འཛམ་གླིང་གི་རྐང་སྤོལ་རྩེད་འགྲན་ཆེན་པོ་གཉིས་མཇུག་བསྡུས།

དེ་རིང་ཕྱི་ཟླ ༧ ཚེས་ ༡༥ ཉིན་འཇར་མན་དུ་བསྡུས་པའི་རྒྱལ་སྤྱིའི་ཡུ་རོབ་སྐྱེས་པའི་རྐང་རྩེད་སྤོ་ལོའི་འགྲན་ཚོགས་(UEFA Euro 2024) ཀྱི་རྟིང་རྩོད་རྒྱལ་ཁ་དེ་སི་པན་རུ་ཁག་གིས་བླངས་ཡོད་པ་དང་། ཨ་རིར་བསྡུས་པའི་རྒྱལ་སྤྱིའི་ཁོ་པ་ཨ་མེ་རི་ཁ་རྐང་རྩེད་སྤོ་ལོའི་འགྲན་ཚོགས་ (2024 Copa América) དེ་སླར་ཡང་ཨན་ཇན་ཊི་ན་ཡིས་བཀྱགས་སོང་།

འདི་ལོའི་ཡུ་རོབ་རྩེད་འགྲན་ཁྲོད། རང་ལོ་བཅུ་བདུན་ཡིན་པའི་ཡ་མལ་(Yamal) ལ་རྩེད་འགྲན་པ་ལོ་ན་ཆུང་ཤོས་ཀྱི་བྱ་དགའ་ཐོབ་ཡོད་པ་དང་། སི་པན་རུ་ཁག་གི་བར་སྲུང་བ་རོ་ཌི་(Rodri) ལ་ཕུལ་བྱུང་རྩེད་འགྲན་པའི་བྱ་དགའ། ཧྥ་རན་སིའི་སྒོ་ར་བ་མེ་ཡ་ཀི (Mike Maignan) ལ་སྒོ་ར་བ་ཡག་ཤོས་ཀྱི་བྱ་དགའ་བཅས་ཐོབ་སོང་། དེ་བཞིན་འདི་ལོའི་ཁོ་པ་ཨ་མེ་རི་ཁའི་རྐང་རྩེད་སྤོ་ལོའི་འགྲན་ཚོགས་ཁྲོད། ཨར་ཇན་ཊི་ནའི་སྒོ་ར་བ་མ་ཊི་ནོ་སི་( Emiliano Martínez) ལ་སྒོ་ར་བ་ཡག་ཤོས་དང་།  ཨར་ཇན་ཊི་ནའི་རྩེད་འགྲན་པ་ཧྥ་ནན་ཌ་སི་མ་ཊི་ན་སི་(Martinez) སྤོ་ལོ་མང་ཤོས་ལྡུག་མཁན།  ཁོ་ལོམ་བྷི་ཡའི་རུ་དཔོན་ཇེམ་སི་(James Rodriguez) ལ་ཕུལ་བྱུང་རྩེད་འགྲན་པའི་བྱ་དགའ་བཅས་ཐོབ་སོང་།

སྤྱིར་མེ་སི་ཡིས་སྣེ་ཁྲིད་པའི་རུ་ཁག་གིས་འདི་ལོར་སླར་ཡང་ཁོ་པ་ཨ་མེ་རི་ཁའི་རྩེད་འགྲན་ལས་རྣམ་པར་རྒྱལ་ཡོད་ཀྱང་། ཁོའི་རྐང་པར་རྨས་སྐྱོན་ཐེབས་ནས་རྩེད་འགྲན་གཅིག་གི་ནང་མཉམ་ཞུགས་ཐུབ་མེད་པའི་ཁར། དེ་རིང་རྟིང་རྩོད་ཁྲོད་སླར་ཡང་རྐང་པར་རྨས་སྐྱོན་ཐེབས་ནས་སྐར་མ་དྲུག་ཅུ་རེ་དྲུག་སྟེང་རྩེད་འགྲན་ལས་བུད་དགོས་ཁེལ་ཡོད་པ་རེད། ཉེ་ལམ་ཧྥོག་སི་རྩེད་རིགས་ (Fox Sports) གསར་ཁང་གིས་གནས་ཚུལ་སྤེལ་བའི་ནང་། མེ་སི་ཡི་ད་ལྟའི་གཟུགས་པོའི་གནས་བབ་དང་། རྐང་སྤོལ་སྒྱུ་རྩལ། དེ་བཞིན་རྩེད་འགྲན་ཁག་གི་གནས་བབ་བཅས་དང་། ལྷག་པར་༢༠༢༦ ལོའི་རྒྱལ་སྤྱིའི་རྐང་སྤོལ་འགྲན་ཚོགས་སྐབས་ཁོང་ལོ་ ༣༩ ལས་མིན་པས། ཁོས་འདི་ལོའི་ཁོ་པ་ཨ་མེ་རི་ཁའི་རྩེད་འགྲན་ཙམ་དུ་མ་ཟད། ཕྱི་ལོ་ ༢༠༢༦ ལོར་མེག་སི་ཁོ་དང་། ཨ་རི། ཁེ་ན་ཌ་བཅས་མཉམ་རུབ་ཀྱིས་གོ་སྒྲིག་བྱ་རྒྱུའི་རྒྱལ་སྤྱིའི་སྐྱེས་པའི་རྐང་སྤོལ་རྩེད་འགྲན་ཁྲོད་དུའང་ཞུགས་རྒྱུ་ཡིན་པའི་ཚོད་དཔག་བྱས་འདུག

