྐབས་ཡག་པོ་རེད་བསམ་གྱི་འདུག ཅེས་བརྗོད་སོང་།
ཆབ་སྲིད་བཙོན་ཟུར་ཤེས་རབ་རྒྱ་མཚོ་ལགས་ཀྱིས། རྒྱ་གཞུང་གིས་ནམ་རྒྱུན་སྤྱི་ཚོགས་འཆམ་མཐུན་དང་། ཆོས་ལུགས་འཆམ་མཐུན། རང་དབང་། ཐོབ་ཐང། འདྲ་མཉམ་བཅས་དྲིལ་བསྒྲགས་བྱས་ཏེ། དམངས་གཙོའི་ཐོབ་ཐང་གཏོར་བཤིག་གཏོང་བཞིན་ཡོད་པ་མ་ཟད། ཉེ་ཆར་རྒྱ་ནག་གི་སྲིད་འཛིན་ཞི་ཅིན་ཕིང་བོད་ཀྱི་མཚོ་སྔོན་ཁུལ་དུ་ཡོང་ནས་མི་རིགས་འཆམ་མཐུན་དང་། ཆོས་ལུགས་སྲུང་སྐྱོབ། མཚོ་བོད་མཐོ་སྒང་གི་ཁོར་ཡུག་སྲུང་སྐྱོབ་སོགས་ཀྱི་དྲིལ་བསྒྲགས་ཤུགས་ཆེན་བྱས་ཡོད་པ་རེད། དོན་དངོས་ཐོག་རྒྱ་གཞུང་ལ་དམངས་གཙོ་གླེང་བའི་ཐོབ་ཐང་རྩ་བ་ནས་ཉིད་མེད། ཅེས་བརྗོད་སོང་།
དེ་བཞིན་ཆབ་སྲིད་བཙོན་ཟུར་བློ་བཟང་ཡོན་ཏན་ལགས་དང་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་གཉིས་ཀྱིས། རྒྱ་གཞུང་གི་བཙོན་འོག་ཏུ་ལོ་མང་དཀའ་སྡུག་མྱངས་བའི་རང་ཉིད་ཀྱི་ཉམས་མྱོང་དང་སྦྲགས། རྒྱ་གཞུང་གིས་བོད་ནང་དུ་ཁྲིམས་མེད་ལུགས་མེད་ཀྱི་སྲིད་ཇུས་སྣ་ཚོགས་སྤེལ་བཞིན་ཡོད་པས། བཙན་བྱོལ་ནང་གི་བོད་མི་ཚོས་མཐུན་སྒྲིལ་རྡོག་རྩ་གཅིག་སྒྲིལ་བྱ་དགོས་སྐོར་འབོད་སྐུལ་གནང་སོང་།
གསར་འགོད་པ། བྱམས་པ་ཚེ་རིང་། ཚེ་རིང་རྣམ་རྒྱལ།
རྩོམ་སྒྲིག་པ། པདྨ་མཚོ།
