མོན་ཡུལ་མི་མང་ནས་༧གོང་ས་མཆོག་བོད་ལུགས་ལྟར་དགུང་གྲངས་ ༩༠ ཕེབས་པའི་གོ་སྟོན་སྲུང་གཙིའི་མཛད་སྒོའི་ཐོག་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན་ཤར་བསྐྱོད་བྱས་ཚེ་དོན་དམ་གྱི་བརྟན་བཞུགས་ཆགས་ཀྱི་ཡོད། ཅེས་གསུངས་སོང་།
དེ་རིང་ཕྱི་ཚེས་ ༧ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། མོན་ཡུལ་ལྷ་སྡེ་མི་སྡེ་ཡོངས་ནས་༧གོང་ས་རྒྱལ་བ་རིན་པོ་ཆེ་མཆོག་བོད་ལུགས་ལྟར་དགུང་གྲངས་ ༩༠ ཕེབས་པའི་གོ་སྟོན་སྲུང་གཙིའི་མཛད་སྒོ་ཞིག་འཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་༧སྐྱབས་རྗེ་གླིང་རིན་པོ་ཆེ་མཆོག ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག ཨ་རུ་ན་ཅལ་མངའ་སྡེའི་གྲོས་ཚོགས་འཐུས་མི། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་གཙོ་བྱས་པའི་ལྷན་ཁང་གི་དྲུང་ཆེ་རྣམས་དང་། མོན་ཡུལ་གྱི་དད་ལྡན་མི་མང་། དེ་བཞིན་བཞུགས་སྒར་ཁུལ་གྱི་སེར་སྐྱ་མི་མང་དང་སློབ་ཕྲུག་བཅས་འཛོམས་འདུག
མོན་གྱི་ལྷ་སྡེ་མི་སྡེ་ཡོངས་ཀྱིས་སྐུའི་གོ་སྟོན་སྲུང་གཙིའི་མཛད་སྒོ་དང་འབྲེལ་བའི་ཐད་མོན་གྱི་བརྟན་བཞུགས་བསྟར་འབུལ་ཚོགས་ཆུང་གི་ཚོགས་གཙོ་བླ་མ་ངག་དབང་ནོར་བུ་ལགས་ཀྱིས་ངོ་སྤྲོད་གནང་བའི་ནང་། དེ་རིང་གི་ཉིན་མོ་འདི་མོན་ཡུལ་གྱི་ལྷ་སྡེ་མི་སྡེ་ཡོངས་ལ་ཧ་ཅང་གི་གོ་སྐབས་དང་སྐལ་བ་བཟང་པོ་ཞིག་ཆགས་ཡོད་བསམ་གྱི་འདུག་སྟེ། ༧གོང་ས་རྒྱལ་བ་རིན་པོ་ཆེ་མཆོག་སྐུ་འཁྲུངས་ནས་བོད་ལུགས་ཀྱི་དགུང་ལོ་དགུ་བཅུ་ཐམ་པར་ཕེབས་པ་དང་། དེའི་ཚེ་བསྟན་པ་དང་འགྲོ་བའི་དོན་ལ་བཀའ་དྲིན་བསམ་གྱིས་མི་ཁྱབ་པ་ཞིག་བྱུང་བ་རེད། ལྷག་པར་དུ་མོན་ལྟ་བུ་ཞིག་ལ་མཚོན་ན། ཕྱི་ལོ་ ༡༩༥༩ ཟླ་ ༣ ཚེས་ ༣༡ ཉིན་༧གོང་ས་རྒྱལ་བ་རིན་པོ་ཆེ་མཆོག་བོད་དང་མོན་གྱི་ས་མཚམས་སུ་ཆིབས་བསྒྱུར་བསྐྱངས་ནས་ད་ཆ་མི་ལོ་དྲུག་ཅུ་རེ་ལྔ་ཧྲིལ་པོ་འཁོར་གྱི་ཡོད། སྐབས་དེར་མགོན་པོ་གང་ཉིད་ཀྱི་ཕེབས་ལམ་དུ་རླངས་འཁོར་མེད་པར་ཆིབས་རྟར་ཕེབས་དགོས་ཁེལ་བས། སྐུ་ངལ་དེ་འདྲ་ཞིག་ཡོད་རེད་དེ། མོན་དེ་༧རྒྱལ་བ་སྐུ་ཕྲེང་གོང་མ་རིམ་བྱོན་དང་འབྲེལ་བ་ཧ་ཅང་ཆེན་པོ་ཡོད་པ་དང་