ཨ་རིས་ཁེ་ལས་ཁང་ ༤༠༠ ཙམ་བཀག་སྡོམ་བྱས་པར་རྒྱ་ནག་གིས་དགག་ལན་བསློགས།

ཨུ་རུ་སུར་དམག་དོན་དང་འབྲེལ་བའི་ཚོང་རྫས་མཐུན་འགྱུར་བྱེད་མུས་ཡིན་པའི་རྒྱ་ནག་དང་རྒྱལ་སྤྱིའི་ཚོང་དོན་ཁེ་ལས་ཁང་ ༤༠༠ མ་ཟིན་ཙམ་གྱི་ཚོང་བསྒྱུར་ལས་དོན་བཀག་སྡོམ་བྱས་འདུག

A man walks past U.S. and Chinese flags on the day of a meeting between U.S. Treasury Secretary Janet Yellen and People’s Bank of China Gov. Pan Gongsheng in Beijing on April 8. © Reuters

ཨུ་རུ་སུས་ཁྲིམས་མཐུན་མིན་པའི་ཐོག་ནས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་དང་འབྲེལ། ཟླ་འདིའི་ཕྱི་ཚེས་ ༢༤ ཉིན་ཨ་རིའི་ནོར་སྲིད་ལས་ཁུངས་ཀྱིས། རྒྱལ་སྤྱིའི་སྒེར་གཉེར་དང་གཞུང་འབྲེལ་ཁེ་ལས་ ༤༠༠ མ་ཟིན་ཙམ་གྱིས། ཨ་རིའི་འཕྲུལ་རིག་གློག་ཆས་རིགས་ཨུ་རུ་སུར་མཁོ་འདོན་བྱས་ཏེ་མུ་མཐུད་ཡུ་ཁེ་རིན་ལ་བཙན་འཛུལ་བྱེད་པར་མཐུན་འགྱུར་བྱེད་མུས་ཡིན་པ་བཀག་སྡོམ་བྱས་ཡོད་ཅིང་། ཚོང་རྫས་བཀག་སྡོམ་བྱས་པའི་ཁྲོད་གཙོ་བོ་ཨུ་རུ་སུ་དང་རྒྱ་ནག་དང་། དེ་བཞིན་ཡུ་རོབ་དང་ཨེ་ཤ་ཡའི་རྒྱལ་ཁབ་གཞན་ཁག་ཅིག དཀྱིལ་ཤར་ཡུལ་གྲུའི་རྒྱལ་ཁབ་ཁག་ཅིག་བཅས་ཚུད་ཡོད་སྟབས། ཁ་སང་ཕྱི་ཚེས་ ༢༥ ཉིན་རྒྱ་ནག་ཚོང་དོན་བློན་ཆེན་ལས་ཁུངས་ཀྱིས། ཨ་རིས་རྒྱ་ནག་གི་ཁྲིམས་མཐུན་གྱི་ཁེ་ལས་ཚོང་དོན་ཐད་ལ་ཐེ་ཇུས་བྱས་པར་དགག་པ་ཤུགས་ཆེན་ཡོད་ལུགས་བཤད་འདུག

