བོད་ཀྱི་མ་འོངས་བའི་ཁ་ཕྱོགས་ཀྱི་བགྲོ་གླེང་ཐོག་སྲིད་སྐྱོང་མཆོག་ནས་རྒྱ་གཞུང་གི་ཆུ་མཛོད་བརྒྱུད་ཨེ་ཤ་ཡའི་ནང་དཀའ་ངལ་འཕྲད་ཉེན་ཡོད་སྐོར་གསུངས།
ཁ་སང་ཕྱི་ཚེས་ ༢༡ ཉིན་རྒྱ་གར་གྱི་རྒྱལ་ས་ལྡི་ལིའི་རྒྱལ་སྤྱིའི་ལྟེ་གནས་ཁང་དུ། འཚེ་བ་མེད་པའི་ཐབས་ལམ་ཐེབས་རྩ་ཁང་གི་ (Foundation for Non-violent Alternatives) གོ་སྒྲིག་འོག བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་དང་། བཙན་བྱོལ་ནང་གི་ཐབས་ཇུས། ༸གོང་ས་རྒྱལ་བ་རིན་པོ་ཆེ་མཆོག་གི་མཛད་འཕྲིན། རྒྱ་གར་གྱི་བྱེད་སྒོ་བཅས་ཀྱི་ཐོག་བོད་ཀྱི་མ་འོངས་བའི་ཁ་ཕྱོགས་ཀྱི་སྐོར་ལ་བགྲོ་གླེང་ཞིག་འཚོགས་ཡོད་ཅིང་། ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། འཚེ་བ་མེད་པའི་ཐབས་རྩ་ཁང་འཛུགས་མཁན་སྐུ་ཞབས་ཨོཾ་པ་རཱ་ཀ་ཤ་ཏན་ཌོན་ལགས། སྐུ་ཞབས་ཨ་ཤོ་ཀ་ཀུ་མཱར་མེ་ཧ་ཊ་ལགས། རྒྱ་གར་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་སྐུ་ཞབས་སུ་ཇེ་ཏ་ཀུ་མཱར་ལགས། ཉམས་ཞིབ་པ་སོགས་འཛོམས་ཡོད་འདུག
བོད་ཀྱི་ས་ཁམས་ཆགས་ཚུལ་སྐོར་ལ་སྲིད་སྐྱོང་སྤེན་པ་ཚེ་རིང་མཆོག་ནས། བོད་ནི་གངས་རིའི་ཡོངས་སུ་བསྐོར་ཡོད་པར་བརྟེན། ཕྱི་གླིང་བ་རྣམས་ཀྱིས་འཛམ་གླིང་གི་ཡར་རྩེ་རུ་འབོད་ཀྱི་ཡོད་ཅིང་། ས་ཁམས་ཡོངས་སུ་རྒྱ་མཚོ་ངོས་ལས་མཐོ་ཚད་རྨིད་ ༥༨༨༠ ཙམ་ཡོད། དེ་ནི་ནེའུ་ཛི་ལན་ཌི་རྒྱལ་ཁབ་ནང་གི་རི་བོ་མཐོ་ཤོས་ཀྱི་ཚད་དང་གཅིག་པ་རེད། བོད་ཀྱི་ས་ཆའི་རྒྱ་ཁྱོན་ཡོངས་སུ་སྤྱི་ལེ་གྲུ་བཞི་མ་ས་ཡ་ ༢།༥ ཟིན་ཡོད་པ་དང་། ཚན་རིག་པ་རྣམས་ཀྱིས་བོད་ནི་འཛམ་གླིང་སྣེ་གསུམ་པར་འབོད་བཞིན་འདུག བོད་མཐོ་སྒང་གི་འཁྱགས་རོམ་བཞུར་ཏེ་ཤར་ལྷོའི་ཨེ་ཤ་ཡའི་རྒྱལ་ཁབ་བཅུ་ལྷག་གི་གཙང་པོའི་ནང་བཞུར་བཞིན་ཡོད། ཅེས་དང་། དེ་བཞིན་བོད་ཀྱི་ལོ་རྒྱུས་ཀྱི་འཕེལ་རིམ་ཁྲོད་ཀྱི་གལ་གནད་ཆེ་བའི་ལོ་ཚིགས་གསལ་སྟོན་བྱས་ཅིང་། བོད་དང་རྒྱ་གར་བར་དུ་ཆོས་སྲིད་གཉིས་ཀྱི་ཐད་ནས་འབྲེལ་ལམ་ཟབ་མོ་ཡོད་པ་མ་ཟད། ཨ་རིའི་གཞུང་གིས་གཏན་འབེབས་གནང་བའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གི་ནང་དོན་གལ་གནད་སྐོར་གཙོ་བོར་བཟུང་སྟེ། ཁྲིམས་ཡིག་དེ་བརྒྱུད་ཨ་རིའི་གཞུང་ནས་བོད་རྒྱའི་དཀའ་རྙོག་ཐོག་སྔར་ལྷག་དོ་སྣང་དང་། ལངས་ཕྱོགས་གསལ་སྟོན་གྱིས་བོད་དོན་ལ་རྒྱབ་སྐྱོར། བོད་དང་རྒྱ་ནག་བར་གྱི་དཀའ་རྙོག་སེལ་ཐབས་ལ་སྐུལ་དེད་གཏོང་བ་སོགས་ཁྲིམས་ཡིག་གི་གལ་གནད་སྐོར་གསུངས་སོང་།