། ལྷག་པར་༧རྒྱལ་མཆོག་སྐུ་ཕྲེང་དྲུག་པ་རིག་འཛིན་ཚངས་དབྱངས་རྒྱ་མཚོ་མོན་ཡུལ་དུ་སྐུ་བལྟམས་པའི་ཐུགས་བཞེད་ཀྱི་ཐོག་ནས། ༧རྒྱལ་བ་རིན་པོ་ཆེ་མཆོག་གིས་ལོ་རྒྱུས་ལྡན་པའི་རྟ་དབང་དགའ་ལྡན་ལྷ་རྩེ་རྣམ་རྒྱལ་དགོན་དུ་གསུང་ཆོས་དང་པོ་བསྩལ་གནང་མཛད་དེ་མི་ལོ་དྲུག་ཅུ་རེ་ལྡ་ཧྲིལ་པོ་འཁོར་བ་ནི་ཧ་ཅང་སྐལ་བཟང་གི་དུས་ཚིགས་ཤིག་ཆགས་བསྡད་ཡོད་ལ། ༧རྒྱལ་བ་ཚངས་དབྱངས་རྒྱ་མཚོ་མཆོག་སྐུ་འཁྲུངས་ནས་མི་ལོ་ ༣༤༡ ཧྲིལ་པོ་འཁོར་བའི་བཀའ་དྲིན་རྗེས་དྲན་དང་། ༧གོང་ས་རྒྱལ་བ་རིན་པོ་ཆེ་མཆོག་བོད་ལུགས་ལྟར་དགུང་གྲངས་ ༩༠ ཕེབས་པའི་སྐལ་བཟང་གི་དུས་འདིར། མོན་ཡུལ་གྱི་འགྲོ་བ་ཡོངས་ལ་བརྟན་བཞུགས་བསྟར་འབུལ་དང་ཆོས་འགྲེལ་གསོལ་སྩལ་གནང་བ་འདི། མོན་ཡུལ་གྱི་ལྷ་སྡེ་མི་སྡེ་ཡོངས་ལ་སྤྱན་རས་གཟིགས་ཀྱི་རྗེས་འཇུག་པའི་བྱིན་རླབས་ཤིག་རེད་བསམ་གྱི་ཡོད། ཅེས་གསུངས་སོང་།
༧སྐྱབས་རྗེ་ཡང་སྟེང་རིན་པོ་ཆེ་མཆོག་ནས། མོན་གྱི་ཡུལ་འདི་མཚོན་ན་ཐོག་མར་ལོ་རྒྱུས་ཐོག་ནས་བོད་ཀྱི་ཆོས་རྒྱལ་ཚོའི་གཟིགས་རྟོག་གི་འོག་ནས་ཆོས་དང་རིག་གཞུང་། རིགས་རྒྱུད་སོགས་གཅིག་གྱུར་གྱི་ཐོག་ནས་འཚོ་བསྡད་པ་ཞིག་ཆགས་འདུག ལྷག་པར་༧གོང་ས་ལྔ་པ་ཆེན་པོ་མཆོག་གིས་བོད་བསྟན་སྲིད་ཀྱི་མངའ་དབང་བསྒྱུར་བ་ནས་བཟུང་། ༧གོང་ས་ལྔ་པ་ཆེན་པོ་མཆོག་གི་མཐུན་འགྱུར་འོག་སློབ་མ་མེ་རག་བླ་མ་བློ་གྲོས་རྒྱ་མཚོ་མོན་ཡུལ་ལ་ཆེད་དུ་གཟིགས་རྟོག་གནང་ཆེད་དུ་བཏང་ནས། ཆོས་སྲིད་གཉིས་ཀྱི་ཐོག་ནས་གཟིགས་རྟོག་དང་། ལྷག་པར་མོན་རྟ་དབང་དགའ་ལྡན་ལྷ་རྩེ་རྣམ་རྒྱལ་ཕྱག་བཏབ་ཏུ་བཅུག་སྟེ། ༧གོང་ས་ལྔ་པ་ཆེན་པོ་མཆོག་གི་སྐུ་ཕྲེང་རྗེས་མ་དེ་མོན་ཡུལ་དུ་འཁྲུངས་རྒྱུའི་ཐུགས་དགོངས་བཞིན། ༧རྒྱལ་དབང་སྐུ་ཕྲེང་དྲུག་པ་མོན་ཡུལ་དུ་སྐུ་བལྟམས་ཏེ་མོན་ནས་ཕེབས་པ་ཞིག་ཆགས་ཡོད་པ་རེད། ཅེས་དང་། ༧རྒྱལ་དབང་ཚངས་དབྱངས་རྒྱ་མཚོ་མཆོག་གིས་ཕྱི་ནང་གསང་གསུམ་གྱི་མཛད་པ་རྒྱ་ཆེར་བསྐྱངས་པའི་ཁྲོད། སྙན་ངག་གི་གསུང་རྩོམ་གཅིག་པུ་བོད་ཀྱི་རིག་གཞུང་གཅིག་པའི་ཡུལ་ལུང་དང་། ལྷག་པར་རྒྱ་ནག་དང་འཛམ་གླིང་ཡོངས་སུ་ཁྱབ་མུས་ཡིན་པའི་ཁར། ༧གོང་ས་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