རྒྱ་ནག་ཚོང་དོན་བློན་ཆེན་ལས་ཁུངས་ཀྱིས་བསྒྲགས་གཏམ་ཞིག་སྤེལ་བའི་ནང་། ཨ་རིའི་ཕྱོགས་གཅིག་གི་ཐོག་ནས་ཚོང་དོན་གྱི་ཐག་གཅོད་ཆེན་པོ་ཞིག་བྱས་པ་དེས། རྒྱལ་སྤྱིའི་ཚོང་དོན་གྱི་ཁྲིམས་སྒྲིག་ལ་སྔར་མེད་ཀྱི་འགོག་རྐྱེན་ཆེན་པོ་ཞིག་བཟོས་པ་མ་ཟད། རྒྱལ་སྤྱིའི་བཟོ་ལས་དང་ཚོང་དོན་གྱི་བརྟན་བརླིང་ལ་ཤུགས་རྐྱེན་ཆེན་པོ་ཞིག་ཐེབས་སུ་བཅུག་པ་ཡིན། ཨ་རིས་ལུགས་མཐུན་མིན་པའི་ལག་བསྟར་དེ་དག་བྱེད་མཚམས་བཞག་ནས། རྒྱ་ནག་གི་ཁེ་ལས་ཚོང་དོན་གྱི་ཁྲིམས་མཐུན་ཐོབ་ཐང་དང་ཁེ་ཕན་ལ་སྲུང་སྐྱོབ་བྱ་དགོས། ཞེས་དང་། ཨ་རིས་རྒྱ་ནག་གི་ཚོང་དོན་ཁེ་ལས་ཁང་དེ་དག་ནས་ཨ་རིའི་ཅ་དངོས་བགོ་འགྲེམས་བྱ་མི་ཆོག་པའི་ཐོ་གཞུང་དུ་བཅུག་པར་དགག་པ་ཡོད། ཅེས་གསལ་འདུག

བྷའེ་ཌན་སྲིད་གཞུང་གིས། འཛམ་གླིང་གི་ཁེ་ལས་ཁང་ ༤༠༠ ལྷག་གིས་ཨུ་རུ་སུར་མཉམ་འབྲེལ་གྱི་ཐོག་ནས་དམག་དོན་སོགས་ཀྱི་ཐོན་རྫས་མཁོ་སྤྲོད་བྱེད་མུས་ཡིན་པ་བཀག་སྡོམ་བྱས་པའི་ཁྲོད། རྒྱ་ནག་གི་ཚོང་དོན་ཁེ་ལས་ཁང་ ༤༢ དང་། ཨུ་རུ་སུ་གཞུང་སྒེར་གཉིས་ཀྱི་ཁེ་ལས་ཁང་ ༦༣ དང་། འཛམ་གླིང་རྒྱལ་ཁབ་གཞན་ནས་ཚོང་གཉེར་ཁང་ ༡༨ བཅས་ཡོད་ཅིང་། དེ་སྔ་ཨུ་རུ་སུས་ཡུ་ཁེ་རིན་བཙན་འཛུལ་བྱེད་བཞིན་པའི་གནད་དོན་དང་འབྲེལ་ནས། ཨ་རིས་རྒྱ་ནག་གཞུང་ནས་ཨ་རུ་སུར་དམག་དོན་མཚོན་ཆ་སོགས་མཁོ་འདོན་གཏན་ནས་བྱེད་མི་ཆོག་པའི་ཉེན་བརྡ་ལན་མང་བཏང་ཡང་། རྒྱ་ནག་གཞུང་གིས་ཨུ་རུ་སུ་དང་རྒྱ་ནག་གཉིས་ཀྱི་འབྲེལ་ལམ་གཙོ་བཟུང་གིས་ཨུ་རུ་སུའི་མཐའ་སྲུང་གི་ཆེད་དུ་མཚོན་ཆ་མཁོ་འདོན་བྱེད་མུས་ཡིན་པ་ལས། ཡུ་ཁེ་རིན་ལ་བཙན་འཛུལ་གྱི་ཆེད་དུ་མིན་ལུགས་བཤད་འདུག

