བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་འགན་འཛིན་དང་སྤྱི་ཁྱབ་རྩིས་ཞིབ་པ་གཉིས་ཀྱིས་ལས་ཁུར་དམ་བཅའ་ཕུལ།
བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་འགན་འཛིན་དང་སྤྱི་ཁྱབ་རྩིས་ཞིབ་པ་གཉིས་ཀྱིས་ལས་ཁུར་དམ་བཅའ་ཕུལ། བོད་ཀྱི་དུས་བབ་ཀྱིས་བསྒྲིགས། ༢༠༢༤།༨།༣༠
དེ་རིང་ཕྱི་ཟླ་ ༨ ཚེས་ ༣༠ ཉིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། སྤྱི་འཐུས་ཚོགས་གཙོས་མཁན་པོ་བསོད་ནམས་བསྟན་འཕེལ་མཆོག་གི་དབུས། སྤྱི་འཐུས་རྒྱུན་ལས་སོགས་ཀྱི་ཚོགས་བཞུགས་ཐོག བཀའ་ཟུར་ཀརྨ་ཡེ་ཤེས་ལགས་དང་། ལྷག་པ་རྒྱལ་མཚན་ལགས་གཉིས་ཀྱིས་དབུས་བོད་མིའི་སྒྲིག་འཛུགས་ཀྱི་རང་དབང་ཅན་གྱི་སྡེ་ཚན་ལས་བྱེད་འདེམས་བསྐོ་ལྷན་ཁང་དང་རྩིས་ཞིབ་ལྷན་ཁང་གི་འགན་འཛིན་གྱི་ལས་ཁུར་དམ་བཅའ་ཕུལ་སོང་།
སྐབས་དེར་བཀའ་ཟུར་ཀརྨ་ཡེ་ཤེས་ལགས་ཀྱིས་འདི་གའི་གསར་འགོད་པར། དེ་རིང་བོད་མི་མང་སྤྱི་འཐུས་ལྷན་ཚོགས་སུ་ཚོགས་གཙོ་མཆོག་གི་དྲུང་ནས་ལས་བྱེད་འདེམས་བསྐོ་ལྷན་ཁང་གི་ཚོགས་གཙོའི་ལས་ཁུར་ཞུས་ཚར་བ་ཡིན། སྤྱིར་བཏང་ལས་བྱེད་འདེམས་བསྐོ་ལྷན་ཁང་དེ་ལྷན་ཁང་གལ་ཆེ་བ་ཞིག་རེད་ལ། དེའི་ནང་ནས་རང་དབང་ཅན་གྱི་སྡེ་ཚན་ཞིག་ཆགས་ཡོད་པའི་ཁྲོད། སྲི་ཞུའི་ལས་བྱེད་པ་རྣམས་ནི་བོད་མིའི་སྒྲིག་འཛུགས་ཀྱི་སྒལ་ཚིགས་ལྟ་བུ་ཞིག་ཆགས་བསྡད་ཡོད་པས། ད་ལྟ་བོད་མིའི་སྒྲིག་འཛུགས་སུ་སྲི་ཞུའི་ལས་བྱེད་ཀྱི་ཞབས་ཕྱི་ཞུ་བའི་གོ་སྐབས་ཤིག་རག་པ་རེད། གལ་ཆེ་ཤོས་ཤིག་ནི་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་འབེབས་བྱས་པའི་ལས་བྱེད་འདེམས་ལྷན་ཀྱི་སྒྲིག་གཞི་དང་། ལས་བྱེད་འདེམས་བསྐོ་ལྷན་ཁང་གིས་གཏན་འབེབས་བྱས་པའི་ལས་བྱེད་བླང་དོར་སྒྲིག་གཞི་ཡིན་པས། སྒྲིག་གཞི་དེ་གཉིས་གཙོ་བོར་བཟུང་ནས་སྲི་ཞུ་ལས་བྱེད་རྣམས་ཀྱི་ནུས་པ་གོང་མཐོར་གཏོང་རྒྱུ་དང་། བོད་གཉན་འཕྲང་ཆེ་བའི་དུས་སྐབས་དང་ལྷག་པར་༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་མཐོ་བོར་ཕེབས་ཡོད་པས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན་ལས་ཀ་བྱ་རྒྱུ་ནི་ང་ཚོ་ཚང་མའི་འོས་འགན་ཡིན་སྟབས། ངས་སྲི་ཞུ་བ་ལས་བྱེད་ཀྱི་བདེ་སྡུག་ལ་བལྟ་རྒྱུ་དང་ནུས་པ་གོང་མཐོར་གཏོང་ཐབས། སྒྲིག་གཞིའི་དགོངས་དོན་ཧུར་ཐག་བྱ་རྒྱུའི་ཆོད་སེམས་བརྟན་པོ་ཡོད། ཅེས་བརྗོད་སོང་།