འཛམ་གླིང་རྩེད་རིགས་དཔྱད་བརྗོད་སྤེལ་ས་ (sportskeeda )  ཟེར་བ་ཞིག་གིས་འདི་ལོའི་ཁོ་པ་ཨ་མེ་རི་ཁའི་རྐང་སྤོལ་ཐད་ལ་དཔྱད་བརྗོད་ཅིག་བྱས་པའི་ནང་། ཐོག་མའི་རྩེད་འགྲན་གྱི་རིམ་པ་དང་། རྩེད་འགྲན་པ་རྣམས་ཀྱི་ནུས་རྩལ་དང་དྲག་འདེམས་ཀྱི་རིམ་པ། རུ་ཁག་སྤྱི་ཡོངས་ཀྱི་རྩེད་འགྲན་པ་རྣམས་ལ་གཞིགས་ན། འདི་ལོའི་ཁོ་པ་ཨ་མེ་རི་ཁའི་རྩེད་འགྲན་དེ་ཐེངས་སྔ་མའི་རྩེད་འགྲན་དེའི་གསེར་འབུམ་བཀྱག་མཁན་ཨར་ཇན་ཊི་ལ་འཐོབ་རྒྱུའི་རེ་བ་བྱས་ཡོད་ལ། འདི་ལོའི་ཡུ་རོབ་རྐང་སྤོལ་འགྲན་ཚོགས་དེ་དབྱིན་ཡུལ་ལ་བརྒྱ་ཆ་ ༡༩།༩ དང་སི་པན་ལ་ ༩།༦ ལས་ཐོབ་རེ་བྱས་མེད་ཀྱང་། སི་པན་རུ་ཁག་གིས་རྣོ་ངར་ཆེན་པོས་རྩེད་འགྲན་བྱས་མཐར་རྣམ་པར་རྒྱལ་ཡོད་ཅིང་། རྩེད་རིགས་ཆེད་མཁས་པ་རྣམས་ཀྱིས། དྲ་ཐོག་སོགས་སུ་རྐང་རྩེད་དང་འབྲེལ་བའི་གནད་དོན་མང་པོ་ཞིག་དབྱེ་ཞིབ་དང་ཚ་གླེང་བྱས་ཡོད་ཀྱང་།  མཚམས་ལན་རེར་བསམ་ཡུལ་ལས་འདས་པའི་གྲུབ་འབྲས་ཀྱང་ཐོན་གྱི་ཡོད་པ་རེད།

ཕྱི་ལོ་ ༡༩༢༨ ལོར་ཡུ་རོབ་འཛམ་གླིང་རྐང་སྤོལ་འགྲན་ཚོགས་ཀྱི་མྱུ་གུ་ཐོག་མར་འབུས་ཡོད་ཀྱང་། ཕྱི་ལོ་ ༡༩༦༠ ལོར་རྩེད་འགྲན་ཐོག་མ་བྱེད་མགོ་བཙུགས། དེ་ནས་བཟུང་ལོ་བཞི་རེའི་མཚམས་སུ་ལོ་ལྟར་རྩེད་འགྲན་དེ་བསྡུ་ཡི་ཡོད་ལ། ཡུ་རོབ་ཀྱི་རྒྱལ་ཁབ་འཇར་མན་ལ་ཐེངས་གསུམ་དང་། སི་པན་ལ་ཐེངས་བཞི། ཧྥ་རན་སི་ལ་ཐེངས་གཉིས། ཨི་ཊ་ལི་ཐེངས་གཉིས་བཅས་ཀྱི་རྒྱལ་ཁ་ཐོབ་འདུག དེ་བཞིན་ཕྱི་ལོ་ ༢༠༢༨ ལོའི་ཡུ་རོབ་ཀྱི་རྐང་སྤོལ་འགྲན་ཚོགས་དེ་དབྱིན་ཡུལ་དང་།  ཨ་རི་ལེན་ཌི་དང་། ཕྱི་ལོ་ ༢༠༣༢ ལོར་ཨི་ཊ་ལི་དང་། ཏུར་ཀི་བཅས་ཀྱིས་གོ་སྒྲིག་བྱ་རྒྱུ་ཡིན་འདུག

ཕྱི་ལོ་ ༡༩༡༦ ཙམ་ནས་ཁོ་པ་ཨ་མེ་རི་ཁའི་རྩེད་འགྲན་ཐོག་མར་རྩེ་མགོ་བཙུགས་ཡོད་ཅིང་།  དེ་ནས་བཟུང་ལོ་བཞི་རེའི་མཚམས་སུ་ལོ་ལྟར་རྩེད་འགྲན་དེ་བསྡུ་ཡི་ཡོད་ལ། རྩེད་འགྲན་དེའི་ཁྲོད་ཨར་ཇན་ཊི་ན་དང་། ཡུ་རོ་གྷེ་གཉིས་ཀྱིས་ཐེངས་བཅོ་ལྔ་དང་། བྷི་ར་ཛིལ་ལ་ཐེངས་དགུ་ལ་རྟིང་རྩོད་འགྲན་ཚོགས་ལ་རྣམ་པར་རྒྱལ་ཡོད་ཅིང་། ཕྱི་ལོ་ ༢༠༢༨ ལོའི་རྩེད་འགྲན་དེ་པ་ན་མ་རྒྱལ་ཁབ་ཀྱིས་གོ་སྒྲིག་བྱ་རྒྱུ་ཡིན་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།