ཟླ་སྔོན་མའི་ཕྱི་ཚེས་ ༡༤ ཉིན་ཨ་རིའི་སྲིད་འཛིན་སྐུ་ཞབས་བྷའེ་ཌན་མཆོག་དང་ཡུ་ཁེ་རིན་གྱི་སྲིད་འཛིན་ཛ་ལེན་སི་ཀི་གཉིས་ཀྱིས། ཨ་རི་དང་ཡུ་ཁེ་རིན་གཉིས་ཀྱི་བདེ་སྲུང་གི་ཐད་ལ་མཉམ་འབྲེལ་གྱི་གྲོས་མཐུན་ལ་ས་ཡིག་བཀོད་ཡོད་ཅིང་། གྲོས་ཆོད་དེའི་ཁྲོད་མི་ལོ་བཅུའི་རིང་ཕྱོགས་གཉིས་ཀྱིས་དམག་དོན་དང་། བདེ་སྲུང་། ཚོང་དོན་སོགས་ཀྱི་ཐོག་ནས་མཉམ་ལས་བྱ་རྒྱུ་ཡིན་ཞིང་། ཨ་རིས་ཕྱོགས་ཡོངས་ནས་གཡུལ་འགྱེད་ཀྱི་ཁྲོད་མི་དམངས་ཕལ་བ་མང་དག་ཅིག་གི་འཚོ་གནས་ལ་དོ་ཕོག་ཆེན་པོ་འགྲོ་མུས་ཡིན་པའི་ཡུ་ཁེ་རིན་ལ་རོགས་འདེགས་དང་མཉམ་འབྲེལ་གྱི་ལས་དོན་སྤེལ་རྒྱུ་ཡིན་པའི་གྲོས་མཐུན་བྱུང་འདུག་ལ། དེ་བཞིན་ཉེ་ལམ་ཨ་རི་དང་ཡུ་རོབ་རྒྱལ་ཁབ་ཕལ་མོ་ཆེས་ཡུ་ཁེ་རིན་ལ་ཨ་སྒོར་ཐེར་འབུམ་ ༡༧༠ ལྷག་གི་དམན་དོན་མཚོན་ཆ་ཚུད་པའི་རོགས་འདེགས་བྱེད་མུས་ཡིན་འདུག དེ་བཞིན་ཟླ་འདིའི་ཕྱི་ཚེས་ ༢༣ ཉིན་རྒྱ་གར་གྱི་སྲིད་བློན་སྐུ་ཞབས་མུ་དྷི་མཆོག་གིས་ཡུ་ཁེ་རིན་གྱི་སྲིད་འཛིན་ཛི་ལེན་སི་ཀི་དང་ཐུག་འཕྲད་བྱས་ཏེ། ཡུ་ཁེ་རིན་དང་རྒྱ་གར་གཉིས་ཀྱིས་དོན་ཚན་སོ་གཉིས་ཅན་གྱི་མཉམ་འབྲེལ་བསྒྲགས་གཏམ་ཞིག་སྤེལ་བའི་ནང་། ཡུ་རྒྱ་གཉིས་མཉམ་ལས་ཁེ་ཕན་གཙོ་བོ་གཞི་ལ་བཟུང་ནས་ཚོང་དོན་དང་། དཔལ་འབྱོར། ཚན་རྩལ། གློག་ཆས་སོགས་ཀྱི་ཐད་ལ་ལས་དོན་གཉེར་རྒྱུ་ཡིན་སྐོར་སོགས་བཀོད་འདུག

ཟླ་འདིའི་ཕྱི་ཚེས ༨ ཉིན་ཨ་རིའི་གྲོས་ཚོགས་ཀྱི་ཞིབ་འཇུག་ལྟེ་གནས་ཁང་གིས་ཨ་རྒྱ་གཉིས་ཀྱི་ཚོང་དོན་དང་འབྲེལ་བའི་གནས་ཚུལ་ཞིག་སྤེལ་བའི་ནང་། ཕྱི་ལོ་ ༢༠༠༡ ལོར་རྒྱ་ནག་རྒྱལ་སྤྱིའི་ཚོང་གི་སྒྲིག་འཛུགས་སུ་འཛུལ་ཞུགས་བྱས་རྗེས། ཨ་རྒྱ་གཉིས་ཀྱི་ཚོང་དོན་ལ་སྔར་ལས་ལྷག་པའི་འཕེལ་རྒྱས་ཆེན་པོ་ཞིག་བྱུང་ཡོད་པ་མ་ཟད། འདས་པའི་མི་ལོ་བཅུ་ཕྲག་རིང་རྒྱ་ནག་ནི་ཨ་རིའི་ཚོང་ཤག་ཆེ་ཤོས་དེ་ཡིན་ཡང་། ཕྱི་ལོ་ ༢༠༢༣ ལོར་རྒྱ་ནག་དེ་ཨ་རིའི་ཚོང་ཤག་ཆེ་ཤོས་བཞི་པར་གྱུར་ནས། ཨ་རྒྱ་གཉིས་ཀྱིས་ཨ་སྒོར་ཐེར་འབུམ་ ༥༧༥ ལྷག་གི་ཚོང་དོན་མཉམ་ལས་བྱས་པའི་ཁྲོད། རྒྱ་ནག་གིས་ཨ་རིར་སྐྱེལ་འདྲེན་བྱས་པའི་ཅ་དངོས་ཀྱིས་ཨ་སྒོར་ཐེར་འབུམ ༢༧༩།༤ ཟིན་ཡོད་འདུག

