བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་འཚོགས།

བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་ཐེངས་བཅུ་བདུན་པ་འཚོགས་ཏེ་སྐབས་བདུན་པའི་རྒྱུན་ལས་གསར་འདེམས་བྱ་རྒྱུ་ཡིན་འདུག

དེ་རིང་དྷ་ས་ས་གནས་མགོ་འཛིན་གྱི་ཚོགས་ཁང་དུ་བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་ཐེངས་བཅུ་བདུན་པ་འཚོགས་སོང་། སྐབས་དེར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་འབྱོར་ལས་ཁུངས་ཀྱི་དྲུང་ཆེ་ཚེ་རིང་དོན་གྲུབ་ལགས་དང་། བོད་མིའི་ཚོང་ལས་བདེ་ཚོགས་ཀྱི་ཚོགས་གཙོ་བཀྲ་ཤིས་དབང་འདུས་ལགས། དྷ་ས་ས་གནས་མགོ་འཛིན་དང་། ཚོང་ལས་བདེ་ཚོགས་ཀྱི་ཚོགས་མི་བཅས་འཛོམས་འདུག

ཐོག་མར་བོད་མིའི་ཚོང་ལས་བདེ་ཚོགས་ཀྱི་ཚོགས་གཙོ་བཀྲ་ཤིས་དབང་འདུས་ལགས་ཀྱིས། བོད་མིའི་ཚོང་ལས་བདེ་ཚོགས་ཀྱི་འདས་པའི་ལོ་གཅིག་རིང་གི་ལས་བསྡོམས་སྙིང་བསྡུས་ངོ་སྤྲོད་གནང་བ་དང་། ཕྱི་ལོ་ ༢༠༠༥ ལོར་བཀའ་ཤག་གིས་རྒྱ་གར་གྱི་ཁྲིམས་མཐུན་འོག་གཞུང་འབྲེལ་མིན་པའི་བོད་མིའི་ཚོང་ལས་བདེ་ཚོགས་གསར་འཛུགས་གནང་ཡོད་པ་དང་། ད་ལྟའི་ཆར་བལ་ཡུལ་ནས་ཚོགས་མི་ ༦༠ ཙམ་དང་རྒྱ་གར་ནང་ཚོགས་མི་ ༧༠ ཙམ་ཡོད་ཅིང་། ད་བར་ཚོང་ལས་བདེ་ཚོགས་ཀྱིས་ལོ་ལྟར་བོད་མི་ཚོང་པ་ཁག་ཅིག་ལ་ཚོང་ལས་དང་འབྲེལ་བའི་ཟབ་སྦྱོང་སྤྲད་དང་སྤྲོད་མུས་ཡིན་སྐོར་སོགས་བརྗོད་གྲུབ་མཚམས། བོད་མིའི་ཚོང་ལས་བདེ་ཚོགས་ཀྱི་དངུལ་གཉེར་བ་ནས་ལོ་འཁོར་དངུལ་རྩིས་སྙན་སྒྲོན་གནང་སོང་།

དེ་ནས་སྐུ་མགྲོན་གཙོ་བོ་དཔལ་འབྱོར་དྲུང་ཆེ་ཚེ་རིང་དོན་གྲུབ་ལགས་ཀྱིས། བོད་མིའི་ཚོང་ལས་བདེ་ཚོགས་ཀྱི་སྒྲིག་འཛུགས་འདི་སྲ་བརྟན་དུ་གནས་པར་ལེགས་སྐྱེས་གང་འདྲ་ཕུལ་དགོས་པ་དང་། ཚོགས་མིའི་ངོས་ནས་ག་རེ་གནང་དགོས་ཀྱི་འདུག སྒྲིག་འཛུགས་བཙུགས་རྗེས་དེའི་ལས་དོན་ལམ་ལྷོངས་མ་བྱུང་ན་ཚོགས་མི་ཡོངས་ཀྱི་ལས་དོན་ལམ་ལྷོངས་མི་འབྱུང་བ་དང་གཅིག་པ་རེད། དེར་བརྟེན་སྒྲིག་འཛུགས་སྲ་བརྟན་དང་ཡུན་གནས་ཐུབ་པར་ཚོགས་མི་ཡོངས་ཀྱིས་སྤྱི་པ་གལ་ཆེ་བར་བརྩིས་ནས་སྤྱི་པའི་སྒྲིག་འཛུགས་ཚད་ལྡན་བཟོ་དགོས་གལ་ཆེ་སྐོར་དང་། ད་ལྟའི་བོད་མི་སྤྱི་ཡོངས་ཀྱི་གནས་སྟངས་བལྟས་ན། ད་ལྟའི་ཆར་རྒྱ་གར་ནང་བོད་མི་ཉུང་དུ་འགྲོ་ཡི་ཡོད་པ་དང་། ལོ་ངོ་བཅུའི་རྗེས་སུ་རྒྱ་གར་ནང་གི་བོད་མི་ཇེ་ཉུང་དུ་འགྲོ་ཉེན་ཆེ་བར་བརྟེན། གཞིས་ཆགས་ཁག་ཏུ་མི་གནས་ཐུབ་ཐབས་སུ་འཚོ་བའི་མཐུན་རྐྱེན་ཡར་རྒྱས་གཏོང་བའི་ལས་འཆར་འདྲ་མིན་སྤེལ་དགོས་པ་དང་། གཞོན་སྐྱེས་རྣམས་ཀྱི་ཚོང་གི་ནུས་པ་གོང་མཐོར་གཏོང་གལ་ཆེ་སྐོར། དེ་བཞིན་སྒྲིག་འཛུགས་གང་འདྲ་ཞིག་ཡིན་རུང་རྒྱ་གར་གྱི་ཁྲིམས་དང་སྒྲིག་གཞི་ལ་ཉམས་ལེན་ལེགས་པོ་གནང་ནས་ཁྲིམས་དང་མཐུན་པའི་ཐོག་ནས་ཚོང་ལས་བརྒྱག་དགོས་པ་དང་། དཔྱ་ཁྲལ་དང་དེབ་སྐྱེལ་བྱེད་སྟངས་སོགས་དང་འབྲེལ་བའི་གོ་རྟོགས་དང་ལས་གཞི་གང་མང་སྤེལ་དགོས་སྐོར་སོགས་བརྗོད་སོང་།

ཉིན་རྒྱབ་ཏུ་བོད་མིའི་ཚོང་ལས་བདེ་ཚོགས་ཀྱི་ལོ་འཁོར་དངུལ་རྩིས་ཐོག་བགྲོ་གླེང་བྱ་རྒྱུ་དང་། ལོ་རྗེས་མའི་འགྲོ་གྲོན་བཀའ་ཁྲོལ་གནང་རྒྱུ། དེ་བཞིན་སྐབས་བདུན་པའི་བོད་མིའི་ཚོང་ལས་བདེ་ཚོགས་ཀྱི་རྒྱུན་ལས་གསར་འདེམས་བྱ་རྒྱུ་བཅས་རེད་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། སྐལ་བཟང་སྦྱིན་པ།