ལྷག་པ་རྒྱལ་མཚན་ལགས་ཀྱིས། མ་འོངས་པའི་རྩིས་ཞིབ་ཁང་གི་ལས་དོན་བྱེད་ཕྱོགས་དེ། མ་འོངས་པར་རྒྱུན་དུ་དོན་གཉེར་གྱིན་འདི་དང་འདི་བྱོས་ཟེར་ནས་ཧ་གོ་ནས་འགྲོ་སྟངས་ཤིག་ཡོང་གི་ཡོད་པ་ལས། ད་ལྟ་འདི་ནས་ཐད་ཀར་འདི་དང་འདི་བྱེད་ཀྱི་ཡིན་ཟེར་ནས་དམིགས་བསལ་ཞུ་རྒྱུ་གང་ཡང་མེད། ལས་ཀ་བྱེད་ཀྱིན་བྱེད་ཀྱིན་གནས་སྟངས་ཤིག་ཆགས་ཡོང་གིན་ཡོད་པས་དེ་ལྟར་བྱ་རྒྱུ་ཡིན། ཞེས་བརྗོད་སོང་།
བཀའ་ཟུར་ཀརྨ་ཡེ་ཤེས་ལགས་ཀྱིས་ཅན་རྡི་སྒར་པཎ་ཇབ་གཙུག་ལག་སློབ་གཉེར་ཁང་ནས་ཆེད་སྦྱོང་རིག་གནས་རབ་འབྱམས་པ་དང་ཉེ་བའི་གཙུག་ལག་རབ་འབྱམས་པའི་ (B.A. (Hons.), B.Ed.)སློབ་གཉེར་གནང་། ཕྱི་ལོ་ ༡༩༩༥ ཟླ་ ༩ ཚེས་ ༡ ནས་ ༢༠༠༡ ཟླ་ ༨ ཚེས་ ༣༡ བར་ལོ་ངོ་དྲུག་རིང་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཞོན་སྐབས་གཉིས་རིང་བྱས། ཕྱི་ལོ་ ༢༠༠༣ ཟླ་ ༣ ཚེས་ ༡༨ ནས་ཕྱི་ལོ་ ༢༠༡༡ ཟླ་ ༥ ཚེས་ ༣༡ བར་ལོ་ངོ་བརྒྱད་ལྷག་ནོར་ཝེ་བོད་ཀྱི་རླུང་འཕྲིན་ཁང་གི་སྤྱི་ཁྱབ་རྩོམ་སྒྲིག་འགན་འཛིན་བྱས། སྐབས་གཉིས་ལ་བོད་མི་མང་སྤྱི་འཐུས་སུ་འདེམས་ཐོན་བྱུང་། ཕྱི་ལོ་ ༢༠༡༦ ཟླ་ ༦ ཚེས་ ༡ ཉིན་བཀའ་ཤག་སྐབས་བཅོ་ལྔ་པའི་བཀའ་བློན་དུ་བདམས་ཐོན་བྱུང་སྟེ། ཕྱི་ལོ་ ༢༠༢༡ ཟླ་ ༥ ཚེས་ ༢༦ བར་ལོ་ངོ་ལྔའི་རིང་དཔལ་འབྱོར་བཀའ་བློན་གྱི་ལས་འཁུར་ཞུས།
ལྷག་པ་རྒྱལ་མཚན་ལགས་ཀྱིས་ཕྱི་ལོ་ ༡༩༨༥ ནས་ ༡༩༩༡ བར་རྩིས་ཞིབ་ལས་ཁུངས་ནང་རྩིས་ཞིབ་པའི་ལས་ཁུར་ཞུས། ༡༩༩༡ ནས་ ༡༩༩༦ བར་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་ནང་རྩིས་པ་དང་ལས་ཁུངས་དོ་དམ་པའི་ལས་ཁུར་ཞུས། ༡༩༩༦ ནས་ ༢༠༠༠ བར་ཆོད་གན་ཐོག་བལ་ཡུལ་རྩིས་ཞིབ་ཡན་ལག་ལས་ཁུངས་ཀྱི་འགན་འཛིན་ལས་ཁུར་ཞུས། ཕྱི་ལོ་ ༢༠༠༠ ཟླ་བ་ ༥ པ་ནས་ ༡༡ བར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་རྩིས་དཔོན་གྱི་ལས་ཁུར་ཞུས། ཕྱི་ལོ་ ༢༠༠༢ ཟླ་ ༢ ནས་ ༢༠༠༤ ཟླ་ ༣ བར་བོད་གཞུང་ནང་སྲིད་ལྷན་ཁང་གི་བཀའ་དགོངས་བཞིན་ཆོད་གན་ཐོག་རྩིས་དཔོན་གྱི་ལས་ཁུར་ཞུས། ཕྱི་ལོ་ ༢༠༡༤ ནས་བཟུང་བོད་ཕྲུག་ཁྱིམ་སྡེའི་ནང་ལས་ཞུགས་ཀྱིས་བོད་ཁྱིམ་ཚོང་འབྲེལ་སྡེ་ཚན་གྱི་འགན་འཛིན་ལས་ཁུར་ཞུ་བཞིན་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