ཡང་སྲིད་སྐྱོང་མཆོག་ནས། བོད་ཀྱི་ཁོར་ཡུག་སྤྱི་དང་ལྷག་པར་དུ་བོད་ནས་ཐོན་པའི་གཙང་ཆུ་ཁག་རྒྱ་ནག་གཞུང་གིས་ཆབ་སྲིད་ཀྱི་ལག་ཆར་བཀོལ་སྤྱོད་བྱེད་ཚུལ་དང་འབྲེལ་ཏེ། བོད་ནས་ཐོན་པའི་གཙང་ཆུ་རྣམས་ནི་ཨེ་ཤ་ཡའི་མི་མང་འབུམ་ཕྲག་མང་པོའི་འཚོ་རྟེན་དུ་གྱུར་ཡོད་པ་མ་ཟད། བོད་ནས་ཐོན་པའི་གཙང་ཆུ་ཆེ་ཁག་གཉིས་ཀྱི་འདབས་སུ་རྒྱ་དཀར་ནག་གཉིས་ཀྱི་དཔལ་ཡོན་དར་མགོ་ཚུགས་ཡོད་པ་གསལ་བཤད་གནང་བའི་ཐོག ད་ལྟའི་ཆར་རྒྱ་ནག་གཞུང་གིས་གཙང་ཆུ་དེ་དག་ལ་ཆུ་མཛོད་བརྒྱབ་སྟེ། ཆུའི་བཞུར་རྒྱུན་ལ་འགྱུར་བ་གཏོང་གི་ཡོད་ལ། ལྷག་པར་དུ་གཙང་ཆུ་དེ་དག་ཆབ་སྲིད་ཀྱི་དགོས་མཁོར་བེད་སྤྱད་ཀྱིས་ཁྱིམ་མཚེས་རྒྱལ་ཁབ་ཁག་ལ་དཀའ་ངལ་བཟོ་བཞིན་ཡོད་པ་གསལ་སྟོན་བྱས་ཏེ། རྒྱ་ནག་གཞུང་གིས་ཡར་ཀླུང་གཙང་པོར་འཛམ་གླིང་སྟེང་གི་ཆུ་མཛོད་ཆེ་ཤོས་དེ་རྒྱག་བཞིན་ཡོད་པ་དེས། རང་བྱུང་གོད་ཆག་སོགས་ཀྱི་དཀའ་ངལ་བྱུང་ཚེ། ཆུ་མཛོད་ཆེན་པོ་དེའི་ཉེ་འབྲེལ་རྒྱལ་ཁབ་དག་གི་མི་མང་འབུམ་ཕྲག་མང་པོར་དཀའ་ངལ་འཕྲད་རྒྱུ་ཡིན་པའི་སྐོར་གསུངས་འདུག
མཇུག་ཏུ་སྲིད་སྐྱོང་མཆོག་ནས་༸གོང་ས་རྒྱལ་བ་རིན་པོ་ཆེ་མཆོག་གི་བྱམས་དང་སྙིང་རྗེའི་ལམ་སྟོན་མཛད་རྗེས་འཛམ་གླིང་མི་མང་གི་དོ་སྣང་བྱ་ཡུལ་དུ་གྱུར་ཡོད་པ་མ་ཟད། བོད་ཀྱི་འཚེ་བ་མེད་པའི་བདེན་པའི་འཐབ་རྩོད་ལ་རྒྱལ་སྤྱིའི་ཐོག་ནས་མི་མང་གིས་རྒྱབ་སྐྱོར་ཤུགས་ཆེན་ཐོབ་ཡོད་སྐོར་གསུངས་འདུག
འདས་ལོའི་ཕྱི་ཟླ་ ༨ ཕྱི་ཚེས་ ༡ ནས་ཉིན་གཉིས་རིང་འཚེ་བ་མེད་པའི་ཐབས་ལམ་ཐེབས་རྩ་ཁང་གི་(Foundation For Non-Violent Alternatives) གོ་སྒྲིག་འོག རྒྱ་ནག་གཅིག་གི་སྲིད་ཇུས་དྲག་སྤྱོད་ཅེས་པའི་མཁས་པའི་བགྲོ་གླེང་ལྷན་ཚོགས་ཤིག་འཚོགས་ཡོད་ཅིང་། ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། རྒྱ་གར་གཞུང་ཚབ་ཆེན་མོ་ཟུར་པ་ལཱ་ཁཱན་ལཱལ་མེ་ཧ་རོ་ཌི་རཱ་(Lakhan Mehrotra) མཆོག་གི་གཙོས་རྒྱལ་སྤྱིའི་མཁས་དབང་དང་། ཉམས་ཞིབ་པ། གཙུག་ལག་སློབ་གླིང་ཁག་གི་སློབ་དཔོན། གཞུང་ཚབ་ཟུར་པ་བཅས་མཉམ་ཞུགས་གནང་ཡོད་འདུག སྐབས་དེར་སྲིད་སྐྱོང་མཆོག་ནས་རྒྱ་ནག་གཅིག་གི་སྲིད་ཇུས་ནི་བོད་དང་འབྲེལ་བ་ཅིའང་མེད་ཅེས་ནན་བརྗོད་གནང་འདུག
གསར་འགོད་པ། བྱམས་པ་ཚེ་རིང་།
