ཨ་རི་དང་མཐུན་ཕྱོགས་རྒྱལ་ཁབ་ཁག་གི་བདེ་འཇགས་ལ་ཉེན་ཁ་ཡོད་པའི་ངོས་འཛིན་འོག་རྒྱ་ནག་གི་འཕྲུལ་རིག་བཟོ་ཚོང་ཁང་ ༡༤༠ བཀག་སྡོམ་བྱ་རྒྱུ་ཡིན་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཨ་རིས་གཞུང་འབྲེལ་གྱི་ཐོག་ནས་རྒྱ་ནག་གི་ནང་འདྲེན་དང་ཕྱིར་ཚོང་གློག་རྡུལ་འཕྲུལ་རིག་བཟོ་ཚོང་ཁང་ ༡༤༠ བཀག་སྡོམ་བྱ་རྒྱུའི་ཐག་གཅོད་བྱས་ཡོད་ཅིང་། བཟོ་ཚོང་ཁང་དེ་དག་གིས་རྒྱ་ནག་དམར་ཤོག་ཚོགས་པའི་བཀོད་འདོམས་གཞིར་བཟུང་རྒྱ་ནག་གི་སྔོན་ཐོན་ཕྲ་གློག་གི་དམིགས་ཡུལ་སྒྲུབ་ཀྱི་ཡོད་སྟབས། དེས་ཨ་རི་དང་མཐུན་ཕྱོགས་རྒྱལ་ཁབ་ཁག་གི་བདེ་འཇགས་ལ་ཉེན་ཁ་བཟོ་ཡི་ཡོད་སྐོར་བརྗོད་འདུག
དེ་འབྲེལ་རོའུ་ཊར་གསར་ཁང་གི་གནས་ཚུལ་ལྟར་ན། ཐེངས་འདིར་ཨ་རིའི་ཚོང་འབྲེལ་ལྷན་ཁང་གིས་བཀག་སྡོམ་བྱས་པའི་རྒྱ་ནག་གི་འཕྲུལ་རིག་བཟོ་ཚོང་ཁང་ཁག་གི་ཁྲོད་དུ། རྒྱ་ནག་གཞུང་འབྲེལ་གྱི་འཕྲུལ་རིག་བཟོ་ཚོང་ཁང་ (Naura Technology Group) དང་སྒེར་གཉེར་འཕྲུལ་རིག་བཟོ་ཚོང་ཁང་(Wise Road Capital) ། དེ་བཞིན། (Wingtech Technology Co) སོགས་ཡོད་འདུག་ལ། བཀག་སྡོམ་དེ་ནི་རྒྱ་ནག་གིས་རྒྱལ་སྤྱིའི་ཁྲོམ་རའི་ཁྲོད་སྣེ་ཁྲིད་བྱེད་ཐབས་སུ་བརྩོན་པའི་གློག་ཀླད་ཀྱི་གཞི་རྩའི་བྱེད་ནུས་མཐུད་སྦྲེལ་བྱེད་པའི་ཅིབ་སེ་ (chip) མ་ལག་བཟོ་སྐྲུན་ཁང་ ༡༠༠ ལྷག་དང་མཉེན་ཆས་ཀྱི་རིགས། ཕྱེད་ཁྲིད་གློག་གི་སྦྱོར་བཟོ་ (semiconductor fabrication plants) དང་ཕྱེད་ཁྲིད་ཡོ་བྱད་བཟོ་གྲྭ་ ༢༤ ལྷག དེ་བཞིན་མིས་བཟོས་རིག་ནུས་ལ་མཁོ་བའི་རྒྱུ་ཆ། འཕྲུལ་རིག་བཟོ་ཚོང་གི་མ་འཛུགས་ཚོང་ལས་ཁང་སོགས་བཀག་སྡོམ་བྱེད་ཆེད་དུ་ཡིན་པ་རེད།
ད་ལྟའི་ཆར་རྒྱ་ནག་གི་འཕྲུལ་རིག་བཀག་སྡོམ་གྱི་གནད་དོན་དང་འབྲེལ་ནས། རྒྱ་ནག་ཙམ་མིན་པར་རྒྱ་ནག་གི་འཕྲུལ་རིག་ཐོན་སྐྱེད་དང་འབྲེལ་ཆགས་ཀྱི་རྒྱལ་སྤྱིའི་འཕྲུལ་རིག་བཟོ་ཚོང་མང་དག་ཅིག་ལ་ཟ་དང་ཟུར་ནས་དཀའ་ངལ་འཕྲད་ཀྱི་ཡོད་ཅིང་། དེ་དག་གི་ཁྲོད་དུ་ལྷོ་ཀོ་རི་ཡའི་སཱམ་ཟཱ་ (Samsung) དང་འཇར་མན་གྱི་ (Siemens) འཕྲུལ་རིག་བཟོ་ཚོང་ཁང་། ནེ་ཐི་ལན་ཌིའི་ (ASM International) རྒྱལ་སྤྱིའི་འཕྲུལ་རིག་བཟོ་ཚོང་ཁང་སོགས་ཡོད་འདུག
གནད་དོན་དེའི་ཐད་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལིན་ཇེན་ཟེར་བས། ཨ་རིའི་བྱ་སྤྱོད་དེས་རྒྱལ་སྤྱིའི་ཚོང་གི་སྒྲིག་ལམ་ལ་ཁྱད་གསོད་དང་ཚོང་འབྲེལ་གྱི་ལམ་སྲོལ་ལ་གཏོར་སྐྱོན་བཏང་ཡོད། ཅེས་ལན་འདེབས་བྱས་འདུག་པ་མ་ཟད། རྒྱ་ནག་གིས་ཀྱང་རང་གི་འཕྲུལ་རིག་བཟོ་ཚོང་ཁང་དེ་དག་གི་ཐོབ་ཐང་དང་མངོན་འདོད་སྲུང་སྐྱོབ་བྱ་རྒྱུ་ཡིན་པ་སོགས་ནན་བརྗོད་བྱས་འདུག
དབྱེ་ཞིབ་པས། ཨ་རིའི་རྒྱ་ནག་གི་འཕྲུལ་རིག་འཕེལ་རྒྱས་ཀྱི་མདུན་ལམ་བཀག་འགོག་བྱེད་དོན་ནི། ཕྱོགས་གཅིག་ནས་རྒྱ་ནག་གི་འཕྲུལ་རིག་ཕྱིར་ཚོང་གིས་ཨ་རི་གཙོ་བྱས་པའི་མཐུན་ཕྱོགས་རྒྱལ་ཁབ་ཁག་གི་བདེ་འཇགས་ལ་ཉེན་ཁ་བསྐྲུན་གྱི་ཡོད་པ་དང་། ཕྱོགས་གཞན་ཞིག་ནས་རྒྱ་ནག་གིས་རྒྱལ་ཁབ་གཞན་གྱི་སྔོན་ཐོན་འཕྲུལ་རིག་གི་བྱེད་ནུས་ལ་བརྟེན་ནས་རྒྱ་ནག་གི་དམག་ཤུགས་རྒྱ་སྐྱེད་གཏོང་ཐབས་བྱེད་བཞིན་པ་སོགས་བཀག་སྡོམ་བྱེད་ཆེད་ཡིན་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