་རྒྱ་གར་དུ་ཕེབས་སྐབས། མོན་ཡུལ་དུ་ཐོག་མར་ཕེབས་པ་སོགས་མོན་དང་༧རྒྱལ་དབང་སྐུ་ཕྲེང་རིམ་བྱོན་གྱི་བར་དམིགས་བསལ་གྱི་འབྲེལ་བ་དང་དམ་ཚིག་གཡོ་བ་མེད་པ་ཞིག་ཡོད་སྐོར་སོགས་གསུངས་སོང་།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས། དེ་རིང་མོན་ཡུལ་ལྷ་སྡེ་མི་སྡེ་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་གྱི་གོ་སྐབས་དང་བསྟུན། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གི་དབུས། སྐུ་མགྲོན་གཙོ་བོ་སྐྱབས་རྗེ་གླིང་རིན་པོ་ཆེ་མཆོག ཨ་རུ་ན་ཅལ་མངའ་སྡེའི་གྲོས་ཚོགས་འཐུས་མི། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ཚང་མར་བཀའ་ཤག་སྐབས་བཅུ་དྲུག་པ་དང་སྒེར་གྱི་ངོས་ནས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་དུས་ཚོད་རྐྱེན་གྱིས་གཏམ་བཤད་རིང་པོ་བཤད་པའི་གོ་སྐབས་མེད་པར་བརྟེན། ༧གོང་ས་རྒྱལ་བ་རིན་པོ་ཆེ་མཆོག་བོད་ལུགས་ལྟར་ད་ལོ་དགུང་ལོ་ ༩༠ ལ་ཕེབས་ཡོད་ཅིང་། ལོ་རྗེས་མར་ཕྱི་ལུགས་ལྟར་དགུང་ལོ་ ༩༠ ལ་ཕེབས་ཀྱི་ཡོད། ༧གོང་ས་རྒྱལ་བ་རིན་པོ་ཆེ་མཆོག་གི་རྗེས་འཇུག་པ་ཡོངས་ཀྱིས་རྒྱུན་དུ་༧གོང་ས་མཆོག་ནས་བཀའ་གང་གནང་བཞིན་ཡོད་པར་ཐུགས་སྣང་བྱས་ཏེ། དེ་དག་གི་ཐོག་ཏུ་ཉམས་ལེན་བྱེད་དགོས་པ་གལ་ཆེན་པོ་རེད། དེ་ནི་རྒྱལ་བ་དགྱེས་པའི་མཆོད་སྤྲིན་རེད་མ་གཏོགས། ༧གོང་ས་མཆོག་ལ་སྐྱབས་སུ་མཆི་ཟེར་ནས་ལས་ཀ་གོ་ལོག་བྱས་བསྡད་ཚེ་ཏག་ཏག་བསྡད་ཀྱི་མེད་པ་རེད། དེ་དོན་དག་གཙོ་བོ་ཆགས་ཡོད། ཅེས་གསུངས་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས། རྩ་བའི་བོད་དང་མོན་ཡུལ་གཉིས་བར་གྱི་འབྲེལ་ལམ་དམ་ཟབ་ཡོད་ཅིང་། དེའང་ཆོས་དང་རིག་གཞུང་གཅིག་གྱུར་གྱི་འབྲེལ་ལམ་ཞིག་ཆགས་ཡོད། ལྷག་པར་དུ་དེ་རིང་མོན་གྱི་ལྷ་སྡེ་མི་སྡེ་ཡོངས་ཀྱིས་མ་སྐུལ་དང་བླངས་ཆེན་པོའི་ཐོག ༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཏེ། དེ་རིང་ང་ཚོ་ཚང་མར་༧གོང་ས་མཆོག་གི་གསེར་ཞལ་མཇལ་བའི་སྐལ་བ་བྱུང་བ་རེད། ༧རྒྱལ་དབང་སྐུ་ཕྲེང་རིམ་བྱོན་དང་མོན་ཡུལ་བར་དམ་ཚིག་གཙང་མ་ཡོད་པ་ལ་དམིགས་ཏེ་ཡིད་སྨོན་སྐྱེས་དགོས་པ་ཞིག་ཆགས་སོང་། དེ་རིང་གི་གོ་སྐབས་འདི་བརྒྱུད་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་དང་འབྲེལ་ཡོད་ཚང་མར་བོད་མི་མང་གི་ཚབ་བྱས་ཏེ་ཐུགས་རྗེ་ཆེ་ཞུ་རྒྱུ་ཡིན། ༧གོང་ས་རྒྱལ་བ་རིན་པོ་ཆེ་མཆོག་བོད་ལུགས་ལྟར་ན་དགུང་ལོ་ ༩༠ ལ་ཕེབས་ཡོད་ཅིང་། དུས་སྐབས་འདིའི་རིང་སྟབས་མ་ལེགས་པ་ཞིག་ལ་བོད་ཀྱི་ས་ཤོར་ཏེ་བཙན་བྱོལ་བ་ཞིག་ཆགས་ཡོད་ཀྱང་། ༧གོང་ས་མཆོག་གི་ཐུགས་བརྩོན་ཆེན་པོ་མཛད་དེ་སྤྱིར་འཛམ་གླིང་ཡོངས་ཀྱི་ཞི་བདེ་དང་། སྒོས་སུ་བོད་ཀྱི་རྩ་དོན། དེ་བཞིན་ཧི་མ་ལ་ཡ་དང་བོད་བར་གྱི་ཆོས་དང་རིག་གཞུང་དང་འབྲེལ་བའི་ཐོག་མཛད་པ་འཕྲིན་ལས་བསྐྱངས་ཡོད། བོད་ཀྱི་རྩ་དོན་ཐོག་འཛམ་གླིང་གི་རྒྱབ་སྐྱོར་ཚད་མཐོ་པོ་ཐོབ་ཡོད་པ་ནི་༧གོང་ས་མཆོག་གི་མཛད་པ་འཕྲིན་ལས་ཀྱི་བཀའ་དྲིན་ཆགས་ཡོད། ཁོང་གི་བཀའ་དྲིན་རྗེས་དྲན་ཞུ་རྒྱུ་མོན་གྱི་མང་ཚོགས་ལ་དཔེ་བལྟས་ཏེ། བོད་ཀྱི་མང་ཚོགས་ཀྱིས་༧གོང་ས་མཆོག་གི་མཛད་པ་དང་སྐུ་ཚེ་བརྟན་པར་གསོལ་འདེབས་ཞུ་རྒྱུ་དང་། གནམ་དཀར་གྱི་དགེ་བ་དུས་ནས་དུས་སུ་བསྒྲུབ་པར་འབོད་སྐུལ་ཞུ་རྒྱུ་ཡིན། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ནི་བོད་ཀྱི་ཆོས་དང་རིག་གཞུང་ཐོག་རྒྱབ་སྐྱོར་ཡོད་པ་ཙམ་མ་ཟད། བོད་ཀྱི་རྩ་དོན་འཐབ་རྩོད་ཐོག་ཧ་ལས་པའི་རྒྱབ་སྐྱོར་བྱས་ཡོད་ལ། བོད་དོན་ཐོག་ཡིད་ཆེས་བྱེད་ཆོག་པའི་གནད་ཡོད་མི་སྣ་ཞིག་ཆགས་ཡོད། ཉིན་འགའི་སྔོན་ནས་དྷ་རམ་ས་ལར་ཕེབས་ཏེ་བཀའ་མོལ་བྱུང་ཡོད། དེ་རིང་དངོས་སུ་འདིར་ཕེབས་ཏེ་གསུང་བཤད་གནང་བ་ང་ཚོས་སེམས་སུ་བཞག་ནས་ལག་བསྟར་བྱ་རྒྱུ་གལ་ཆེན་པོ་རེད། ཅེས་གསུངས་སོང་།
ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས། ཉིན་ཤས་རིང་དབུས་བོད་མིའི་སྒྲིག་འཛུགས་ཀྱིས་སྣེ་ལེན་ཡག་པོ་ཞུས་པས་ཚང་མར་ཐུགས་རྗེ་ཆེ་ཞུ་རྒྱུ་ཡིན། ང་རང་བོད་མིའི་སྒྲིག་འཛུགས་དང་། བོད་ཀྱི་ངོ་བོ་དང་རིག་གཞུང་སོགས་མཚོན་པའི་འགྲེམ་སྟོན་ཁང་དུ་བཅར་རྒྱུའི་གོ་སྐབས་བཟང་པོ་ཞིག་བྱུང་། ཅེས་དང་། དེ་རིང་བརྟན་བཞུགས་ཕུལ་བ་ཙམ་མིན་པར་མི་དམངས་ཀྱིས་ཀྱང་༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཡུན་རིང་བརྟན་སླད་གསོལ་བ་སྨོན་ལམ་འདེབས་དགོས། ནང་ཆོས་འདི་ཉིད་ཆོས་གཅིག་པུའི་སྐད་ཆ་ཞིག་གཏན་ནས་མིན་པར་འགྲོ་བ་མིའི་རིགས་ཀྱི་རྒྱུན་ལྡན་གྱི་འགྲོ་ལུགས་དང་མཉམ་དུ་བསྡུས་ཡོད་པས། ཧི་མ་ཡ་ལའི་རི་རྒྱུད་ཀྱི་མི་རིགས་རྣམས་ཀྱིས་ནང་ཆོས་ཉམས་སུ་བླངས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་དད་མོས་བྱས་ཏེ་རྩ་བའི་བླ་མར་བརྩི་ཡི་ཡོད་པར་བརྟེན། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་ཉན་པ་གཅིག་པུ་མིན་པར། ཁོང་གི་བཀའ་དགོངས་བཞིན་ཤར་བསྐྱོད་བྱས་པ་ཡིན་ན། དེ་ནི་དོན་དམ་གྱི་བརྟན་བཞུགས་ཆགས་ཀྱི་ཡོད། ཅེས་གསུངས་སོང་།
མཇུག་ཏུ་སྐུ་མགྲོན་གཙོ་བོ་༧སྐྱབས་རྗེ་གླིང་རིན་པོ་ཆེ་མཆོག་ནས། དེ་རིང་འདིར་༧གོང་ས་རྒྱལ་བ་རིན་པོ་ཆེ་མཆོག་ལ་མོན་ཡུལ་མི་མང་གིས་བརྟན་བཞུགས་བསྟར་འབུལ་ཞུ་བའི་དགའ་སྟོན་འཚོགས་པ་རེད། ལྷག་དོན་ཉེ་ལམ་༧གོང་ས་མཆོག་གི་ཞབས་པུས་འཕྲོད་བཞེས་ལེགས་གྲུབ་བྱུང་ནས་རྒྱ་གར་དུ་ཕེབས་པའི་རྗེས་ཀྱི་མཛད་ཆེན་ཞིག་ཆགས་ཡོད། དེའང་མ་སྒྲིག་ལྷུན་འགྲིག་ཐོག་མོན་ཡུལ་གྱི་ལྷ་སྡེ་མི་སྡེ་ཡོངས་ལ་བརྟན་བཞུགས་བསྟར་འབུལ་གྱི་གོ་སྐབས་ཐོབ་པ་དང་། མངའ་སྡེའི་སྤྱི་ཁྱབ་བློན་ཆེན་གཙོས་མོན་ཡུལ་མི་མང་ཆིག་སྟོང་ལྷག་ཕེབས་ཏེ། བརྟན་བཞུགས་བསྟར་འབུལ་ཧ་ཅང་ཡག་པོ་བྱུང་སོང་། མོན་ཡུལ་མི་མང་ཡོངས་སུ་དམིགས་བསལ་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་དེ་རིང་༧གོང་ས་མཆོག་གིས་ཐོག་མར་བཙན་བྱོལ་དུ་ཕེབས་པའི་སྐབས་ནས་མོན་ཡུལ་མི་མང་དད་གུས་ཆེན་པོ་དང་། དུས་རྟག་ཏུ་ཐུགས་བརྩེ་བའི་བསྐྱངས་རྒྱུ་ཡིན་པའི་བཀའ་སློབ་ཕེབས་པར་མོན་ཡུལ་མི་མང་གི་བསོད་ནམས་ཀྱི་བགོ་སྐལ་ཆགས་ཡོད། ༧གོང་ས་རྒྱལ་དབང་རིམ་བྱོན་ཐོག་བོད་དང་མོན་ཡུལ་གྱི་བར་ཡོད་པའི་འབྲེལ་ལམ་བཟང་པོ་ཇི་སྲིད་སྐལ་བ་ནམ་གནས་བར་གནས་པ་དང་། དེ་བཞིན་ཚང་མས་༧གོང་ས་མཆོག་གི་སྐུ་ཚེ་མཛད་འཕྲིན་དང་ཐུགས་དགོངས་ལྷུན་གྱི་འགྲུབ་པའི་ཐུགས་སྨོན་གནང་རོགས། ཅེས་གསུངས་སོང་།
གསར་འགོད་པ། དཔལ་ལྡན། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