ཕྱི་ལོ་ ༢༠༢༢ ལོར་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་སྐབས། རྒྱལ་ཁབ་མང་པོ་ཞིག་གིས་ཨུ་རུ་སུར་ཚོང་དོན་གྱི་འབྲེལ་ལམ་བཅད་པའམ་ཚོང་གི་ཉེས་ཆད་མི་ཉུང་བ་ཞིག་བཅད་ཡོད་ཀྱང་། རྒྱ་ནག་གིས་ཨུ་རུ་སུར་སྔར་ལས་ལྷག་པའི་ཚོང་དོན་གྱི་འབྲེལ་ལམ་ཤུགས་ཆེན་བཙུགས་ནས་མ་འཇོག་དང་དཔལ་འབྱོར་འཕེལ་རྒྱས་ཀྱི་ལས་དོན་གཉེར་རོགས་བྱས་ཏེ། ཨུ་སུ་རུའི་མགོ་ཁྲིད་པུ་ཌིན་གྱི་དུས་སྐབས་གསར་པ་ཟེར་བ་སྟེ། ཕྱི་ལོ་ ༢༠༢༢ ལོར་ཨུ་རུ་སུའི་ཅ་དངོས་བརྒྱ་ཆ་ ༣༦།༥ རྒྱ་ནག་ནས་དབོར་འདྲེན་བྱས་ཏེ། ལོ་དེ་གཅིག་པུར་རྒྱལ་ཁབ་དེ་གཉིས་ཀྱིས་ཨ་སྒོར་ཐེར་འབུམ་ ༡༩༠ ལྷག་གི་ཚོང་འབྲེལ་བྱས་ཡོད། ཕྱི་ལོ་ ༢༠༠༨ རྗེས་ནས་རྒྱ་ནག་དང་ཡུ་ཁེ་རིན་གཉིས་བར་ཚོང་གི་འབྲེལ་ལམ་བཟུང་ནས། ཕྱི་ལོ་ ༢༠༡༩ ལོར་རྒྱ་ནག་དེ་ཡུ་ཁེ་རིན་གྱི་ཚོང་འབྲེལ་ཆེ་ཤོས་ཀྱི་རྒྱལ་ཁབ་ཏུ་གྱུར་ཏེ་ཕྱི་ལོ་ ༢༠༢༠ ལོ་གཅིག་པུར་ཨ་སྒོར་ཐེར་འབུམ་ ༡༥།༤ ཚོང་འབྲེལ་བྱས་ཡོད་ཀྱང་། གནད་དོན་དབྱེ་ཞིབ་པ་མང་པོ་ཞིག་གིས། རྒྱ་ནག་གིས་ཡུ་ཁེ་རིན་དང་ཚོང་དོན་གྱི་འབྲེལ་ལམ་གཡུགས་ནས། ཨུ་རུ་སུ་དང་མཉམ་འབྲེལ་བྱས་ཏེ་དམག་དོན་གྱི་ནུས་པ་མཉམ་དུ་སྤུངས་ནས། མ་འོངས་པར་སྔར་ལྷག་གིས་ཨ་རིའི་ལྡོག་ཕྱོགས་སུ་ལངས་ཏེ་ཚོང་དང་དམག་དོན་གྱི་ནུས་པ་བསྐྱེད་རྒྱུའི་དམིགས་ཡུལ་འཛིན་གྱིན་ཡོད་པར་ངོས་འཛིན་བྱེད་ཀྱི་ཡོད་པ་རེད།